བོད་ཀྱི་ལོ་རྒྱུས་ལྡོག་འགྲེལ་གྱི་གློག་བརྙན།

རྒྱ་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་བྱས་ཡོད་པའི་གློག་བརྙན་རིང་པོ་ཞིག་བཟོས་ཏེ་ཉིན་འདི་གར་བོད་དང་རྒྱ་ནག་ནང་སྟོན་བཞིན་ཡོད་འདུག

ཟླ་ ༡ ཚེས་ ༢༩ ཉིན་ལྷ་ས་གྲོང་ཁྱེར་དུ། རྒྱ་ནག་གི་མའོ་ཏུན་ (Mao Dun)རྩོམ་རིགས་བྱ་དགའ་ཐོབ་མཁན་གྱི་བོད་རིགས་ཨ་ལའེ་ (Alai) ཡིས་འཁྲབ་གཞུང་བརྩམས་ཤིང་། རྒྱ་རིགས་ན་གཞོན་པཱོ་ཏུང་ཡུས་ཀྱིས་འཁྲབ་ཁྲིད་བྱས་པའི་༼བོད་ཀྱི་མཁའ་ཁྱབ།༽ ཅེས་པའི་གློག་བརྙན་གྱི་པར་ཕུད་དང་པོ་སྟོན་པའི་མཛད་སྒོ་ཞིག་བསྡུས་ཡོད་ཅིང་། དེར་རང་སྐྱོང་ལྗོངས་ཀྱི་མཐོ་རིམ་དཔོན་རིགས་དང་སྒྱུ་རྩལ་བ་མང་པོ་ཞིག་མཉམ་ཞུགས་བྱས་ཡོད་འདུག

གློག་བརྙན་དེས་ ༡༩༥༠ ནས་ ༡༩༨༠ ལོའི་བར་གྱི་བོད་ཞི་བས་བཅིངས་འགྲོལ་དང་། དམངས་གཙོའི་བཅོས་སྒྱུར། སྒྱུར་བཅོས་སྒོ་དབྱེ་ཟེར་བ་སོགས་དུས་མཚམས་གསུམ་ནང་། བོད་ཀྱི་ཞིང་བྲན་བདག་པོའི་བུ་ཕྲུག་བསྟན་འཛིན་དང་ཞིང་བྲན་ཕུར་བུའི་བར་གྱི་དགའ་སྐྱོ་ཆགས་སྡང་དང་མི་སྒེར་གྱི་ལས་དབང་། བསམ་བློའི་འགྱུར་ལྡོག་བཅས་མཚོན་པར་བྱས་ཡོད་ཅིང་། འཁྲབ་སྟོན་པ་མང་ཆེ་བ་བོད་རིགས་ཡིན་པ་མ་ཟད་སྐད་རིགས་ཀྱང་བོད་སྐད་ཡིན་སྟབས། གློག་བརྙན་དེ་རྒྱ་ནག་ནང་སྟོན་སྐབས་རྒྱ་ཡིག་འགྲེལ་བརྗོད་འཁོད་དེ་སྟོན་རྒྱུ་ཡིན་འདུག

བདུན་ཕྲག་སྔོན་མའི་རེས་གཟའ་སྤེན་པའི་ཉིན་གློག་བརྙན་དེའི་འཁྲབ་གཞུང་རྩོམ་པ་པོ་ཨ་ལའེ་ཡིས་ཚོང་ལས་ཚད་འདེགས་ (Business Standard) ཞེས་པའི་དྲ་ཚིགས་ཐོག་བརྗོད་དོན། “ངས་བོད་ཀྱི་དོན་དངོས་གནས་ཚུལ་གང་ཡིན་གསལ་པོ་སྟོན་ཆེད་འཁྲབ་གཞུང་འདི་ཐེངས་ ༡༧ ཙམ་བཟོ་བཅོས་བརྒྱབ་པ་ཡིན” ཞེས་དང་། འཁྲབ་སྟོན་པ་ལྷ་དབང་ནོར་བུ་ཟེར་བས།“གློག་བརྙན་འདི་ནི་བོད་ཀྱི་ལོ་རྒྱུས་དང་དོན་དངོས་གནས་ཚུལ་ལ་གཞི་བཅོལ་ཏེ་བཟོ་སྐྲུན་བྱས་པ་ཞིག་ཡིན་པ་མ་ཟད། བོད་ཀྱི་དངོས་ཡོད་གནས་ཚུལ་རྟོགས་ཐུབ་རྒྱུར་མང་ཚོགས་ཚོར་ཕན་ཐོགས་ཆེན་པོ་ཡོད་སྟབས། མ་འོངས་པར་རྒྱལ་སྤྱིའི་ནང་སྟོན་ཐུབ་པའི་རེ་བ་རྒྱག་གི་ཡོད”ཅེས་སོགས་བརྗོད་འདུག

ཧྲང་ཧེ་ནང་རྟེན་གཞི་བྱས་པའི་གློག་བརྙན་ཕབ་སྐྲུན་པ་རན་ཀྲུང་ལུང་ (Ren Zhonglun) གྱིས། “ང་ཚོས་རྒྱ་ཆེའི་བོད་རིགས་གཟིགས་མོ་བ་ཚོའི་བསམ་འཆར་བཏོན་པར་གཞིགས་ཏེ། བོད་ཀྱི་དོན་དངོས་ལོ་རྒྱུས་དང་འཚམ་པར་ནང་དོན་ལ་བསྒྱུར་བཅོས་བཏང་སྟེ། མ་འོངས་པར་འཇར་མན་དང་ཧྥ་རན་སི། ཨི་ཌ་ལི། ཉི་ཧོང་བཅས་ཀྱི་སྐད་ཡིག་ནང་བསྒྱུར་ནས་རྒྱལ་སྤྱིའི་ཐོག་འགྲེམ་སྤེལ་བྱ་རྒྱུ་ཡིན”ཞེས་དང་། ཁོས་མུ་མཐུད་དུ། “ང་ཚོ་ལས་མི་ ༤༠༠ བོད་ནང་ཟླ་ ༡༠ བསྡད་པ་དང་ཨ་སྒོར་ས་ཡ་ ༢།༢༥ འགྲོ་གྲོན་བཏང་སྟེ། ལོ་ལྔ་ཙམ་གོང་ནས་གློག་བརྙན་འདི་བཟོ་སྐྲུན་བྱས་པ་མ་ཟད། བོད་སྐད་ཐོག་བཟོས་པའི་གློག་བརྙན་དང་པོ་དང་བོད་ནང་སྟོན་ཐེངས་ཐོག་མ་དེ་ཡང་ཆགས་ཡོད་སྟབས། མང་ཚོགས་ཚོ་དགའ་བསུ་ཐོབ་པའི་རེ་བ་ཡོད།” ཅེས་སོགས་བརྗོད་འདུག

ད་རེབ་ཀྱི་གློག་བརྙན་དེར་རིང་ཚད་ཆུ་ཚོད་ ༢ ཡོད་པ་དང་། གློག་བརྙན་དེའི་ནང་སྟོབས་རྒྱལ་གཙོས་ཧྲང་ཧེ་སྒྱུ་རྩལ་ཚོགས་པ་དང་། བོད་ཀྱི་གཏམ་བརྗོད་ཟློས་གར་ཚོགས་པ་ཁག་ནས་ཐོན་པའི་བོད་རིགས་འཁྲབ་སྟོན་པ་ཁག་ཅིག་ཀྱང་ཡོད་པ་དང་། ༢༠༡༤ ལོའི་ཟླ་ ༤ ཚེས་ ༡༣ ཉིན་ཧྲང་ཧེ་ནང་ཐོག་མར་བསྟན་ཡོད་པ་དང་། འདི་ལོའི་ཟླ་ ༦ ནང་ཨི་ཌ་ལིའི་སཱ་ལན་ཌོ་ (Salento) དང་། ཟླ་ ༨ ནང་ཁེ་ན་ཌའི་མཱོན་ཊི་རཱལ་ (Montreal) གྱི་རྒྱལ་སྤྱིའི་གློག་བརྙན་དུས་སྟོན་ཁག་གཉིས་ལ་སྟོན་འཆར་ཡོད་འདུག

གནད་དོན་དབྱེ་ཞིབ་པ་ཚོས། ཐེངས་འདིར་རྒྱ་གཞུང་གིས་ཆེད་དུ་ཕབ་སྐྲུན་བྱས་པའི་གློག་བརྙན་དེའི་འཁྲབ་སྟོན་མི་སྣར་བོད་རིགས་བདམས་པ་དང་། བོད་སྐད་གཙོ་བོར་འཛིན་དགོས་པའི་རྒྱུ་མཚན་གློག་བརྙན་བརྒྱུད་དེ་རྒྱ་ནག་མི་མང་ཁྲོད་དང་རྒྱལ་སྤྱིའི་སྤྱི་ཚོགས་ནང་། རྒྱ་ནག་གཞུང་གིས་བོད་བཙན་བཟུང་བྱས་མེད་པ་མ་ཟད། དེ་ལས་ལྡོག་སྟེ་བོད་ལ་ཞི་བའི་བཅིངས་གྲོལ་བཏང་བ་ཡིན་ཚུལ་ཁྱབ་བསྒྲགས་བྱེད་ཆེད་ཡིན་ཡང་། རྒྱལ་སྤྱིའི་མང་ཚོགས་ཀྱིས་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་བྱེད་ཀྱིན་ཡོད་པར་བདེན་དཔང་བྱེད་ངེས་ཡིན་སྐོར་བརྗོད་འདུག

གློག་བརྙན་དེའི་ཁྲབ་གཞུང་རྩོམ་པ་པོ་ཨ་ལའེ་ཡི་ཨ་ཕ་རྒྱ་རིགས་དང་ཨ་མ་བོད་པ་ཡིན་ཡིན་འདུག་ལ། ༡༩༩༨ ལོར་ཁོས་༼ཉལ་ཐ་དམར་པོ།༽ (Red Poppies) ཞེས་པའི་བརྩམས་སྒྲུང་གི་དེབ་ཅིག་བཏོན་རྗེས་རྒྱ་ནག་ནང་སྙན་གྲགས་རྒྱས་ཡོད་པ་མ་ཟད། ༢༠༠༣ ལོར་༼རྡུལ་འཚུབ་དྭངས་སོང་།༽ (All Dust Settled) ཞེས་པའི་བརྩམས་སྒྲུང་བཏོན་ཏེ་རྒྱ་ནག་གི་མའོ་ཏུན་ (Mao Dun)རྩོམ་རིགས་བྱ་དགའ་ཐོབ་ཡོད་འདུག

གསར་འགོད་པ། དོན་གྲུབ།