༧གོང་ས་མཆོག་གིས་མ་འོངས་པར་ཏཱ་ལའི་བླ་མ་གླེན་པ་དང་ཞབས་འདྲེན་ཞུ་མཁན་དེ་འདྲ་ཡོང་མི་སྲིད་པ་ཞིག་མིན་སྟབས། དུས་རབས་མང་པོའི་ལོ་རྒྱུས་ཡོད་པའི་ཏཱ་ལའི་བླ་མའི་སྒྲིག་འཛུགས་འདི་ཡང་སྙན་གྲགས་ཅན་གྱི་ཏཱ་ལའི་བླ་མ་དང་མཉམ་དུ་མེད་པ་ཆགས་ན་དེ་ལས་ཡག་པ་ཞིག་ཡོད་པ་མ་རེད་གསུངས་འདུག
དེ་རིང་བྷི་བྷི་སི་དྲ་ཚིགས་ཐོག་ཟླ་འདིའི་ཚེས་ ༡༢ ནས་ ༡༤ ཉིན་བར་ཨི་ཊ་ལིའི་རྒྱལ་ས་རོམ་དུ། འཛམ་གླིང་ཐོག་ནོ་བྷེལ་ཞི་བདེའི་གཟེངས་རྟགས་བཞེས་མྱོང་མཁན་རྣམ་པའི་ཞི་བདེ་ལྷན་ཚོགས་ཐེངས་ ༡༤ པ་ཚོགས་སྐབས། ཧྥ་རན་སིའི་ཆུ་ཚོད་ཉེར་བཞིའི་བརྙན་འཕྲིན་དང་། བྷི་བྷི་སི། ཨི་ཊ་ལིའི་རའོ་སོགས་གསར་འགྱུར་བརྒྱུད་ལམ་ཁག་གསུམ་གྱིས་༧གོང་ས་མཆོག་ལ་བོད་རྒྱའི་གནད་དོན་དང་རྒྱལ་སྤྱིའི་དཀའ་རྙོག ཏཱ་ལའི་བླ་མའི་ཡང་སྲིད་ལམ་སྲོལ་བཅས་ཀྱི་སྐོར་ལ་བཅར་འདྲི་ཞུས་པ་ལས་ཚན་པ་ཁག་ཅིག་འདིར་བསྒྱུར་འགོད་བྱས།
བྷི་བྷི་སི་མཚན་མོའི་གསར་ཁང་གིས་རྒྱ་ནག་གི་སྐོར་ལ་བཀའ་འདྲི་ཞུས་པའི་ལན་དུ་ཁོང་གིས། “རྒྱ་ནག་གཞུང་གིས་རྒྱལ་སྤྱིའི་དཔལ་འབྱོར་ཁྲོམ་རྭའི་ནང་ཞུགས་རྒྱུར་རྩོད་ལེན་བྱེད་ཀྱིན་ཡོད་པ་དེ་ནི། ཁོ་ཚོའི་ཐོབ་ཐང་ཞིག་ཡིན་སྟབས་ང་ཚོས་བརྩི་འཇོག་དང་དགའ་བསུ་ཞུ་འོས་པ་ཞིག་ཡིན་ཡང་། རྒྱ་ནག་གི་ཁེ་ཕན་ཆེད་རྒྱལ་སྤྱིའི་རང་དབང་ཅན་གྱི་རྒྱལ་ཁབ་དང་ཚོགས་པ་སྒྲིག་འཛུགས་ཁག་གིས་བསམ་སྤྱོད་ཀྱི་འགན་འཁུར་བླངས་ཏེ་རྒྱ་ནག་དམངས་གཙོའི་རྒྱལ་ཁབ་ཅིག་ཏུ་འགྱུར་ཐུབ་པ་བྱ་རྒྱུ་གལ་ཆེན་ཆགས་ཡོད་པ་མ་ཟད། དེ་ནི་རྒྱ་ནག་གི་མང་ཚོགས་དང་མཁས་པ་ཚོས་ཀྱང་འདོད་ཀྱི་ཡོད་སྟབས། ངོས་ཀྱིས་མ་འོངས་པའི་འཛམ་གླིང་གི་མངོན་འདོད་ནི་རང་དབང་དང་དམངས་གཙོ་ཞིག་ཡིན་དགོས་དྲན་གྱི་འདུག་པས། ད་ལྟ་རང་དབང་ལྡན་པའི་རྒྱལ་སྤྱིའི་རྒྱལ་ཁབ་ཁག་གིས་དམངས་གཙོ་དང་ཁྲིམས་ཀྱི་དབང་སྒྱུར། གསར་འགོད་རང་དབང་བཅས་ལ་ལངས་ཕྱོགས་བརྟན་པོ་ཞིག་འཛིན་རྒྱུར་འགན་འཁུར་ཆེ་ཙམ་ལེན་དགོས་པ་རེད་བསམ་གྱི་འདུག’’ ཅེས་གསུངས་འདུག
ཁོ་མོས་མུ་མཐུད་དུ་༧གོང་ས་མཆོག་ལ་དབྱིན་ཡུལ་གཞུང་གིས་རྒྱ་གཞུང་ལ་ལངས་ཕྱོགས་བརྟན་པོ་ཞིག་བཟུང་སྟེ་ཁ་གཏད་གཅོག་གི་མེད་པར་ཐུགས་ཕམ་ཡོང་གི་ཡོད་མེད་བཀའ་འདྲི་ཞུས་པའི་ལན་དུ་ཁོང་གིས།“ངོས་ཀྱི་དབྱིན་ཇིའི་གྲོགས་པོ་ཁ་ཤས་ཀྱིས་དབྱིན་ཡུལ་གཞུང་གི་བང་མཛོད་སྟོང་པའམ་དངུལ་ཉུང་ཉུང་ཆགས་ཡོད་སྟབས། དཔལ་འབྱོར་དང་དངུལ་གྱི་ཆེད་དུ་རྒྱ་ནག་གཞུང་དང་འབྲེལ་ལམ་ཡག་པོ་མ་བྱེད་རང་བྱེད་ཆགས་ཀྱི་འདུག་ཅེས་ལབ་ཀྱི་འདུག ཕྲན་གྱིས་དེ་དངོས་ཡོད་ཅིག་རེད་བསམ་གྱི་འདུག”ཅེས་གསུངས་འདུག
གསར་འགོད་པས་༧གོང་ས་མཆོག་ལ་མ་འོངས་པར་ཏཱ་ལའི་བླ་མ་སྐུ་ཕྲེང་ ༡༥ པ་ཕེབས་མིན་བཀའ་འདྲི་ཞུས་པའི་ལན་དུ་བཀའ་ལན་བསྩལ་དོན། “མ་འོངས་པར་ཏཱ་ལའི་བླ་མའི་ལམ་སྲོལ་འདི་གནས་དགོས་མིན་ནི་བོད་མི་ཚོས་ཐག་གཅོད་བྱེད་དགོས་པ་ཞིག་ཆགས་ཡོད་ཀྱང་། ངོས་རང་ད་དུང་ལོ་ ༡༥ དང་ ༢༠ རྗེས་ལ་མ་གཏོགས་ལོ་གཅིག་གཉིས་རྗེས་ལ་གྲོངས་སྲིད་པ་ཞིག་མིན་སྟབས། ངོས་ཀྱི་བསམ་པར་མ་འོངས་པར་ཏཱ་ལའི་བླ་མའི་ལམ་སྲོལ་འདི་དགོས་གལ་མེད་པའི་དུས་ཤིག་ཤར་ཚེ། རང་བཞིན་གྱིས་མེད་པ་ཆགས་འགྲོ་ངེས་རེད་བསམ་གྱི་འདུག”ཅེས་གསུངས་འདུག ཡང་གསར་འགོད་པས་༧གོང་ས་མཆོག་ལ་མི་མང་པོ་ཞིག་གིས་མ་འོངས་པར་རྒྱ་ནག་གཞུང་གིས་ཏཱ་ལའི་བླ་མ་སྐུ་ཕྲེང་ ༡༥ པའི་ཡང་སྲིད་ལ་ཐེ་ཇུས་བྱེད་སྲིད་པའི་སེམས་འཚབ་གནང་གི་ཡོད་པར་ཐུགས་ཚོར་གང་འདྲ་ཡོད་མེད་དྲིས་པའི་ལན་དུ་ཁོང་གིས། “སྔོན་མ་ཏཱ་ལའི་བླ་མའི་ལམ་སྲོལ་འདིས་ཆབ་སྲིད་ཀྱི་འགན་འཁུར་ཡོད་ཀྱང་ད་ལྟ་འཁུར་མེད། ཡིན་ཡང་མ་འོངས་པར་མིས་བཟོས་པའི་ལམ་སྲོལ་འདི་མེད་པ་ཆགས་སྲིད་པ་ཞིག་ཡིན་སྟབས། མ་འོངས་པར་ཏཱ་ལའི་བླ་མ་གླེན་པ་དང་ཞབས་འདྲེན་ཞུ་མཁན་དེ་འདྲའང་འབྱུང་མི་སྲིད་པ་མིན་པར་བརྟེན། དུས་རབས་མང་པོའི་ལོ་རྒྱུས་ཡོད་པའི་ཏཱ་ལའི་བླ་མའི་སྒྲིག་སྲོལ་འདི་ཡང་སྙན་གྲགས་ཅན་གྱི་ཏཱ་ལའི་བླ་མ་དང་མཉམ་དུ་མེད་པ་ཆགས་ན་དེ་ལས་ཡག་པ་ཞིག་ཡོད་པ་མ་རེད་”ཅེས་སོགས་གསུངས་འདུག
ཡེ་ཤུའི་བླ་ཆེན་པོབ་ཧྥན་སི་སི་མཆོག་གིས་༧གོང་ས་མཆོག་དང་མཇལ་འཕྲད་གནང་མེད་པའི་ཐད་བཀའ་འདྲི་ཞུས་པའི་ལན་དུ། “ཉེ་ཆར་པོབ་མཆོག་གིས་ལྷོ་ཀོ་རི་ཡར་འཚམས་གཟིགས་སུ་བསྐྱོད་པ་ལྟར། པོབ་མཆོག་གིས་རྒྱ་ནག་ནི་ནང་ཆོས་དར་ཡུལ་གྱི་རྒྱལ་ཁབ་ཅིག་ཡིན་ཡང་ཡེ་ཤུའི་ཆོས་བྱེད་མཁན་ཧ་ཅང་མང་པོ་ཡོད་སྟབས། ངོས་ཀྱིས་བསམ་པར་ཁོང་གིས་མ་འོངས་པར་རྒྱ་ནག་ནང་འཚམས་གཟིགས་གནང་རྒྱུར་དགོངས་པ་བཞེས་ཀྱི་ཡོད་པ་རེད་བསམ་གྱི་འདུག”ཅེས་གསུངས་འདུག
གསར་འགོད་པ། དོན་གྲུབ།
དྲང་པོར་ཞུས་ན། རྒྱ་གཞུང་དགའ་ཐག་ཆོད་པ་རེད། ཁོ་རང་ཚོས་སྤྲུལ་སྐུ་ཞིག་ངོས་འཛིན་གནང་ནས་མུ་མཐུད་རྒྱུན་སྐྱོང་ངེས་ཡིན། སྔོན་མ་ཡུ་རོབ་མཐུན་ཚོགས་ཀྱིས་བཙན་བྱོལ་བོད་གཞུང་ངོས་ལེན་གནང་མིན་ལ་བསམ་བློ་གཏོང་གི་ཡིན་ལབ་སྐབས། རྒྱ་གཞུང་གིས་ཏཱ་ལའི་བླ་མའི་སྐུ་ཚབ་ལ་སྣེ་ལེན་བྱེད་དགོས་ཐུག་དོན་ཅི་ཡིན་མཁྱེན་དགོས་པ་ནི་གལ་ཆེན་རེད། ད་ལྟ་ཕྱིར་ལོག་གནང་ཐུབ་བམ། འགྱོད་པ་སྐྱེས་སམ། ལམ་ཁ་མི་འདུག་ག
སྔན་མ་སོག་ཡུལ་དུ། ནང་པའི་ཆོས་དགེ་སོག་ཡུལ་དུ། ཕེབས་མཐུབ་གོང་། ཡེ་ཤུའི་ཆོས་པ་མང་པོ་སོག་ཡུལདུ། ཕེབས་ཐུབ་པ་བྱུང་ཡོད་རེད།
བོད་ནང་ཡེ་པོབ་སྔོན་ལ་སླེབས་སམ། ནང་པ་༸གོང་ས་མཆོག་སྔོན་ལ་ཕེབས་ཐུབ་བམ། ལགས།