ཉིན་གཉིས་གོང་རྒྱ་ནག་གི་མཚོ་ཁུལ་ལས་དོན་ལྷན་ཁང་གིས་རྩོད་རྙོག་ཆེ་བའི་ཤར་ལྷོ་རྒྱ་ནག་རྒྱ་མཚོའི་ནང་མཚོ་ངོགས་རྟོག་ཞིབ་ས་ཚིགས་གསར་རྒྱག་བྱ་འཆར་ཡོད་ཚུལ་བསྒྲགས་འདུག
ཟླ་འདིའི་ཚེས་ ༡༧ ཉིན་རྒྱ་ནག་གི་མཚོ་ཁུལ་ལས་དོན་ལྷན་ཁང་གིས། ༢༠༢༠ ལོའི་སྔོན་དུ་རྩོད་རྙོག་ཆེ་བའི་ཤར་ལྷོ་རྒྱ་ནག་རྒྱ་མཚོའི་མཚོ་གླིང་ཁག་གི་ཁུལ་དུ་མཚོ་ངོགས་རྟོག་ཞིབ་ས་ཚིགས་ཤིག་གསར་འཛུགས་བྱ་རྒྱུ་དང་། ལྷག་པར་དུ་རྒྱ་ནག་གིས་མཚོ་དམག་གྱི་སྟོབས་ཤུགས་རྒྱ་སྐྱེད་བྱས་ཏེ། ཤར་ལྷོ་རྒྱ་ནག་རྒྱ་མཚོའི་ནང་གི་རྩོད་རྙོག་ཡོད་པའི་མཚོ་གླིང་ཁག་ལ་ལྟ་སྲུང་ནན་མོ་བྱེད་སྟངས་སྐོར་གྱི་ལམ་སྟོན་ཡིག་ཆ་ཞིག་ཕྱིར་བསྒྲགས་བྱས་སྟབས། རྒྱ་ནག་དང་མཚོ་གླིང་རྩོད་རྙོག་ཡོད་པའི་རྒྱལ་ཁབ་ཉི་ཧོང་དང་ཧྥི་ལི་ཕིན། ཝེ་ཋི་ནམ། གསུམ་གྱིས་རྒྱ་གཞུང་གི་ལས་འཆར་དེ་སྐྱོན་བརྗོད་བྱེད་བཞིན་ཡོད་འདུག
རྒྱ་ནག་མཚོ་ཁུལ་ལས་དོན་ལྷན་ཁང་གིས་མཚོ་ངོགས་རྟོག་ཞིབ་ས་ཚིགས་གསར་རྒྱག་བྱས་ན་རང་བྱུང་མཚོ་རླབས་འཕྱུར་བའི་གོད་ཆག་སྔོན་འགོག་དང་མཚོ་འགྲམ་ཁུལ་གྱི་དཔལ་འབྱོར་ཡར་རྒྱས། རྒྱ་ནག་ལ་བདག་དབང་ཡོད་པའི་ཤར་ལྷོ་རྒྱ་ནག་རྒྱ་མཚོའི་མཚོ་གླིང་ཁག་ལ་སྲུང་སྐྱོབ་བྱེད་པར་དགེ་མཚན་ཡོད་སྐོར་བརྗོད་འདུག
རྒྱ་ནག་གིས་ལྷོ་རྒྱ་ནག་རྒྱ་མཚོའི་ནང་རྩོད་རྙོག་ཡོད་པའི་སི་པུ་རད་ཊི་ལེ་མཚོ་གླིང་ (Spratly Islands)གཙོས་ཁ་འཐོར་མཚོ་གླིང་ (Paracel Islands)དང་། བྱེ་གླིང་ཧྥེ་རེའུ་ཁུ་རོབ་སི་རེ་ཧྥི་ (Fiery Cross Reef)བཅས་རྒྱ་ནག་གི་རྒྱལ་ཁོངས་ཡིན་པར་བརྗོད་སྟབས། ཧྥི་ལི་ཕིན་དང་ཝེ་ཋི་ནམ། ཐའེ་ཝན། མ་ལཱ་ཤི་ཡ། སྦར་ནེ་ (Brunei) བཅས་ཀྱིས་ཀྱང་རྒྱལ་ཁོངས་སོ་སོའི་ཡིན་ཚུལ་བརྗོད་དེ་རྩོད་རྙོག་འབྱུང་བཞིན་ཡོད། དེ་ནི་ཚན་རིག་པས་མཚོ་གླིང་འདི་དག་ཁུལ་དུ་རྡོ་སྣུམ་དང་སོལ་རླངས་ཀྱི་ཐོན་ཁུངས་ཡག་པོ་ཡོད་པ་བསྒྲགས་སྟབས། རྒྱ་ནག་གཙོས་རྒྱལ་ཁབ་སོ་སོས་མཚོ་གླིང་འདི་དག་གི་བདག་དབང་བརྩད་དེ། རྒྱལ་ཁབ་ཁག་གི་བར་ཛ་དྲག་གི་གནས་ཚུལ་ཡང་ཡང་ཡོང་གི་ཡོད་འདུག
ཤར་རྒྱ་ནག་རྒྱ་མཚོའི་ནང་དུའང་རྒྱ་ནག་གིས་ཏོབ་ཡུ་ (Diaoyu) ཟེར་བ་དང་ཉི་ཧོང་གི་སན་ཁཱ་ཁོ་ (Senkaku) ཟེར་བའི་གླིང་ཕྲན་དེའི་བདག་དབང་རྒྱ་ནག་ལ་ཡོད་ཚུལ་བརྗོད་སྟབས། རྒྱ་ནག་དང་ཉི་ཧོང་བར་གྱི་ཕྱི་སྲིད་འབྲེལ་ལམ་ཇེ་སྡུག་ཏུ་སོང་སྟེ། རྒྱ་ནག་གིས་ཡང་ཡང་ནན་ཅིན་དམར་གསོད་དོན་རྐྱེན་ཁ་ལ་འཁྱེར་ཏེ་ཉི་ཧོང་གིས་དམར་གསོད་དོན་རྐྱེན་ལ་དགོངས་དག་ཞུ་དགོས་པ་མ་ཟད། ཁོ་ཚོའི་ཤུལ་ལུས་ནང་མི་ལ་གུན་གསབ་ སྤྲོད་དགོས་ཚུལ་བརྗོད་པ་དང་། ཉི་ཧོང་གིས་རྒྱ་ནག་གི་བཤད་སྤྱོད་དེ་དག་ལ་སྣང་མེད་ཐོག་སྲིད་བློན་ཨ་བྷེ་ཡིས་འཛམ་གླིང་དམག་ཆེན་གཉིས་པའི་སྐབས་ཉི་ཧོང་གི་དམག་མི་བསད་པའི་རྗེས་དྲན་ལྷ་ཁང་ལ་ཡང་ཡང་སོང་སྟེ་མཆོད་འབུལ་བྱེད་ཀྱི་ཡོད་བྱས་སྟབས། རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་ཇེ་སྡུག་ཏུ་སོང་ཡོད་འདུག
ཨ་རིས་ཀྱང་ཉི་ཧོང་དང་ཧྥི་ལི་ཕིན། ཝེ་ཋི་ནམ་བཅས་ལ་ཕྱི་སྲིད་འབྲེལ་ལམ་ཇེ་ཡག་ཏུ་བཏང་སྟེ། ཚོང་ལས་དང་དམག་དོན་ཐོག་གྲོས་ཆོད་འཇོག་གི་ཡོད་ལ། རྒྱ་གར་སྲིད་བློན་མུ་དྷི་ཡིས་ཀྱང་ཤར་ཕྱོགས་སུ་ལྟ་བའི་སྲིད་བྱུས་ལག་བསྟར་གྱིས་ལྷོ་ཨེ་ཤ་ཡའི་རྒྱལ་ཁབ་ཚོའི་བར་དམག་དོན་དང་ཚོང་ལས་འབྲེལ་ལམ་སྔར་ལས་ཡག་ཏུ་གཏོང་གི་ཡོད་འདུག
གསར་འགོད་པ། ལྷ་སྐྱབས་རྒྱལ།
