ཟླ་འདིའི་ཚེས་ ༢༤ ནས་ ༢༥ བར་ཉིན་གཉིས་རིང་སྐབས་དང་པོའི་ཞང་ཞུང་རིག་གནས་རིག་གཞུང་དཔྱད་གླེང་ཚོགས་འདུ་ཞེས་པ་དེ་ལྷ་སར་ཚོགས་ཡོད་འདུག ཐེངས་འདིའི་ཚོགས་ཐོག་ཏུ་རྒྱས་བཅད་བགོས་བྱས་པའི་བོད་རང་སྐྱོང་ལྗོངས་ཁོངས་དང་། མཚོ་སྔོན། ཀན་སུའུ། སི་ཁྲོན། པེ་ཅིན་བཅས་ཀྱི་ཞིབ་འཇུག་མི་སྣ་དང་དགེ་རྒན་ཆེན་མོ་ ༤༠ ཙམ་མཉམ་ཞུགས་གནང་སྟེ་དཔྱད་རྩོམ་སྒྲོགས་སྦྱང་གནང་ཡོད་འདུག
ཐེངས་འདིའི་ཉིན་གཉིས་ཀྱི་ཚོགས་འདུའི་སྟེང་། ཚོགས་བཅར་བ་ཡོངས་ཚོགས་ཆུང་གཉིས་སུ་བགོས་ཏེ། ཚོགས་ཆུང་དང་པོའི་ནང་། ཞང་ཞུང་སྒྱུ་རྩལ་དང་། ཞང་ཞུང་ལོ་རྒྱུས་རིག་གནས་ཀྱི་ཁྱད་ཆོས་དང་དེའི་དེང་རབས་ཀྱི་རིན་ཐང་གླེང་བ། རི་བོ་ཧི་མ་ལ་ཡའི་ཁུལ་གྱི་ས་འོག་ནས་ཐོན་པའི་གསེར་གྱི་འབག གནའ་བོའི་ཞང་བོད་དང་རྒྱ་གར་བར་གྱི་འགྲོ་ལམ་ལས་འཕྲོས་ཏེ་ཞང་ཞུང་ཤེས་རིག་ཕྱི་ཕྱོགས་སུ་ཁྱབ་པའི་རྒྱུ་ལམ་བཅས་ཀྱི་བརྗོད་གཞིའི་ཐོག རང་རང་གི་དཔྱད་རྩོམ་སྒྲོགས་སྦྱང་གནང་ཡོད་འདུག
ཚོགས་ཆུང་གཉིས་པའི་ནང་། གླ་རྩིའི་ཚོང་ལམ་དང་སྤུ་རྒྱལ་རིག་གནས། མཚོ་བོད་ས་མཐོའི་འདས་ཟིན་པའི་ལོ་ངོ་ལྔ་སྟོང་གི་གནམ་གཤིས་ཀྱི་འགྱུར་བས་ཞང་ཞུང་གི་ཤེས་རིག་ལ་ཤུགས་རྐྱེན་བྱུང་ཚུལ། རྒྱའི་ལོ་རྒྱུས་ནང་འཁོད་པའི་འབྲེལ་ཡོད་ཞང་ཞུང་སྐོར་ཅུང་ཟད་གླེང་བ། མངའ་རིས་པུང་ཧྲང་གི་སྲོལ་རྒྱུན་བུད་མེད་ཀྱི་གྱོན་ཆས་དང་རྒྱན་ཆའི་འབྱུང་ཁུངས་དང་ཞང་ཞུང་རིག་གནས་ཀྱི་འབྲེལ་བ་རགས་ཙམ་གླེང་བ་བཅས་ཀྱི་ཐོག་དཔྱད་རྩོམ་སྒྲོགས་སྦྱང་དང་དྲི་བ་དྲིས་ལན་གནང་འདུག
ཚོགས་འདུ་དངོས་གཞིའི་སྔར་ཉིན་ཚེས་ ༢༣ ཉིན་ཚོགས་བཅར་བ་རྣམས་ལྷ་སའི་སྟོད་ལུང་བདེ་ཆེན་རྫོང་གི་འབྲི་ལུང་ས་ཆའི་གནའ་ཤུལ་རྙིང་པར་རྟོག་ཞིབ་ཏུ་བསྐྱོད་ཡོད་པ་དང་། འབྲི་ལུང་ཞང་ཞུང་རིག་གནས་གནའ་ཤུལ་རྙིང་པ་ནི་ལྷ་ས་གྲོང་ཁྱེར་གྱི་སྟོད་ལུང་བདེ་ཆེན་རྫོང་གནས་ཆུང་དགོན་པའི་སྤོ་མ་གྲོང་ཚོའི་ཞང་སྟོན་རང་བྱུང་ཚོ་པ་བཞི་པའི་ལྷོ་ནུབ་མཚམས་ཀྱི་སྤྱི་ལེ་གསུམ་གྱི་མཚམས་སུ་ཡོད་འདུག
གནས་ཚུལ་ནང་འཁོད་པར། གནའ་ཤུལ་དེ་ནི་མཚོ་ངོས་ལས་མཐོ་ཚད་རྨི་ ༤༠༣༢ ཀྱི་སར་ཡོད་པ་དང་། བོད་ཁུལ་དུ་འདུ་གནས་སོ་བདུན་བཞེངས་པའི་ཡ་གྱལ་ཏོ་རོ་ལུང་གསུམ་ཞེས་པ་འདི་ནི། དུས་རབས་བཅུ་གཅིག་པར་བསྟན་པ་ཕྱི་དར་དུས་སུ་བོན་གྱི་མཁས་ཆེན་ཞང་སྟོན་བསྟན་པ་ཚུལ་བཞིས་བོན་གྱི་གསས་ཁང་དུ་བསྒྱུར་ཞིང་། ལ་ལས་ད་ལྟའི་འབྲི་ལུང་གནའ་ཤུལ་རྙིང་པ་དེ་ནི་དུས་སྐབས་དེའི་སྟོད་ལུང་ར་བོན་གྱི་འདུ་གནས་བཞེངས་སའི་གནས་སུ་འབྲི་ལུང་དགོན་བཞེངས་པར་འདོད། དུས་རབས་བཅོ་བརྒྱད་པར་འཇང་གུར་དམག་དཔུང་གིས་དགོན་པ་འདི་གཏོར་བརླགས་བཏང་ཡོད་འདུག
ཐེག་པ་གསུམ་གྱི་གནས་ལ་མ་འཐོགས་ཤིང་།།
ཐེག་པ་རིམ་དགུའི་དྲངས་འདྲེན་ཙམ་ཞིག་གིས།།
ཐེག་པ་གང་ལ་མི་གཏོགས་གདོད་མ་ཡི།།
ཐེག་ཞེན་ཐེག་སྣང་ཐེག་འཕྲུལ་ཡོངས་ལ་འདུད།།
རང་རེས་ཕ་ཆོས་ཆེ་མོ་གཡུང་དྲུང་བོན་
སྣང་བ་རྒྱ་ཡན་རིག་པ་རྨོངས་ལ་ཤོར།།
སྣང་བ་གང་དྲན་སྣེ་མོ་འདམ་ལ་ཟུག།
སྣང་ཚུལ་ཙམ་གྱིས་འཐོམས་པའི་གཤེན་ཞེན་པ།།
སྣང་རྒྱལ་ཤེར་ཉིའི་སྤྱན་ལ་འདི་འདྲ་ཡོད།།
མ་བརྟག་འུར་ལ་ཉན་ན་སྣང་བ་སྨྱོ།།
མ་ཤེས་རང་མགོ་མཐོ་ན་སྣང་བ་རྨོངས།།
མ་མཐོང་མེད་པར་འདོད་ན་སྣང་བ་འཁྲུལ།།
མ་སྐྱེས་ཤིང་ལོའི་ཐུགས་ལ་དེ་ལྟར་ཞོག །
གཤེན་རབས་མི་བོ་གཤེགས་ཤུལ་མི་ཤེས་ཤིང་།།
སྨྲ་ཆེན་སྨྲ་ཆུང་སུས་བྲིས་མི་ཚོར་བ།།
བསང་གསུར་རི་ཆུས་སྐྱབས་ཀྱི་ཆོས་ལུགས་ཤིག།
གདོད་མའི་མི་ཡི་རྨོངས་པ་འགའ་ཞིག་ལགས།།
ཞང་ཞུང་རིག་གནས་ཀྱི་ཕུ་ཐག་དང་ཁྱབ་ཚད། ས་རྒྱ་ཁྱབ་ཁུངས་བཅས་ལ་ད་དུང་ཞིབ་དཔྱད་མང་དུ་བྱེད་དགོས་པར་སྣང་།