ཁ་སང་པ་ཀི་སི་ཐན་གྱི་མཐའ་སྲུང་དམག་མིས་རྒྱ་གར་གྱི་མཐའ་མཚམས་སྒར་ས་ཁག་ཅིག་ལ་མེ་སྒྱོགས་འཕངས་ཡོད་སྟབས་རྒྱ་གར་གྱི་ཡུལ་མི་ཁྲི་གཅིག་ལྷག་ས་ཆ་གཞན་ལ་ཉེན་ཡོལ་འགྲོ་དགོས་བྱུང་འདུག
ཁ་སང་རྒྱ་གར་ཇམ་མུ་ཀཱ་ཤཱེ་མཱེར་མངའ་སྡེའི་མཐའ་སྲུང་དམག་མིས་པ་ཀི་སི་ཐན་གྱི་སེལ་ཀཱོ་ཌེ་གྲོང་ཁྱེར་ཉེ་འདབས་སུ་མེ་སྒྱོགས་འཕངས་ཏེ་པ་ཀི་སི་ཐན་གྱི་མི་སེར་བཞི་དང་དམག་མི་གཉིས་བསད་ཡོད་སྟབས། པ་ཀི་སི་ཐན་མཐའ་སྲུང་དམག་མིས་རྒྱ་གར་ཇམ་མུ་ཀཱ་ཤེ་མཱེར་མངའ་སྡེའི་སཱམ་བྷ་དང་ཀཱ་དྷོ་ས་ཁུལ་གཙོས་མཐའ་མཚམས་ཀྱི་སྒར་ས་ ༡༥ ཙམ་ལ་མེ་སྒྱོགས་འཕངས་ཏེ་མཐའ་སྲུང་དམག་མི་གཅིག་བསད་དེ་འཁོན་ལན་སློག་ ཡོད་སྟབས། རྒྱ་གར་མཐའ་མཚམས་ཁུལ་གྱི་ཡུལ་མི་ ༡༠༠༠༠ ལྷག་ས་ཆ་གཞན་ལ་ཉེན་ཡོལ་འགྲོ་དགོས་བྱུང་ཡོད་འདུག
འདིའི་ཐད་རྒྱ་གར་བདེ་སྲུང་བློན་ཆེན་མཱ་ཎོ་ཧར་(Manohar Parrikar) གྱིས་རྒྱ་གར་གྱི་གསར་ལམ་ཁག་ཏུ་བརྗོད་དོན། “ པ་ཀི་སི་ཐན་གཞུང་གིས་རྒྱལ་ཁབ་གཉིས་བར་གྲོས་མཐུན་ལ་རྒྱབ་བརྒལ་བྱས་ཏེ་ས་མཚམས་ཁུལ་དུ་རྙོག་གྲ་ཇེ་ཆེར་བཏང་ཚེ། ང་ཚོས་ས་མཚམས་ཁུལ་དུ་དམག་མི་ལྡབ་གཉིས་སྤར་ནས་པ་ཀི་སི་ཐན་ལ་ཁ་གཏད་གཅོག་རྒྱུ་ཡིན”ཞེས་བརྗོད་འདུག
པ་ཀི་སི་ཐན་བདེ་སྲུང་བློན་ཆེན་གྱིས་པ་ཀི་སི་ཐན་གྱི་སྐྱ་རེངས་ཞེས་པའི་གསར་ལམ་ཐོག་བརྗོད་དོན། “ང་ཚོས་འདས་པའི་ཟླ་དྲུག་བདུན་རིང་རྒྱ་གར་དང་འབྲེལ་ལམ་བཟང་དུ་གཏོང་རྒྱུར་ཐབས་ཤེས་གང་ཡོང་བྱས་ཀྱང་། རྒྱ་གར་གཞུང་གིས་མགོ་འཚོས་ཀྱི་མེད་སྟབས་ང་ཚོས་ཐབས་ལམ་གཞན་ཞིག་བརྒྱུད་དེ་རྒྱ་གར་གཞུང་ལ་གོ་བརྡ་སྤྲོད་ཐབས་བྱེད་རྒྱུ་ཡིན”ཞེས་བརྗོད་འདུག
དེ་རིང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་ལྕམ་ཇན་པ་སཱ་ཀི་ (Jen Psaki) ཡིས་གྷར་ཌིན་གསར་ལམ་ཐོག་བརྗོད་དོན། “ཨ་རིས་རྒྱ་གར་དང་པ་ཀི་སི་ཐན་རྒྱལ་ཁབ་གཉིས་བར་གྱི་ས་མཚམས་རྩོད་ཉོག་ཐད་སེམས་ཁྲལ་བྱེད་བཞིན་ཡོད་སྟབས། ཕྱོགས་གཉིས་པོས་གྲོས་མོལ་བརྒྱུད་དཀའ་རྙོག་སེལ་རྒྱུར་རེ་སྐུལ་ཞུ་བཞིན་ ཡོད”ཅེས་དང་། རྒྱ་གར་གཞུང་གི་གསང་བའི་ལས་ཁུངས་ཀྱིས། “པ་ཀི་སི་ཐན་གྱིས་ཨཱ་ར་ཧྥིན་མཚོ་ཐོག་ཏུ་བཏང་བའི་གྲུ་གཟིངས་དེ་ནི་རྒྱ་གར་ལ་དུས་ཚོད་ངེས་མེད་དྲག་སྤྱོད་ལས་འགུལ་སྤེལ་བར་བཏང་བ་ཞིག་ཡིན་སྟབས། ང་ཚོས་ད་ལྟ་རྒྱལ་ནང་གི་བདེ་འཇགས་ལ་ལྟ་སྲུང་ནན་མོ་བྱེད་ཀྱིན་ཡོད”ཅེས་སོགས་བརྗོད་འདུག
རྒྱ་གར་སྲིད་འཛིན་གྱི་ལས་འཁུར་དམ་འབུལ་སྐབས་པ་ཀི་སི་ཐན་གྱི་སྲིད་བློན་ནཱ་ཝ་སེ་ཤཱ་རེབ་མཛད་སྒོར་བཞུགས་ཏེ། ནཱ་རེན་ཌ་མུ་དྷེ་མཆོག་དང་ཐུག་ནས་ཁྱིམ་མཚེས་རྒྱལ་ཁབ་གཉིས་བར་མཉམ་ལས་བྱེད་ཤུགས་ཆེ་རུ་བཏང་སྟེ། འདས་ལོའི་ཟླ་ ༨ ནང་པ་ཀི་སི་ཐན་གྱི་རྒྱལ་སར་རྒྱ་གར་དང་པ་ཀི་སི་ཐན་གྱི་ཕྱི་སྲིད་དྲུང་ཆེ་རྣམ་ གཉིས་བར་ས་མཚམས་རྩོད་རྙོག་སྐོར་ལ་གྲོས་མོལ་གནང་རྒྱུ་ཐག་གཅོད་བྱས་ཡོད་ཀྱང་། པ་ཀི་སི་ཐན་གྱི་གཞུང་ཚབ་པ་ཨབ་དྷོལ་ (Abdul Basit) ལགས་ཀྱིས་ཀཱ་ཤི་མཱེར་རྒྱ་གར་ལས་ལོགས་སུ་ཁ་བྲལ་རྩོད་ལེན་བྱེད་མཁན་ཇ་མུ་ཀཱ་ཤི་མཱེར་གྱི་དམངས་གཙོ་རང་དབང་ཚོགས་པའི་མགོ་གཙོ་ཤཱ་བྷེར་ (Shabir Shah) དང་ཐུག་འཕྲད་བྱས་ཡོད་སྟབས། རྒྱ་གར་གཞུང་གིས་གྲོས་མོལ་ཕྱིར་འཐེན་བྱས་པར་བརྟེན། པ་ཀི་སི་ཐན་ཁོང་ཁྲོ་ལངས་ནས་རྒྱ་གར་གྱི་ས་མཚམས་ཁུལ་དུ་དམག་མི་ཕོན་ཆེ་འགྲེམས་འཇོག་བྱས་ཡོད།
གསར་འགོད་པ། དོན་གྲུབ།
ནོ་བྷེལ་གཟེངས་རྟགས་གཏིང་བརྗེད་ཟིན་པ་ཡིན་ནམ། ཡང་ན། ཞི་བདེ་ཞིག་འོངས་སྲིད་དམ། གང་མྱུར་ཞི་འགྲིགས་ཡོང་བའི་སྨོན་ལམ་ཡོད།
རྒྱ་གར་གྱིས་ནམ་རྒྱུན་པ་ཀི་སུ་ཐན་ལ་ཐུབ་ཚོད་གཏོང་གིན་ཡོད་ནའང་། མཇུག་མཐའི་རྒྱལ་ཁ་པ་ཀི་སུ་ཐན་ལ་ཐོབ་ངེས་པ་འདྲ། པ་ཀི་སུ་ཐན་ལ་རྒྱ་ནག་དང་དཀྱིལ་ཤར་གྱི་རྒྱལ་ཁབ་མང་པོའི་རོགས་རམ་ཡོད་ལ། དོན་བདག་འདིའི་ཐད་ལ་ཨ་རི་སོགས་ནུབ་ཕྱོགས་ཀྱི་ལུང་པ་ཁག་གིས་རྒྱ་གར་ལ་རྒྱབ་སྐྱོར་བྱེད་མི་སྲིད་དོ།།