ཨོ་མིན་རྒྱ་གཞུང་ལ་རྩིས་སྤྲོད་བྱས་ཏེ་ལོ་ངོ་ ༡༥ འཁོར་བའི་དུས་དྲན་གྱི་ཉིན་མོར་ཨོ་མིན་གྱི་དམངས་ཁྲོད་ཚོགས་པ་ཁག་ཅིག་གིས་ངོ་རྒོལ་ཁྲོམ་སྐོར་བྱས་ཡོད་འདུག
ཟླ་འདིའི་ཕྱི་ཚེས་ ༢༠ ཉིན་ཨོ་མིན་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ ༡༥ འཁོར་བའི་དུས་དྲན་སྲུང་གཙི་བྱས་ཡོད་པ་དང་། མཛད་སྒོའི་ཐོག་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ཐུན་མོང་མ་ཡིན་པའི་སྲིད་བྱུས་འོག ངེས་པར་དུ་རྒྱལ་ཁབ་གཅིག་གི་རྩ་དོན་རྒྱུན་འཁྱོངས་དང་ལམ་ལུགས་གཉིས་ལ་བརྩི་བཀུར་དགོས་པའི་གཏམ་བཤད་སྤེལ་ཡོད་པ་དང་། དུས་དྲན་དང་བསྟུན་ཏེ་ཨོ་མིན་དམངས་ཁྲོད་ཀྱི་ཚོགས་པ་ཁག་ཅིག་གིས་ཨོ་མིན་སྲིད་གཞུང་ལྟེ་གནས་སུ་ངོ་རྒོལ་ཁྲོམ་སྐོར་བྱས་ཡོད་པ་མ་ཟད། མཛའ་མཐུན་སྤྱི་གླིང་ཟེར་བ་རུ་༼མི་མང་གཉིད་ལས་དཀྲོག་པ༽ཞེས་པའི་དགོང་ཚོགས་བསྡུས་ཏེ། ཕྱི་ལོ་ ༢༠༡༩ ལོའི་ཨོ་མིན་དམིགས་བསལ་སྲིད་འཛིན་འོས་མི་མི་མང་གིས་མིང་འདོན་བྱེད་དགོས་པ་མ་ཟད། མི་རེར་འོས་རེ་བླུགས་པའི་ཐོབ་ཐང་སྤྲོད་དགོས་པའི་རེ་འདུན་བཏོན་ཡོད་འདུག
ལས་འགུལ་སྣེ་ཁྲིད་པ་ཨོ་མིན་གསར་པའི་མཐུན་ཚོགས་ཀྱི་ཚོགས་གཙོ་ཧོ་ཀྲུའུ་ལགས་ཀྱིས་གསར་འགོད་པར། ཐེངས་འདིའི་ལས་འགུལ་ནང་མི་གྲངས་ ༣༠༠ ལྷག་མཉམ་ཞུགས་བྱས་ཡོད་པ་དང་། ང་ཚོའི་དགོས་འདུན་ནི་འོས་འདེམས་སྐོར་ཡིན་ལ། དགོས་འདུན་འདི་བཏོན་ནས་ལས་འགུལ་སྤེལ་བ་ཐོག་དང་པོ་དང་། ང་ཚོས་དུས་དྲན་དང་བསྟུན་ནས་ངོ་རྒོལ་བྱས་པ་ཐེངས་ ༧ པ་དེ་རེད། འདས་པའི་ལོ་ ༦ ནང་གི་དགོས་འདུན་གཙོ་བོ་མི་མང་གི་འཚོ་བའི་གནད་དོན་སྐོར་རེད། དེང་སྐབས་ཨོ་མིན་མི་མང་ལ་དཀྱིལ་ཡངས་འདྲ་མཉམ་གྱི་འོས་འདེམས་ལམ་ལུགས་ཤིག་ཐོབ་པར་རེ་འདོད་ཤུགས་ཆེ་རུ་འགྲོ་བཞིན་ཡོད་ཀྱང་། ད་ལྟའི་ཆར་ཁོང་ཚོ་སོ་སོའི་མངོན་འདོད་ཁུར་ཏེ་ཕྱིར་ཐོན་ཐུབ་ཀྱི་མི་འདུག་པས། ང་ཚོས་བྱེད་ཐབས་འདྲ་མིན་གྱི་ཐོག་ནས་མི་མང་གི་དམངས་གཙོའི་འདུ་ཤེས་སྐུལ་སློང་བྱས་ཏེ། མ་འོངས་པའི་ལོ་གཅིག་ནང་སྔར་ལས་ནུས་ཤུགས་འདོན་ཐབས་བྱ་རྒྱུ་དང་། མ་འོངས་གནད་འགག་གི་དུས་སུ་གཉིད་ལས་སད་པའི་ཨོ་མིན་མི་མང་སོ་སོའི་མངོན་འདོད་ཀྱི་ཆེད་དུ་ཕྱིར་ཐོན་ཐུབ་པའི་རེ་བ་རྒྱག་གིན་ཡོད། ད་ལོ་སྔར་དང་མི་འདྲ་བར་མཉམ་ཞུགས་བྱེད་མཁན་མང་ཆེ་བ་གཞོན་སྐྱེས་དང་འབྱོར་འབྲིང་མི་སྣ་རེད། ང་ཚོ་སྲིད་གཞུང་ལྟེ་གནས་སུ་འབྱོར་སྐབས་ལ་བ་གྱོན་ཡོད་མེད་ཀྱི་ཉེན་རྟོག་པ་ ༡༠༠ ཕྲག་ལྷག་གིས་བཀོག་འགོག་བྱས་རྐྱེན། ལས་འགུལ་བ་ཚང་མ་མཛའ་མཐུན་སྤྱི་གླིང་དུ་འཛོམས་དགོས་བྱུང་། ཞེས་བརྗོད་འདུག
མཛད་སྒོའི་ཐོག་ཞི་ཅིན་ཕིན་གྱིས་དུས་དྲན་དང་འབྲེལ་བའི་གཏམ་བཤད་བྱེད་སྐབས། ངེས་པར་དུ་རྒྱལ་ཁབ་གཅིག་གི་རྩ་དོན་རྒྱུན་འཁྱོངས་དང་ལམ་ལུགས་གཉིས་ཀྱི་ཐུབ་ མིན་ཁྱད་ཆོས་ལ་བརྩི་བཀུར་བྱེད་དགོས་པ་མ་ཟད། རྒྱ་ནག་དབུས་གཞུང་གི་དབང་ཆ་སྲུང་སྐྱོང་དང་དམིགས་བསལ་སྲིད་འཛིན་ས་ཁུལ་གྱི་ ཚད་མཐོའི་རང་སྐྱོང་ཁེ་དབང་འགན་སྲུང་བྱེད་དགོས། རྒྱལ་ཁབ་ཀྱི་འཕེལ་རྒྱས་དང་བསྟུན་ཏེ་ཨོ་མིན་དང་ཧོང་ཀོང་གཉིས་ཀྱི་འགྲན་རྩོད་ ནུས་པ་མཉམ་འབྲེལ་བྱས་པ་ཡིན་ན། ད་གཟོད་བགྲོད་ལམ་མ་ནོར་བའི་སྒོ་ནས་བརྟན་བརླིང་ཡོང་ཐུབ། དེ་ལས་ལྡོག་ཚེ་ནོར་འཁྲུལ་འབྱུང་རྒྱུ་ཡིན་སྐོར་དང་། མ་འོངས་པར་དཀའ་རྙོག་ཅན་གྱི་གནས་ཚུལ་གསར་པ་ག་འདྲ་ཞིག་དང་འཕྲད་པ་ཡིན་ནའང་། དབུས་གཞུང་གིས་ཧོང་ཀོང་དང་ཨོ་མིན་ནང་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ བྱུས་ལག་བསྟར་བྱེད་བཞིན་པའི་ཆོད་སེམས་ཧ་ཅང་བརྟན་པོ་ཡིན་སྟབས། གནས་དུས་ཀྱི་དཀའ་རྙོག་ཙམ་གྱིས་ཆབ་སྲིད་ལ་འགྱུར་བ་གཏོང་མི་སྲིད་སྐོར་བརྗོད་ འདུག
ཡང་མཛད་སྒོའི་ཐོག་ཞི་ཅིན་ཕིན་གྱིས་གཅིག་ཨོ་མིན་དམིགས་བསལ་སྲིད་འཛིན་ས་ཁུལ་གྱི་ཁྲིམས་སྐྱོང་ནུས་པ་དང་ཆུ་ཚོད་མུ་མཐུད་གོང་མཐོར་གཏོང་དགོས་པ་དང་། གཉིས་གཅིག་གྱུར་གྱི་འཆར་གཞིའི་འོག་ཨོ་མིན་གྱི་དཔལ་འབྱོར་འཕེལ་རྒྱས་ལ་ཧུར་ཐག་གིས་སྐུལ་འདེད་བཏང་སྟེ་མུ་མཐུད་འཕེལ་རྒྱས་ཀྱི་ལམ་བར་སྐྱོད་ཐབས་བྱེད་དགོས་པ། གསུམ་རྨང་གཞི་འཛུགས་སྐྲུན་གྱིས་སྤྱི་ཚོགས་བརྟན་ལྷིང་ལ་ཧུར་བརྩོན་ཆེན་པོས་སྐུ་འདེད་གཏོང་བ་དང་། བཞི་མ་འོངས་པར་ཁ་ཕྱོགས་ཏེ་གཞོན་སྐྱེས་ཀྱི་སློབ་གསོའི་བྱ་བར་ཤུགས་སྣོན་རྒྱག་དགོས་པ་བཅས་ཀྱི་རེ་འདུན་བཏོན་འདུག
གསར་འགོད་པ། པདྨ་མཚོ།
་་་་་་་་་་་ དབུས་གཞུང་གིས་ཧོང་ཀོང་དང་ཨོ་མིན་ནང་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ བྱུས་ལག་བསྟར་བྱེད་བཞིན་པའི་ཆོད་སེམས་ཧ་ཅང་བརྟན་པོ་ཡིན་སྟབས། གནས་དུས་ཀྱི་དཀའ་རྙོག་ཙམ་གྱིས་ཆབ་སྲིད་ལ་འགྱུར་བ་གཏོང་མི་སྲིད་སྐོར་བརྗོད་ འདུག ་་་་་་་་་་ ཟེར།