ཆོས་དཔེ་མཆོད་གཤོམ་ནང་མ་འཇོག་པར་སློབ་དེབ་རང་བྱས་ཏེ་ལྟ་རོགས།

༧གོང་ས་མཆོག་གིས་སོག་པོའི་ཆོས་ཞུ་བ་གཙོ་བོར་གྱུར་བའི་ཕྱི་རྒྱལ་དང་བོད་པ་ཚོར་ལམ་རིམ་ཆེན་མོའི་གསུང་ཆོས་གནང་སྐབས། ཁྱེད་རང་ཚོ་དོལ་རྒྱལ་མཚམས་འཇོག་བྱ་རྒྱུར་ཞེད་སྣང་སྐྱེ་ན། སེམས་ནང་དོལ་རྒྱལ་མཚམས་འཇོག་བྱས་པ་དེ་སྒེར་སོ་སོ་དོལ་རྒྱལ་ལ་མ་དགའ་བ་མིན་པར། ཏཱ་ལའི་བླ་མའི་ཐོག་མ་དོལ་རྒྱལ་བསྟེན་ཏེ་ཕྱིས་སུ་སྐྱོན་མཐོང་ནས་མཚམས་འཇོག་བྱས་པ་ལྟར་ང་ཚོར་ལམ་སྟོན་གནང་བའི་རྗེས་སུ་འབྲང་གི་ཡོད་སྟབས། དོལ་རྒྱལ་ཁྲོ་ན་ཏཱ་ལའི་བླ་མའི་སྟེང་ཁྲོ་རོགས། གནོད་པ་གཏོང་རྒྱུ་ཡོད་ན་ཏཱ་ལའི་བླ་མར་གནོད་པ་གཏོང་ཤོག་ཅེས་གསུངས་སོང་།

དེ་རིང་ཕྱི་ཚེས་ ༢ ཉིན་གྱི་སྔ་དྲོའི་ཆུ་ཚོད་ ༨ །༠༠ སྟེང་ནས་བཟུང་ཉིན་བཞི་རིང་དྷ་ས་ཐེག་ཆེན་གཙུག་ལག་ཁང་དུ། ༧གོང་ས་མཆོག་གིས་སོག་པོ་ཆོས་ཞུ་པ་ ༧༠༠ ཙམ་གཙོས་འཛམ་གླིང་གི་རྒྱལ་ཁབ་ ༤༨ ཀྱི་མི་ ༤༠༠ ལྷག་དང་དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་ ༡༦༠༠ ཙམ་ལ་རྗེ་ཙོང་ཁ་པ་ཆེན་པོས་མཛད་པའི་བྱང་ཆུབ་ལམ་རིམ་ཆེན་མོའི་གསུང་ཆོས་དབུ་འཛུགས་གནང་སོང་།

ཐེངས་འདིའི་ལམ་རིམ་ཆེན་མོའི་གསུང་ཆོས་ཀྱི་སྔོན་དུ་༧གོང་ས་མཆོག་གིས་སོག་པོ་ཆོས་ཞུ་པ་རྣམས་ལ་གསུངས་དོན། དེ་རིང་ཆེན་པོ་ཧོར་གྱི་དད་ལྡན་ཆོས་ལ་དོན་གཉེར་ཅན་ཁྱེད་ཚོས་དཀའ་ལས་དང་འགྲོ་སོང་མང་པོ་བཏང་སྟེ་ཆེད་མངགས་འདིར་ཆོས་ཞུ་རུ་ཡོང་བར་འཚམས་འདྲི་ཡོད། ཐེངས་འདིར་ཁྱེད་རང་ཚོར་ལམ་རིམ་ཆེན་པོ་སོག་སྐད་ནང་བསྒྱུར་ནས་པར་བརྒྱབ་པ་ཡག་པོ་བྱུང་ཡོད། ལམ་རིམ་ཆེན་མོ་སོག་སྐད་ལ་སྒྱུར་མཁན་དང་པར་སྐྲུན་ཁང་། ལས་ཀ་བྱེད་མཁན་ཚང་མར་ཐུགས་རྗེ་ཞུ་རྒྱུ་ཡིན། ཨེ་ཤ་ཡའི་མངའ་ཁུལ་དུ་རྒྱ་གར་དང་ཧོར། བོད་གསུམ་བྱས་ཏེ་ལོ་རྒྱུས་ཡུན་རིང་ཡོད་དང་། ལྷག་པར་དུ་བོད་སོག་གཉིས་བར་ཐུན་མོང་མ་ཡིན་པའི་འབྲེལ་བ་ཞིག་ཡོད། ང་ཚོ་བོད་དང་སོག་པོ་གཉིས་བར་ནང་ཆོས་ཙམ་མ་ཡིན་པར་སྦྱིར་བཏང་གོམས་གཤིས་དང་རིག་གཞུང་ལའང་ཕལ་ཆེར་འབྲེལ་བ་ཡོད་ས་རེད། རྒྱལ་དབང་སྐུ་ཕྲེང་གོང་མ་ཚོའི་ཐོག་ནས་མར་བཤད་ན། ཐམས་ཅད་མཁྱེན་པ་བསོད་ནམས་རྒྱ་མཚོ་སོག་ཡུལ་དུ་ཕེབས་ནས་རིམ་བཞིན་ཐུན་མོང་གི་འབྲེལ་བ་ཆགས་ཏེ། ཁྱེད་རང་ཚོའི་ཏཱ་ལའི་པཀྵི་ཟེར་བའི་ཏཱ་ལའི་ཟེར་བ་དེ་བྱུང་ཡོད་སྟབས། ངས་ས་ཡིག་རྒྱག་རོགས་ཟེར་དུས་ངས་ཏཱ་ལའི་བླ་མ་ཞེས་ས་ཡིག་རྒྱག་གི་ཡོད། དེའི་དོན་དག་ག་རེ་རེད་ཟེར་ན་ངས་ཏཱ་ལའི་ཟེར་བ་སོག་སྐད་རེད་ཟེར་རྒྱུ་དེ་རེད། རྒྱལ་བ་བསོད་ནམས་རྒྱ་མཚོའི་མཚན་ཟུར་དུ་རྒྱ་མཚོ་ཡོད་དུས་ཕལ་ཆེར་རྒྱ་མཚོ་བླ་མ་ཞེས་པ་ཐོག་པ་ཡིན་ས་རེད།

ཁྱེད་ཚོ་ཆེན་པོ་ཧོར་ཡུལ་ཚང་མར་ནང་ཆོས་ཧ་ཅང་དར་བསྡད་པ་དག་བོད་ནས་མར་བརྒྱུད་པ་ཡིན་སྟབས། སྨོན་ལམ་རྒྱག་པ་དང་འདོན་པ་འདོན་པ་རིགས་བོད་སྐད་ནང་བྱེད་ཀྱི་ཡོད་པ་མ་ཟད། སློབ་གཉེར་ཡང་བོད་སྐད་ནང་བྱས་ཏེ་སྔ་མོ་སློབ་སྦྱོང་ཧ་ཅང་ཡག་པོའི་དུས་ཚོད་དེ་འདྲ་བྱུང་ཡོད་སྟབས། སོག་པོའི་མཁས་པ་དེ་འདྲས་བརྩམས་པའི་ཕར་ཕྱིན་དང་དབུ་མའི་གཞུང་མང་པོ་ཡོད། ངས་མང་པོ་མཐོང་མྱོང་ལ་སློབ་སྦྱོང་ཡང་བྱས་མྱོང་། བར་སྐབས་བསྟན་པར་གོད་ཆགས་ཀྱི་དཀའ་ངལ་ཆེན་པོ་བྱུང་སྐབས་ཀྱང་སོ་སོས་སངས་རྒྱས་ཀྱི་ཆོས་རྩ་བར་བཟུང་སྟེ་དད་པ་བྱེད་བསྡད་པ་རེད།

༡༩༧༩ ལོར་ང་ཐོག་མར་སོག་ཡུལ་དུ་སླེབ་དུས་སོག་པོ་དམར་པོའི་རྒྱལ་ཁབ་རེད། སྤྱི་ཡོངས་ཀྱི་ཆ་ནས་ཆོས་ལ་དམ་དྲག་ཆེན་པོ་ཡོད་ཀྱང་། བར་སྐབས་རང་དབང་ཐོབ་ཡོང་དུས་ཁྱེད་རང་ཚོས་སོ་སོའི་ཕ་མེས་ནས་ཡོད་པའི་ཆོས་ལ་ཐོས་བསམ་སྒོམ་གསུམ་བྱེད་པར་རང་དབང་ཡོད་པའི་ཐོག་ནས་བྱེད་པའི་གོ་སྐབས་བྱུང་བ་རེད། ཁྱེད་རང་ཚོས་སངས་རྒྱས་ཀྱི་ཆོས་ཟེར་བ་དད་པ་བྱེད་ཡུལ་ཙམ་དུ་མི་ཆོག་པར། ཆོས་དད་པ་བྱེད་སའི་ཡུལ་ག་འདྲ་ཡིན་པར་སློབ་སྦྱོང་བྱས་ཏེ་ཤེས་པར་བྱེད་དགོས། ཆོས་ཤེས་ནས་དད་པ་ཐོབ་དགོས་པ་གལ་ཆེན་པོ་རེད། དེར་བརྟེན། ལམ་རིམ་ཆེན་མོ་འདི་འཇམ་མགོན་བླ་མ་ཙོང་ཁ་པ་ཆེན་པོས་མཛད་པའི་གཞུང་གལ་ཆེན་པོ་ཞིག་རེད། དེ་སོག་སྐད་ནང་བསྒྱུར་ཡོད་པ་སོ་སོའི་ནང་གི་མཆོད་གཤོམ་ནང་སྒྲིག་བཞག་པ་མ་ཡིན་པར་སློབ་དེབ་རང་བྱས་ཏེ་ཡག་པོ་ལྟ་དགོས། ཞེས་གསུངས་སོང་།

༧གོང་ས་མཆོག་གིས་དོལ་རྒྱལ་སྐོར་ལ་གསུངས་དོན། ༧གོང་ས་ལྔ་བ་ཆེན་པོའི་སྐབས་ནས་དོལ་རྒྱལ་སྐོར་གྱི་གནས་ཚུལ་དེ་བྱུང་བ་རེད། དོལ་རྒྱལ་སྐོར་ལ་རྒྱུས་མངའ་ཆེ་བ་ཡོད་པ་༧གོང་ས་ལྔ་བ་ཆེན་པོ་ཆགས་ཡོད་སྟབས། ༧གོང་ས་ལྔ་བ་ཆེན་པོས་དོལ་རྒྱལ་ག་འདྲ་ཞིག་ལ་ངོས་འཛིན་གནང་བ་རེད་ཟེར་ན། པཎ་ཆེན་བསོད་ནམས་གྲགས་པའི་ཡང་སྲིད་སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ཡང་སྲིད་རྫུན་མ་ལམ་དུ་ལྷོངས་པ། ཞེས་སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ཡང་སྲིད་མིན་གསུངས་ཡོད། ལོ་རྒྱུའི་ནང་སྤྲུལ་སྐུ་གྲགས་པ་རྒྱལ་མཚན་གྱི་མ་ཡུམ་དེ་ལག་ཨ་རྒྱལ་ཟེར་བ་ཞིག་ཡོད་པ་རེད། ལག་འཇོན་པོ་དང་གྲུང་པོ་ཡོད། ཨ་རྒྱལ་གྱི་འཕྲུལ་ལ་བརྟེན་ནས་པཎ་ཆེན་བློ་བཟང་ཆོས་རྒྱན་ལ་འབྲེལ་བ་ཐབས་མཁས་བྱས་ཏེ། མཐའ་མར་སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ཡང་སྲིད་ལ་ངོས་འཛིན་བྱུང་བ་རེད། རྒྱལ་དབང་ལྔ་བས་དེར་ངོས་འཛིན་གནང་མེད། སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ཡང་སྲིད་རྫུན་མ་ལམ་དུ་ལྷོངས་པ། སྨོན་ལམ་ལོག་པས་དམ་སྲིར་གྱུར་ཏེ་བསྟན་པ་དང་འགྲོ་བར་འཚེ་བ་བྱེད་པ་ཞེས་གསུངས་ཡོད་འདུག དེའི་དོན་དག་དེ་རྒྱུ་ཡི་ཁྱད་པར་སྨོན་ལམ་ལོག་པ་དང་ངོ་བོའི་ཁྱད་པར་དམ་སྲི་འབྱུང་པོ། བྱེད་ལས་ཀྱི་ཁྱད་པར་བསྟན་པ་དང་འགྲོ་བར་འཚེ་བ་བྱེད་མཁན་ཞེས་འདི་འདྲ་གསུངས་འདུག་གཱ  སྔ་མོ་ངས་དོལ་རྒྱལ་གྱི་རྙོག་དྲ་ཕྲན་བུ་གོ་བ་མ་གཏོགས་ཞེ་དྲག་ཤེས་ཀྱི་མེད་པས་ངས་དོལ་རྒྱལ་བསྟེན་པ་རེད། ཕྱིས་སུ་ང་ལ་དགེ་སློང་གི་སྡོམ་པ་གནང་མཁན་མཁན་ཆེན་རྡོ་རྗེ་འཆང་ཡོངས་འཛིན་གླིང་རིན་པོ་ཆེས་དོལ་རྒྱལ་ལ་མ་ཉེས་པ་ཤུགས་ཆེན་པོ་འདུག

སྐྱབས་རྗེ་ཁྲི་བྱང་རིན་པོ་ཆེས་དོལ་རྒྱལ་ཤུགས་ཆེན་པོ་བསྟེན་པར་བརྟེན་ཏེ་ངས་ཀྱང་བསྟེན་པ་ཡིན། གླིང་རིན་པོ་ཆེས་སྐྱབས་རྗེ་ཁྲི་བྱང་རིན་པོ་ཆེས་དོལ་རྒྱལ་ཤུགས་ཆེན་བསྟེན་གྱི་ཡོད་སྟབས། མངོན་གསལ་དད་པོས་དགག་པ་སྐྱོན་མ་ཐུབ་པ་རེད་མ་གཏོགས། གཞན་རིན་པོ་ཆེས་ནང་གི་བློ་འཁེལ་མཁན་ཚོར་དོལ་རྒྱལ་བསྟེན་རྒྱུ་ཡོད་པ་མ་རེད་གསུང་གི་ཡོད་འདུག རྗེས་སུ་ང་རང་ཐེ་ཚོམ་ཞིག་བྱུང་སྟེ་བརྟག་དཔྱད་ཞེ་དྲག་བྱས་ཏེ་མཐའ་མར་དོལ་རྒྱལ་བསྟེན་ན་ཕན་ཐོགས་མེད་པའི་གནས་ཚུལ་ཞིག་ཡོང་དུས་གཞི་ནས་ལོ་བཞི་བརྒྱའི་ལོ་རྒྱུས་ལ་ཞིབ་འཇུག་བྱས་པ་བརྒྱུད་ནས་༧གོང་ས་ལྔ་པའི་གསུང་དེ་རྙེད་པ་རེད། དེ་འདྲ་ཡིན་དུས་ངས་དོལ་རྒྱལ་བསྟེན་པ་མཚམས་འཇོག་བྱས་རྗེས་གླིང་རིན་པོ་ཆེས་ཡག་པོ་ཞེ་དྲག་བྱུང་སོང་གསུང་གི་འདུག གླིང་རིན་པོ་ཆེ་ངའི་བསྙེན་རྫོགས་སྒྲུབ་ས་ཡིན་ལ་དབང་མང་པོ་ཞུ་ས་རེད། ངའི་དཔེ་ཁྲིད་གཙོ་བོ་གནང་མཁན་ཡང་གླིང་རིན་པོ་ཆེ་རེད། ཁོང་ངའི་རྩ་བའི་བླ་མ་ཆགས་ཡོད་དུས་རིན་པོ་ཆེ་ཐུགས་རྒྱས་པོ་ཞེ་བོ་བྱུང་སོང་། སྐྱབས་རྗེ་ཁྲི་བྱང་རིན་པོ་ཆེར་ངས་འདི་ཞུས་པ་ཡིན། ངས་བརྟག་དཔྱད་ནན་པོ་བྱས་པ་ཡིན་པར་དོལ་རྒྱལ་མཚམས་འཇོག་བྱོས་འདི་འདྲ་ཡོང་གི་འདུག་ཅེས་ཞུས་པ་ཡིན། ཁོང་གིས་འདི་ལ་ནོར་འཁྲུལ་ཁྱོན་ནས་ཡོད་པ་མ་རེད། བརྟག་དཔྱད་གནང་སྟངས་དེ་ཚོ་ཡང་དག་བྱུང་ཡོད་སྟབས། དགོས་པ་རྒྱུ་མཚན་ཏན་ཏན་ཡོད་པས་འགྲིག་འདུག་གསུངས་སོང་། ཞེས་གསུངས་སོང་།

༧གོང་ས་མཆོག་གིས་མུ་མཐུད་དུ། དེའི་རྗེས་ང་རང་ལ་ཉམས་མྱོང་གང་བྱུང་བ་མི་ལ་འགྲེལ་བཤད་རྒྱག་གི་ཡོད་ལ། འགྲེལ་བཤད་རྒྱག་དགོས་པ་ངའི་ལས་འགན་རེད། འགྲེལ་བཤད་བརྒྱབ་ནས་ཉན་དང་མ་ཉན་མི་སོ་སོས་བསམ་བློ་གཏོང་དགོས་མ་རེད་མ་གཏོགས་ངས་བཀའ་གཏོང་བ་ཡོད་པ་མ་རེད། དེ་འདྲ་ཡིན་དུས་བོད་པའི་སྤྱི་ཚོགས་ནང་ལོགས་སུ་དོལ་རྒྱལ་བསྟེན་མཁན་མང་པོ་མེད་ལ་སྔོན་ནས་ཀྱང་མང་པོ་ཡོད་པ་མ་རེད། ༧རྒྱལ་དབང་ལྔ་བོས་དོལ་རྒྱལ་དམ་དྲག་གནང་བ་དང་ཁྲི་ཆེན་ངག་དབང་མཆོག་ལྡན་ནས་ཀྱང་དམ་དྲག་གནང་། སྐུ་མདུན་སྐུ་གོང་མས་ཀྱང་དམ་དྲག་གནང་། དེ་དང་དེ་འདྲའི་དགེ་ལུགས་པའི་བླ་མ་མང་པོ་ཞིག་གིས་དོལ་རྒྱལ་ལ་ཉེས་པོ་མེད་པར་དམ་དྲག་གནང་གི་ཡོད། ཉུང་ཤས་ཤིག་གིས་དོལ་རྒྱལ་བསྟེན་གྱིན་ཡོད་པ་རེད། སྐུ་མདུན་སྐུ་གོང་མས་དོལ་རྒྱལ་དམ་དྲག་ཤུགས་ཆེན་པོ་གནང་སྟབས། སྐུ་མདུན་སྐུ་གོང་མ་སྐུ་གཤེགས་སྐབས་དོལ་རྒྱལ་གྱིས་རྒྱལ་བ་རིན་པོ་ཆེ་སྐུ་གཤེགས་པར་དགའ་བསུ་ཞུས་པ་རྣམ་ཐར་ལོ་རྒྱུས་ནང་ཡོད། དེ་རིང་ཁ་སང་དོལ་རྒྱལ་ལ་ཆ་བཞག་ན། དོལ་རྒྱལ་དང་དོལ་རྒྱལ་བསྟེན་མཁན་ཚོས་ང་ཤི་ཡ་ལ་སྒུག་བསྡད་ཡོད་པ་དངོས་ཡོད་གནས་ཚུལ་རེད་དཱ། (བཞད་མོ་དང་བཅས་གསུངས།) དེ་ལ་ཁྱད་པར་གང་ཡང་མེད་པར་སྤྱི་ཡོངས་ཀྱི་འགྲོ་སྟངས་དེ་འདྲ་ཞིག་རེད། དེ་འདྲ་ཡིན་དུས་བོད་རིགས་ཙམ་མ་ཡིན་པར་ཕྱི་རྒྱལ་མི་རིགས་བསྟེན་མཁན་དེ་འདྲ་ཡོད་ས་རེད། དེ་ཚོའི་རིགས་ཁག་ཅིག་གིས་དོལ་རྒྱལ་བསྟེན་མཚམས་བཞག་རྗེས། དོལ་རྒྱལ་གྱི་གནོད་པའི་རིགས་གང་ཡང་ཡོང་གི་མི་འདུག་ཟེར་གྱི་འདུག ཁ་ཤས་ཤིག་ལ་རྨི་ལམ་འཚུབ་འཚུབ་དེ་འདྲ་ཡོང་གི་ཡོད་ས་རེད་མ་གཏོགས་གནོད་པ་གང་ཡང་ཡོང་གི་མི་འདུག ཁྱེད་རང་ཚོ་དོལ་རྒྱལ་བསྟེན་མཁན་ཚོས་སོ་སོའི་བསམ་བློའི་ནང་མུ་མཐུད་བསྟེན་རྒྱུ་ཡིན་ཟེར་ན་སོ་སོའི་རང་དབང་རེད། ངས་དོལ་རྒྱལ་ལ་ལོ་མང་པོ་བརྟག་དཔྱད་བྱས་ཏེ་ལོ་བཞི་བརྒྱའི་ལོ་རྒྱུས་ནང་ལོགས་ལ་རྙོག་དྲ་ཡོད་བསྡད་པ་མཚམས་འཇོག་བྱེད་པར་བློར་བབ་པ་ཡིན་ན་མཚམས་འཇོག་བྱོས་དང་ཁྱོན་ནས་ཞེད་སྣང་སྐྱེས་དགོས་ཀྱི་མེད། ཁྱེད་རང་ཚོའི་བསམ་བློ་འདི་འདྲ་ཐོངས། དོལ་རྒྱལ་མཚམས་འཇོག་བྱས་པ་སྒེར་སོ་སོས་དོལ་རྒྱལ་ལ་མ་དགའ་བས་མཚམས་འཇོག་བྱས་པ་མིན། ང་རང་ཚོའི་ཏཱ་ལའི་པཀྵི་འདིས་དང་པོ་བསྟེན་ནས་ཕྱིས་སུ་དེར་སྐྱོན་མཐོང་ནས་མཚམས་འཇོག་བྱས་སྟབས། ཏཱ་ལའི་པཀྵི་ཡིས་ང་ཚོར་ལམ་སྟོན་བྱས་པའི་རྗེས་ལ་ང་འབྲང་གི་ཡོད་ཟེར་ནས་དོལ་རྒྱལ་ཁྲོ་ན་ཏཱ་ལའི་བླ་མར་ཁྲོ་རོགས། དོལ་རྒྱལ་ཁྲོས་ནས་གནོད་པ་གཏོང་རྒྱུ་ཡོད་ན་ཏཱ་ལའི་བླ་མར་གནོད་པ་གཏོང་ཤོག་ཟེར་ན་ཁྱེད་རང་ཚོ་ཞེད་དགོས་མ་རེད། ཅེས་སོགས་གསུངས་སོང་།

གསར་འགོད་པ། ལྷ་སྐྱབས་རྒྱལ།