པེ་ཅིན་གྱི་དགེ་ལུཊ་པའི་དགོན་པ་གཉིས་སྤྲོ་སྐྱིད་ཁང་དུ་བསྒྱུར།

པེ་ཅིན་དུ་ཡོད་པའི་ལྕང་སྐྱ་སྐུ་ཕྲེང་རིམ་བྱོན་གྱི་བཞུགས་གནས་དགེ་ལུགས་པའི་དགོན་པ་གཉིས་ཤར་ནུབ་ལུགས་ཀྱི་རྒྱས་སྤྲོས་ཆེ་བའི་སྤྲོ་སྐྱིད་ཁང་ཞིག་ཏུ་བསྒྱུར་ཏེ། དེང་སྐབས་རྒྱ་རིགས་རྒྱུ་འབྱོར་ཅན་ཚོས་ཐུགས་སྤྲོ་དང་བག་མེད་སྤྲོ་གཡེང་བྱེད་ཡུལ་ཞིག་ཆགས་ཡོད་འདུག

པེ་ཅིན་གྲོང་ཁྱེར་གྱི་གནའ་བོའི་མཁར་གྲོང་གི་ཉེ་འཁྲིས་སུ་ཡོད་པའི་བོད་བརྒྱུད་ནང་བསྟན་དགེ་ལུགས་པའི་དགོན་པ་སོང་ཀྲུའུ་དགོན་དང་ཀྲི་ཀྲུའུ་དགོན་གཉིས་སུ། ཕྱི་ལོ་ ༢༠༡༡ ཙམ་ནས་བཟུང་ཚོང་ལས་འདྲ་མིན་གཉེར་གྱི་ཡོད་པའི་གནས་ཚུལ་རིམ་པར་ཐོན་ཀྱང་། རྒྱ་ནག་རིག་དངོས་སྲུང་སྐྱོབ་ཁང་དང་པེ་ཅིན་ནང་བསྟན་མཐུན་ཚོགས་སོགས་ཀྱིས་གསང་རྒྱ་དམ་པོ་བྱས་ཏེ་ད་ལྟའི་བར་གནས་ཚུལ་ཁ་གསལ་བྱུང་མེད་ཀྱང་། ཉེ་སྔོན་རྒྱ་ནག་ཞིན་ཧྭ་གསར་ཁང་གི་གསར་འགོད་པ་ཞིག་གིས་ཆེད་དུ་ཞིབ་འཇུག་བྱས་ཏེ་ཤེས་རྟོགས་བྱུང་བ་ལྟར་ན། ཕྱི་ལོ་ ༢༠༡༡ ཙམ་ནས་བཟུང་སོང་ཀྲུའུ་དགོན་རིག་གནས་འགན་ལེན་ཚད་ཡོད་ཚོང་གཉེར་ཁང་ཟེར་བ་སོགས་ཁེ་ལས་ཁང་འགའི་བདག་གཉེར་འོག དགོན་པ་དེ་གཉིས་ཀྱི་ནང་དུ་རྒྱས་སྤྲོས་ཆེ་བའི་ཤར་ནུབ་ལུགས་ཀྱི་ཟས་རིགས་ལ་ རོལ་བའི་གསོལ་སྟོན་ཁང་དང་། མགྲོན་ཁང་། དེ་བཞིན་དབང་འབྱོར་ལྡན་པའི་མཐོ་རིམ་མི་སྣ་རེ་འགས་སྤོས་མཆོད་ས་དང་འབྲུག་མགོ་ཅན་གྱི་གསེར་ཁྲིར་བསྡད་དེ་དཔོན་ཉམས་སྟོན་ས་དང་། གླུ་གར་ལ་རོལ་ས་སོགས་ཚོང་ལས་རིགས་འདྲ་མིན་གཉེར་གྱི་ཡོད་འདུག

དགོན་པའི་སྤྲོ་སྐྱིད་ཁང་དུ་ལས་ཀ་བྱེད་མཁན་ཞིག་གིས། འབྲུག་མགོ་ཅན་གྱི་གསེར་ཁྲི་དེ་མགྲོན་པོ་ཚོས་ཟས་ལ་རོལ་བཞིན་འདྲ་པར་རྒྱག་ས་བྱེད་ཀྱི་ཡོད་པ་དང་། སྤྲོ་སྐྱིད་ཁང་དུ་ཡོང་བའི་མགོ་ཁྲིད་མང་པོ་ཟློས་གར་ལ་ལྟ་ཉན་བྱེད་པར་དགའ་བོ་ཡོད་པས་ཟློས་གར་སྟེགས་བུ་ཞིག་ཀྱང་ཆེད་དུ་བཟོས་ཡོད་ལ། མགྲོན་པོ་གཅིག་གི་དགོང་ཟས་ལ་རིན་གོང་ཆེས་དམའ་ཤོས་རྒྱ་སྒོར་ ༨༠༠ ནས་ ༢༠༠༠ བར་ཡིན་པ་དང་། དེ་བཞིན། ཀྲི་ཀྲུའུ་དགོན་གྱི་ལྷོ་ནུབ་ར་བའི་ནང་ཚད་མཐོའི་ནུབ་གླིང་ལུགས་ཀྱི་གསོལ་སྟོན་ཁང་ཞིག་ཡོད་པ་དང་། དེའི་ནང་གི་མགྲོན་ཁང་རེ་རེར་ནུབ་རེར་རྒྱ་སྒོར་ ༢༠༠༠ ཡིན་སྐོར་བརྗོད་ཡོད་པ་རེད།

དགོན་པ་དེ་གཉིས་པེ་ཅིན་ནང་བསྟན་མཐུན་ཚོགས་ཀྱིས་དོ་དམ་འོག་ཡོད་སྟབས། གསར་འགོད་པས་པེ་ཅིན་ནང་བསྟན་མཐུན་ཚོགས་དང་ཆོས་ལུགས་ལས་དོན་ཁང་གི་འབྲེལ་ཡོད་ལས་བྱེད་པར་གནས་ཚུལ་དེའི་སྐོར་བཅར་འདྲི་བྱེད་སྐབས། དེ་སྔོན་དགོན་པ་དེ་གཉིས་ཀྱི་ནང་རྟོག་ཞིབ་བྱེད་དུ་ཕྱིན་ཡོད་ཀྱང་། སོང་ཀྲུའུ་དགོན་གྱི་ལས་བྱེད་པས་ཕྱི་ཕྱོགས་ལ་ཚོང་ལས་གཉེར་གྱི་མེད་ལབ་སོང་ཞེས་བརྗོད་འདུག༄༅ ཤིན་ཧྭ་གསར་ཁང་གི་གསར་འགོད་པ་ཉིན་ཞིག་གནས་ཚུལ་རྒྱུས་ལོན་བྱེད་དུ་དགོན་པར་ཕྱིན་ཡོད་ཀྱང་། སྒེའུ་ཁུང་ནས་རྒྱས་སྤྲོས་ཆེ་བའི་གསོལ་སྟོན་ཁང་མཐོང་བ་མ་གཏོགས་མགྲོན་པོ་འགྲོ་འོང་བྱེད་པ་མཐོང་རྒྱུ་མེད་པ་མ་ཟད། གསར་འགོད་པ་ནང་དུ་འགྲོ་རྩིས་ཀྱིས་སྒོ་བརྡུང་ཡང་ཕྱེ་མཁན་མེད་པ་དང་། ཁ་པར་བཏང་ཡང་མགྱོག་མཁན་མ་བྱུང་། ཡིན་ནའང་ཉེ་འཁྲིས་ཀྱི་ཡུལ་མི་ཚོས་དགོན་པ་དེ་གཉིས་ཕྱི་དྲོའི་ཆུ་ཚོད་ ༥ པ་ཙམ་ནས་སྒོ་ཕྱེས་ཏེ། མཚན་གུང་ཆུ་ཚོད་ ༡༢ ཡོལ་རྗེས་གཞི་ནས་སྒོ་རྒྱག་གི་ཡོད་པ་དང་། མི་ཚོགས་ཀྱི་འུར་ཟིང་གིས་ཉེ་འཁྲིས་ཀྱི་སྡོད་མང་ཚོར་སུན་སྣང་ཆེན་པོ་བཟོ་བཞིན་ཡོད་སྐོར་བརྗོད་འདུག

སོང་ཀྲུའུ་དགོན་རིག་གནས་འགན་ལེན་ཚོང་གཉེར་ཁང་ཟེར་བའི་བཟོ་ཚོང་དེབ་སྐྱེལ་ཐོ་གཞུང་ནང་། ཚོང་གཉེར་ཁང་དེ་ཕྱི་ལོ་ ༢༠༠༥ ཟླ་ ༦ པའི་ནང་གསར་དུ་བཙུགས་ཤིང་། ད་ལྟའི་ཆར་མ་དངུལ་རྒྱ་སྒོར་ཁྲི་ ༡༠༠ ཡོད་པ་དང་། ཚོང་ལས་ཀྱི་ཁྱབ་ཁོངས་སུ་རྒྱ་ཟས་དང་ཆང་སོགས་བཟའ་བཏུང་རིགས་དང་། བཟོ་རྩལ་ཐོན་རྫས་རིགས་ཀྱི་ཚོང་ལས་གཉེར་གྱི་ཡོད་པ་མ་ཟད། མགྲོན་པོའི་བདེ་ཐང་ཞབས་ཞུ་དང་རིག་གནས་བརྗེ་རེས་ཀྱི་བྱེད་སྒོ་སོགས་སྤེལ་གྱི་ཡོད་སྐོར་བཀོད་འདུག

ཕྱི་ལོ་ ༢༠༠༧ ལོར་ལོ་རྒྱུས་ཀྱི་འཛུགས་སྐྲུན་སྲུང་སྐྱོབ་དང་བསྐྱར་སྐྲུན་གནད་དོན་ཐག་གཅོད་ཆེད། པེ་ཅིན་གྲོང་ཁྱེར་ནང་བསྟན་མཐུན་ཚོགས་དང་དགོན་དེ་བདག་ཏུ་བཟུང་བའི་ཁེ་ལས་པའི་བར་སུས་བསྐྱར་སྐྲུན་བྱས་པ་ཡིན་ན་དེ་ལ་ཁེ་ཕན་ཡོང་བའི་སྲིད་བྱུས་འོག ཁེ་ལས་ཁང་ཁ་ཤས་ལ་བོགས་གཏོང་གི་གྲོས་ཆོད་བཞག་སྟེ། དགོན་པ་དེ་གཉིས་ཀྱི་ཚོང་གཉེར་བདག་དབང་ཡང་སྲུང་སྐྱོབ་རང་བཞིན་གྱིས་བེད་སྤྱོད་བྱེད་པའི་མིང་ཐོག་ནས་བོགས་མར་བཏང་ཡོད་འདུག ཡིན་ནའང་། སོང་ཀྲུའུ་དགོན་རིག་གནས་འགན་ལེན་ཚད་ཡོད་ཚོང་གཉེར་ཁང་ཟེར་བ་དང་ཁེ་ལས་ཁང་གཞན་ཁག་ཅིག་གིས་སྤྱི་པའི་ཐོན་ཁུངས་བེད་སྤྱད་དེ་ལོ་རྒྱུས་ཡུན་རིང་ལྡན་པའི་བཟོ་བཀོད་རྣམས་མེད་པར་བཏང་ནས་མཆོད་མཇལ་བ་རྣམས་ནང་དུ་འཛུལ་བར་བཀག་འགོག་བྱས་ཏེ། སྒེར་དབང་རིང་ལུགས་ཀྱི་གསོལ་སྟོན་ཁང་དང་མགྲོན་ཁང་། ཚོགས་ཁང་སོགས་བརྒྱབ་ནས་ཚོང་ལས་གཉེར་བའི་བྱ་འགུལ་སྤེལ་བཞིན་ཡོད་འདུག

ཕྱི་ལོ་ ༢༠༡༡ ལོར་ཀྲི་ཀྲུའུ་དགོན་དུ་པེ་ཅིན་ལྷ་ཁང་གསོལ་སྟོན་ཁང་ཞེས་པ་གསར་རྒྱག་བྱས་ཏེ། རྒྱུན་དུ་ཁེ་ལས་མི་སྣ་མང་པོ་འགྲོ་འོང་བྱེད་ཀྱི་ཡོད་པའི་གནས་ཚུལ་ཐོན་ཏེ་མི་མང་པོས་དོ་སྣང་བྱུང་ཡོད་པ་མ་ཟད། ཕྱི་ལོ་ ༢༠༡༣ ཟླ་ ༡ ནང་རྒྱ་ནག་དཔལ་འབྱོར་རླུང་འཕྲིན་ཁང་གིས། ཁེ་ལས་ཁང་འགའ་རེས་རིག་དངོས་འཛུགས་སྐྲུན་གྱི་མིང་དང་ཁོར་ཡུག་བེད་སྤྱད་དེ་སྒེར་གྱི་ཚོང་ལས་གཉེར་གྱི་ཡོད་པ་དང་། པེ་ཅིན་གྲོང་ཁྱེར་རིམ་པའི་རིག་དངོས་སྲུང་སྐྱོབ་ཁང་སོང་ཀྲུའུ་དགོན་དང་ཀྲི་ཀྲུའུ་དགོན་གཉིས་ཤར་ནུབ་ལུགས་ཀྱི་རྒྱས་སྤྲོས་ཆེ་བའི་ཟ་ཁང་དུ་བསྒྱུར་ཡོད་སྐོར་ཕྱིར་བསྒྲགས་བྱས་ཏེ། སྤྱི་ཚོགས་ཁྲོད་ལབ་གླེང་མང་པོ་བྱུང་ཡོད་པ་རེད། སྐབས་དེར་པེ་ཅིན་གྲོང་ཁྱེར་རིག་དངོས་སྲུང་སྐྱོབ་ཁང་གིས། ཁོང་ཚོས་ཞིབ་འཇུག་བྱས་པ་བརྒྱུད་དགོན་པ་དེ་གཉིས་ཀྱི་ནང་བཟའ་བཏུང་བྱེད་ས་ཡོད་པ་བདེན་པ་ཡིན་ཡང་མེ་བེད་སྤྱོད་གཏོང་གི་མེད་ལུགས་བརྗོད་ཡོད་པ་དང་། བྱ་སྤྱོད་དེ་ཁྲིམས་འགལ་ཡིན་མིན་དོགས་འདྲི་བྱས་པར་ད་ལྟའི་བར་ལན་འདེབས་གང་ཡང་བྱས་མི་འདུག འདི་ལོའི་ཕྱི་ཟླ་ ༧ ནང་པེ་ཅིན་གྲོང་ཁྱེར་ཡན་ལིན་ཅི་ཅན་བཟོ་སྐྲུན་ཚད་ཡོད་ཚོང་གཉེར་ཁང་ཟེར་བ་དེས། སོང་ཀྲུའུ་དགོན་ནང་ལོགས་ཀྱི་རྩིག་རྙིང་དང་སྒེའུ་ཁུང་ཚང་མ་གཏོར་ཏེ། བསྟན་བཅོས་ཁང་དུ་ཟས་སྣ་གཡོ་སྦྱོར་བྱས་ཏེ་ཐབ་ཚང་བྱེད་ཀྱི་ཡོད་པའི་གནས་ཚུལ་སྤྱི་ཚོགས་ཐོག་ཁྱབ་སྐབས། བཟོ་སྐྲུན་ཁང་དེས་གྲོང་ཁྱེར་རིག་དངོས་སྲུང་སྐྱོབ་ཁང་གི་ཆོག་མཆན་ཡོད་ལ་དགོན་པ་ཞིག་གསོ་བྱེད་བཞིན་ཡོད་སྐོར་བརྗོད་ཡོད་པ་རེད།

དགོན་པ་དེ་གཉིས་ཀྱི་ལོ་རྒྱུས་ནང་བཀོད་པ་ལྟར་ན། ཆིན་རྒྱལ་རབས་ཀྱི་དུས་མགོར་སོག་པོས་ཤར་ཕྱོགས་སུ་དཔུང་འཇུག་ཐེངས་མང་བྱས་པར་བརྟེན། ཆིན་སྲིད་གཞུང་གིས་ཁྱིམ་མཚེས་རྒྱལ་ཁབ་སོག་པོ་དང་བོད་གཉིས་ལ་མཐུན་འགྲིག་ཡོང་ཆེད། བོད་བརྒྱུད་ནང་བསྟན་གྱི་དགོན་པ་མང་པོ་གསར་དུ་ཕྱག་བཏབ་ནས་བོད་བརྒྱུད་ནང་པའི་བསྟན་པ་དར་སྤེལ་བཏང་ཡོད་པ་ལྟར། གོང་མ་ཁང་ཞི་ཁྲི་ལོ་ ༤༠ སྟེ་ཕྱི་ལོ་ ༡༧༠༡ ལོར་སོག་པོའི་ཏོ་ལིན་ནོར་མནའ་མཐུན་ཆིང་ཡིག་བཞག་རྗེས། གོང་མ་ཁང་ཞི་ཡིས་ལྕང་སྐྱ་སྐུ་ཕྲེང་གཉིས་པ་ངག་དབང་བློ་བཟང་ཆོས་ལྡན་མཆོག་ལ་ཊོ་ལིན་ནོར་ཏྲ་སཱ་ཁེ་ཏཱ་བླ་མ་(多伦诺尔扎萨克达喇嘛)ཞེས་པའི་མཚན་གནས་ཕུལ་བ་མ་ཟད། ཁང་ཞི་ཁྲི་ལོ་ ༤༥ ཕྱི་ལོ་ ༡༧༠༦ ལོར་ངག་དབང་བློ་བཟང་ཆོས་ལྡན་མཆོག་དབུ་བླ་རུ་བསྐོས་ཏེ་བོད་བརྒྱུད་ནང་བསྟན་དགེ་ལུགས་པའི་དབུ་ཁྲིད་ཀྱི་ཐུགས་འགན་བཞེས་སུ་བཅུག་པ་དང་། ཕྱི་ལོ་ ༡༧༡༡ ལོར་གོང་མ་ཁང་ཞི་ཡིས་ཁོང་ལ་དགོན་པ་ཞིག་གསར་བཞེངས་མཛད་དེ་ཕུལ་བའི་ཐུགས་གཏན་འཁེལ་ཏེ། ཕྱི་ལོ་ ༡༧༡༢ ལོར་སོང་ཀྲུའུ་དགོན་པ་དངོས་སུ་བཞེངས་མགོ་བརྩམས་ཡོད་པ་དང་། ཕྱིས་སུ་དགོན་པ་དེ་ལྕང་སྐྱ་ངག་དབང་བློ་བཟང་ཆོས་ལྡན་མཆོག་ནས་བཟུང་ལྕང་སྐྱ་སྐུ་ཕྲེང་རིམ་བྱོན་གྱི་བཞུགས་གནས་སུ་གྱུར་ཞིང་། ཆིན་གོང་མས་གསེར་དངུལ་ཟངས་གསུམ་གྱི་ལྷ་སྐུ་དང་གསེར་གྱི་ཕོར་བ། མུ་ཏིག གཡང་ཊི། དར་ཟབ་སོགས་རིན་པོ་ཆེའི་རིགས་མང་པོ་ཡོན་ཏུ་ཕུལ་ཏེ་ཕྱི་ནང་གི་བཀོད་པ་རབ་ཏུ་རྒྱས་པར་མཛད་ཡོད་པ་མ་ཟད། བཀའ་བསྟན་བཅོས་དཔར་སྐྲུན་གྱི་ལྟེ་གནས་ཆེ་ཤོས་ཤིག་ཏུ་གྱུར་ཡོད་ཀྱང་། ཕྱི་ལོ་ ༡༩༠༠ ལོར་རྒྱལ་ཁབ་ ༨ གྱི་མཉམ་འབྲེལ་དམག་དཔུང་གིས་པེ་ཅིན་མཁར་དུ་ཡོངས་ཁྱབ་འཕྲོག་བཅོམ་བྱེད་སྐབས། དགོན་པ་དེའི་རྒྱུ་དངོས་མང་པོ་བཙན་འཁྱེར་བྱས་ཏེ་གྱོང་གུད་ཚབས་ཆེན་ཐེབས་ཡོད་འདུག

ཕྱི་ལོ་ ༡༩༥༠ ལོར་ནང་པའི་དགོན་པ་དེའི་ཆོས་ལུགས་ཀྱི་བྱེད་སྒོ་ཁག་མེད་པར་བཟོས་ཏེ་བཟོ་གྲྭ་དང་སློབ་གྲྭ་སོགས་ཀྱི་ལྟེ་གནས་སུ་གྱུར་ཏེ་ཡུན་རིང་ཕྱིན་ཡོད་པ་དང་། ཕྱི་ལོ་ ༡༩༨༤ ཟླ་ ༥ ཚེས་ ༢༤ ཉིན་སོང་ཀྲུའུ་དགོན་དང་། དགོན་དེའི་ནུབ་ཕྱོགས་སུ་ཆགས་ཤིང་གོང་མ་ཆན་ལུང་གིས་ཕྱི་ལོ་ ༡༧༦༡ ལོ་ཙམ་ལ་ཕྱག་བཏབ་པའི་ཀྲི་ཀྲུའུ་དགོན་གཉིས། པེ་ཅིན་མཁར་གྱི་རིག་དངོས་སྲུང་སྐྱོབ་ཁང་དུ་གཏན་འབེབས་ཁྱབ་བསྒྲགས་བྱས་ཏེ། ཁེ་ལས་ཁང་ཁག་ཅིག་གིས་སྔ་རྗེས་སུ་ཞིག་གསོ་ཐེངས་འགའ་བྱས་ཏེ་ཚོང་ལས་གཉེར་མགོ་བརྩམས་ཡོད་འདུག གཞན་ཡང་། སུང་ཀྲུའུ་དགོན་གྱི་ཤར་ཕྱོགས་སུ་ཧྥ་ཡཱན་དགོན་ཟེར་བའི་དགེ་ལུགས་ཀྱི་དགོན་པ་ཞིག་ཡོད་པ་དང་། དེ་ནི་ཕྱི་ལོ་ ༡༧༣༤ ལོར་གོང་མ་ཡོང་ཀྲིན་གྱིས་ཕྱག་བཏབ་ཅིང་། ལྕང་སྐྱ་སྐུ་ཕྲེང་རིམ་པ་དང་རྗེ་ཙོང་ཁ་པ་ཆེན་པོའི་དངོས་སློབ་བྱམས་ཆེན་ཆོས་ རྗེ་ཡིས་དགོན་དེར་ཞབས་ཀྱིས་བཅགས་ཤིང་བྱིན་གྱིས་རླབས་མྱོང་ཡང་། ད་སྐབས་ཤུལ་མེད་དུ་གྱུར་ནས་གནས་དེར་རྒྱ་ནག་གཞུང་གི་ཆེད་གཉེར་དངུལ་ཁང་ཆེན་པོ་ཞིག་བརྒྱབ་ཡོད་འདུག

གསར་འགོད་པ། པདྨ་མཚོ།