ཀྲང་ཁུན་ཧྲིན་ལ་ཞིབ་བཤེར།

ལཱ་ཌེན་ཨ་རིའི་ནང་༧གོང་ས་མཆོག་ལ་ངོ་རྒོལ་དང་བོད་དོན་ལ་འཁྱོག་བརྗོད་བྱེད་མཁན་རྒྱ་ནག་ཕྱི་འབྲེལ་ལྷན་ཁང་གི་འགན་འཛིན་ལས་རོགས་ཀྲང་ཁུན་ཧྲིན་ལ་ཞིབ་བཤེར་བྱེད་བཞིན་ཡོད་འདུག

དེ་རིང་རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པས་གསར་ལམ་དུ་བརྗོད་པ་ལྟར་ན། རྒྱ་ནག་ཕྱི་འབྲེལ་ལྷན་ཁང་གི་འགན་འཛིན་ལས་རོགས་ཀྲང་ཁུན་ཧྲིན་རྒྱལ་ཁབ་ཀྱི་ཁྲིམས་དང་འགལ་བའི་དོགས་གཞིའི་འོག ལས་གནས་ནས་ཕྱིར་འབུད་བཏང་སྟེ་ཞིབ་བཤེར་བྱེད་བཞིན་ཡོད་ལུགས་བརྗོད་འདུག་ཀྱང་། ཁོ་བོས་ཁྲིམས་འགལ་ནག་ཉེས་ག་རེ་བྱས་ཡོད་མེད་གསལ་བོ་བརྗོད་མེད་པ་རེད།

ཀྲང་ཁུན་ཧྲིན་ནི་རྒྱ་ནག་ཧྲན་ཞི་ཞིང་ཆེན་ནས་ཡིན་པས། ཉེ་སྔོན་ཁྲིམས་བཤེར་བྱེད་མགོ་བརྩམས་པའི་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་འགན་འཛིན་ལིན་ཅི་ཧྭ་ཡི་ཉེས་དོན་དང་འབྲེལ་བ་ཡོད་པའི་ཚོད་དཔག་བྱེད་ཀྱི་ཡོད་པ་དང་། རྒྱ་ནག་ཕྱི་འབྲེལ་ལྷན་ཁང་གི་ལས་བྱེད་ཅིག་གིས་ཟླ་ཕྱེད་ཙམ་གྱི་གོང་ནས་བཟུང་སྒྲིག་ཁྲིམས་ཞིབ་བཤེར་ཁང་གིས་ཀྲང་ཁུན་ཧྲིན་ལ་ཞིབ་བཤེར་བྱེད་མགོ་བརྩམས་ཡོད་སྐོར་བརྗོད་འདུག

ཀྲང་ཁུན་ཧྲིན་གྱིས་ལོ་ངོ་ ༢༩ རིང་རྒྱ་ནག་ཕྱི་འབྲེལ་ལྷན་ཁང་ནང་ལས་ཀ་བྱས་ཡོད་པ་དང་། ལོ་མང་རིང་ཨ་རིར་ཡོད་པའི་རྒྱ་ནག་གཞུང་ཚབ་ཁང་གི་དྲུང་ཆེ་དང་ངེས་སྟོན་པའི་ལས་ཀ་གཉེར་ཏེ། རྒྱ་ནག་གི་སྲིད་འཛིན་ཅང་ཙེ་མེན་དང་སྲིད་བློན་ཟུར་པ་ཀྲུའུ་རོང་ཅི། ཨ་རིའི་སྲིད་འཛིན་ཟུར་པ་ཁི་ལིན་ཏོན་སོགས་ཨ་རྒྱ་བར་གྱི་མགོ་ཁྲིད་མང་པོ་མཇལ་མོལ་བྱེད་པར་འབྲེལ་མཐུད་ཀྱི་ལས་ཀ་བྱས་ཡོད་པ་དང་། ཕྱི་ལོ་ ༢༠༠༣ ལོར་ཁོ་བོ་རྒྱ་ནག་ཕྱི་འབྲེལ་ལས་སྒྲུབ་ཁང་གི་ངེས་སྟོན་པ་དང་ ༢༠༠༧ ལོར་ཕྱི་འབྲེལ་ལྷན་ཁང་མགྲོན་གཉེར་སྡེ་ཚན་གྱི་འགན་འཛིན་སོགས་ལས་འགན་འཁུར་ཡོད་པ་དང་། ཕྱི་ལོ་ ༢༠༡༡ ལོར་ལས་གནས་འཕར་ཏེ་ཕྱི་འབྲེལ་ལྷན་ཁང་གི་འགན་འཛིན་ལས་རོགས་སུ་བསྐོ་བཞག་བྱས་ཏེ། ལྷོ་ཨ་མེ་རི་ཁ་ཁུལ་གྱི་ཕྱི་འབྲེལ་ལས་ཀའི་གཙོ་འགན་འཁུར་ནས་གྲུབ་འབྲས་གཟེངས་སུ་ཐོན་ཡོད་པ་མ་ཟད། རྒྱ་ནག་ཕྱི་འབྲེལ་ལྷན་ཁང་གི་འགན་འཛིན་ལས་རོགས་བཞི་ཡི་ནང་ནས་ཨང་དང་པོར་རྩི་བ་ཞིག་ཡིན་འདུག

འདས་ལོའི་ཕྱི་ཟླ་ ༥ པའི་ནང་འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་ལྷོ་ཨ་མེ་རི་ཁའི་འབྲེལ་མཐུད་པ་ཚེ་དབང་ཕུན་ཚོགས་ལགས་སུ། ལཱ་ཌེན་ཨ་མེ་རི་ཁའི་རྒྱ་ནག་གཞུང་ཚབ་པ་དང་རྒྱ་རིགས་ཚོས་བོད་དོན་ཐོག་ལྟ་སྟངས་ག་འདྲ་ཡོད་མེད་བཅར་འདྲི་ཞུ་སྐབས་ཁོང་གིས། ས་གནས་རྒྱ་རིགས་དེ་ཚོས་ནམ་རྒྱུན་༧གོང་ས་མཆོག་ཡུལ་དེའི་ནང་གདན་ཞུ་དང་མཇལ་འཕྲད་བྱས་ན་འགྲིག་གི་མ་རེད་ཟེར་བ་དང་། མཐོ་རིམ་སློབ་གྲྭ་ཁག་ནས་༧གོང་ས་མཆོག་གདན་འདྲེན་ཞུ་སྐབས་གནོན་ཤུགས་སྤྲོད་ཀྱི་ཡོད་པ་རེད། ལྷག་པར་དུ་བར་སྐབས་ནས་ལཱ་ཌེན་ཨ་རིའི་ནང་རྒྱ་གཞུང་གིས་གཞུང་འབྲེལ་ལྟ་སྐོར་ཚོགས་པ་ཆེད་གཏོང་གིས། ང་ཚོར་འབྲེལ་བ་ཡོད་པའི་མཐོ་རིམ་སློབ་གྲྭ་ཚང་མའི་ནང་སྐོར་སྐྱོད་དང་གཏམ་བཤད་བྱེད་ཀྱི་ཡོད་སྟབས། ཆབ་སྲིད་ཀྱི་ཐོག་ནས་ལཱ་ཌེན་ཨ་རིའི་རྒྱལ་ཁབ་ཁག་གི་ནང་མངོན་གསལ་དོད་པོས་བོད་དོན་ལ་རྒྱབ་སྐྱོར་བྱེད་མཁན་ཇེ་ཉུང་དུ་འགྲོ་བཞིན་ཡོད་སྐོར་བརྗོད་བྱུང་།

གསར་འགོད་པ། པདྨ་མཚོ།