ཁ་སང་བྷོ་ཁཱོ་ཧ་རམ་དྲག་སྤྱོད་ཤོག་ཁོག་གིས་ནེ་ཇེ་རི་ཡའི་གྲོང་ཚོ་གཉིས་ལ་འཇབ་རྒོལ་བྱས་ཏེ་མི་ ༦༠ ལྷག་བཙན་ཁྲིད་བྱས་ཡོད་འདུག
ཁ་སང་བྷོ་ཁཱོ་ཧ་རམ་དྲག་སྤྱོད་ཤོག་ཁག་གིས་ཁེམ་རོན་གྱི་ཌོ་རོ་རྫོང་ཁོངས་ཀྱི་གྲོང་ཚོ་མཱ་ཁེ་ (Maki) དང་མཱ་ཌཱ་ (Mada)ནང་གློ་བུར་འཇབ་རྒོལ་བྱས་ཏེ། བུད་མེད་དང་ཕྲུག་གུ་ ༦༠ ལྷག་བཙན་ཁྲིད་བྱས་ཡོད་ཅིང་། དེ་ནི་ཨ་ཧྥི་རི་ཀའི་ཡུལ་གྲུ་ཆཱ་ཌི་ (Chad) ཡིས་ཁེམ་རོན་ལ་རོགས་པ་བྱས་ཏེ་བྷོ་ཁཱོ་ཧ་རམ་གཏོར་ཕམ་གཏོང་ཆེད་ས་མཚམས་ཁུལ་དུ་དམག་དཔུང་འགྲེམས་འཇོག་བྱས་པར་བརྟེན་ནས་བྱུང་བ་ཞིག་ཡིན་སྐོར་བསྒྲགས་འདུག
འདིའི་ཐད་ཁེམ་རོན་དྲིལ་བསྒྲགས་ལྷན་ཁང་གི་བློན་ཆེན་ཨེ་སཱ་བྷ་ཁཱ་རེ་ (Issa Tchiroma Bakary) ཡིས་བྷི་བྷི་སི་གསར་ལམ་ཐོག་བརྗོད་དོན། “བྷོ་ཁཱོ་ཧ་རམ་དྲག་སྤྱོད་ཤོག་ཁག་གིས་མི་ ༣༠ ནས་ ༥༠ བར་བཙན་ཁྲིད་བྱས་ཡོད་པ་ཤེས་རྟོགས་བྱུང་ཡང་། ང་ཚོས་ས་ཁུལ་དངོས་ནང་ཕྱིན་ནས་རྟོག་ཞིབ་བྱེད་རྒྱུ་ཁག་པོ་ཆགས་ཡོད་སྟབས། ད་ལྟ་ཡུལ་མི་ག་ཚོད་ཙམ་ཞིག་བཙན་ཁྲིད་བྱས་ཡོད་མེད་ཀྱི་གནས་ཚུལ་ངོ་མ་གང་ཡང་བཤད་ཤེས་ཀྱི་མི་འདུག”ཅེས་བརྗོད་འདུག
ཁེམ་རོན་གྱི་ཉེན་རྟོག་པ་ཞིག་གིས་རོའུ་ཌར་གསར་ལམ་ཐོག་བརྗོད་དོན། “བྷོ་ཁཱོ་ཧ་རམ་དྲག་སྤྱོད་པས་ཌོ་རོ་རྫོང་ཁོངས་ཀྱི་གྲོང་ཚོ་གཉིས་ནང་གཏོར་རྒོལ་བཏང་སྟེ། མི་ ༣༠ དང་ལོ་ ༡༠ ནས་ ༡༥ བར་གྱི་ཕྲུག་གུ་ ༥༠ བཙན་ཁྲིད་དང་། ཁང་པ་ ༨༠ མེར་བསྲེགས་བཏང་ཡོད་སྟབས། ད་ལྟ་ང་ཚོའི་དམག་དཔུང་ས་མཚམས་ཁུལ་དུ་འགྲེམས་འཇོག་བྱས་ནས་དྲག་སྤྱོད་པ་དང་དམག་འཐབ་བྱེད་རྩིས་བྱེད་བཞིན་ཡོད”ཅེས་བརྗོད་འདུག
བདུན་ཕྲག་ཁ་ཤས་སྔོན་ནས་བཟུང་ནེ་ཇེ་རི་ཡ་ནང་རྟེན་གཞི་བྱས་པའི་བྷོ་ཁཱོ་ཧ་རམ་དྲག་སྤྱོད་ཤོག་ཁག་གིས་ཁྱིམ་མཚེས་རྒྱལ་ཁབ་ཁག་ཏུ་གཏོར་རྒོལ་བྱེད་མགོ་བཙུགས་ཏེ། ཁོ་ཚོའི་དྲག་ཤུགས་ཀྱི་ནུས་པ་རྒྱ་སྐྱེད་གཏོང་ཐབས་བྱེད་ཀྱིན་ཡོད་པ་ལྟར། བདུན་ཕྲག་སྔོན་མའི་རེས་གཟའ་ཟླ་བ་ཉིན་བྷོ་ཁཱོ་ཧ་རམ་དྲག་སྤྱོད་ཤོག་ཁག་གིས་ཁེམ་རོན་བྱང་ཁུལ་གྱི་དམག་སྒར་ལ་སྒྱོགས་མདེལ་འཕངས་ཏེ། དམག་མི་ ༡༤༣ བསད་ཡོད་པ་དང་། ཁ་སང་དྲག་སྤྱོད་པས་ལུས་ཐོག་ཏུ་འབར་མདེལ་བཏགས་ཏེ་ནེ་ཇེ་རི་ཡའི་བྱང་ཤར་ཁུལ་གྱི་གྲོང་ཁྱེར་པོ་ཌི་སེ་ཁམ་ (Potiskum) གྱི་སྤྱི་སྤྱོད་རླངས་འཁོར་འབབ་ཚིགས་སུ་གཏོར་རྒོལ་བཏང་སྟེ། མི་ ༤ བསད་པ་དང་གཞན་མི་ ༤༨ ལྷག་ལ་རྨས་སྐྱོན་བཏང་ཡོད་འདུག
ཟླ་འདིའི་ཚེས་ ༢ ནས་ ༧ ཉིན་བར་བྷོ་ཁཱོ་ཧ་རམ་དྲག་སྤྱོད་ཤོག་ཁག་གིས་ཨ་ཧྥི་རི་ཀའི་རྒྱལ་ཁབ་ཁེམ་རོམ་དང་། ཆཱ་ཌི་བཅས་དང་ས་འབྲེལ་འཁེལ་ཡོད་པའི་ནེ་ཇེ་རི་ཡའི་ཌོ་རན་བྷ་གྷ་ (Doron Baga) གྲོང་བརྡལ་ཐོག་མེ་སྒྱོགས་དང་མཚོན་ཆ་གང་བྱུང་འཕངས་ཏེ། ཡུལ་མི་ ༢༠༠༠ ལྷག་བསད་ཡོད་པ་མ་ཟད། སྡོད་ཁང་ ༣༧༠༠ ལྷག་གཏོར་བཤིག་བཏང་ཡོད་ཅིང་། དེ་ནི་བྷོ་ཁཱོ་ཧ་རམ་གྱིས་མི་གསོད་དོན་རྐྱེན་ཆེ་ཤོས་ཆགས་ཡོད་སྟབས། རྒྱལ་སྤྱིའི་སྒྲིག་འཛུགས་ཁག་གིས་ནེ་ཇེ་རི་ཡ་གཞུང་ལ་སྐྱོན་བརྗོད་བྱས་ཡོད་འདུག ཟླ་འདིའི་ཚེས་ ༨ ཉིན་རྒྱལ་སྤྱིའི་ཉེས་ཡང་ཚོགས་པ་དང་འགྲོ་བ་མིའི་ཐོབ་ཐང་རྟོག་ཞིབ་ཚོགས་པས་བྷོ་ཁཱོ་ཧ་རམ་གྱིས་ནེ་ཇེ་རི་ཡའི་བྷ་གྷ་གྲོང་བརྡལ་ནང་སྒྱོགས་མདེལ་འཕངས་ཏེ། ཁང་པ་ ༣༧༠༠ གཏོར་བཤིག་བཏང་ཡོད་པའི་འདྲ་པར་ཁག་ཅིག་དྲ་ཐོག་ཏུ་བཀོད་པར། རྒྱལ་སྤྱིའི་ཉེས་ཡང་ཚོགས་པས་གཏོར་རྒོལ་དེའི་ཁྲོད་ཉེས་མེད་མི་སེར་ ༢༠༠༠ སྡེབ་གསོད་བཏང་ཡོད་སྐོར་བརྗོད་ཡོད་ཀྱང་། ནེ་ཇེ་རི་ཡའི་འབྲེལ་ཡོད་ཉེན་རྟོག་པས་མི་ ༡༥༠ ཙམ་ལས་བསད་མེད་སྐོར་བརྗོད་འདུག
རྒྱལ་སྤྱིའི་གསར་ལམ་ཁག་གིས་བྷོ་ཁཱོ་ཧ་རམ་དྲག་སྤྱོད་ཤོག་ཁག་གིས་བཙན་ཁྲིད་བྱས་ཏེ་བསད་པ་དང་། གྲོང་ཁྱེར་དང་གྲོང་བརྡལ། ས་ཁུལ་བཅས་སུ་སྒྱོགས་མདེལ་འཕངས་ནས་བསད་པ་སོགས་རྩིས་ན། ད་བར་ཉེས་མེད་མི་སེར་ ༡༣༠༠༠ ལྷག་དང་དམག་མི་ ༦༡༨༣ ཙམ་བསད་ཡོད་པ་མ་ཟད། ཡུལ་མི་ ༡།༥ ལྷག་ཁྱིམ་མཚེས་རྒྱལ་ཁབ་གཞན་ནང་ཉེན་ཡོལ་དུ་འགྲོ་དགོས་པ་བྱུང་ཡོད་སྟབས། ནེ་ཇེ་རི་ཡའི་ཁྱིམ་མཚེས་རྒྱལ་ཁབ་ཁེམ་རོན་དང་ཆཱ་ཌི་སོགས་ཀྱིས་བྷོ་ཁཱོ་ཧ་རམ་དྲག་སྤྱོད་པ་དང་དམག་འཁྲུག་རྒྱག་རྒྱུར་གྲ་སྒྲིག་བྱེད་བཞིན་པ་ལྟར། ཟླ་འདིའི་ཚེས་ ༡༧ ཉིན་ཆཱ་ཌི་གཞུང་གིས་དམག་རྒྱག་རླངས་འཁོར་ ༤༠༠ དང་ཐད་འཕུར་གནམ་གྲུ། དམག་མི་སོགས་ནེ་ཇེ་རི་ཡ་དང་ཁེམ་རོམ་ལ་དམག་རྒྱག་རོགས་རམ་བྱེད་བར་བཏང་ཡོད་སྟབས། ཁ་སང་ཆཱ་ཌི་དམག་དཔུང་གི་དམག་དཔོན་ཨི་བྷར་ཧམ་ (Djerou Ibrahim) གྱིས་དེ་རིང་ང་ཚོས་དགྲ་བོའི་ཕྱོགས་སུ་ཤར་སྐྱོད་བྱེད་ཀྱི་ཡིན་ཞེས་བརྗོད་འདུག
སྲིད་དོན་དབྱེ་ཞིབ་པ་ཚོས། རྒྱལ་སྤྱིའི་རྒྱལ་ཁབ་ཁག་ཅིག་གིས་བྷོ་ཁཱོ་ཧ་རམ་དྲག་སྤྱོད་ཤོག་ཁག་དང་དམག་འཐབ་ བྱེད་དང་བྱེད་མུས་ཡིན་ཡང་། དྲག་སྤྱོད་པའི་སྟོབས་ཤུགས་མུ་མཐུད་རྒྱ་སྐྱེད་འགྲོ་བཞིན་ཡོད་སྟབས། མཉམ་འབྲེལ་རྒྱལ་ཚོགས་ངོས་ནས་རྒྱལ་སྤྱིའི་ཞི་བདེའི་སྲུང་དམག་(UNO Peace Keeping Force)བཏང་སྟེ། རྩ་མེད་མ་བཟོ་ཐབས་བྱེད་དགོས་སྐོར་བརྗོད་འདུག
ཇི་སྐད་དུ། ནང་གི་ཉོན་མོངས་དགྲ་བོ་མ་ཐུལ་ན།། ཕྱི་ཡི་དགྲ་བོ་བཏུལ་ཡང་འཕེལ་བར་འགྱུར་གསུངས་པ་དངོས་གནས་མད་དོ།།