ལྡུམ་ར་གཅིག་གི་མེ་ཏོག་ཡིན།

ཨོ་བྷ་མས་རྒྱ་གར་འཛམ་གླིང་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ནང་ཞུགས་རྒྱུར་རྒྱབ་སྐྱོར་ཡོད་སྐོར་བརྗོད་པར་རྒྱ་ནག་གིས་ངོས་ལེན་མེད་པའི་རྣམ་འགྱུར་བསྟན་འདུག

ཨ་རིའི་སྲིད་འཛིན་ཨོ་བྷ་མ་རྒྱ་གར་ནང་གཟིགས་སྐོར་དང་བསྟུན་ཏེ་ཁ་སང་རྒྱ་གར་དམངས་གཙོའི་དུས་དྲན་ཐེངས་ ༦༦ པའི་སྐུ་མགྲོན་གཙོ་བོར་ཕེབས་ཏེ། རིག་གཞུང་འགྲེམས་སྟོན་སོགས་རྔམ་སྟོན་ཁག་གཟིགས་རྗེས་ཉིན་རྒྱབ་རྒྱ་གར་སྲིད་བློན་མཆོག་དང་ལྷན་རྒྱལ་ཁབ་གཉིས་ཀྱི་ཚོང་པའི་ལྷན་ཚོགས་སྟེང་ཞུགས་ཏེ། ཨོ་བྷ་མས་ཚོགས་ཐོག་ཏུ་ད་ལྟ་རྒྱ་གར་དང་ཨ་རིའི་བར་ལོ་རེར་ཨ་སྒོར་ཐེར་འབུམ་ ༡༠༠ ཙམ་གྱི་ཚོང་འབྲེལ་བྱེད་བཞིན་ཡོད་ཀྱང་། མ་འོངས་པའི་ལོ་ ༡༠ ནང་ལོ་རེར་ཨ་སྒོར་ཐེར་འབུམ་ ༥༠༠ ཡི་ཚོང་འབྲེལ་བྱ་རྒྱུ་ཡིན་སྐོར་བརྗོད་འདུག

འདིའི་ཐད་ཨོ་བྷ་མས་གསར་ལམ་ཁག་ཏུ་བརྗོད་དོན། “ད་ལྟ་ཨ་རྒྱ་གཉིས་ཀྱི་ཚོང་དོན་འབྲེལ་ལམ་རྒྱལ་ཁབ་གཞན་དང་བསྡུར་ན་ཚད་གཞི་ངེས་ཅན་ཞིག་ཏུ་སླེབ་མེད་པ་མ་ཟད། ཨ་རིས་རྒྱལ་ཁབ་གཞན་ནས་ནང་འདྲེན་བྱས་པའི་ཚོང་ཟོག་ཁྲོད་ནས་བརྒྱ་ཆ་ ༢ ཙམ་རྒྱ་གར་ནས་ནང་འདྲེན་དང་། རྒྱ་གར་གྱིས་ཨ་རིའི་ཚོང་ཟོག་བརྒྱ་ཆ་ ༡ ལས་ཉོ་ཐུབ་ཀྱི་མེད་ཀྱང་། ངས་ཨ་རིའི་སྲིད་གཞུང་བཟུང་རྗེས་རྒྱལ་ཁབ་གཉིས་བར་ལོ་རེར་ཨ་སྒོར་ཐེར་འབུམ་ ༡༠༠ ཙམ་ཚོང་འབྲེལ་བྱས་ཏེ་འཕེལ་རྒྱས་ཆེན་པོ་ཕྱིན་ཡོད་ཀྱང་། ཨ་རི་དང་རྒྱ་ནག་བར་ལ་ལོ་རེར་ཨ་སྒོར་ཐེར་འབུམ་ ༥༦༠ ཡི་ཚོང་འབྲེལ་བྱེད་བཞིན་ཡོད་པ་དང་བསྡུར་ན་ད་དུང་རྗེས་ལུས་ཡིན་སྟབས། ང་ཚོས་མ་འོངས་པར་རྒྱལ་ཁབ་གཉིས་བར་ལོ་རེར་ཨ་སྒོར་ཐེར་འབུམ་ ༥༠༠ ཡི་ཚོང་འབྲེལ་བྱ་རྒྱུར་ཤུགས་སྣོན་རྒྱག་དགོས” ཞེས་བརྗོད་འདུག

ཁོང་གིས་མུ་མཐུད་དུ། “རྒྱ་གར་ནང་ཨ་རིའི་ཕྱིར་ཚོང་ནང་འདྲེན་དངུལ་ཁང་གིས་ཨ་སྒོར་ཐེར་འབུམ་གཅིག་གི་འགྲོ་གྲོན་བཏང་སྟེ་ཨ་རིའི་ཐོན་རྫས་ཕྱིར་ཚོང་བྱ་རྒྱུ་དང་། ཨ་རིའི་ཕྱི་འཛུགས་ཁེ་ལས་ཁག་གིས་ཨ་སྒོར་ཐེར་འབུམ་གཅིག་གི་དངུལ་བུན་གཡར་ཏེ། རྒྱ་གར་གྲོང་གསེབ་ཁུལ་གྱི་སྒེར་གཉེར་ཁེ་ལས་ཁག་གི་རྨང་གཞི་བརྟན་པོ་ཚུགས་ཐུབ་པ་བྱ་རྒྱུ་ཡིན་ལ། རྒྱ་གར་གྱི་ཡུན་གནས་ཐུབ་པའི་ནུས་ཁུངས་ཁག་ལ་ཨ་སྒོར་ཐེར་འབུམ་ ༢ ཀྱི་མ་འཇོག་བྱ་རྒྱུ་མ་ཟད། ཕྱོགས་གཉིས་ཀྱི་རྡུལ་ཕྲན་གློག་ཤུགས་ཀྱི་གྲོས་མཐུན་ཁག་བསྐྱར་གསོ་དང་། དམག་རྒྱག་གནམ་གྲུ་བཟོ་སྐྲུན་བཅས་ཀྱི་ཐོག་མཉམ་ལས་བྱ་རྒྱུ་ཡིན”ཞེས་བརྗོད་འདུག

ཡང་མགོ་ཁྲིད་རྣམ་གཉིས་ཐུན་མོང་གི་བསྒྲགས་གཏམ་ནང་། “རྒྱལ་ཁབ་གཉིས་ཀྱིས་ལྷོ་རྒྱ་ནག་རྒྱ་མཚོའི་དཀའ་རྙོག་ཞི་འཇགས་ཡོང་ཐུབ་བྱས་ཏེ་མངའ་ཁུལ་ནང་བརྟན་ལྷིང་ཡོང་བ་དང་། ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་ལ་ཁ་གཏད་གཅག་སྟེ།སྡུག་བསྔལ་ནང་ལྷུང་ཡོད་པའི་མང་ཚོགས་སྲུང་སྐྱོབ་བྱ་རྒྱུ་ཡིན”ཞེས་བརྗོད་འདུག

དེ་རིང་སྔ་དྲོར་ཨོ་བྷ་མ་དང་ནཱ་རེན་ཌ་མུ་དྷེ་རྣམ་གཉིས་ཀྱིས་ཟླ་རེའི་རླུང་འཕྲིན་ལེ་ཚན་༼སེམས་ནང་གི་སྐད་ཆ༽ (Mann ki Baat) ཞེས་པའི་རྒྱལ་ཡོངས་ཐད་གཏོང་ལེ་ཚན་ནང་མཉམ་ཞུགས་བྱས་ཏེ། ཨོ་བྷ་མས་ལྡི་ལིར་རྟེན་གཞི་བྱས་པའི་ཤཱི་རི་ཧྥོར་ཌི་ཚོགས་ཁང་ (Siri Fort auditorium) ནང་རྒྱ་གར་གྱི་གཞོན་སྐྱེས་དང་ཆེད་ལས་མཁས་པ་༢༠༠༠ལྷག་ལ་༼ང་ཚོས་ཐུན་མོང་ཐོག་མ་འོངས་པའི་ཨ་རི་དང་རྒྱ་གར་འཛུགས་སྐྲུན་བྱེད་དགོས༽ཞེས་པའི་ཐོག་གཏམ་བཤད་སྤེལ་ཡོད་པ་དང་། སྐབས་དེར་ཨོ་བྷ་མས་རྒྱ་གར་གྱི་གཞོན་སྐྱེས་ཚོས་སོ་སོའི་རྒྱལ་ཁབ་བཅོས་བསྒྱུར་གཏོང་ཐུབ་པ་མ་ཟད། རྒྱལ་སྤྱི་ཁྱོན་ཡོངས་ལའང་ཤུགས་རྐྱེན་བཟོ་ཐུབ་ཀྱིན་ཡོད། ད་ལྟ་རྒྱལ་སྤྱིའི་ཐོག་ཨ་རི་སྟོབས་ཤུགས་ཆེ་ཤོས་ཆགས་དགོས་དོན་ནི་ང་ཚོས་མི་རབས་གཞོན་པ་ཚོར་འགན་དབང་སྤྲད་པ་ལས་བྱུང་བ་ཞིག་ཡིན། གྷན་དྷི་མཆོག་གིས་འདྲ་མཉམ་ནི་ལྡུམ་ར་གཅིག་གི་མེ་ཏོག་ཡིན་གསུངས་ཡོད་སྟབས། རྒྱ་གར་གཞུང་གིས་ཆོས་ལུགས་འཐེན་འཁྱེར་མ་བྱས་པར་མདུན་སྐྱོད་བྱས་ཚེ་མ་འོངས་པར་རྒྱལ་ཁབ་འཕེལ་རྒྱས་འགྲོ་རྒྱུ་རེད། ཁྱེད་ཚོར་རིགས་རུས་ཞན་པའི་མི་སྣས་བྲིས་པའི་རྩ་ཁྲིམས་ཡོད་པ་མ་ཟད། སྤོ་བོ་མ་བྱན་ཡིན་པའི་སྲིད་འཛིན་དང་། ཇ་ཚོང་མཁན་སྲིད་བློན་དུ་གྱུར་བའི་རྒྱལ་ཁབ་འདིའི་ནང་འཚོ་སྡོད་བྱེད་བཞིན་ཡོད་པ་དེ་སྤོབས་སེམས་སྐྱེ་འོས་པ་ཞིག་རེད། ད་ལྟ་རྒྱ་གར་དང་ཨ་རིའི་བར་རྒྱལ་སྤྱིའི་གནམ་གཤིས་འགྱུར་ལྡོག་གི་དཀའ་ངལ་སེལ་ཐབས་ལ་ལྟ་ཕྱོགས་མ་མཐུན་པ་འབྱུང་བཞིན་ཡོད་ཀྱང་། མ་འོངས་བར་དཀའ་རྙོག་དེ་ལས་གྲོལ་བར་ཡིད་ཆེས་ཡོད། ཨ་རིས་མཉམ་འབྲེལ་རྒྱལ་ཚོགས་བདེ་འཇགས་ཚོགས་མིའི་ཁོངས་སུ་རྒྱ་གར་འཇུག་རྒྱུར་རྒྱབ་སྐྱོར་བྱེད་བཞིན་ཡོད་ལ། མ་འོངས་པར་རྒྱལ་ཁབ་གཉིས་བར་རྡུལ་ཕྲན་གློག་ཤུགས་དང་དམག་དོན་གྲོས་མཐུན་སོགས་གང་མང་འཇོག་ཐབས་བྱས་ཏེ། རྒྱ་གར་ཨ་རིའི་མཐུན་གྲོགས་ཡག་ཤོས་ཆགས་རྒྱུར་ཡིད་ཆེས་བྱེད་བཞིན་ཡོད་ཅེས་སོགས་གཏམ་བཤད་སྤེལ་རྗེས།དེ་རིང་ཕྱི་དྲོ་ཨོ་བྷ་མ་རྒྱ་གར་ནས་སོ་ཌི་ཨེ་ར་བྷེ་ཡ་ནང་ཕྱིར་བསྐྱོད་ཀྱིས་ཡུལ་ལུང་དེའི་རྒྱལ་པོ་དང་། ཉེ་ལམ་འདས་གྲོངས་སོང་བའི་སྙན་གྲགས་ཅན་གྱི་རྒྱལ་པོ་ཨབ་དྷོ་ལའི་ (Abdullah) ནང་མི་འཁོར་བཅས་ལ་མཇལ་ཏེ་ཐུགས་གསོ་འཚམས་འདྲི་ཞུ་རྒྱུ་ཡིན་འདུག

ད་ཐེངས་ཨོ་བྷ་མ་རྒྱ་གར་ནང་རྒྱལ་དོན་སྐོར་སྐྱོད་བྱེད་སྐབས་ཁོང་གིས་མཉམ་འབྲེལ་རྒྱལ་ཚོགས་ཀྱི་གཏན་འཇགས་ཚོགས་མིའི་ཁོངས་སུ་རྒྱ་གར་ཞུགས་རྒྱུར་རྒྱབ་སྐྱོར་བྱེད་ཀྱི་ཡིན་སྐོར་བརྗོད་ཡོད་སྟབས། ཁ་སང་རྒྱ་ནག་ཕྱི་སྲིད་ལྷན་ཁང་གིས་མགྲིན་ཚབ་པ་ཧྭ་ཁྲིན་ཡེན་ (Hua Chunying) གྱིས་བརྒྱུད་ལམ་ཁག་ཏུ་ཨ་རིས་གནད་དོན་དེ་འདྲ་ཐག་གཅོད་བྱེད་སྐབས་ཚོགས་མིའི་རྒྱལ་ཁབ་ཁག་ལ་བསམ་གཞིགས་བྱེད་དགོས། ང་ཚོས་ཚོགས་མི་གསར་པ་འཇུག་རྒྱུར་ཚོགས་མིའི་རྒྱལ་ཁབ་བར་གྲོས་བསྡུར་བྱས་ཏེ་ཐག་གཅོད་བྱ་དགོས་པར་ངོས་འཛིན་བྱེད་བཞིན་སྟབས། རྒྱ་གར་ངོས་ནས་ཀྱང་གོམ་ཐབས་རྗེས་མ་སྤོ་རྒྱུར་རེ་སྐུལ་ཞུ་བཞིན་ཡོད་ཅེས་བརྗོད་འདུག

དེ་བཞིན། རྒྱ་ནག་གི་གཞུང་འབྲེལ་གསར་ལམ་ཁག་གིས་རྒྱ་གར་དང་ཨ་རིའི་འབྲེལ་ལམ་ཐོག་ཆེད་བརྗོད་སྤེལ་བའི་ནང་། ཤིན་ཧྭ་གསར་འགྱུར་ཁང་གིས་རྒྱ་གར་དང་ཨ་རིའི་བར་གནམ་གཤིས་འགྱུར་ལྡོག་དང་ཞིང་ལས་ཐོན་སྐྱེད། རྡུལ་ཕྲན་གློག་ཤུགས་ཀྱི་གྲོས་མཐུན་བཅས་ལ་ལྟ་ཕྱོགས་མི་མཐུན་པ་འབྱུང་བཞིན་ཡོད་སྟབས།ཕྱི་ཚུལ་ཙམ་ལས་མགོ་ཁྲིད་རྣམ་གཉིས་བར་ཅོག་ཙེ་གཅིག་སྟེང་ལ་གྲོགས་པོ་བསྒྲིག་རྒྱུ་ཁག་པོ་ཡིན་ཞེས་དང་། རྒྱ་ནག་རྒྱལ་ཡོངས་རླུང་འཕྲིན་ (The China National Radio) ཁང་གིས། ཨ་རིས་རྒྱ་གར་བེད་སྤྱོད་བཏང་ནས་རྒྱ་ནག་ལ་ཁ་གཏད་གཅོག་ཐབས་བྱེད་བཞིན་ཡོད་ཀྱང་། རྒྱ་གར་གཞུང་གིས་ཨ་རིའི་དམག་དོན་དང་ཚོང་གི་ཁེ་བཟང་ཐོབ་ཆེད་ཨ་རི་དང་མཉམ་འབྲེལ་བྱས་པ་ལས་རྒྱ་ནག་ལ་ཁ་གཏད་གཅོག་གི་མ་རེད། ཅེས་དང་། གོ་ལའི་དུས་བབ་ (Global Times) ཐོག་རྒྱ་གར་དང་རྒྱ་ནག་ནུབ་ཕྱོགས་རྒྱལ་ཁབ་ཀྱིས་གཡོ་བྱུས་འོག་ཚུད་ཀྱི་མ་རེད་ཅེས་སོགས་སྤེལ་ཡོད་འདུག

ཁ་སང་རྒྱ་གར་གྱི་ཐབས་ཇུས་མཁས་པ་ལྦར་མ་ཅཱ་ཎཱ་ལཱ་ཡིས་རྒྱ་གར་དུས་བབ་ཐོག རྒྱལ་ཁབ་གཉིས་བར་གྱི་འབྲེལ་ལམ་འཕེལ་རྒྱས་འདི་ནི་ལོ་རྒྱུས་ཐོག་བྱུང་མ་མྱོང་བ་ཞིག་ཆགས་ཡོད་སྟབས། རྒྱལ་ཁབ་གཞན་གྱི་སྐྱོན་བརྗོད་བྱེད་མིན་ལ་མ་ལྟོས་པར། མ་འོངས་པར་རྒྱལ་ཁབ་གཉིས་གཅིག་ལ་གཅིག་རྟེན་གྱི་མཐུན་གྲོགས་རྒྱལ་ཁབ་ཞིག་ཏུ་འགྱུར་རྒྱུ་ཡིན་ཞེས་བརྗོད་འདུག