ཉིན་འདི་གར་ཨུ་རུ་སུའི་སྲིད་འཛིན་རྒྱ་གར་ནང་སྐོར་སྐྱོད་བྱས་ཏེ་རྒྱ་གར་དང་ཨ་སྒོར་ཐེར་འབུམ་ ༡༢༠ ལྷག་གི་ཚོང་དོན་དང་དམག་དོན་གྲོས་མཐུན་བཞག་ཡོད་འདུག
ཁ་སང་ཨུ་རུ་སུའི་སྲིད་འཛིན་པུ་ཊེན་རྒྱ་གར་དུ་ཡོང་སྟེ། དེ་རིང་རྒྱལ་ཁབ་གཉིས་བར་གྱི་མཉམ་འབྲེལ་ལྷན་ཚོགས་ཐེངས་ ༡༥ པའི་སྟེང་ཞུགས་ཡོད་ཅིང་། རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་དང་མཉམ་དུ་ཨུ་རུ་སུས་རྒྱ་གར་ལ་སྦུགས་ལམ་བརྒྱུད་སོལ་རླངས་ཕྱིར་ཚོང་དང་། རྒྱ་གར་དང་ཨུ་རུ་སུས་བྱང་ཨན་ཌར་ཌི་ཀ་རྒྱ་མཚོ་ནས་སོལ་རླངས་དང་རྡོ་སྣུམ་སྔོག་འདོན། ཨུ་རུ་སུའི་ཐད་འཕུར་གནམ་གྲུའི་བཟོ་གྲྭ་དང་རྒྱ་གར་གྱི་གནམ་གྲུ་བཟོ་གྲྭའི་བར་མཉམ་ལས་བྱས་ནས་མ་འོངས་པར་རྒྱ་གར་ལ་ཐད་འཕུར་གནམ་གྲུ་ ༣༨༤ བཙོང་རྒྱུ། རྒྱ་གར་གཞུང་གིས་ཨུ་རུ་སུར་ཟས་རིགས་ཕྱིར་ཚོང་དང་། ཨུ་རུ་སུས་རྒྱ་གར་ལ་རོགས་རམ་བྱས་ཏེ་ཏ་མིལ་ཎཱ་ཌོ་སོགས་ས་ཁུལ་ཁག་ཅིག་ནང་རྡུལ་ཕྲན་གློག་ཤུགས་ས་ཚིགས་ ༢༠ ནས་ ༢༤ བར་རྒྱག་རྒྱུ། ཨུ་རུ་སུས་རྒྱ་གར་ནང་ཨུ་རུ་སུའི་ཚད་མཐོའི་དམག་རྒྱག་གནམ་གྲུ་ (Sukhoi superjet-100) དང་འགྲུལ་སྐྱེལ་གནམ་གྲུ་ (MS-21) རྟགས་ཅན་བཙོང་རྒྱུ། རྒྱ་གར་གཞུང་དང་ཨུ་རུ་སུ་མཉམ་ལས་བྱས་ནས་ཡུ་རའེ་ཤི་ཡའི་མཁའ་ལམ་བཀོལ་སྤྱོད་བྱེད་ཤུགས་ཆེ་རུ་བཏང་སྟེ། ཨེ་ཤ་ཡ་དང་ཡུ་རོབ་བར་གྱི་འབྲེལ་ལམ་གོང་མཐོར་གཏོང་རྒྱུ་དང་། ཨུ་རུ་སུས་རྒྱ་གར་ནང་རྡོ་རྗེ་ཕ་ལམ་ཕྱིར་ཚོང་བྱ་རྒྱུ་བཅས་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༡༢༠ ཡི་དམག་དོན་དང་ཚོང་དོན་གྲོས་མཐུན་ཁག་ ༢༠ ཙམ་བཞག་ཡོད་འདུག
འདིའི་ཐད་རྒྱ་གར་སྲིད་བློན་གྱིས་སྤྱི་ཚོགས་དྲ་གནས་ཌོའུ་ཌར་སྟེང་། “ད་རེབ་ཨུ་རུ་སུའི་སྲིད་འཛིན་པུ་ཊེན་རྒྱ་གར་ནང་རྒྱལ་དོན་སྐོར་སྐྱོད་བྱས་པ་དེས། རྒྱལ་ཁབ་གཉིས་ཀྱི་འབྲེལ་ལམ་ཚད་གཞི་གསར་པ་ཞིག་ཏུ་སླེབ་པ་མཚོན་སྟབས། འབྲེལ་ལམ་འདི་བརྒྱུད་དེ་རྒྱལ་ཁབ་གཉིས་ཀྱི་མཉམ་ལས་སྔར་ཨུ་རུ་སུའི་སྤྱི་མཐུན་རྒྱལ་ཁབ་དུམ་བུ་ ༡༡ མ་ཤོར་གོང་གི་འབྲེལ་ལམ་ལྟར་ཆགས་རྒྱུའི་རེ་བ་འཆང་གི་ཡོད།”ཅེས་བརྗོད་འདུག
ཨུ་རུ་སུའི་སྲིད་འཛིན་པུ་ཊེན་གྱིས། “ང་ཚོས་རྒྱ་གར་དང་ཚོང་དོན་དང་དམག་དོན་འབྲེལ་ལམ་གོང་འཕེལ་བཏང་སྟེ། མ་འོངས་པར་རྒྱལ་ཁབ་གཉིས་བར་མཉམ་ལས་བྱེད་ཤུགས་ཆེ་རུ་བཏང་སྟེ་སྔོན་མ་ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་བཅད་པར་གདོང་ལེན་དང་། ཨུ་རུ་སུ་ཉེས་ཆད་དེ་ལ་ཞེད་ཀྱིན་མེད་པ་ར་སྤྲོད་བྱེད་རྒྱུ་ཡིན།”ཞེས་དང་། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨུ་རུ་སུའི་གཞུང་ཚབ་ཨེ་ལེག་ཛིན་ཌར་ (Alexander Kadakin) གྱིས་ཨུ་རུ་སུའི་སྲིད་འཛིན་པུ་ཊེན་རྒྱ་གར་ལ་སྐོར་སྐྱོད་མ་བྱས་སྔོན་དུ་རོའུ་ཌར་གསར་ཁང་དུ། “བུད་མེད་ཕྱུག་པོ་ཞིག་ལ་མག་པ་ཡག་པོ་ཞིག་དགོས་རྒྱུ་གལ་ཆེན་པོ་ཆགས་ཡོད་ཀྱང་གཉེན་སྒྲིག་བྱས་རྗེས་གཅིག་གིས་གཅིག་ལ་མགོ་སྐོར་གཏང་ན་འབྲེལ་ལམ་ལ་དོ་ཕོག་འགྲོ་རྒྱུ་ཡིན་པ་ལྟར། ད་རེབ་རྒྱལ་ཁབ་གཉིས་པོས་འབྲེལ་ལམ་འདི་བརྒྱུད་ཕན་ཚུན་བསམ་ཤེས་མ་བྱས་ཚེ། མ་འོངས་པར་དཀའ་ངལ་འཕྲད་སྲིད་པ་རེད།”ཅེས་བརྗོད་འདུག
འདི་ལོའི་ཕྱི་ཟླ་ ༧ ཚེས་ ༡༥ ཉིན་ནས་བཟུང་ཉིན་གསུམ་རིང་བྷར་ཛལ་གྲོང་ཁྱེར་ཧྥོར་ཌ་ལེ་ཛ་ནང་དཔལ་འབྱོར་ཡར་རྒྱས་འགྲོ་བཞིན་པའི་རྒྱལ་ཁབ་ལྔའི་དབུ་ཁྲིད་ཚོགས་འདུའི་སྐབས། རྒྱ་གར་སྲིད་བློན་ནཱ་རེན་ཌ་མུ་དྷེ་དང་ཨུ་རུ་སུའི་སྲིད་འཛིན་པུ་ཊེན་རྣམ་གཉིས་ཐུག་སྟེ། རྒྱལ་ཁབ་གཉིས་བར་གྱི་དམག་དོན་དང་ཚོང་དོན། རྡུལ་ཕྲན་གློག་ཤུགས་འཕེལ་རྒྱས་དང་མཁའ་སྐྱོད་ཚན་རྩལ་འཕེལ་རྒྱས་བཅས་ཀྱི་ཐོག་གྲོས་མོལ་བྱས་ཤིང་། ཟླ་ ༤ པའི་ནང་རྒྱལ་ཁབ་གཉིས་བར་རྒྱ་གར་གྱི་ཀཱོ་ཌན་ཀུ་ལམ་ནང་རྡུལ་ཕྲན་གློག་ཤུགས་བརྒྱུད་གཏོང་ས་ཚིགས་ཀྱི་ཚན་ཁག་ ༣ དང་ ༤ འཛུགས་ཕྱོགས་གྲོས་མཐུན་ཐོག་མཉམ་ལས་བྱེད་ཕྱོགས་ལ་གྲོས་མོལ་བྱས་ཡོད།
༢༠༠༨ ལོ་ནས་བཟུང་རྒྱ་གར་དང་ཨུ་སུ་སུའི་བར་ཚོང་དོན་དང་དམག་དོན་མཉམ་ལས་འབྲེལ་བ་ཇེ་ལེགས་སུ་སོང་ཡོད།
༢༠༠༩ ལོར་རྒྱ་གར་དང་ཨུ་རུ་སུ་བར་ཨ་སྒོར་ཐེར་འབུམ་ ༤།༤༦ དང་།
༢༠༡༠ ལོར་ཨ་སྒོར་ཐེར་འབུམ་ ༦།༥༣།
༢༠༡༡ ལོར་ཨ་སྒོར་ཐེར་འབུམ་ ༧།༢༧།
༢༠༡༢ ལོར་ཨ་སྒོར་ཐེར་འབུམ་ ༨།།༤༧།
༢༠༡༣ ལོར་ཨ་སྒོར་ཐེར་འབུམ་ ༡༠།༩༤ བཅས་བྱས་ཡོད།
ཉེ་ལམ་ཨུ་རུ་སུ་དང་རྒྱ་ནག་བར་འབྲེལ་ལམ་ཡག་ཏུ་ཕྱིན་ཏེ། ལོ་རེར་རྒྱལ་ཁབ་གཉིས་བར་ཨ་སྒོར་ཐེར་འབུམ་ ༩༠ ལྷག་གི་ཚོང་འབྲེལ་བྱེད་ཀྱི་ཡོད་པ་མ་ཟད། འདི་ལོའི་ཕྱི་ཟླ་ ༥ པའི་ནང་ཨུ་རུ་སུའི་སྲིད་འཛིན་དང་རྒྱ་ནག་གི་སྲིད་འཛིན་རྣམ་གཉིས་ཐུག་ནས་མ་འོངས་པའི་ལོ་ ༣༠ ནང་ཚུད་དུ་ཡུལ་གྲུ་གཉིས་བར་ཨ་སྒོར་ཐེར་འབུམ་ ༤༠༠ ཡི་རྡོ་སྣུམ་དང་སོལ་རླངས་ཚོང་འབྲེལ་བྱ་རྒྱུའི་གྲོས་མཐུན་བཞག་ཡོད་སྟབས། རྒྱ་གར་གྱི་སྲིད་དོན་དབྱེ་ཞིབ་པ་སྐོར་ཞིག་གིས་ཨུ་རུ་སུར་ཡིད་ཆེས་མེད་ཚུལ་རྗོད་འདུག
ཟླ་འདིའི་ཚེས་ ༥ ཉིན་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་མཱ་རེ་ཧྥབ་ (Marie Harf) ཀྱིས་ཨ་རིའི་ཕྱི་སྲིད་ལྷན་ཁང་གི་དྲ་རྒྱའི་ཐོག་གནས་ཚུལ་སྤེལ་བ་ཞིག་གི་ནང་། ཨུ་རུ་སུའི་སྲིད་འཛིན་པུ་ཊེན་མཆོག་རྒྱ་གར་ནང་སྐོར་སྐྱོད་བྱ་འཆར་ཡོད་པ་དེས། ༢༠༡༥ ལོའི་ཟླ་ ༡ ཚེས་ ༢༦ ཉིན་གྱི་རྒྱ་གར་གྱི་རྩ་ཁྲིམས་གཏན་འབེབས་བྱས་པའི་དུས་སྟོན་ཉིན་མོར། སྲིད་འཛིན་ཨོ་བྷ་མ་དུས་སྟོན་གྱི་སྐུ་མགྲོན་གཙོ་བོར་ཕེབས་རྒྱུའི་ལས་འཆར་ལ་དོ་ཕོག་འགྲོ་མི་སྲིད་ཀྱང་། སྲིད་འཛིན་མུ་ཊེན་རྒྱ་གར་ནང་སྐོར་སྐྱོད་བྱས་རྗེས། རྒྱ་གར་དང་ཨུ་རུ་སུའི་བར་ཚོང་དོན་མཉམ་ལས་གྲོས་མཐུན་ག་རེ་འཇོག་མིན་ལ་གཞིགས་ཏེ། མ་འོངས་པར་ཨུ་རུ་སུ་དང་ཨ་རི་གཉིས་མཉམ་ལས་བྱེད་དགོས་མིན་ཐག་གཅོད་བྱ་རྒྱུ་ཡིན། ཞེས་བརྗོད་འདུག
ཨུ་རུ་སའི་གནད་དོན་ཆེད་མཁས་པ་ཎཱན་ཌན་ (Nandan Unnikrishnan) གྱིས་རྒྱ་གར་དུས་བབ་ཐོག་བརྗོད་དོན། ད་ལྟ་ཨུ་རུ་སུས་རྒྱ་གར་གྱི་ཕྱི་སྲིད་འབྲེལ་ལམ་ལ་དབང་སྒྱུར་བྱེད་ཐབས་མེད་ཀྱང་། ཉེ་ལམ་རྒྱལ་ཁབ་གཉིས་བར་གྱི་འབྲེལ་ལམ་འཕེལ་རྒྱས་ཕྱིན་ཏེ་ཕན་ཚུན་བསམ་ཤེས་བྱེད་བཞིན་ཡོད་སྟབས། རྒྱལ་ཁབ་གཉིས་བར་ཐུན་མོང་དགྲ་བོ་རེ་ཡོད་ཀྱང་མ་འོངས་པར་ཉ་དང་ཉ་ཕྲུག་བཞིན་མཛའ་བརྩེའི་འབྲེལ་ལམ་ཡག་ཏུ་འགྲོ་རྒྱུ་ཡིན། ཞེས་བརྗོད་འདུག
རྒྱ་གར་གྱི་མཐོ་རིམ་དཔོན་རིགས་ཟུར་པ་ཕུན་ཆོག་(Phunchok Stobdan) གིས་རྒྱ་གར་བང་ཆེན་ཐོག་བརྗོད་དོན། ད་རེབ་ཨུ་རུ་སུའི་སྲིད་འཛིན་ཡུག་རེན་གནད་དོན་རྐྱེན་པས་ཨ་རི་དང་ཡུ་རོབ་མཐུན་ཚོགས་ཀྱིས་གནོན་ཤུགས་དང་དཔལ་འབྱོར་ཉེས་ཆད་གཏོང་གི་ཡོད་སྟབས། རྒྱ་གར་ལ་འབྲེལ་བ་འཛུགས་ཀྱི་ཡོད་སྟབས། རྒྱ་གར་གཞུང་གིས་གོ་སྐབས་དམ་འཛིན་བྱས་ཏེ་ཨུ་རུ་སུ་དང་ཚོང་དོན་དང་དམག་དོན་གྱི་མཉམ་ལས་གྲོས་མཐུན་གང་མང་འཇོག་ཐུབ་དགོས། ཞེས་བརྗོད་འདུག
