ང་ཚོར་དམངས་གཙོ་རྫུན་མ་མི་དགོས།

ཁ་སང་ཧོང་ཀོང་གི་ལྟེ་གནས་གྲོང་ཁྱེར་ནང་མི་མང་སྟོང་ཕྲག་མང་པོས་ང་ཚོར་ཡང་དག་པའི་འོས་འདེམས་དགོས་ཞེས་པའི་འབོད་ཚིག་བསྒྲགས་ཏེ་ངོ་རྒོལ་ཁྲོམ་སྐོར་བྱས་འདུག

ཁ་སང་ཕྱི་ཚེས་ ༡ ཉིན་ཧོང་ཀོང་དམངས་གཙོ་མཐུན་ཚོགས་ཀྱི་གོ་སྒྲིག་འོག ཧོང་ཀོང་གི་ལྟེ་གནས་གྲོང་ཁྱེར་ནང་མི་གྲངས་སྟོང་ཕྲག་མང་པོས། ༼དམངས་གཙོ་རྫུན་མ་མི་དགོས། ང་ཚོར་ཡང་དག་པའི་འོས་འདེམས་དགོས༽ཞེས་པའི་འབོད་ཚིག་བསྒྲགས་ཏེ་ཞི་བའི་ཁྲོམ་སྐོར་བྱས་ཡོད་པ་དང་། ལས་འགུལ་སྣེ་ཁྲིད་པས་ཐེངས་འདིའི་ལས་འགུལ་ནང་མི་ཁྲི་ ༥ ཙམ་མཉམ་ཞུགས་ཐུབ་པའི་ཚོད་དཔག་བྱས་ཀྱང་། དངོས་སུ་མཉམ་ཞུགས་བྱེད་མཁན་ ༡༣༠༠༠ ལས་མེད་སྐོར་བརྗོད་འདུག

ཐེངས་འདིའི་ལས་འགུལ་ནང་ཞུགས་མཁན་ཉུང་དུ་ཕྱིན་པའི་སྐོར་ལ་ཧོང་ཀོང་ཁྲིམས་ལུགས་སློབ་ཆེན་གྱི་དགེ་རྒན་ཆེན་མོ་དང་ལས་འགུལ་སྣེ་ཁྲིད་པ་དེ་ཡོ་ཐིན་གྱིས། དཀྱིལ་དབུས་བཙན་བཟུང་གི་ལས་འགུལ་མཚམས་འཇོག་བྱས་རྗེས་མི་མང་ལ་ངལ་གསོ་དགོས་ཀྱི་ཡོད་ཅིང་། ད་ལྟའི་ཆར་ཁྲོམ་སྐོར་གྱི་ལམ་ནས་དམངས་གཙོའི་ཆོད་སེམས་མཚོན་ཐབས་བྱེད་པར་མི་མང་ནང་བསམ་ཚུལ་མི་འདྲ་བ་ཡོང་བཞིན་ཡོད་པ་ཙམ་ལས། དེ་སྔོན་ལས་འགུལ་ནང་ཞུགས་པའི་མི་མང་གི་བསམ་བློར་གློ་བུར་དུ་འགྱུར་ལྡོག་ཐེབས་སོང་བ་མིན་སྐོར་བརྗོད་འདུག

ལས་འགུལ་ནང་མཉམ་ཞུགས་མ་བྱས་པའི་ཧོང་ཀོང་རྒྱ་ཡིག་སློབ་ཆེན་རང་སྦྱོང་ལྟེ་གནས་ཀྱི་དགེ་རྒན་ཁྲིན་ཡན་ཡཱ་ཡིས་གསར་འགོད་པར། ད་རེས་ང་ལས་འགུལ་ནང་མཉམ་ཞུགས་བྱས་མེད་ལ། ངས་བལྟས་ན་མི་གྲངས་གཙོ་བོ་མ་རེད། ལས་འགུལ་ནང་ཞུགས་མཁན་ཉུང་བ་ཙམ་གྱིས་མི་མང་གིས་ཡང་དག་པའི་འོས་འདེམས་བརྩོན་ལེན་བྱེད་པའི་ཆོད་སེམས་ཉམས་སོང་བ་མཚོན་གྱི་མེད་ལ། ལས་འགུལ་ནང་མ་ཞུགས་པ་ཙམ་གྱིས་ལས་འགུལ་ལ་རྒྱབ་སྐྱོར་བྱེད་ཀྱི་མེད་པའང་མཚོན་གྱི་མེད། ཅེས་བརྗོད་འདུག

འདས་ལོའི་ཕྱི་ཟླ་ ༦ ཚེས་ ༡༠ ཉིན་རྒྱ་ནག་རྒྱལ་སྲིད་སྤྱི་ཁྱབ་ཁང་གིས། ཧོང་ཀོང་སྐོར་གྱི་༼རྒྱབ་ཤ་དཀར་པོ༽ཞེས་པའི་སྲིད་ཡིག་གསར་པ་ཡོངས་བསྒྲགས་བྱས་ཏེ། ཕྱི་ལོ་ ༢༠༡༧ ལོའི་ཧོང་ཀོང་དམིགས་བསལ་སྤྱི་ཁྱབ་འོས་འདེམས་སྐབས། འོས་མི་རྒྱ་གཞུང་གིས་འདེམས་སྒྲུག་བྱ་རྒྱུ་གཏན་འབེབས་བྱས་པར་བརྟེན། འདས་ལོའི་ཕྱི་ཟླ་ ༧ ཚེས་ ༡ ཉིན་ཧོང་ཀོང་གི་དཀྱིལ་དབུས་གྲོང་ཁྱེར་ནང་ཞི་རྒོལ་བ་ཁྲི་ཕྲག་མང་པོས་ངོ་རྒོལ་བྱས་ཡོད་པ་མ་ཟད། ཕྱི་ཟླ་ ༩ པའི་ནང་ནས་བཟུང་མཐོ་རིམ་སློབ་མས་གཙོས་ཞི་རྒོལ་བ་ཚོས་དཀྱིལ་དབུས་བཙན་བཟུང་གི་ལས་འགུལ་སྤེལ་མགོ་བརྩམས་ཏེ། ཟླ་བ་ ༢ ལྷག་རིང་ལྟེ་གནས་གྲོང་ཁྱེར་གྱི་གཞུང་ལམ་ཁག་ཏུ་སྡོད་གུར་བརྒྱ་ཕྲག་མང་པོ་ཕབ་ནས་ཞི་རྒོལ་བྱས་ཡོད་པ་མ་ཟད། ཧོང་ཀོང་ཁྲིམས་བཟོ་ལྷན་ཁང་དང་ཁྲིམས་ཞིབ་ཁང་གི་སྒོ་སྒེའུ་ཁུང་བཅག་སྟེ་ནང་དུ་འཛུལ་བ་སོགས་ཀྱི་ངོ་རྒོལ་ཤུགས་ཆེན་བྱས་ཡོད་ཀྱང་། འདས་ལོའི་ཕྱི་ཟླ་ ༡༢ པའི་ནང་ཧོང་ཀོང་ཆེས་མཐོའི་ཁྲིམས་ཞིབ་ཁང་གི་བཀའ་བཀོད་འོག་ལས་འགུལ་བཙན་གྱིས་མཚམས་འཇོག་ཏུ་བཅུག་ཡོད་པ་རེད།

གསར་འགོད་པ། པདྨ་མཚོ།