ཡེ་ཤུའི་ཆོས་རྟཊ་ ༤༠༠ ལྷག་གཏོར།

ཁ་སང་ཨ་རིའི་ཡེ་ཤུའི་ཆོས་ལུགས་མཐུན་ཚོགས་ནས་ད་ལོར་རྒྱ་གཞུང་གིས་ཁྱོན་ཡེ་ཤུའི་ལྷ་ཁང་བརྒྱ་ལྷག་དང་ཆོས་རྟགས་ ༤༠༠ ལྷག་གཏོར་བཤིག་བཏང་ཡོད་སྐོར་བསྒྲགས་འདུག

ཡེ་ཤུའི་འཁྲུངས་སྐར་དུས་ཆེན་དང་བསྟུན་ཏེ་ཁ་སང་ཨ་རིའི་ཊི་ཨེ་སི་མངའ་སྡེ་ནང་ཡོད་པའི་ཡེ་ཤུའི་ཆོས་ལུགས་མཐུན་ཚོགས་(China Aid)ཀྱི་དྲ་བའི་ཐོག རྒྱ་ནག་ནང་ཡེ་ཤུའི་ཆོས་ལུགས་ལ་སྔར་ལས་བཀག་སྡོམ་ཆེན་པོ་བྱེད་ཀྱིན་ཡོད་པའི་སྐོར་གྱི་གནས་ཚུལ་ཞིག་སྤེལ་བའི་ནང་། ལོ་ ༢༠༡༣ ལོའི་ལོ་མཇུག་ནས་བཟུང་རྒྱ་ནག་ཀྲེ་ཅང་ཞིང་ཆེན་ཡོངས་སུ་༼ཁྲིམས་འགལ་གྱིས་ལྷ་ཁང་འཛུགས་སྐྲུན་བྱས་པ་ལེགས་སྒྲིག༽་ཅེས་པའི་ལས་འགུལ་འོག ད་ལོ་གཅིག་པུར་ཁྱོན་ཡེ་ཤུའི་ལྷ་ཁང་བརྒྱ་ལྷག་དང་། ཡེ་ཤུའི་ཆོས་རྟགས་ ༤༠༠ ལྷག་བཙན་གཏོར་བཏང་ཡོད་སྟབས། ད་ལོར་རྒྱ་ནག་ནང་གི་ཡེ་ཤུ་བ་ཚོས་ཡེ་ཤུའི་འཁྲུངས་སྐར་དུས་ཆེན་སྔོན་ཆད་བཞིན་སྲུང་གཙི་བྱེད་ཐུབ་ཀྱི་མེད་སྐོར་བསྒྲགས་འདུག

ཡེ་ཤུའི་ཆོས་ལུགས་མཐུན་ཚོགས་དེའི་མགོ་ཁྲིད་བྷོ་ཤི་ཆོ་ཡིས་གསར་འགོད་པར། གཏོར་བཤིག་བཏང་བའི་ནང་ཡེ་ཤུའི་གནམ་བདག་ཆོས་ལུགས་ཀྱི་ལྷ་ཁང་འགའ་ཤས་ཡོད་པ་དང་། མང་ཆེ་བ་ཡེ་ཤུའི་ཆོས་ལུགས་གསར་པའི་ལྷ་ཁང་ཡིན་ལ། གཏོར་བཤིག་གཏོང་མཁན་གྱི་གྲས་སུ་སྲིད་གཞུང་ཆོས་ལུགས་ལྷན་ཁང་དང་གསང་བའི་ཆོས་ལུགས་མཐུན་ཚོགས་སོགས་ཡོད་པ་དང་། ལྷ་ཁང་གཏོར་བཤིག་ཡོང་བའི་ལས་འགུལ་དེ་ས་གནས་ཡེ་ཤུའི་ཆོས་ལུགས་ཀྱི་མྱུར་ཚད་མཐོ་བའི་འཕེལ་རྒྱས་ལ་སྟངས་འཛིན་བྱེད་པའི་ཆེད་དུ་རེད། སྲིད་གཞུང་གི་ཡིག་ཆའི་ནང་དུའང་ག་རེ་བྱས་ནས་ཡེ་ཤུའི་ཆོས་ལུགས་ལ་བཀག་སྡོམ་བྱེད་པའི་ལས་འགུལ་ཀྲེ་ཅང་དུ་སྤེལ་བ་དང་། ལྷག་པར་དུ་ཝིན་ཀྲུའུ་གྲོང་ཁྱེར་དུ་ཅིའི་ཕྱིར་སྤེལ་བ་རེད་ཟེར་ན། ཝིན་ཀྲུའུ་ནི་རྒྱ་ནག་གི་ཡེ་ཤུའི་ཆོས་པ་ཆེས་མང་ཞིང་། རྒྱལ་ཡོངས་ནང་ཡེ་ཤུའི་ཆོས་ལུགས་འཕེལ་རྒྱས་ཧ་ཅང་མགྱོགས་པའི་སྔོན་ཐོན་ས་ཁུལ་ཞིག་ཡིན་པའི་རྐྱེན་གྱིས་རེད་ཅེས་བཀོད་ཡོད་སྐོར་བརྗོད་འདུག

ཡང་ཁོང་གིས་སྲིད་གཞུང་གིས་བྱེད་ཐབས་གསུམ་གྱི་ཐོག་ནས་ཡེ་ཤུའི་ཆོས་ལུགས་བཀག་སྡོམ་བྱེད་ཀྱི་ཡོད་སྐོར་བརྗོད་དོན། ཀྲེ་ཅང་ཞིང་ཆེན་གྱི་མགོ་ཁྲིད་ཤཱ་པོ་ལུང་གིས་གཏན་འབེབས་བྱས་པའི་གཅིག་གཏོར་གསུམ་བཅོས་ཀྱི་སྲིད་ཇུས་ལ་དབུས་གཞུང་གིས་ཆོག་མཆན་སྤྲད་ཡོད་པར་འདོད་པ་དང་། སྲིད་གཞུང་གིས་ཡེ་ཤུའི་ལྷ་ཁང་གཏོར་བཤིག་བཏང་བ་ཁོ་ན་མ་ཡིན་པར་གཅིག་ནས་ཆོས་ལོག་སྤེལ་བའི་ཉེས་མིང་འོག གཞུང་འབྲེལ་མ་ཡིན་པའི་ཆོས་ཚོགས་ཁག་ལ་དམ་དྲག་དང་། གཉིས་ནས་ཆོས་ཚོགས་ཆེ་གྲས་ཀྱི་དབུ་ཁྲིད་ལ་གནོན་ཤུགས་སྤྲོད་པ་དང་འཛིན་བཟུང་བྱས་པའི་གནས་སྟངས་ན་ནིང་ལས་ཚབས་ཆེ་རུ་ཕྱིན་ཡོད། གསུམ་ནས་གཞོན་སྐྱེས་ཚོས་དད་མོས་ལ་དམ་དྲག་བྱས་ཏེ་ལོ་ན་ ༡༨ མན་གྱི་ན་གཞོན་ཚོར་ཆོས་འཆད་ཁྲིད་མི་ཆོག་པ་མ་ཟད། ས་གནས་སྲིད་གཞུང་དང་སློབ་གྲྭ་ཁག་གིས་སློབ་གྲྭ་ཆུང་འབྲིང་གི་སློབ་མར་ཆོས་མེད་སྨྲ་བའི་ལྟ་གྲུབ་དྲིལ་བསྒྲགས་དགོས་པའི་བཀའ་རྒྱ་བཏང་ཡོད་པ་རེད། ཅེས་བརྗོད་འདུག

རྒྱ་ནག་ཀྲེ་ཅང་ཞིང་ཆེན་ཝིན་ཀྲུའུ་གྲོང་ཁྱེར་ནི་ཡེ་ཤུའི་ལྷ་ཁང་ཆེས་མང་བའི་གྲོང་ཁྱེར་ཞིག་ཡིན་པ་དང་། ས་གནས་ཀྱི་ཚོང་པ་མང་པོ་ཡང་ཡེ་ཤུ་ཆོས་པ་ཡིན་པས་ལྷ་ཁང་འཛུགས་སྐྲུན་གྱི་མ་དངུལ་ཕོན་ཆེན་གཏོང་བཞིན་ཡོད་སྟབས། སན་ཅང་ལྷ་ཁང་སོགས་ལྷ་ཁང་ཁག་ཅིག་གི་འཛུགས་སྐྲུན་གཞི་རྒྱ་ཆེན་པོ་ཡོད་འདུག ཕྱི་ལོ་ ༢༠༡༣ ལོར་གསར་དུ་ལེགས་འགྲུབ་བྱུང་བའི་སན་ཅང་ལྷ་ཁང་ལ་ཁྱོན་ཡུ་སྒོར་ཁྲི་ ༣༥༠ ལྷག་གི་འགྲོ་གྲོན་བཏང་ཡོད་པ་དང་། ས་གནས་ཀྱི་དཔེ་མཚོན་རང་བཞིན་ལྡན་པའི་ལྷ་ཁང་ཞིག་ཏུ་ངོས་འཛིན་བྱེད་ཀྱི་ཡོད་འདུག ཡིན་ནའང་། ལེགས་འགྲུབ་བྱུང་མ་ཐག་སྲིད་གཞུང་གིས་གཞུང་གི་ཆོག་མཆན་ཐོབ་མེད་པའི་ཉེས་འཛུགས་འོག འདི་ལོའི་ཕྱི་ཟླ་ ༤ ཚེས་ ༢༦ ཉིན་བཙན་དབང་གིས་ལྷ་ཁང་གཏོར་བཤིག་བཏང་བ་མ་ཟད། ས་གནས་ཀྱི་ཡེ་ཤུའི་ལྷ་ཁང་གཞན་མང་པོར་ཡང་བསྟུད་མར་གཏོར་བཤིག་བཏང་སྟེ་ཡེ་ཤུའི་ཆོས་པ་མང་པོར་ཕོག་ཐུག་ཆེན་པོ་བཟོས་བར་བརྟེན། ཡེ་ཤུའི་ཆོས་ཚོགས་མང་པོ་མཉམ་རུབ་ཀྱིས་སྲིད་གཞུང་གི་ལས་འགུལ་ལ་ངོ་རྒོལ་ཁྲོམ་སྐོར་བྱས་ཏེ། ཉེན་རྟོག་པ་དང་མི་མང་བར་ཟིང་འཁྲུག་ཐེངས་མང་བྱུང་ཡོད་པ་མ་ཟད། ས་གནས་ཀྱི་ཆོས་པ་མང་པོ་འདུ་འཛོམས་ཀྱིས་ཉིན་མཚན་གཉིས་སུ་ལྷ་ཁང་སྐོར་སྲུང་བྱེད་པ་སོགས་ཀྱི་བྱ་འགུལ་ཡང་སྤེལ་ཡོད་འདུག

གསར་འགོད་པ། པདྨ་མཚོ།