བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༠ སྟེང་གི་རྩོམ་སྒྲིག་པའི་གཏམ།
བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཉེར་བདུན་པ་དེ་དྷ་རམ་ས་ལར་ཉིན་གཉིས་རིང་ཚོགས་སོང་། བོད་རྒྱ་ཞི་མོལ་ཞེས་པའི་ཡིག་འབྲུ་འདི་གཉིས། བོད་རྒྱ་ཆེའི་མང་ཚོགས་ཀྱིས་མིག་གིས་ལྟ་ས་དང་རྣ་བས་ཉན་ས་ཡིན། ཡིག་འབྲུ་འདི་གཉིས་ཀྱི་ཆེད་དུ་བོད་ནང་དུ་མིའི་ལུས་ན་མེ་འབར་བཞིན་ཡོད། འོན་ཀྱང་། དབྱིན་སྐད་དུ་ “ཡི་གེ་བཏང་ཡིན། ཡི་གེ་འབྱོར་སོང་།” ཞེས་པའི་ཁ་རྒྱུན་ལྟར། ཉིན་གཉིས་ཀྱི་ཚོགས་འདུ་དེ་བརྒྱུད་ནས་མང་ཚོགས་ལ་རག་པ་ནི། ཚོཊ་འདུ་ཚོཊ་སོང་། ཚོཊ་འདུ་གྲོལ་སོང་ཟེར་བ་འདི་གཉིས་རེད།
མང་ཚོགས་ཀྱི་སེམས་པའི་ནང་དུ། ཞི་མོལ་ཚོགས་ཆུང་འདི་ལ་རིན་ཐང་གི་ལྟ་བ་བསླེབས་དོན། སྔོན་ཆད་བོད་པའི་སྐུ་ཚབ་རྣམས་གྲོས་མོལ་ཆེད་རྒྱ་ནག་ཏུ་འགྲོ་ཁ་དང་། རྒྱ་ནག་ནས་ཕྱིར་ལོག་མཚམས་བསྐྱར་ཞིབ་བྱེད་ཆེད་བཅས་ལ་འཚོཊ་བཞིན་ཡོད་སྟབས། ཚོཊ་འདུ་དེ་ཤི་བོའི་ཞེ་མཁྲེང་ས་དང་གསོན་པོའི་མིག་ཅེར་ས་ཆགས་པ་རེད། ཉིས་སྟོང་བཅུ་ལོ་ནས་བོད་རྒྱའི་འབྲེལ་ལམ་ཆད་ཀྱང་། ཚོགས་ཆུང་གི་ཚོགས་འདུ་རིམ་བསྟུད་དུ་ཚོགས་ཏེ། འབྲེལ་མོལ་རྗེས་སུ་ལུས་ཤིང་ཚོགས་འདུ་སྔོན་དུ་ཕྱིན་ཡོད།
ཞི་མོལ་ལས་དོན་ཚོགས་ཆུང་གི་ཚོགས་འདུ་དེ་ད་ལྟ་བོད་དོན་དྲིལ་བསྒྲགས་ཀྱི་ལས་འགུལ་ཞིག་ཆགས་འདུག ཚོགས་ཆུང་གི་ཚོགས་མི་རྣམས་ཀྱང་འཚེ་མེད་ཞི་བའི་ལྟ་གྲུབ་སྦྱོར་བརྡར་ཐོབ་པའི་ལས་འགུལ་བ་ཆགས་འདུག གྲངས་ཚད་ཉེར་བདུན་ལ་སླེབས་པའི་ཞི་བའི་ལས་འགུལ་དེའི་དགོས་འདུན་དོན་ཚན་གཉིས་ནི། བོད་ཕྱོགས་ལ་གྲ་སྒྲིག་ཨང་གསར་ཡོད་པ་དང་། དབུ་མའི་ལམ་མུ་མཐུད་རྒྱུན་འཁྱོངས་བྱ་རྒྱུ་གཉིས་རེད། ད་དུང་རྒྱ་ནག་དང་རྒྱལ་སྤྱིར་ཉམས་ཞིབ་བྱས་ཚུལ་གྱི་སྐད་ཆ་འདྲ་ཆགས་པོ་ཞིག་ཀྱང་ཡོད།
ད་ལྟ་མང་ཚོགས་ནང་གླེང་གཞི་གསར་པ་ཞིག་ཡོང་གི་ཡོད་པ་ནི། བཀའ་ཤག་གིས་བོད་རྒྱའི་འབྲེལ་ལམ་མཐུད་མ་ཐུབ་པ་རེད་དམ། ཡང་ན་མཐུད་མ་འདོད་པ་རེད་ཟེར་བ་འདི་རེད། བོད་རྒྱ་ཞི་མོལ་ལས་དོན་ཚོགས་ཆུང་གི་བྱ་བྱེད་ལས་གསུམ་ལ་རིན་ཐང་སྤྲོད་མཁན་དེ། ལྕག་སྒྲོག་དང་མེ་མདའི་འོག་ན་སྡོད་པའི་བོད་ནང་གི་བོད་མི་ཚོ་དང་། ཕ་མ་སྤུན་མཆེད་དང་ཕ་ས་ཕ་ཡུལ་ཡ་བྲལ་དུ་སོང་བའི་ཕྱི་ལོགས་ཀྱི་སྤྲངས་ཁྱམ་པ་དག་རེད།
རྒྱལ་ཁབ་གཉིས་དང་གསུམ་གྱི་མི་སེར་བཟོས་ཤིང་། གཞིས་ཁྱིམ་གཉིས་དང་གསུམ་ལ་མངའ་དབང་མཛད་མཁན་ཆེན་པོ་མཐོན་པོ་ཚོས། ཆབ་སྲིད་སྐྱབས་བཅོལ་བའི་དབུ་ཁྲིད་ཅིག་གི་ལས་འགན་གཙོ་བོ་ཟུར་དུ་བཞག་སྟེ། སློབ་གྲྭའི་ཕྲུ་གུ་དང་གཞིས་མི་རྒན་འཁོགས་ཚོའི་ངོ་སོ་བཙལ་ནས་ལོ་ཟླ་བསྐྱེལ་ན། མང་ཚོགས་ནང་གི་གླེང་ཕྱོགས་གསར་པ་དེར་གནས་ལུགས་རྒྱུ་མཚན་མེད་པ་དང་། དོགས་པ་བྱེད་སའི་གཞི་རྩ་མེད་པའི་བསྙོན་འཛུགས་ཤིག་ག་ལ་ཡིན།
བཀའ་ཤག་སྐབས་བཅུ་གསུམ་གྱི་ལས་འགན་འཁྱོལ་བ་དང་བརྒྱུད་ལམ་གཅིག་དང་གྲོས་གཞི་གཅིག་གི་སྲིད་བྱུས་དེ་ཡང་མཇུག་བསྒྲིལ་ཡོད། རྒྱ་ནག་གཞུང་གིས་བོད་པའི་ཆབ་སྲིད་ཀྱི་མགོ་ཁྲིད་དང་གྲོས་མོལ་བྱེད་འདོད་མེད་པ་དེར། སྲིད་སྐྱོང་མཆོག་ལ་འགན་འཁུར་མེད་པའི་རྣམ་པ་སྟོན་ཆེད། ཕྱིའི་རྣམ་པ་ལས་ནང་གི་དོན་སྙིང་གལ་ཆེ་སྐོར་བརྒྱ་ཚར་དང་སྟོང་ཚར་སྐྱོར་ཏེ། མང་ཚོགས་“ལྷིང་འཇགས་པོ།”ཡོང་ཐབས་ཙམ་ལ་ཞེ་འཁྲེང་ནས་སྡོད་པ་ལས། ཡང་དག་པའི་ཐབས་ལམ་སྣ་ཚོགས་དང་། དོན་དང་ལྡན་པའི་བརྒྱུད་ལམ་འདྲ་མིན་བེད་སྤྱོད་བཏང་སྟེ་བོད་རྒྱའི་འབྲེལ་བ་མཐུད་ཐབས་དང་། གལ་སྲིད་དེ་ལྟར་མ་བྱུང་ཚེ་བསྐྱར་དུ་༧གོང་ས་མཆོག་གི་མཚན་གནས་གཡར་ན་མི་ལེགས་སམ།།
