ལྐོག་ཟ་རུལ་སུངས་ད་ལྟ་འཛམ་གླིང་ཐོག་སྐྲན་ནད་ལྟར་གང་སར་ཁྱབ་བཞིན་ཡོད།

ཁ་སང་༧གོང་ས་མཆོག་རྒྱ་གར་ལྷོ་ཕྱོགས་གྷེང་ལོར་ཏུམ་ཀོར་གཙུག་ལག་སློབ་གྲྭའི་བགྲོ་གླེང་དབུ་འབྱེད་དུ་ཕེབས་ཏེ། རྒྱ་གར་ནང་ལོ་སུམ་སྟོང་གོང་ནས་དར་བའི་ཆོས་ལུགས་རིས་མེད་ཀྱི་ལྟ་གྲུབ་དེས། ཆོས་ལུགས་ཚང་མར་གུས་བརྩི་ཞུ་བ་མ་ཟད། ཆོས་ཁས་མི་ལེན་མཁན་ཚོ་ལའང་གུས་འདུད་ཞུ་སྲོལ་ཡོད་སྟབས། དེང་གི་སྤྱི་ཚོགས་དང་ཧ་ཅང་འཚམ་པོ་ཆགས་ཡོད་ཅེས་གསུངས།

ཁ་སང་སྔ་དྲོའི་ཆུ་ཚོད་ ༡༠ ཡོལ་ཙམ་ལ་༧གོང་ས་མཆོག་རྒྱ་གར་ལྷོ་ཕྱོགས་བྷེང་ལོར་གྲོང་ཁྱེར་ནས་རྒྱང་ཐག་ཀི་ལོ་མི་ཌར་ ༧༠ ཙམ་གྱི་སར་རྟེན་གཞི་བྱས་པའི་ཏུམ་ཀོར་གཙུག་ལག་སློབ་གཉེར་ཁང་དུ། གཙུག་ལག་སློབ་ཁང་དང་སེར་བྱེས་མཁས་སྙན་གྲྭ་ཚང་ཐུན་མོང་གིས་གོ་སྒྲིག་ཞུས་པའི་༼སྟོང་ལོ་གསར་པའི་བཟང་སྤྱོད་དང་འབྲེལ་བའི་ནང་པའི་ལྟ་ཚུལ།༽ཞེས་པའི་བགྲོ་གླེང་དབུ་འབྱེད་དུ་ཆིབས་སྒྱུར་བསྐྱངས་ཡོད་ཅིང་། དེར་གཙུག་ལག་སློབ་ཁང་གི་ཉེ་བའི་རིགས་བདག་ར་ཇཱ་སབ་(A.H.Rajasab) མཆོག་དང་། ལོ་ན་ ༡༠༨ ལ་སོན་པའི་ཧིན་དྷུའི་བླ་ཆེན་ཤི་ཝ་ཀུ་མཱ་ར་ (Shree Shree Shree Shivakumara Maha Swamiji)མཆོག ཀཱ་ན་ཊ་ཀ་མངའ་སྡེའི་ཁྲིམས་དོན་བློན་ཆེན་ཇཱ་ཡཱ་ཅན་ཌ་ར་ (T.B. Jayachandra) མཆོག བྱང་རྩེ་ཆོས་རྗེ་དང་སེར་བྱེས་མཁན་རིན་པོ་ཆེ། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར། སེར་བྱེས་གྲྭ་ཚང་གི་བླ་སྤྲུལ་དགེ་བཤེས་བྷེང་ནོར་ཁུལ་གྱི་བོད་མི་བཅས་མི་ ༣༥༠༠ ལྷག་འདུ་འཛོམས་བྱུང་ཡོད་འདུག

བགྲོ་གླེང་ཐོག་༧གོང་ས་མཆོག་གིས་བཀའ་གནང་དོན། དེ་རིང་འདིར་ཧིན་དྷུའི་བླ་ཆེན་ཁོང་དང་མཇལ་རྒྱུ་བྱུང་བ་དགའ་པོ་ཞེ་དྲག་བྱུང་། དེ་སྔོན་ཁོང་དང་མཇལ་སྐབས་ཁོང་དགུང་གྲངས་བརྒྱ་བརྒལ་ཡོད་པ་མ་ཟད། ད་རེབ་སླར་ཡང་ཁོང་མཇལ་སྐབས་ང་ཡང་ལོ་བརྒྱ་ཙམ་སྡོད་དགོས་ཐུབ་རྒྱུ་ཡིན་བསམ་པའི་ཆོད་སེམས་ཤིག་རང་བཞིན་གྱིས་སྐྱེ་བཞིན་འདུག ངོས་ཀྱིས་བླ་ཆེན་ཁོང་ལ་སེམས་གཏིང་ནས་གུས་འདུད་ཞུ་ཡི་ཡོད། ཅེས་དང་། ཁོང་གིས། ད་ལྟའི་དུས་ཚོད་འདིར་མིའི་སྤྱི་ཚོགས་འདི་བདེ་ཞིང་སྐྱིད་པ་ཞིག་དགོས་ན། སྤྱིར་ཕྱི་དངོས་པོའི་མཐུན་རྐྱེན་ཧ་ཅང་གལ་ཆེན་པོ་ཆགས་ཡོད་ཀྱང་། དེ་གཅིག་པོས་འདང་གི་མེད་སྟབས། དེང་རབས་ཚན་རིག་པ་དང་སྒོས་སུ་ནད་བཅོས་སྲོག་སྐྱོབ་བྱེད་མཁན་གྱི་སྨན་དཔྱད་མཁས་པ་ཚོས་ཀྱང་ལུས་ཀྱི་འཕྲོད་བསྟེན་ཡག་པོ་ཡོང་བའི་རྒྱུ་རྐྱེན་གཙོ་བོ་ནི་སེམས་ཀྱི་ཞི་བདེར་རག་ལས་ཡོད་པ་ར་སྤྲོད་བྱས་ཡོད་སྟབས། ཇི་ཙམ་གྱི་བྱམས་བརྩེ་ཟབ་པའི་ཁྱིམ་ཚང་དབུལ་ཕྱུག་གང་ཡིན་ཡང་ནང་མི་ཉེ་འབྲེལ་དག་བདེ་ཞིང་སྐྱིད་པའི་ངང་མི་ཚེ་སྐྱེལ་བཞིན་ཡོད་ཀྱང་། ཇི་ཙམ་གྱི་ཁྱིམ་ཚང་སྟོབས་འབྱོར་ཆེ་བ་ཡོད་ཀྱང་བྱམས་བརྩེས་ཕོངས་པ་ཡིན་ན་ཁྱིམ་ཚང་དེའི་ནང་བདེ་སྐྱིད་ཡོང་མི་ཐུབ་པ་ནི་ཧ་ཅང་གསལ་པོ་ཡིན་སྟབས། ཕྱིའི་དངོས་པོ་ཡར་རྒྱས་ཆེ་རུ་ཕྱིན་ནས་ཕྱུག་པོ་ཆགས་པ་དེ་ཚོད་ཀྱིས་འདོད་རྔམས་དང་ཕྲག་དོག འགྲན་སེམས་སོགས་ཆེ་རུ་འགྲོ་རྒྱུ་ཡིན་པར་བརྟེན། སེམས་ནང་དངངས་སྐྲག་ཆེ་རུ་དང་སེམས་ངལ་ཆེན་པོ་ཡོང་བཞིན་ཡོད་པ་དེ་ནི་དཀའ་ངལ་དེ་དག་གི་གཞི་རྩ་ཆགས་ཡོད་སྟབས། ཕྱི་དངོས་པོའི་འཛུགས་སྐྲུན་དང་ཡར་རྒྱས་གཅིག་པུས་འཛམ་གླིང་དང་སེམས་ལ་ཞི་བདེ་བསྐྲུན་མི་ཐུབ་པ་གསལ་པོ་ཡིན། དེང་སྐབས་ཆོས་ལུགས་ལ་བརྟེན་ནས་འཚེ་བའི་བྱ་སྤྱོད་དང་དྲག་སྤྱོད་ཀྱི་ལས་འགུལ་སྤེལ་བཞིན་ཡོད་པ་དག་ཀྱང་མཐར་གཏུགས་ན་དངུལ་དང་དབང་ཆའི་འཐབ་རྩོད་ཅིག་ཆགས་ཡོད་སྟབས། ང་ཚོས་མང་ཚོགས་ལ་སློབ་གསོ་སྤྲད་ནས་ཕྱི་དངོས་པའི་འཛུགས་སྐྲུན་ཡར་རྒྱས་གལ་ཆེན་ཡིན་ཡང་ནང་གི་ཤིས་བརྒྱུད་དང་འབྲེལ་བའི་བཟང་པོའི་རིན་ཐང་དེ་དག་སྣང་མེད་དུ་བཞག་ན་འགྲིག་ཐབས་རྩ་བ་ནས་མེད་པ་སློབ་གསོ་རྒྱག་དགོས། ཞེས་གསུངས་འདུག

ཆོས་ལུགས་ཕན་ཚུན་མཐུན་སྒྲིལ་བྱས་ནས་འཛམ་གླིང་སྤྱི་ཡོངས་ལ་ཕན་བདེ་སྐྲུན་ཐབས་སྐོར་གསུངས་དོན། ཆོས་ལུགས་བྱེ་བྲག་པ་ཞིག་ཇི་ཙམ་ཡག་པོ་དང་སྤུས་ཚད་ལྡན་ཡང་འགྲོ་བ་མི་རིགས་ཚང་མར་ཁྱབ་ཐུབ་ཐབས་མེད་སྟབས། འགྲོ་བ་མི་རིགས་ཐེར་འབུམ་བདུན་ནས་ཐེར་འབུམ་གཅིག་གིས་ཆོས་ཁས་ལེན་བྱེད་ཀྱི་མེད་པ་ནི་དངོས་ཡོད་གནས་ཚུལ་ཞིག་ཆགས་ཡོད་ཀྱང་། ཆོས་ཁས་ལེན་མཁན་ཚོའི་ནང་ལ་ཆ་བཞག་ན། དཔེར་ན་བོད་པའི་ཆོས་བྱེད་དགེ་འདུན་པའི་ཁྲོད་དུ་ཚུལ་དང་མི་མཐུན་པ་བྱེད་མཁན་ཡོད་ལ། ཡེ་ཤུ་སོགས་ཆོས་ལུགས་གཞན་ནང་ལའང་ཚུལ་མིན་བྱེད་མཁན་དེ་འདྲ་ཡོད་སྟབས། ཆོས་ཁ་ལ་འཁྱེར་བ་མ་གཏོགས་ཆོས་དངོས་སུ་ལག་ལེན་མི་བསྟར་མཁན་ཆོས་ལུགས་ཚང་མའི་ནང་ཡོད། དེ་ནི་ཆོས་ལ་བསམ་པ་རྣམ་དག་བྱས་ནས་ལག་ལེན་བསྟར་རྒྱུའི་འདུན་པ་མེད་པར་བརྟེན་ནས་ཡོང་གི་ཡོད་སྟབས། ང་ཚོས་དྲང་བདེན་དང་བྱམས་བརྩེ་སོགས་ལྟ་གྲུབ་དེ་དག་ལག་བསྟར་བྱ་རྒྱུ་གལ་ཆེན་པོ་ཆགས་ཡོད། ཅེས་གསུངས་འདུག

༧གོང་ས་མཆོག་གིས་ལྐོག་ཟ་རུལ་སུངས་སྐོར་གསུངས་དོན། ད་ལྟ་འཛམ་གླིང་ནང་ལྐོག་ཟ་རུལ་སུངས་ཀྱི་དཀའ་ངལ་དེ་སྐྲན་ནད་ལྟ་བུ་ཞིག་ཆགས་ཏེ། མི་མང་ཆེ་བས་སོ་སོ་མ་གཏོགས་གཞན་ལ་བསམ་བློ་མི་གཏོང་མཁན་ཞིག་ཆགས་ཡོད་སྟབས། དབུལ་ཕྱུག་དབར་བར་ཁྱད་ཆེན་པོ་ཆགས་ཡོད་པ་འདི་ནི་འགྲོ་བ་མིའི་རིགས་ཀྱི་བཟང་སྤྱོད་དང་མཐུན་གྱི་མེད། དེ་ནི་བྱམས་བརྩེས་མ་འདང་པར་བརྟེན་ནས་བྱུང་བ་ཞིག་ཡིན་པ་མ་ཟད། དཀའ་ངལ་དེ་དག་མང་ཆེ་བ་མིས་བཟོས་པ་ཤ་སྟག་ཡིན་པར་བརྟེན། འགྲོ་བ་མི་རིགས་སྤྱི་ཡོངས་ཀྱིས་འབད་བརྩོན་བྱས་ནས་སེལ་ཐུབ་རྒྱུ་ཡིན་པ་ནི་ཆོས་ཉིད་ཅིག་ཡིན་སྟབས། ང་ཚོ་ཆོས་ལུགས་ཚང་མ་ལྟ་གྲུབ་མི་འདྲ་བ་ཆགས་ཡོད་ཀྱང་། གཞི་རྩའི་ཆོས་ལུགས་ཚང་མའི་སྒྲུབ་བྱ་ནི་གཞན་ཕན་དང་བཟང་སྤྱོད་ཀྱི་ནུས་པ་གོང་མཐོར་གཏོང་ཐབས་ཡིན་སྟབས། ཐུན་མོང་དང་མཉམ་རུབ་བྱས་ནས་དཀའ་ངལ་དེ་དག་སེལ་ཐུབ་པ་བྱེད་དགོས་པ་ལས་ཆོས་ལུགས་བྱེ་བྲག་ཅིག་ལ་གཞི་བཅོལ་ན་དཀའ་ལས་ཁག་པོ་དང་ཧ་ལམ་བསྒྲུབ་མི་སྲིད་པ་ཞིག་ཡིན་སྟབས། རྒྱ་གར་ནང་འདས་པའི་མི་ལོ་གསུམ་སྟོང་རིང་ཆོས་ལུགས་རིས་མེད་ཀྱི་བཟང་སྤྱོད་ (Secular Ethics) ཀྱི་ལྟ་གྲུབ་ཐོག་མ་གསར་གཏོད་བྱུང་ཡོད་སྟབས། ཆོས་ལུགས་ཚང་མར་གུས་བརྩི་ཞུ་བ་མ་ཟད། ཆོས་ཁས་མི་ལེན་མཁན་ཚོ་ལའང་གུས་འདུད་ཞུ་སྲོལ་ཡོད་པར་བརྟེན། འདི་ནི་དེང་དུས་སྤྱི་ཚོགས་ཀྱི་གནས་སྟངས་དང་ཧ་ཅང་འཚམ་པོ་ཆགས་ཡོད་པར་བརྟེན། འཛམ་གླིང་གི་མི་འབོར་ཐེར་འབུམ་བདུན་ཡོད་པ་རྣམས་ལ་ཆོས་ལུགས་རིས་མེད་ཀྱི་ལྟ་གྲུབ་གཅིག་སྤེལ་དགོས་ན་རྒྱ་གར་གྱི་གནའ་རབས་རིག་གཞུང་འདིས་ཕན་ཐོགས་བྱེད་ཐུབ་ངེས་ཡིན། ཞེས་སོགས་གསུངས་འདུག

ཁ་སང་ཉིན་རྒྱབ་༼སྟོང་ལོ་གསར་པའི་བཟང་སྤྱོད་དང་འབྲེལ་བའི་ནང་པའི་ལྟ་ཚུལ༽ཞེས་པའི་བརྗོད་གཞིའི་ཐོག་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། བྷེང་ལོར་ནང་རྟེན་གཞི་བྱས་པའི་ཝུ་ཇེ་ཡ་ཎཱ་གྷ་ར་ (Shri Vijayanagara Krishnadevaraya University) གཙུག་ལག་སློབ་གཉེར་ཁང་གི་ཉེ་བའི་རིགས་བདག་སོ་མཱ་ཤེ་ཀར་ (Prof.J.Somashekar)སོགས་རིགས་གཅིག་མཁས་དབང་དང་ཉམས་ཞིབ་པ་ ༡༤ ལྷག་གིས་བགྲོ་གླེང་གནང་དང་གཏམ་བཤད་གནང་ཡོད་པ་དང་། སང་ཉིན་ནས་བཟུང་ཟླ་འདིའི་ཚེས་ ༢༩ བར་༧གོང་ས་མཆོག་གིས་མོན་གྷོ་འདོད་རྒུ་གླིང་དུ་རྗེ་ཙོང་ཁ་པ་ཆེན་པོས་མཛད་པའི་བྱང་ཆུབ་ལམ་རིམ་གསུང་ཆོས་བསྩལ་རྒྱུ་ཡིན་འདུག

གསར་འགོད་པ། དོན་གྲུབ།