ཁ་སང་རྨ་ཆུའི་རྡུང་ལེན་པ་སྐལ་བཟང་ཡར་འཕེལ་ལགས་ཀྱི་གླུ་གཞས་ནང་ཆབ་སྲིད་ཀྱི་གནད་དོན་ཡོད་པའི་ཉེས་མིང་འོག་ལོ་ ༤ ཡི་བཙོན་འཇུག་ཁྲིམས་ཐག་བཅད་ཡོད་འདུག
ཕྱི་ལོ་ ༢༠༡༣ ལོའི་ཕྱི་ཟླ་ ༦ ཚེས་༡༤ ཙམ་ལ་རྒྱ་གཞུང་ཉེན་རྟོག་པས་རྨ་ཆུའི་རྡུང་ལེན་པ་སྐལ་བཟང་ཡར་འཕེལ་ལགས་ལྷ་ས་ནས་འཇུ་བཟུང་བྱས་ཏེ། ཁྲིན་ཏུའུ་གྲོང་ཁྱེར་གྱི་ལྟ་སྲུང་ཁང་ཞིག་ཏུ་ཟླ་བ་ ༡༦ ལྷག་ཙམ་རིང་བཀག་ཉར་བྱས་རྗེས། ཕྱི་ལོ་ ༢༠༡༣ ལོར་ཁོང་གིས་གཙོ་སྒྲུབ་གནང་བའི་༼ཁ་བའི་མེ་ཏོག་རིག་རྩལ་སྤྲོ་ཚོགས་ཆེན་མོ༽དང་། ཁོང་གི་གླུ་གཞས་༼བོད་པ་ཚོ༽དང་༼བླ་མ་ལགས༽ཞེས་པ་སོགས་ཀྱི་ནང་ཆབ་སྲིད་ཀྱི་གནད་དོན་ཡོད་པའི་ནག་ཉེས་མིང་འོག ཁ་སང་ཕྱི་ཚེས་ ༢༧ ཉིན་ཁྲིན་ཏུའུ་གྲོང་ཁྱེར་གྱི་ཁྲིམས་ཁང་ཞིག་ནས་ཁོང་ལ་ལོ་ ༤ ཡི་བཙོན་འཇུག་ཁྲིམས་ཐག་བཅད་ཡོད་འདུག
བོད་ནང་གི་འབྲེལ་ཡོད་ཅིག་གིས་ཕྱི་ཕྱོགས་སུ་གནས་ཚུལ་བཏང་བ་ལྟར་ན། ཁོང་དང་མཉམ་དུ་གླུ་གཞས་སྒྲིག་སྦྱོར་བ་པདྨ་རིག་འཛིན་ལགས་དང་མི་གཞན་གཉིས་ཀྱང་ཡོད་པ་དང་། པདྨ་རིག་འཛིན་ལགས་ལ་ལོ་ ༢ བཙོན་འཇུག་ཁྲིམས་ཐག་བཅད་ཡོད་ཀྱང་། ད་ལྟའི་ཆར་མི་གཞན་དེ་གཉིས་སུ་ཡིན་དང་ཁྲིམས་ཐག་ག་ཚོད་བཅད་ཡོད་མེད་ཤེས་རྟོགས་ཐུབ་ཀྱི་མི་འདུག
སྐལ་བཟང་ཡར་འཕེལ་ལགས་ཀྱིས་བླངས་བའི་༼བོད་པ་ཚོ༽ ཞེས་པའི་གླུ་གཞས་ནང་། བོད་པ་ཚོ། ང་ཚོའི་བོད་ཡིག་སྦྱོང་། བོད་སྐད་བཤད། བོད་ཀྱི་སྐད་དང་ཡི་གེ་སྦྱོང་བའི་འོས་འགན་ང་ཚོར་ཡོད། བོད་པ་ཚོ། ང་ཚོས་མཐུན་སྒྲིལ་བྱེད། མཐུན་སྒྲིལ་བྱེད། སྟོད་སྨད་བར་གསུམ་མཐུན་སྒྲིལ་བྱས་ཏེ་རྡོག་རྩ་གཅིག་སྒྲིལ། བོད་པ་ཚོ། ང་ཚོས་སྙིང་སྟོབས་སྐྱེད། སྐྱིད་སྡུག་འདྲེས་མའི་ལོ་ཟླ་བསམ་ཏེ་ང་ཚོས་སྙིང་སྟོབས་སྐྱེད། བོད་པ་ཚོ། ང་ཚོས་བདེ་སྡུག་གླེང་། མ་འོངས་བོད་མིའི་མདུན་ལམ་བསམ་དེ་ང་ཚོས་ཕུགས་བསམ་འཚོལ། བོད་པ་ཚོ། ང་ཚོས་ལ་རྒྱ་འཛིན། ལ་རྒྱའི་ཕྲག་གདང་གཤིབ་སྟེ། ང་ཚོ་མདུན་དུ་བསྐྱོད། བོད་པ་ཚོ། ང་ཚོས་འབད་བརྩོན་བྱེད། དུས་རབས་གསར་བའི་བོད་པའི་རྒྱུད་འཛིན་ང་ཚོ་ཡིན། བོད་པ་ཚོ། ཞེས་བརྗོད་འདུག
སྐལ་བཟང་ཡར་འཕེལ་ལགས་ནི་རྨ་ཆུ་རྫོང་རྨ་ཁུག་རྟ་རར་སྐྱེས་ཤིང་། ཕ་མིང་ལ་མགོན་པོ་ཚེ་བརྟན་དང་མ་མིང་ལ་མ་ཁོ་ཟེར་གྱི་ཡོད་འདུག ཁོང་གི་བཟའ་ཟླའི་མིང་ལ་ཚེ་འཛིན་དཔལ་མོ་ཟེར་ཞིང་། ད་ལྟ་རང་ལོ་ ༣༩ ཡིན་པ་དང་། ཁོང་གཉིས་ལ་བུ་གཉིས་དང་བུ་མོ་གཅིག་ཡོད་པ་ལས། བུ་ཆེ་བ་ཨོ་རྒྱན་སྐྱབས་ལོ་ ༢༢ དང་། བུ་ཆུང་བ་དཀོན་མཆོག་བསྟན་པ་རང་ལོ་ ༢༠ ། བུ་མོ་སྒྲོལ་དཀར་ལྷ་མོ་ལོ་ ༡༩ བཅས་ཡིན་འདུག
གསར་འགོད་པ། པདྨ་མཚོ།
