ཕྱི་ལོ་ ༡༩༨༩ ཟླ་ ༡༢ ཚེས་ ༡༠ ཉིན་༧གོང་ས་མཆོག་ལ་ནོར་ཝེ་རྒྱལ་ས་ཨོ་སི་ལོ་རུ་འཛམ་གླིང་ནོ་བྷེལ་ཞི་བདེ་གཟེངས་རྟགས་འབུལ་བཞེས་གནང་རྗེས། ཟླ་དེའི་ཕྱི་ཚེས་ ༡༩ ཉིན་བཞུགས་སྒར་དུ་བོད་གཞུང་དམངས་ཡོངས་ཀྱིས་དགའ་སྟོན་གྱི་མཛད་སྒོ་ཞིག་ཚོགས་པའི་སྟེང་། སྐུ་མགྲོན་གཙོ་བོར་སྐབས་དེའི་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་བྷིར་བྷ་དྷར་སིང་མཆོག་དང་འཕྲོད་བསྟེན་བློན་ཆེན། ཞིང་ལས་བློན་ཆེན་གཞོན་པ། སྤྱི་ཚོགས་ཡར་རྒྱས་བློན་ཆེན་གཞོན་པ། དེ་བཞིན་གྲོས་ཚོགས་འཐུས་མི། འབྲས་ལྗོངས་ཆོས་དོན་ལས་ཁུངས་ཀྱི་སྐུ་ཚབ་ཟུང་འབྲེལ་དྲུང་ཆེ་སྐུ་ཞབས་ཨེན་རྡོ་རྗེ། བོད་མི་སེར་སྐྱ་མི་མང་བཅས་འཛོམས་པའི་སྟེང་༧གོང་ས་མཆོག་གིས་མི་མང་ལ་བཀའ་སློབ་བསྩལ་བ་བསྡུ་སྒྲིག་བྱས།________________
དེ་རིང་འདིར་ཕེབས་པའི་ང་ཚོ་ལོ་ཉེར་དགུ་ལྷག་ཙམ་སྡོད་སའི་མངའ་སྡེའི་བློན་ཆེན་དང་། ཕྱག་རོགས་གཞན་རྣམ་པ། དེ་བཞིན། ས་ཁུལ་ཁག་ནས་འཛོམས་པའི་གངས་ཅན་ལྗོངས་ཀྱི་བོད་མི་སེར་སྐྱ་ཚང་མ་ལ། ང་རང་བོད་གངས་ཅན་ལྗོངས་ཀྱི་ཤཱཀྱའི་དགེ་སློང་སྟོན་པ་བཅོམ་ལྡན་འདས་ཀྱི་ཟབ་པ་དང་རྒྱ་ཆེ་བའི་ཆོས་ཀྱི་སྙིང་པོ་སྟོང་ཉིད་སྙིང་རྗེ་ཟུང་དུ་འཇུག་པའི་ལམ་ལ་ཤེས་ནས་དད་པ་ཐོབ་པའི་སྒོ་ནས་གང་ཐུབ་ཉམས་ལེན་བྱེད་མཁན་ཞིག་དང་། སོ་སོའི་ལས་དང་སྨོན་ལམ་གྱིས་འབྲེལ་བའི་ཐོག་ནས་བོད་ཀྱི་བསྟན་སྲིད་སྐྱེ་འགྲོའི་བདེ་སྐྱིད་དང་བཅས་པའི་ཁུར་འཁྲི་པ་ཞིག་གིས་དུས་ཚོས་ཉག་ཕྲ་ཞིང་། དངོས་གནས་གངས་ཅན་ལྗོངས་ཀྱི་མི་རིགས་རིག་གཞུང་དང་བཅས་པ་རྩ་བརླག་ཏུ་འགྲོ་བའི་ཉེན་ཁའི་དུས་ཚོད་འདིར་ད་བར་གང་ཐུབ་བསྒྲུབས་ཡོད།
ང་རང་ཚོ་ཐེག་པ་ཆེན་པོའི་ཆོས་ཉམས་ལེན་བྱེད་མཁན་གྱིས་ཞོགས་པ་མིག་གདངས་པ་དང་སེམས་ཅན་ཐམས་ཅད་ཅེས་བརྗོད་ཀྱིན་ཡོད། དེ་གཞིར་བཟུང་བྱས་ནས་སེམས་ཅན་ཐམས་ཅད་ཅེས་བརྗོད་དགོས་ཀྱང་། སྔོན་ལ་ང་རང་ཚོར་ཁ་ཡོད་ལག་ཡོད་ཀྱི་འབྲེལ་བ་ཡོད་པའི་འཛམ་གླིང་ཧྲིལ་པོ་འདིའི་སྒང་གི་སེམས་ཅན་སྤྱི་དང་། ཡང་སྒོས་འགྲོ་བ་མིའི་རིགས་ལ་གང་ཐུབ་ཀྱི་ཕན་པ་བསྒྲུབ་ཐུབ་པ་ཞིག་མ་བྱུང་ན། དངོས་གནས་ཆོས་ནས་བཤད་པའི་སྨོན་ལམ་རྒྱག་རྒྱུ་དང་འདུན་པ་སྤྱང་རྒྱུ་འདི་ངོ་ཐོག་ལག་ལེན་འགེལ་བའི་གོ་སྐབས་མེད་ན་ནི་དེ་ག་རང་རེད། སྨོན་ལམ་རྒྱག་རྒྱུ་མ་གཏོགས་བྱེད་རྒྱུ་གང་ཡང་མེད། གོ་སྐབས་ཡོད་ན་ཁ་ནི་སྨོན་ལམ་བརྒྱབ་པ་ལས། ལག་ལེན་འགེལ་རྒྱུ་འདི་དངོས་གནས་ཆོས་ཉམས་ལེན་བྱེད་རྒྱུའི་དགོས་དོན་སྙིང་པོ་ཡིན་སྟབས། གང་ཐུབ་ཅི་ཐུབ་ཀྱིས་མི་ལ་ཁ་ཕན་ཚིག་ཕན་གྱི་ཕན་ཐོགས་བསྒྲུབ་དགོས་པ་རེད། དེ་འདྲ་བྱེད་མཁན་ཞིག་ལ་དེ་རིང་འདིར་ཞི་བདེའི་བྱ་དགའ་ཐོབ་པ་རེད། ང་སྒེར་གྱི་ངོས་ལ་དམིགས་བསལ་ཁྱད་དུ་འཕགས་པའི་ཁྱད་ཆོས་གང་ཡང་ཡོད་པ་མ་རེད། རྒྱ་གར་འཕགས་པའི་ཡུལ་གྱི་སྟོན་པ་འཀའ་དྲིན་ཅན་དང་། དེ་བཞིན་སྟོན་པའི་རྗེས་འབྲང་མཁས་གྲུབ་སྐྱེས་མཆོག་མང་པོ་ཞིག་གི་བསླབ་བྱ་བཟང་པོ་ཡོད་པ་དེ་ལ་སོ་སོས་གནད་འགག་དང་རྒྱུ་མཚན་ཞིག་འདུག་བསམས་ཏེ་ཡིད་ཆེས་དང་མོས་པ་ཐོབ་པའི་ཐོག་ནས་ཉམས་ལེན་བྱེད་ཀྱི་ཡོད།
རྒྱ་གར་འཕགས་པའི་ཡུལ་ལ་གནའ་སྔ་མོ་ནས་འཚེ་མེད་ཞི་བའི་ལམ་ཞེས་པའི་ལྟ་བ་བཟང་པོ་ཞིག་ཡོད་པ་དེ་དུས་རབས་ཉི་ཤུ་པ་འདིའི་ནང་རང་དབང་རང་བཙན་རྩོད་ལེན་བྱེད་པའི་ཆབ་སྲིད་འཐབ་རྩོད་ནང་ཉམས་སུ་བླངས་ཏེ། ལྟ་བ་དེ་ཆབ་སྲིད་ཐོག་བེད་སྤྱོད་བྱེད་མཁན་རྒྱ་གར་འཕགས་པའི་ཡུལ་གྱི་སྐྱེས་མཆོག་མཧཱཏ་མ་གྷན་དྷི་ཞེས་དེང་དུས་ཀྱི་ཤེས་ཡོན་ཆ་ཚང་ཡོད་པའི་ཐོག་ལ་རྒྱ་གར་ལ་གནའ་སྔ་མོ་ནས་ཡོད་པའི་ལྟ་བ་བཟང་པོ་དང་། སྤྱོད་པ་བཟང་པོ་དེ་ཟུང་དུ་འབྲེལ་བའི་ཐོག་ནས་རྒྱ་གར་གྱི་རང་དབང་བསྒྲུབས་པ་རེད། དེ་ནི་གཟི་བརྗིད་དང་རླབས་ཆེན་ཞིག་དང་། ངོ་མཚར་སྐྱེ་འོས་པ་ཞིག་རེད། ང་རང་ཆུང་ཆུང་སྐབས་ནས་གྷན་དྷིའི་འཚེ་མེ་ཞི་བའི་ལམ་ཞེས་པ་འདིར་མོས་པ་ཡོད། དེ་འདྲའི་ཐོག་ནས་གྷན་དྷིའི་ཕྱག་ལེན་དང་། ཁོང་གི་གནང་སྟངས་ལ་གང་ཐུབ་ཅི་ཐུབ་ཀྱིས་མིག་དཔེ་ལྟ་བཞིན་ཡོད། དེ་འདྲའི་གནས་ཚུལ་དང་ཤུགས་རྐྱེན་འོག་ནས་ཐབས་ཤེས་གང་འདུག་བལྟས་ཏེ་ཕན་སེམས་དང་། གཞན་ཕན་བྱེད་པ་དེ་ཙམ་ཉམས་ལེན་བྱེད་ཀྱི་ཡོད་མ་གཏོགས། དེ་ལས་ལྷག་པའི་ཁྱད་དུ་འཕགས་པ་གང་ཡང་མེད།
སྤྱིར་ང་རང་ཚོ་ལས་དང་སྨོན་ལམ་གྱིས་འབྲེལ་ཡོད་པ་དང་། ཡང་སྒོས་དད་པ་དང་དམ་ཚིག་གི་མདུད་རྒྱ་ནམ་ཡང་གཡོ་བ་མེད་པའི་བོད་གངས་ཅན་ལྗོངས་ཀྱི་བོད་མི་གཞིས་འཁོད་ཚོ་ཡིན་ན་འདྲ་ལ། བྱེས་འཁོད་ཚོ་ཡིན་ནའང་འདྲ། གང་ལྟར་ཚང་མས་ང་ལ་ཡིད་ཆེས་བློས་འགེལ་བྱས་ཏེ་དགའ་པོ་བྱེད་པ་དང་། ང་རང་ཚོར་དཀའ་ངལ་ཡོད་ཀྱང་འཚེ་མེད་ཞི་བའི་ལམ་ལ་འགྲོ་དགོས་ཞེས་འབོད་སྐུལ་བྱས་པ་འདི་ཚང་མས་དང་ལེན་བྱས་ཏེ་གང་ཐུབ་ཀྱིས་འཚེ་མེད་ཞི་བའི་ལམ་གྱི་དྲང་བདེན་འཐབ་རྩོད་འདི་སྲོག་དང་བསྡོས་ནས་ལག་ལེན་བྱེད་ཀྱིན་ཡོད། དེ་འདྲའི་རྐྱེན་འཛོམས་པའི་ཐོག་ནས་དེ་རིང་ཞི་བདེའི་བྱ་དགའ་ཐོབ་པ་རེད་མ་གཏོགས། ང་མི་གཅིག་གཞན་དང་མི་འདྲ་བའི་རྣམ་དཔྱོད་ཡོད་པས་ངོ་མཚར་ཆེ་ཡས་གང་ཡང་མེད།
དེ་ཡང་རྩ་བ་བཟང་དང་ངན་གྱི་ཆོས་གང་ཡིན་ཡང་། རྒྱུ་རྐྱེན་རྟེན་འབྲེལ་ཚོགས་པའི་ཐོག་ནས་ཡོང་དགོས་པ་ཆོས་ཉིད་རེད། ད་རེས་ཀྱི་གནས་ཚུལ་འདི་རྣམས་ཀྱང་ང་རང་ཚོ་སྐྱ་སེར་མཆོག་དམན་མང་པོ་ཙམ་མ་ཡིན་པར། བོད་པའི་གྲོགས་པོ་མང་པོ་ཞིག་གི་ཐོག་ནས་དངོས་གནས་བོད་པའི་གཤིས་ཀ་འདི་འཇམ་པོ་དང་། ཡག་པོ། དངོས་གནས་ངོ་མཚར་སྐྱེ་འོས་པ་ཞིག་འདུག་ཅེས་དེ་འདྲའི་ཐོག་ནས་བོད་པར་བསྔགས་བརྗོད་བྱས། བོད་པར་མཐོང་བྱས་ཏེ་དེ་འདྲའི་གནས་ཚུལ་ཐོག་ནས་ཤུགས་རྐྱེན་ཏན་ཏན་ཐེབས་ཡོད། གང་ལྟར་རྐྱེན་མང་པོ་ཞིག་ཚོགས་པའི་སྟེང་ནས་ད་རེས་འཛམ་གླིང་ཐོག་མི་ཚོས་དོ་སྣང་ཆེན་པོ་བྱེད་པའི་ཞི་བདེའི་གཟེངས་རྟགས་འདི་ཐོབ་པ་རེད། དེའི་ཐོག་ལ་ས་ཁུལ་མང་པོར་ཡོད་པའི་བོད་པ་ཚོ་དང་། དེ་བཞིན་ངའི་ངོ་ཤེས་པའི་གྲོགས་པོ་མང་པོས་ཀྱང་ཧ་ཅང་དགའ་པོ་བྱས་ཏེ་རྟེན་འབྲེལ་བྱས་པ་དང་། ཚང་མས་དགའ་སྤྲོའི་ཉིན་མོ་ཞིག་ལ་ངོས་འཛིན་བྱས་ཏེ་མ་སྐུལ་དང་བླངས་ཐོག་ནས་དགའ་དགའ་སྐྱིད་སྐྱིད་དང་། སྤྲོ་སེམས་འཁོལ་བའི་རྣམ་འགྱུར་བསྟན་པ་རེད། ཁྱེད་རང་ཚོ་ཚང་མས་འདི་འདྲའི་སེམས་ཁུར་བྱས་པ་དང་། དད་པ་དམ་ཚིག་གཡོ་བ་མེད་པ་ཡོད་དུས་ང་རང་ཡང་ཤིན་ཏུ་དགའ་པོ་བྱུང་བས་ཚང་མར་ཐུགས་རྗེ་ཆེ་ཞུ་རྒྱུ་ཡིན།
འཛམ་གླིང་འདི་སྤྱིར་བཏང་སྒྱུ་མའི་གྲོང་ཁྱེར་འདྲ་པོ་ཡིན། སྒྱུ་མའི་གྲོང་ཁྱེར་གྱི་ནང་ལ་བཟང་དང་ངན་གྱི་སྒྱུ་མའི་ལྟད་མོ་ཅི་ཡང་འཆར་གྱི་ཡོད་པ་རེད། དེ་ཐམས་ཅད་རྟེན་འབྲེལ་ཚོགས་པའི་ཐོག་ནས་ཆགས་ཡོད་པ་རེད། རྒྱུ་རྐྱེན་རྟེན་འབྲེལ་ཚོགས་པའི་ཐོག་ནས་བཟང་དང་ངན་གྱི་སྒྱུ་མའི་སྣང་ངོ་ཅི་ཡང་འཆར་ཡོང་བ་ཡིན་དུས། ང་རང་ཚོ་ཚང་མས་འབྲས་བུ་བཟང་པོ་འདོད་ན་རྒྱུ་བཟང་པོ་ལ་བསླབ་དགོས། རྒྱུ་ལ་དོ་སྣང་གང་ཡང་མ་བྱས་པར་འབྲས་བུ་བཟང་པོ་ཞིག་འདོད་ན་ནོ་འཁྲུལ་རེད། རྒྱུ་འབྲས་རྟེན་འབྲེལ་མི་བསླུ་བ་རེད། དེ་འདྲ་ཡིན་དུས་ཇི་ཙམ་འབྲས་བུ་བཟང་པོ་འདོད་པ་ལྟར། དེ་ཙམ་གྱིས་རྒྱུ་བཟང་པོ་ལ་བསླབ་དགོས། རྒྱུ་བཟང་པོ་ཞེས་པ་འདི་ཕྱི་ནས་དངོས་པོ་བསྒྲུབ་རྒྱུ་དེ་རྒྱུ་རྐྱེན་གཅིག་ཡིན་ཡང་། རྒྱུ་རྐྱེན་གཙོ་བོ་དེ་ནང་ནས་བསྒྲུབ་དགོས། དེ་འདྲ་ཡིན་དུས་ངས་རྟག་ཏུ་བཤད་པ་ལྟར་ཕན་སེམས་དང་། བཟང་པོའི་ཡོན་ཏན་ཞེས་པ་འདི་བདེ་སྐྱིད་ཀྱི་རྩ་བ་དང་སྙིང་སྟོབས་ཀྱི་རྩ་བ་ཡིན། མ་འོངས་པར་ཡར་རྒྱས་འགྲོ་བའི་གཞི་མ་བཟང་པོའི་ཡོན་ཏན་ཞེས་པ་འདི་དཀོན་པོ་ཆགས་ཡོད།
ང་རང་ཚོས་འཚེ་མེད་ཞི་བའི་ལམ་ལ་བསླབ་རྒྱུ་འདི་ཡང་གཞི་རྩ་དྲང་བདེན་ཞིག་ཡོད་ན་འཚེ་མེད་ཞི་བའི་ལམ་ལ་འགྲོ་ཐུབ། གཞི་རྩ་དྲང་བདེན་མེད་ན་འཚེ་མེད་ཞི་བའི་ལམ་ལ་འགྲོ་མི་ཐུབ། དྲང་བདེན་ཡོང་བ་ལ་ཡ་རབས་ཀུན་སྤྱོད་ཀྱི་ཐོག་ནས་དྲང་བདེན་བསྒྲུབ་དགོས། དྲང་བདེན་གྱི་རྒྱབ་རྩ་ཡོད་པའི་ཐོག་ལ་ཐབས་ལམ་དེ་ཡང་ཡ་རབས་སྤྱོད་བཟང་གི་ཐོག་ནས་སྒྲུབ་ཀྱི་ཡོད་ན། དངོས་གནས་གཟི་བརྗིད་ཡོད་ལ། དེའི་ནུས་པའང་ཁྱད་དུ་མངོན་ཐུབ་པ་ཡོང་གི་རེད། བདེན་པ་ཡོད་ཀྱང་བྱེད་ཐབས་ཡག་པོ་མ་བྱུང་ན་གནས་ཚུལ་ཐ་དད་རེད། ཚང་མས་འཚེ་མེད་ཞི་བའི་ལམ་ཞེས་བརྗོད་པའི་རྩ་བ་དེ་བཟང་པོའི་སེམས་ཀྱི་ཡོན་ཏན་ལ་ཐུག་གི་ཡོད། བཟང་པོའི་སེམས་ཀྱི་ཡོན་ཏན་ཞིག་ཡོད་ན། བློ་འཚབ་ངང་ཐུང་བྱེད་དགོས་དོན་མེད། དེ་ལ་རྒྱུ་མཚན་ཞིག་དང་། སྙིང་སྟོབས་སྐྱེ་བའི་རྒྱུ་ཞིག་ཡོད་པ་ཡིན་དུས་དེའི་ཐོག་ནས་ཞུམ་པ་མེད་པའི་སྙིང་སྟོབས་ཀྱིས་རྒྱུན་བསྲིངས་ནས་དཀའ་ངལ་ལ་གདོང་ལེན་བྱེད་ཐུབ་པ་ཞིག་ཡོང་གི་རེད། རྩ་བའི་རྩ་བ་ཐུག་ས་སེམས་ཀྱི་བཟང་པོའི་ཡོན་ཏན་འདི་ཡིན། དེར་བརྟེན་ཚང་མས་གང་ཐུབ་ཀྱིས་ཕན་པའི་བསམ་པ་ཞེས་པ་འདི་ནོར་བུ་དགོས་འདོད་ཀུན་འབྱུང་ཞེས་འཇིག་རྟེན་གྱི་དཔེ་ལ་ཡོད་པ་བཞིན་དངོས་གནས་རང་གཞན་འདི་ཕྱི་གནས་སྐབས་མཐར་ཐུག་གང་གི་གནས་སྐབས་ལ་ཡིན་ཡང་ལེགས་ཚོགས་མཐའ་དག་སྟེར་བའི་རྒྱུ་མཐར་ཐུག་པ་དེ་སེམས་བཟང་པོ་བྱ་རྒྱུ་དེ་ཆགས་ཡོད།
ཉེ་ཆར་ཞི་བདེའི་བྱ་དགའ་རག་རྒྱུ་གཏན་འཁེལ་བའི་རྗེས་ལ་ངས་འདི་འདྲ་བཤད་ཀྱིན་ཡོད། ང་ལ་ཞི་བདེའི་བྱ་དགའ་རག་པ་འདི་ང་ནང་པ་སངས་རྒྱས་པའི་དགེ་སློང་ཞིག་ཡར་མཐོ་གང་མཐོ་རུ་འགྲོ་རྒྱུ་དང་། མར་དམའ་རུ་འགྲོ་རྒྱུ་ཞིག་ཡོད་པ་མ་རེད། ང་མི་དེ་ག་རང་ལ་བསྡད་ཡོད། རྒྱུད་ལ་ས་ལམ་གྱི་རྟོགས་པའི་ཡོན་ཏན་ཞིག་སྐྱེས་པ་ཡིན་ན། དངོས་གནས་སོ་སྐྱེའི་ས་ལས་རིང་དུ་འཕགས་པའི་ཁྱད་ཆོས་ཤིག་ཐོབ་ཀྱི་ཡོད་པ་རེད། དེ་འདྲ་མེད་ཕྱིན་ང་མི་ཕལ་པ་རང་ལ་བསྡད་པ་ལས་གཞན་གང་ཡང་མེད། ཡིན་ནའང་དགའ་པོ་བྱེད་པའི་རྒྱུ་མཚན་གང་འདུག་ཅེ་ན། ངས་བྱམས་པ་དང་སྙིང་རྗེ་དང་། འཚེ་བ་མི་བྱེད་པ་ཞེས་པ་འདི་ཅི་ཐུབ་ཐུབ་ཀྱིས་ཉམས་ལེན་བྱས། ཅི་ཐུབ་ཐུབ་ཀྱིས་མི་ལ་བཤད་ཀྱིན་ཡོད་པ་འདི་དེ་རིང་འཛམ་གླིང་སྤྱི་ཐོག་ནས་ངོས་འཛིན་བྱེད་པ་ཞིག་ཆགས་ཡོང་བ་ཡིན་དུས། འདིས་འཛམ་གླིང་འདིའི་སྒང་ལ་བྱམས་དང་སྙིང་རྗེ་དང་། འཚེ་མེད་ཞི་བའི་ལམ་ཞེས་པ་འདི་ལ་མཐོང་ཆེ་རུ་འགྲོ་རྒྱུ་དང་། སེམས་ཅན་མཐའ་དག་གི་རྒྱུད་ལ་སེམས་བཟང་པོའི་ས་བོན་ཞིག་དག་པའི་རྒྱུད་ལ་ཡོད་ཡོད་པ་རེད། དེ་འདྲ་ཡིན་དུས་སེམས་ཅན་ཚང་མའི་རྒྱུད་ལ་རང་ཆས་སུ་ཡོད་པའི་བྱམས་པ་དང་སྙིང་རྗེ་དེ་གོང་ནས་གོང་དུ་འཕེལ་ཐུབ་པ་ཞིག་དང་། དེ་ལ་རིན་ཐང་ཆེ་རུ་འགྲོ་དུས་མིས་དོ་སྣང་གསར་པ་སླེབས་ཏེ། དེའི་ཐོག་ནས་ཕན་ཐོགས་ཏན་ཏན་ཡོང་གི་རེད་བསམ་གྱི་འདུག རྒྱུ་མཚན་དེ་ལ་བརྟེན་ནས་དམིགས་བསལ་དགའ་པོ་ཡོད་ཅེས་བཤད་རྒྱུ་བྱུང་ལ། དྲན་ཡང་དེ་ག་དྲན་བྱུང་། དེ་འདྲ་ཡིན་དུས་སྔོན་ལ་ང་རང་ཚོས་མི་གཞན་དག་ཚོའི་ཐོག་ནས་བྱམས་པ་དང་སྙིང་རྗེ་ཞེས་པ་འདིར་ཡོན་ཏན་དུ་བལྟས་ནས་ཉམས་ལེན་བྱེད་པ་ཞིག་ཡོང་བའི་རེ་བ་རྒྱག་པའི་སྔོན་ལ་བོད་མི་རང་ཉིད་ཀྱི་ཐོག་ནས་ག་ཚོད་ཐུབ་ཐུབ་ཀྱི་བཟང་པོའི་ཡོན་ཏན་ཞེས་པ་འདི་ལ་འཕྲལ་ཕུགས་ཀྱི་དགེ་མཚན་ཆེན་པོ་ཡོད་པ་ཞིག་ངོས་ཟིན་པའི་ཐོག་ནས་ལག་ལེན་འགེལ་རྒྱུ་གལ་ཆེན་པོ་ཡིན། འདི་གཞིར་བཞག་གིས་ཐབས་ཤེས་ཡ་རབས་བཟང་པོའི་སྤྱོད་པ་དང་མ་བྲལ་བའི་ཐོག་ནས་ཐབས་ཤེས་སྤྱོད་ཐུབ་པ་ཞིག་བྱུང་ན། གཟི་བརྗིད་དང་ངོ་མཚར་སྐྱེ་ཐུབ་པ་ཞིག་ཆགས་ཀྱི་རེད། དེར་བརྟེན་ཚང་མས་ཧུར་ཐག་བྱེད་དགོས།
ཤྭཀྱའི་དགེ་སློང་བསྟན་འཛིན་རྒྱ་མཚོ་ལོ་ལྔ་བཅུ་ང་ལྔ་བརྒལ་འགྲོ་བཞིན་ཡོད། ལོ་བརྒྱ་ལྷག་ཙམ་ཞིག་བསྡད་པ་ཡིན་ན་ཡང་ཕལ་ཆེར་མི་ཚེའི་ཕྱེད་ཀ་རྫོགས་ཚར་བའི་བཟོ་རེད། ད་ཕན་མི་ཚེའི་ཕྱེད་ཀ་ལྷག་ཙམ་གྱི་རིང་ལ་ག་ཚོད་ཐུབ་ཐུབ་ཀྱི་གཞན་ཕན་བསྒྲུབས་པ་ཡིན། ང་རང་ལ་དཔག་པས་ཞེ་དྲག་སྒྲུབ་ཐུབ་པ་མེད་ཀྱང་། ཕྲན་བུ་བསྒྲུབས་ཡོད། ད་དུང་ཡང་ང་གསོན་པའི་རིང་ལ་ཕན་བདེ་བསྒྲུབ་རྒྱུ་མ་གཏོགས་མི་ཚེའི་དགོས་པ་དང་། སྲོག་གི་སྙིང་པོ་གཞན་ཞིག་ཡོད་པ་མ་རེད། སྤྱོད་འཇུག་ནས་གསུངས་པ་བཞིན། ཇི་སྲིད་ནམ་མཁའ་གནས་པ་དང་། འགྲོ་བ་ཇི་སྲིད་གནས་གྱུར་པ། དེ་སྲིད་བདག་ནི་གནས་གྱུར་ནས། འགྲོ་བའི་སྡུག་བསྔལ་སེལ་བར་ཤོག ཅེས་པའི་སྨོན་ལམ་རྒྱག་གི་ཡོད་ལ། སྨོན་ལམ་བརྒྱབ་པ་ལྟར་ལག་ལེན་ཐོག་ལ་གང་ཐུབ་བཀལ་གྱི་ཡོད། མ་ཤི་གསོན་པའི་རིང་ལ་ཕྱིན་ཆད་ཀྱང་གང་ཐུབ་སྤྱི་སྒོས་ལས་དང་སྨོན་ལམ་གྱི་འབྲེལ་བ་ཡོད་པའི་སེམས་ཅན་སུ་ལའང་ཕན་ཐོགས་བྱེད་ཀྱི་རེད། ཚང་མ་ད་ལྟ་ལྟར་བློ་བདེ་པོ་གྱིས། ༸རྒྱལ་བ་རིན་པོ་ཆེའི་ཚེ་ལ་ཆ་བཞག་ན་ངས་རྟག་པར་བཤད་པ་བཞིན་གཟུགས་པོའི་གནས་སྟངས་ཀྱི་བབ་དང་། དེ་བཞིན་བསམ་བློའི་གནས་སྟངས་བཅས་ཕྱི་ནང་གང་གི་ཆ་ནས་ཀྱང་ལོ་དགུ་བཅུ་གོ་གྲངས་དང་། གཅིག་བྱས་ན་ལོ་བརྒྱ་ཟིན་མ་ཟིན་ཞིག་སྡོད་རྒྱུའི་རེ་བ་རྒྱག་གི་ཡོད་ལ། བསྡད་ཐུབ་མདོག་ཁ་པོ་རེད། ཚང་མས་བློ་བདེ་པོའི་ངང་ཧུར་ཐག་བྱེད་དགོས། ཧུར་ཐག་རྦད་ཐག་བྱེད་རྒྱུ་ཟེར་བ་འདི་ཚིག་བཟང་པོ་བེད་སྤྱོད་རྒྱུ་ཞིག་དང་། ངོ་གདོང་ལ་སྤྲེལ་ལད་འཁྲབ་ནས་ཚིག་འདྲ་ཆགས་པོ་བཤད་དེ་ལ་དག་རྒྱུ་ཡོད་པ་མ་རེད། མི་སུ་ཡིན་ཡང་གནས་ཚུལ་གང་འདྲ་གང་འདྲ་ཡོད་མེད་རྣ་བ་གཉིས་ཡོད་སྟབས་གོ་ཡང་གོ་གི་རེད་ལ། མིག་གཉིས་ཡོད་སྟབས་མཐོང་ཡང་མཐོང་གི་རེད། དེ་འདྲ་ཡིན་དུས་མདུན་ལ་ངོ་དགའ་སྤྲེལ་ལད་ཀྱི་སྐད་ཆ་བཤད་ནས་ལ་དག་རྒྱུ་ཞིག་ཡོད་པ་མ་རེད། ངས་རྟག་པར་མངོན་ལྐོག་མཚུངས་པ་བྱེད་དགོས་བཤད་པ་འདི་གལ་ཆེན་པོ་རེད། དེ་ཚང་མའི་སེམས་ལ་ཡག་པོ་བཅངས། ད་ལྟར་ཕན་ཆད་ཚང་མས་འགངས་ཆེ་སའི་ཐོག་ལ་ཧུར་ཐག་བྱས་པ་རེད། ད་དུང་ཡང་ཚང་མས་ཧུར་ཐག་བྱེད་རོགས་ཟེར་རྒྱུ་ཡིན།
ད་རེས་ཞི་བདེའི་བྱ་དགའི་དངུལ་གང་ལ་གང་འཚམས་ཤིག་ཡོང་གི་འདུག དེ་དག་ཁ་སང་གནས་ཚུལ་ཐོག་མ་ཐོས་པ་དང་། ངས་བྱམས་བརྩེ་ཞེས་པ་འདི་ལ་སྣང་ཆེན་པོ་བརྩིས་ཏེ་དེ་འདྲའི་ཐོག་ནས་དོ་སྣང་བྱས་པར་དེ་རིང་མིས་དོ་སྣང་སླེབས་པ་ཞིག་ཆགས་ནས་ད་རེས་བྱ་དགའ་རག་པ་ཡིན་དུས། དངུལ་འདི་ཡང་དེ་འདྲའི་ཐོག་ཕན་པ་ཞིག་བྱུང་ན་ཡག་པོ་རེད་སྙམ་བྱུང་། དེང་སང་འཛམ་གླིང་ཐོག་ང་ཚོ་བོད་པར་ཆ་བཞག་ན་བཙན་བྱོལ་བ་ཆགས་ཏེ་དཀའ་ངལ་ཆེན་པོ་ཡོད། ཡིན་ནའང་ལྟོས་ས་ལྟོས་འཇོག་གིས་འཛམ་གླིང་ཐོག་ང་ཚོ་ལས་སྐྱོ་བའི་མི། དཔེར་ན། ཨ་ཧྥི་རི་ཀའི་ནང་མི་ལྟོགས་ཤི་ཐེབས་ཀྱི་ཡོད་པ་ཕོན་ཆེན་པོ་ཡོང་གི་འདུག ཁོང་ཚོ་མི་གཅིག་པ་ཡིན་པ་དང་། བདེ་བ་འདོད་ཅིང་འཆི་འདོད་མེད་པ་གཅིག་པ་རེད། ཁོང་ཚོར་ལྟོགས་ཤིའི་དཀའ་ངལ་ཆེན་པོ་ཡོད་སྟབས་དེ་ལ་ང་རང་གི་སེམས་ཁྱད་ཀྱི་སྐྱོབ་གསོའི་ཞལ་འདེབས་ཕྲན་བུ་རྒྱག་ཐུབ་ན་བསམ་པ་ལྟར་ཞལ་འདེབས་འབུལ་རྒྱུ་དང་། དེ་ནས་རྒྱ་གར་འཕགས་པའི་ཡུལ་ང་ཚོར་བཀའ་དྲིན་ཤིན་ཏུ་ཆེན་པོ་རེད། རྒྱ་གར་ནང་མཛེ་ནད་ཀྱིས་མནར་བའི་ནད་པ་ཕོན་ཆེན་པོ་འདུག སྔོན་མ་ངོས་ཨོ་རི་སར་སྐྱོད་སྐབས་དེ་གར་ངོ་ཤེས་པ་མི་ཡག་པོ་ཞིག་ཡོད་པ་ཁོང་གིས་མགོ་ཁྲིད་པའི་མཛེ་ནད་ལ་ལྟ་རྟོག་བྱེད་མཁན་ཚོགས་པ་ཞིག་འདུག དེ་ལ་སྔོན་མ་ཡང་སྒོར་མོ་ཁྲི་ཁ་ཤས་ཞལ་འདེབས་ཕུལ་བ་ཡིན། ད་རེས་ཀྱང་དངུལ་གང་འཚམས་ཤིག་མཛེ་ནད་ལ་ལྟ་རྟོག་བྱེད་མཁན་ཚོགས་པ་དེ་ཚོར་ཞལ་འདེབས་འབུལ་ཐུབ་ན་བསམ་པ་ཡོད། དེ་ནས་དམིགས་ཡུལ་གཅིག་ལ་འཛམ་གླིང་འདིའི་སྒང་གི་དོན་དམ་པའི་ཞི་བདེ་ཡོང་བའི་དོན་ལ་དོ་སྣང་དང་འབད་བརྩོན་བྱེད་མཁན་གྱི་ཚོགས་པ་སྟེ་གཙོ་ཆེ་ཤོས་སློབ་སྦྱོང་གི་ཐབས་ལམ་ཐོག་ནས་ཞི་བདེ་བསྒྲུབ་མཁན་ཚོགས་པ་དེ་འདྲ་ཁ་ཤས་ཡོང་གི་ཡོད་པ་དེ་ཚོར་ཞལ་འདེབས་ཕྲན་བུ་འབུལ་ཐུབ་ན་བསམ་པ་ཡོད། དེ་ནས་ང་ཚོ་བོད་མི་བཙན་བྱོལ་ལ་ཡོད་པ་ཚོར་དཀའ་ངལ་མང་པོ་ཡོད་ཀྱང་། ད་རེས་ཀྱི་འདི་དག་ཞི་བདེ་དང་འབྲེལ་བ་ཡོད་པ་ཞིག་ཆགས་ཡོད་པ་ཡིན་སྟབས། ཤེས་ཡོན་ཐད་ནས་ང་རང་ཚོའི་རིག་གཞུང་བརྟན་བཟུང་བྱེས་ཡས་ཀྱི་ཞི་བདེ་དང་འབྲེལ་བ་ཡོད་པའི་གནས་ཚུལ་དེ་འདྲའི་ཐོག་ལ་ཕྲན་བུ་བཏང་ན་བསམ་པ་ཡོད། དེ་ནས་དངུལ་གང་འཚམས་ཤིག་མ་རྩར་བཞག་སྟེ་མུ་མཐུད་ལོ་ལྟར་འཛམ་བུ་གླིང་འདིའི་སྒང་ལ་བྱམས་དང་སྙིང་རྗེའི་ཉམས་ལེན་གྱིས་ཞབས་འདེགས་སྒྲུབ་མཁན་དེ་འདྲའི་ཐོག་ལ་མཐུན་རྐྱེན་ཕྲན་བུ་སྦྱར་ཆེད་ཚོགས་པ་ཞིག་བཙུགས་ནས་དེ་ལ་མ་དངུལ་བཞགས་ན་བསམ་པ་ཡོད། བསམ་ཚུལ་དེ་འདྲ་ཡིན། ཚང་མས་ཧུར་ཐག་རྦད་ཐག་བྱེད་རྒྱུ་གལ་ཆེན་པོ་རེད། ཐུགས་རྗེ་ཆེ།།
