རང་ཚུགས་མ་ཤོར་བའི་མི་རིགས་ཤིག་འཇིག་རྟེན་འདི་ནས་ཡུན་རིང་འཚོ་སྡོད་དགོས་ན་མི་རིགས་རང་ཉིད་ཀྱི་རིག་གཞུང་སྐད་ཡིག་གི་ཟུངས་ཁྲག་དྲོན་མོ་ཤ་ཐིམ་རུས་ཐིམ་ཞིག་ཅིས་ཀྱང་དགོས་རྒྱུ་ལས། མི་རིགས་དེ་དང་དེའི་གྱོན་གོས་ལུགས་འཛིན་པ་ཙམ་གྱིས་མི་རིགས་གསོན་གནས་ཐུབ་པར་འདོད་པ་ནི་ཡང་དག་པའི་འདོད་པ་ཞིག་གཏན་ནས་མིན། དེས་ན་ང་ཚོ་མི་རིགས་འདིའི་རིག་གཞུང་སྐད་ཡིག་རྒྱུན་འཛིན་བྱེད་པའི་མི་རབས་གསར་བའི་གཞོན་སྐྱེས་ཚོར་ཤེས་ཡོན་གྱི་གོ་རྟོགས་ཟབ་མོ་ཞིག་སྤྲོད་དགོས་པ་ནི། ང་ཚོ་དང་ལས་རིགས་གཅིག་པའི་ཚོགས་སྡེ་ཁག་གིས་མགྱོགས་ནས་མྱུར་དུ་སྒྲུབ་དགོས་པའི་ཁ་ཚ་དགོས་གཏུགས་ཀྱི་ལས་འཁུར་ཞིག་ཡིན་པར་ངོས་འཛིན་ཐོག འདི་ག་དཔེ་མཛོད་ཁང་ནས་འདས་པའི་མི་ལོ་གཉིས་རིང་བོད་ཕྲུག་ཁྱིམ་སྡེའི་དགུན་ཁའི་གུང་གསེང་དང་བསྟུན། སྔ་ཕྱི་བསྡོམས་སློབ་ཕྲུག་བརྒྱ་སྐོར་ཞིག་ལ་སུམ་རྟགས་དག་གསུམ་དང་། ནང་ཆོས་ངོ་སྤྲོད་ཀྱི་ཟབ་སྦྱོང་འཛིན་གྲྭ་ཞིག་ཚོགས་ཟིན་པ་ལྟར། འཆར་ལོ་སྟེ། ༢༠༡༥ ཕྱི་ཟླ་ ༡ ཚེས་ ༡༠ རེས་གཟའ་སྤེན་པའི་ཉིན་ནས་ཕྱི་ཟླ་ ༢ ཚེས་ ༡༠ རེས་གཟའ་མིག་དམར་བར་ཟབ་སྦྱོང་འཛིན་གྲྭ་ཚུགས་གཏན་འཁེལ་བ་ལགས་ན། འཛུལ་ཞུགས་སློབ་མ་རྣམས་ཀྱིས་ཕྱི་ཟླ་ ༡ ཚེས་ ༨ མ་འགྱང་བར་ཐོ་འགོད་བྱ་དགོས་པའི་གསལ་བསྒྲགས་སུ།
༡། འབྲེལ་གཏུག་ཁ་པར་ཨང་། ༠༩༦༨༦༡༨༥༧༢༩ ༢། ངོ་དེབ་ཁ་བྱང་། Drepung gomang penzoekhang
༣། མྱུར་འཕྲིན་ཁ་བྱང་། gomanglibrary@yahoo.com
ཟུར་ཞུ། འཛིན་གྲྭ་གོང་འོག་གཉིས་སུ་དབྱེ་ཡོད།
༡། འཛིན་གྲྭ་གོང་མར། སྙན་ངག་ལེའུ་གཉིས་པའི་སྤྱི་བཤད་དང་། རྟོགས་བརྗོད། ཆོས་འབྱུང་། སེམས་བྱུང་ང་གཅིག ཕར་ཕྱིན་དྲུག་རྟེན་འབྲེལ་ཡན་ལག་བཅུ་གཉིས་སོགས་ཀྱི་ཟབ་སྦྱོང་སྤྲོད་རྒྱུ།
༢། ཚོགས་དུས། སྔ་དྲོ་ཆུ་ཚོད་ ༩ ནས་ ༡༠།༣༠ བར། ༼འཛིན་གྲྭ་གོང་མ།༽
༡། འཛིན་གྲྭ་འོག་མར། བརྡ་སྤྲོད་དང་ཡིག་བསྐུར་རྣམ་བཞག བསྡུས་གྲྭའི་རིགས་ལམ། སྐྱབས་གསུམ་ངོ་སྤྲོད། དགེ་སྡིག་བླང་དོར་ངོ་སྤྲོད་སོགས་ཀྱི་ཟབ་སྦྱོང་སྤྲོད་རྒྱུ།
༢། ཚོགས་དུས། ཕྱི་དྲོ་ཆུ་ཚོད་ ༣ ནས་ ༤།༣༠ བར། ༼འཛིན་གྲྭ་འོག་མ།༽
དཔལ་ལྡན་འབྲས་སྤུངས་བཀྲ་ཤིས་སྒོ་མང་དཔེ་མཛོད་ཁང་ནས་ ༢༠༡༤།༡༢།༡༡ ལ་བསྒྲགས།
