བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༢ སྟེང་གི་རྩོམ་སྒྲིག་པའི་གཏམ།
ཉེ་ལམ་འཕྲོད་བསྟེན་ལས་ཁུངས་ཀྱིས་སྨན་བཅོས་ལྟ་སྐྱོང་ལས་གཞིར་ལེགས་བཅོས་བཏང་ཡོད་ཅེས་ས་གནས་མགོ་འཛིན་ཁག་དང་འཕྲོད་བསྟེན་ལས་བྱེད་ཚོར་ཟབ་སྦྱོང་ཞིག་སྤྲད་སོང་། ལས་གཞི་འདིར་བསྐྱར་ཞིབ་དང་ལེགས་བཅོས་བྱེད་དགོས་པ་གལ་ཆེན་རེད། འདས་པའི་ལོ་གཉིས་གསུམ་ནང་ལས་གཞི་འདིར་གྱོང་རག་ཡོད་པ་མ་ཟད། མང་ཚོགས་ལ་ཕན་ཐོགས་ཀྱིན་ཡོད་པའི་སྐད་ཆ་ཡང་གོ་ཐོས་མི་འདུག
རྒྱལ་ཁབ་དང་སྤྱི་ཚོགས་གཞན་པའི་ནང་དུ། ལས་གཞི་འདི་ཁེ་ཕན་ཆེན་པོ་ཡོད་པའི་ཚོང་ལས་ཤིག་ཡིན་པ་མ་ཟད། མི་མང་གི་འཕྲོད་བསྟེན་ལའང་ནུས་པ་ཆེན་པོ་འཐོན་བཞིན་ཡོད། འུ་ཅག་འཕྲོད་བསྟེན་ལས་ཁུངས་ཀྱིས་ཐོག་མ་ནས་ཚོང་ཁེ་ཡི་ཆེད་དུ་མིན་པར། མང་ཚོཊ་ཀྱི་འཕྲོད་བསྟེན་འགན་སྲུང་ཆེད་ཡིན་ཞེས་ཡང་ཡང་གསུངས་ཡོད་ཀྱང་། ད་ལྟ་ད་དུང་ལས་གཞི་འདིའི་ནང་ཞུགས་མཁན་ཉུང་ཉུང་རེད་ལ། གང་ཞུགས་པ་དག་གིས་ཁེ་ཕན་ལོངས་སུ་སྤྱོད་ཕྱོགས་ཀྱང་ཚུལ་མཐུན་མིན་པའི་སྐད་ཆ་འདུག
ལས་གཞི་འདི་དེང་སྐབས་ནུབ་ཕྱོགས་སུ་དར་ཁྱབ་ཆེན་པོ་ཡིན། ཨ་རི་དང་ཡུ་རོབ་ལྟ་བུར་མཚོན་ན་རྒྱལ་ཁབ་ཀྱི་སྤྱི་འབངས་ཤིག་ཡིན་པའི་ཚུན་ལ་ཁྲིམས་ཐོག་ནས་ལས་གཞི་འདིའི་ནང་ཞུགས་དགོས་པ་བཟོས་ཡོད། འུ་ཅག་གི་ལས་གཞི་འདི་ཡང་བཀའ་ཤག་གསར་རྙིང་གཉིས་ཀས་རྣམ་དཔྱོད་དཀྲོག་པའི་མར་ལོ་དང་། སྤྱི་འཐུས་གྲོས་ཚོགས་ནང་རྩོད་གླེང་མང་པོ་བྱས་པའི་ལས་འཆར་ཞིག་ཡིན། བོད་ཀྱི་དུས་བབ་གསར་ཁང་གིས་ཀྱང་རྒྱབ་སྐྱོར་ཆེད་དོགས་འདྲི་གཏིང་སྔོག་བྱས་ཏེ་གནས་ཚུལ་ཐེངས་མང་སྤེལ་ཡོད།
ལོ་གསུམ་འདས་པའི་ད་ལྟ་ད་དུང་ལས་གཞི་འདིར་རྔོ་འཐོག་གི་མེད་པར། ལོ་རེ་ནས་ལོ་རེར་གྱོང་འབོར་ཇེ་ཆེ་དང་ཚོགས་མི་ཇེ་ཉུང་གི་རྣམ་པ་འཐོན་ཡོད། ལས་གཞི་འདི་ལམ་ལྷོངས་འབྱུང་གི་མེད་པའི་གནད་དོན་གཙོ་བོ་འཆར་འགོད་དང་ལག་བསྟར་གནང་ཕྱོགས་ལ་ཐུག་ཡོད་ལ། འུ་ཅག་བོད་པ་ཚང་འདི་སྤྱི་བར་ཁེ་ཕན་བསྐྲུན་རྒྱུ་ལས་སྒེར་གྱི་ཁེ་བཟང་ལེན་རྒྱུར་དགའ་བ་དང་། སྤྱི་བའི་ལས་འགན་བསྒྲུབ་པ་ལས་སྒེར་གྱི་ཐོབ་ཐང་རྩོད་རྒྱུར་མོས་པའི་གཤིས་ཀ་ཞིག་ཡོད་པ་དེས་ཀྱང་ལན་ཡོད།
སྨན་བཅོས་ལྟ་སྐྱོང་ལས་གཞི་འདིའི་ཁྲོད་དུ། མི་རེ་ཟུང་གིས་མགོ་སྨན་སོ་སྨན་ལའང་བྱུང་འཛིན་རྫུན་མ་བཟོ་བ་དང་། ན་ཚ་གང་ཡང་མེད་ཀྱང་འབྲེལ་ཡོད་སྨན་ཁང་ནས་རྒྱབ་གཉེར་བླངས་ཏེ། རྒྱ་གར་སྨན་ཁང་དྲག་རུ་དྲག་ཚད་ནང་ཕྱིན་ཏེ་མགོའི་སྐྲ་ནས་རྐང་པའི་སེན་མོའི་བར་བརྟག་དཔྱད་ཡང་ཡང་གཏོང་གི་ཡོད་པའི་གནས་ཚུལ་ཡང་འདུག ངའི་མིག་གི་མཐོང་སར་ཡང་མི་ཞིག་གིས་རྒྱལ་ཁ་ཆེན་པོ་བླངས་མདོག་དང་། ཧ་ཅང་གྲུང་པོ་ཡིན་མདོག་གིས་ཁོས་དེ་ལྟར་བྱས་སྐོར་བརྗོད་སོང་ལ། མི་གཞན་ལའང་དེ་ལྟར་བྱ་དགོས་པའི་སྐུལ་སློང་བྱས་བྱུང་།
བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་འདི་ལམ་ལྷོངས་དང་། ཐེངས་འདིའི་ཨ་སྒོར་ས་ཡ་གསུམ་དེ་ཆུད་ཟོས་སུ་མ་སོང་བ་ཞིག་བྱེད་དགོས་ན། འབྲེལ་བ་ཡོད་མེད་གཉིས་ཀར་ཟབ་སྦྱོང་སྤྲོད་པ་དང་། ས་གནས་མང་ཚོགས་ཁྲོད་དུ་གོ་རྟོགས་སྤེལ་རྒྱུ་ལས་ཀྱང་། སྔོན་ལ་བསྒྲུབ་དགོས་པ་དེ་དབུས་ཀྱི་ལས་གཞི་འཆར་འགོད་དག་སྒྲིག་ལེགས་བཅོས་དང་། ལག་བསྟར་གོ་རིམ་ཁྲོད་ཀྱི་གནད་དོན་དེ་དག་གཏན་འགོག་བྱེད་དགོས།
