རྒྱ་ནག་གི་རྡུལ་ཕྲན་མཚོན་ཆ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༨ སྟེང་གི་རྩོམ་སྒྲིག་པའི་གཏམ།

ཟླ་འདིའི་ཚེས་མགོར་རྒྱ་ནག་ནན་ཅིན་གྲོང་འཁྱེར་དུ་ལོ་ངོ་བརྒྱད་ཅུར་ཉེ་བའི་ཡར་སྔོན་གྱི་དོན་རྐྱེན་ཞིག་ལ་དྲན་གསོ་བྱས་ཡོད། དེར་རྒྱ་ནག་གི་སྲིད་འཛིན་ཞི་ཅིན་ཕིན་དང་། སྲིད་བློན་གཞོན་པའི་གྲས་རྒྱ་ནག་དམངས་ཆེན་གྱི་མགོ་གཙོ་ཀྲང་ཏིག་ཅང་སོགས་ཀྱིས་སྣེ་འཁྲིད་དེ། དམག་མི་དང་ཉེན་རྟོག་པ། ནན་ཅིན་གཡུལ་འཁྲུག་ནང་ཞུགས་མྱོང་མཁན་རྒན་འཁོགས། རྒྱ་ནག་གི་མཐུན་ཕྱོགས་རྒྱལ་ཁབ་ཁག་གི་སྐུ་ཚབ་བཅས་མི་ཁྲི་ལྷག་འཛོམས་ཏེ། འཛམ་གླིང་ཞི་བདེའི་མིང་ཐོག་ནས་འདས་མཆོད་བསྒྲུབས་ཏེ་གཏམ་བཤད་སྤེལ་ཡོད།

སྔར་ལོ་ཉི་ཧོང་གི་སྲིད་འཛིན་ཤིང་ཛོ་ཨ་བྷེ་ཡིས་ཉི་ཧོང་རྒྱལ་སར་ཡོད་པའི་འཛམ་གླིང་དམག་ཆེན་གཉིས་པའི་སྐབས་འདས་གྲོངས་སུ་སོང་བའི་ཉི་ཧོང་གི་དམག་མིའི་དྲན་རྟེན་ལྷ་ཁང་ལ་མཆོད་འབུལ་དུ་བསྐྱོད་པར། རྒྱ་ནག་གཙོ་བྱས་ཏེ་ཀོ་རི་ཡ་དང་ཐེ་ཝན་སོགས་ཀྱིས་སྐྱོན་བརྗོད་བྱས་ཏེ། ཉི་ཧོང་གིས་དམག་ཆེན་གཉིས་པའི་བྱས་ཉེས་ལ་དགོངས་དག་ཞུ་རྒྱུའི་ཚབ་ཏུ་མི་མང་གི་སེམས་ཀྱི་རྨ་ཁ་རྙིང་པར་ཟུག་གཟེར་གསར་པ་སློང་གི་ཡོད་ཚུལ་བརྗོད།

ཉི་ཧོང་ལ་འཁོན་ལན་སློག་ཆེད། ད་ལོའི་ཕྱི་ཟླ་ ༢ ཚེས་ ༢༧ ཉིན་རྒྱ་ནག་རྒྱལ་ཡོངས་དམངས་ཆེན་སྐབས་བཅུ་གཉིས་པའི་རྒྱུན་ལས་ལྷན་འཛོམས་སྟེང་། ལོ་ལྟར་ཕྱི་ཟླ་ ༡༢ ཚེས་ ༡༣ ཉིན་ནི་ནན་ཅིན་དམར་གསོད་ཆེན་མོར་རྒྱལ་ཁབ་ཐུན་མོང་གིས་འདས་མཆོད་སྒྲུབ་པའི་ཉིན་མོར་གཏན་འབེབས་བྱས་ཤིང་། ད་རེས་འདས་མཆོད་དང་བསྟུན་ཏེ་ཞི་ཅིན་ཕིན་གྱིས་ཉི་ཧོང་དམག་མིས་རྒྱ་ནག་གི་མི་འབུམ་གསུམ་ལྷག་བསད་ཡོད་སྐོར་བསྒྲགས། འོན་ཀྱང་དེར་ཉི་ཧོང་གིས་ངོས་ལེན་བྱས་མེད་པ་མ་ཟད། རྒྱ་ནག་གིས་མང་ཚོགས་ལ་ཞེན་འཁོན་བསླངས་ཏེ་དམག་ཆེན་གསུམ་པ་ཞིག་ལ་རེ་འབོད་བྱེད་ཀྱིན་ཡོད་པའི་སྐྱོན་བརྗོད་བྱས།

ལོ་གཅིག་གཉིས་གོང་ནས་བཟུང་ཞི་བདེའི་རྒྱ་མཚོའི་མངའ་ཁུལ་གྱི་མཚོ་གླིང་ཁག་ཅིག་གི་བདག་དབང་ཐོག རྒྱ་ནག་དང་ཉི་ཧོང་བར་རྩོད་གླེང་བྱུང་སྟེ། རྒྱལ་ཁབ་གཉིས་བར་དམག་འཁྲུག་གི་ཉེན་ཁར་ཐུག་པ་དང་བསྟུན་ཏེ། རྒྱ་ནག་གིས་མང་ཚོགས་སྐུལ་སློང་བྱས་ཏེ་རྒྱ་ནག་པེ་ཅིན་སོགས་སུ་ཡོད་པའི་ཉི་ཧོང་གི་རླངས་འཁོར་དང་བཟོ་གྲྭ་ཁག་ལ་གཏོར་བཅོམ་བཏང་། འདི་ནི་རྒྱ་ནག་གིས་སྲིད་གཞུང་ལ་མིང་འཆལ་མི་འབྱུང་ཆེད་དང་རྒྱལ་སྤྱིར་མངོན་གསལ་མེད་པའི་ཐོག་ནས་ཉི་ཧོང་གི་གཉའ་གཅོག་ཐབས་ཀྱི་ལྐོག་ཇུས་རེད།

དེང་སྐབས་འཛམ་གླིང་རྒྱ་ནག་ལ་ཆེས་ཞེད་སྣང་སྐྱེ་ས་དང་འཛེམ་ཟོན་བྱེད་ས་དེ། རྒྱ་ནག་གི་དམག་དཔུང་དང་མཚོན་ཆ་མིན་པར་རྒྱ་རིགས་མང་ཚོགས་ཀྱི་ཁ་དམག་ཡིན། དེ་ནི་རྒྱ་མི་རིགས་ཀྱིས་འཛམ་གླིང་སྤྱིའི་མི་འབོར་གྱི་བརྒྱ་ཆའི་བཅུ་ལྷག་ཟིན་ཡོད་པ་དང་གཅིག མའོ་ཡིས་ཀྲུང་གོར་མི་དུང་ཕྱུར་བཅུ་གསུམ་ཡོད་ལ་དམག་ཀྱང་དུང་ཕྱུར་བཅུ་གསུམ་ཡོད་ཅེས་པའི་སློབ་གསོ་དེས་སྐྱེད་པའི་རྒྱ་མི་རིགས་ཀྱི་ཞེན་ཁོག་དང་གཉིས། རྒྱ་ནག་དམར་གཞུང་ལ་མང་ཚོགས་བསླུ་འགུག་གི་གཡོ་སྒྱུ་ཆེ་བ་དང་གསུམ། རྒྱུ་མཚན་འདི་གསུམ་གྱིས་རྒྱ་མི་རིགས་ལ་ཕོག་ཐུག་བཟོས་ན། རྡུལ་ཕྲན་མཚོན་ཆའི་ཁ་གཏད་དུ་ལངས་པ་ལས་ཀྱང་ཉེན་ཚབས་ཆེ་བར་ངོས་འཛིན་བྱེད།

བོད་དང་ཡུ་གུར་སོག་པོ་བཅས་ཀྱི་སྟེང་ལའང་རྒྱ་ནག་གཞུང་གིས་ལག་ཆ་འདི་བེད་སྤྱོད་གཏོང་གི་ཡོད། ཏཱ་ལའི་བླ་མ་བདུད་རེད་ཟེར་བ་དང་། ཁོས་རྒྱ་ནག་ཆིག་སྒྲིལ་དང་མི་མང་བདེ་འཇགས་དཀྲུག་གི་ཡོད་ཟེར་བ་དེས། ༧གོང་ས་མཆོག་གི་ཕེབས་ལམ་དུ་སྐད་འབོད་བྱེད་མཁན་རེ་ཟུང་འབྱུང་གི་ཡོད་པ་དང་། ༢༠༠༨ ལོའི་བོད་བོད་མིའི་ཞི་རྒོལ་དང་ ༢༠༠༩ ལོའི་ཡུ་གུར་གྱེན་ལངས་རྗེས་རྒྱ་ནག་གྲོང་ཁྱེར་ཁག་ཏུ་མི་རིགས་དབྱེ་འབྱེད་ཆེན་པོ་བྱུང་བ་དེ་དག་གི་རྒྱབ་ཏུའང་རྒྱ་ནག་གཞུང་ཡིབ་ཡོད་མོད། འཛམ་གླིང་མི་མང་གིས་རྒྱ་མི་རིགས་ཚོས་རང་གི་ཚབ་རང་གིས་མཚོན་ཐུབ་པའི་ཉིན་མོ་ཞིག་ལ་རེ་སྒུག་བྱས་ཡོད།