དེ་རིང་ནས་བཟུང་ཨ་རི་དང་ཁིའུ་བྷ་བར་གྱི་སྒྲིག་གཞི་གསར་པ་ལག་བསྟར་བྱས་ཏེ་འགྲུལ་བ་འགྲོ་འོང་དང་ཚོང་ལས་ཀྱི་འབྲེལ་བ་དངོས་སུ་མགོ་བཙུགས་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། འདས་ལོའི་ཕྱི་ཟླ་ ༡༢ པའི་ནང་ཨ་རི་དང་ཁིའུ་བྷ་རྒྱལ་ཁབ་གཉིས་ཀྱི་འབྲེལ་ལམ་བསྐྱར་གསོ་བྱེད་པར་ཕྱོགས་གཉིས་མོས་མཐུན་བྱུང་ཡོད་པ་ལྟར། དེ་རིང་ཕྱི་ཚེས་ ༡༦ ཉིན་ནས་བཟུང་རྒྱལ་ཁབ་གཉིས་བར་གྱི་སྒྲིག་གཞི་གསར་པ་དངོས་སུ་ལག་བསྟར་བྱེད་མགོ་བརྩམས་ཡོད་པ་མ་ཟད། གྲོས་ཆོད་བྱུང་བ་ལྟར་ཁིའུ་བྷ་གཞུང་གིས་ཆབ་སྲིད་བཙོན་པ་ ༥༣ ཀློད་གྲོལ་བཏང་ཡོད་འདུག
རྒྱལ་ཁབ་གཉིས་བར་གྱི་སྒྲིག་གཞི་གསར་པའི་ནང་ཨ་རིའི་མི་སེར་གྱིས་ཁིའུ་བྷའི་ནང་དངུལ་བྱང་(ATM Card)བེད་སྤྱོད་གཏོང་ཆོག་པ་མ་ཟད། ཨ་རིའི་འགྲུལ་བ་ཚོས་ཁིའུ་བྷ་ནས་ཨ་སྒོར་ ༡༠༠ ལས་མ་བརྒལ་བའི་ཆང་དང་དུ་བ་འཁྱེར་ཆོག་པ། དེ་བཞིན། ཨ་རིའི་བཟོ་ཚོང་ཁང་དག་གི་བཟོ་ལས་ལག་རྩལ་ཁ་ཤས་ཀྱང་ཁིའུ་བྷ་ནང་ཕྱིར་འདྲེན་བྱེད་ཆོག་པ་སོགས་བཀོད་ཡོད་ཀྱང་། ཨ་རིའི་མི་སེར་ཁིའུ་བྷ་ནང་འགྲོ་བར་ཤེས་ཡོན་སློབ་སྦྱོང་དང་ཆོས་ལུགས་འཆད་སྤེལ། རིག་གཞུང་བརྗེ་རིས། དེ་བཞིན་གསར་འགྱུར་འཚོལ་སྡུད་སོགས་དམིགས་བསལ་གྱི་རྒྱུ་མཚན་བཅུ་གྲངས་ཤིག་གཏན་འབེབས་བྱས་ཡོད་སྟབས། རྒྱུ་མཚན་དེ་རིགས་ཡོད་པའི་འགྲུལ་བ་ཚོས་ཨ་རིའི་གཞུང་ནས་དམིགས་བསལ་གྱི་ཐོངས་མཆན་ཞུ་དགོས་ཀྱི་མེད་པ་རེད། ཐེངས་འདིར་ཨ་རིའི་ནང་ཁིའུ་བྷའི་ཐོན་རྫས་ཚོང་འདྲེན་བཀག་སྡོམ་བྱེད་པའི་སྲིད་བྱུས་ལ་འགྱུར་བ་ཆེན་པོ་བཏང་ཡོད་ཀྱང་། བཀག་སྡོམ་རྩ་བ་ནས་མེད་པ་བཟོ་རྒྱུར་ཨ་རིའི་གྲོས་ཚོགས་ནས་གྲོས་མཐུན་བྱུང་དགོས་ཀྱི་ཡོད་འདུག
ཨ་རིའི་ཚོང་དོན་ལྷན་ཁང་གི་བསྡོམས་རྩིས་ལྟར་ན། འདས་ལོར་ཨ་རིའི་འགྲུལ་བ་ ༡༧༠༠༠༠ ཙམ་ལ་ཁིའུ་བྷར་འགྲོ་བའི་ཐོངས་མཆན་རག་ཡོད་པ་མ་ཟད། ད་ལྟའི་ཆར་ཁིའུ་བྷ་ནི་འཛམ་གླིང་ཐོག་སྤྱི་ཚོགས་དྲ་འབྲེལ་ཁྱབ་ཚད་ཆེས་ཆུང་བའི་རྒྱལ་ཁབ་ཅིག་ཡིན་སྟབས། ཨ་རིའི་བཟོ་ཚོང་ཁང་དག་གིས་ཁིའུ་བྷ་ནང་དུ་ལག་ཐོགས་ཁ་པར་དང་མཉེན་ཆས་རིགས་སོགས་དྲ་འབྲེལ་ཞབས་ཞུའི་རིགས་མཁོ་སྤྲོད་བྱེད་རྒྱུ་ཧ་ཅང་ལས་སླ་བོ་བྱུང་ཡོད་པའི་གནས་ཚུལ་ཐོན་ཡོད་པ་དང་། གཞུང་ཕྱོགས་ནས་ཐེངས་འདིའི་རྒྱལ་ཁབ་གཉིས་བར་གྱི་སྒྲིག་གཞི་གསར་པས་སྔར་ལས་སྟབས་བདེ་བསྐྲུན་རྒྱུ་ཡིན་སྐོར་བརྗོད་ཀྱི་ཡོད་པ་མ་ཟད། ཁ་སང་ཨ་རིའི་ནོར་སྲིད་ལྷན་ཁང་གི་དྲུང་ཆེ་ཇཱ་ཁེ་ལའོ་(Jack Lew)ལགས་ཀྱིས་གསལ་བསྒྲགས་ཤིག་སྤེལ་ཏེ། ཨ་རི་གཞུང་གིས་ཁིའུ་བྷ་བར་གྱི་བཀག་སྡོམ་སྲིད་བྱུས་མེད་པར་བཟོས་ཏེ་གོམ་གང་མདུན་སྤོས་ཀྱིས་ཁིའུ་བྷ་མི་མང་གི་ཆབ་སྲིད་དང་དཔལ་འབྱོར་རང་དབང་སྐུལ་འདེད་གཏོང་བར་ནུས་ཤུགས་འདོན་གྱི་ཡིན་སྐོར་བརྗོད་འདུག
ཕྱི་ལོ་ ༡༩༦༠ དང་ ༡༩༦༡ ལོར་ཁིའུ་བྷའི་ནང་ཡོད་པའི་ཨ་རིའི་ཚོང་གཉེར་ཁང་ཁག་ཅིག་གཞུང་བཞེས་བཏང་བ་སོགས་ཀྱིས་ཨ་རིས་ཁིའུ་བྷ་དང་འབྲེལ་ལམ་བཅད་དེ་ལོ་ངོ་ ༥༤ ལྷག་འགྲོ་བཞིན་ཡོད་ཀྱང་། འདས་ལོའི་ཕྱི་ཟླ་ ༡༢ ནང་རྒྱལ་ཁབ་གཉིས་བར་གྱི་འཛིན་བཟུང་བྱས་པའི་གསང་ཉུལ་བ་བརྗེ་པོ་བརྒྱབ་པ་མ་ཟད། རྒྱལ་ཁབ་གཉིས་ཀྱི་མངའ་ཁོངས་བདག་དབང་དང་། ནང་སྲིད་ཐད་ཀྱི་མི་མཐུན་པ་རྣམས་ལ་ཕྱོགས་གཉིས་ཀྱིས་གདོང་ལེན་དང་བསམ་ཤེས་བྱས་ཏེ། ཞི་བདེ་མཉམ་གནས་ཡོང་ཆེད་ལོ་རྒྱུས་རང་བཞིན་གྱི་འབྲེལ་ལམ་གསར་པ་ཞིག་གི་མགོ་རྩོམ་པར་ཕྱོགས་གཉིས་མོས་མཐུན་བྱུང་བ་ཁྱབ་བསྒྲགས་བྱས་ཡོད་སྟབས། རྒྱལ་ཁབ་གཉིས་ཀྱི་མི་མང་གིས་གཙོས་མི་མང་པོས་དགའ་མོས་བྱེད་ཀྱི་ཡོད་ཀྱང་། གནད་དོན་དབྱེ་ཞིབ་པ་ཁག་ཅིག་གིས་དུས་ཡུན་ཐུང་ངུའི་ནང་སྲིད་བྱུས་ལ་འགྱུར་ལྡོག་གཏོང་བར་མོས་མཐུན་བྱེད་ཀྱི་མེད་པ་མ་ཟད། ཕྱོགས་གཉིས་བར་སྒྲིག་གཞི་གསར་པ་གཏན་འབེབས་བྱས་ཡོད་ཀྱང་། ཁིའུ་བྷར་སྐྱོད་འདོད་ཡོད་པའི་ཨ་རིའི་འགྲུལ་བ་ཚོར་ཁིའུ་བྷ་གཞུང་གི་ཐོངས་མཆན་རག་དགོས་པ་དང་། ལྷག་པར་དུ་ཁིའུ་བྷ་གླིང་ཕྲན་གྱི་མགྲོན་ཁང་དང་ཟ་ཁང་གི་སྦྱིན་བདག་ཚོས་སྣེ་ལེན་བྱེད་པར་དཀའ་ངལ་ཡོད་སྐོར་སོགས་བརྗོད་འདུག
གསར་འགོད་པ། པདྨ་མཚོ།
