གསུམ་ཚན་གསུམ་གྱི་རྒོལ་རྡུང་།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༣ སྟེང་གི་རྩོམ་སྒྲིག་པའི་གཏམ།

རྒྱ་ནག་གི་སྲིད་འཛིན་ཞི་ཅིན་ཕིན་གྱི་ལྐོག་ཟ་རུལ་སུངས་རྒོལ་རྡུང་ལས་འགུལ་འདི་རིམ་པ་གསུམ་ལ་བགོས་ན། དུམ་བུ་དང་པོ་སྟག་དང་སྦྲང་མ་མཉམ་རྡུང་གི་རིམ་པ་དང་། དུམ་བུ་གཉིས་པ་མཐའ་དང་དབུས་གཉིས་མཉམ་བཅུན་གྱི་རིམ་པ། དུམ་བུ་གསུམ་པ་གཞུང་དང་དམངས་གཉིས་མཉམ་སྡེབ་ཀྱི་རིམ་པ་བཅས་རེད། འདི་ཞི་ཅིན་ཕིན་གྱི་ཀྲུང་གོའི་རྨི་ལམ་ལ་གོས་དང་རྒྱན་ཆས་མ་སྤུད་པའི་གཅེར་གཟུགས་དེ་ཡིན་ལ། ཏང་གི་ཚོགས་ཆེན་བཅོ་བརྒྱད་པ་ནས་ཞི་ཅིན་ཕིན་གྱི་སྲིད་ལོ་མ་རྫོགས་བར་གྱི་བགྲོད་ལམ་དེ་ཡང་ཡིན། 

དུམ་བུ་གསུམ་ཀའི་གཞུང་ཤིང་དེ་ “ལྐོག་ཟ་རུལ་སུངས་དང་དབང་ཆ་སྒེར་སྤྱོད་ལ་རྒོལ་རྡུང་གཏོང་བ་” ཟེར་བ་འདི་ཡིན། རྩ་བ་ཀླུ་ཡུལ་དུ་ཟུག་ཅིང་ལོ་འདབ་མི་ཡུལ་དུ་རྒྱས་ཏེ། རྩེ་མོ་ལྷ་ཡུལ་དུ་སྙེག་པའི་གཞུང་ཤིང་འདིའི་སྟེང་དུ། ཡལ་ཀ་མང་པོ་ཕྱོགས་བཞི་མཚམས་བརྒྱད་དུ་བསྐྱེད་ཅིང་རྒྱས་ཏེ། ཡལ་ཀ་དང་ལོ་མ་རབ་ཏུ་སྟུག་པའི་དགོས་འདོད་ཀུན་འབྱུང་དཔག་བསམ་འཁྲི་ཤིང་འདིའི་འོག་ནས། ཞི་ཅིན་ཕིན་གྱིས་མ་འོངས་པའི་ལོ་ལྔ་ནས་བཅུ་ལ་སྲིད་ཀྱི་འཁོར་ལོ་རྩིབ་སྟོང་ལྡན་པ་ཞིག་བསྐོར་རྒྱུ་རེད།

སྔོན་ཆད་མའོ་ཙེ་ཏུང་གིས་ལིའུ་ཧྲོ་ཆི་ཡི་སྟོབས་ཤུགས་ཉམས་རྨས་སུ་གཏོང་ཆེད། ༡༩༦༦ ནས་ ༡༩༧༦ ལོའི་བར་རིག་གནས་གསར་བརྗེའི་ལས་འགུལ་སྤེལ་བ་ལྟར། ཞི་ཅིན་ཕིན་གྱི་བགྲོད་ལམ་འདི་ལ་ཡང་མངོན་ལྐོག་གཉིས་ཡོད་ཅིང་། མངོན་དུ་ལྐོག་ཟ་རུལ་སུངས་ལ་རྒོལ་རྡུང་བཏང་སྟེ། ལྐོག་ནས་ཅང་ཙེ་མིན་ཤོག་ཁག་ལ་ཁྱོད་ཤི་ང་གསོན་གྱི་དབང་ཆའི་འཐབ་རྩོད་བྱེད་ཀྱིན་ཡོད།

གཡུལ་འཐབ་འདིར་འཕྲལ་ཕུགས་ཀྱི་དམིགས་ཡུལ་གཉིས་ཡོད། འཕྲལ་དུ་སྒེར་གྱི་དབང་ཆ་སྲ་བརྟན་དང་ཕུགས་སུ་དམར་ཤོག་ཚོགས་པ་རྒྱུན་གནས་ཡོང་ཆེད་ཡིན། དམར་ཤོག་ཚོགས་པ་རྒྱུན་གནས་ཡོང་ན་ཁོའི་སྲིད་ཇུས་ཀྱི་ཐལ་སྐྱོན་ནོར་འཁྲུལ་རིགས་འགེབ་ཐུབ་པ་མ་ཟད། ལོ་རྒྱུས་ཀྱི་ནག་ཉེས་དག་ཀྱང་ཡོ་སྲང་བྱེད་ཐུབ་ལ། ཁོ་དང་ཁོའི་ཤོག་ཁག་གི་བུ་རབས་ཚ་རྒྱུད་ཀྱི་མདུན་ལམ་ཡང་འོད་སྟོང་ལྡན་པ་ཞིག་ཡིན།

ཞི་ཅིན་ཕིན་གྱི་བགྲོད་ལམ་འདི་ལོ་གསུམ་ཚན་གསུམ་ལ་བགོས་ན། ༢༠༡༢ ནས་ ༢༠༡༥ ལོའི་བར་གྱི་སྟག་དང་སྦྲང་མ་མཉམ་རྡུང་གི་དུས་རིམ་དེ་རྫོགས་ཏེ། ད་ཆར་རིམ་པ་གཉིས་པ་ ༢༠༡༥ ནས་ ༢༠༡༨ ལོའི་བར་གྱི་མཐའ་དང་དབུས་གཉིས་མཉམ་བཅུན་གྱི་རིམ་པར་སླེབ་ཡོད། རིམ་པ་འདིར་ཞི་ཅིན་ཕིན་སྔོན་ཆད་བོད་ཁུལ་དུ་བསྐྱོད་སྐབས། “རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས་པ་དང་། མཐའ་མཚམས་སྐྱོང་བར་སྔོན་ལ་བོད་བརྟན་བརླིང་ཡོང་དགོས།” ཞེས་བརྗོད་པ་དེ་གཙོ་གནད་དུ་བཟུང་སྟེ། བོད་གཙོས་པའི་གྲངས་ཉུང་མི་རིཊ་ཀྱི་གནད་དོན་ཐོག་ལག་པ་འཆིང་ངེས་ཡིན།

ཉེ་ལམ་བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཁང་གིས་བོད་རིགས་ཏང་ཡོན་ལས་བྱེད་ཁག་ཅིག་ལ་༧གོང་ས་མཆོག་དང་བོད་རང་བཙན་ལ་འབྲེལ་བ་ཡོད་པ་དང་གསང་བའི་གནས་ཚུལ་ཕྱིར་བསྐྱལ་བ་སོགས་ཀྱི་ནག་ཉེས་བཙུགས་པ། དེ་བཞིན། དམར་ཤོག་དྲུང་ཆེ་ཁྲིན་ཆོན་ཀའོ་ཡིས་རུལ་སུངས་ལ་ངོ་རྒོལ་བྱེད་པའི་འཐབ་རྩོད་དེ་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་དང་མཉམ་དུ་གོ་སྒྲིག་དང་མཉམ་དུ་དོན་འཁྱོལ། མཉམ་དུ་ཞིབ་བཤེར་བྱེད་དགོས། ཞེས་གཏམ་བཤད་སྤེལ་བ་སོགས་ནི་ཞི་ཅིན་ཕིན་གྱི་བགྲོད་ལམ་དུམ་བུ་གཉིས་པའི་ཆ་ཤས་ཡིན།

རིམ་པ་གསུམ་པ་ ༢༠༡༨ ནས་ ༢༠༢༡ ལོའི་བར་གྱི་གཞུང་དང་དམངས་གཉིས་མཉམ་བསྒྲིལ་གྱི་རིམ་པ་དེ་ནི། མང་ཚོགས་ལ་གོ་བསྐོན་བློ་འགུག་གི་དུས་རིམ་ཞིག་ཡིན། ཏང་གི་ཚོགས་ཆེན་བཅོ་བརྒྱད་པའི་སྟེང་ཞི་ཅིན་ཕིན་གྱིས། ཀྲུང་གོའི་རྨི་ལམ་མངོན་འགྱུར་བྱེད་ན་ངེས་པར་དུ་ཀྲུང་གོའི་སྟོབས་ཤུགས་གཅིག་ཏུ་བསྒྲིལ་དགོས། འདི་ནི་ཀྲུང་གོའི་རིགས་སོ་སོའི་མི་དམངས་མཐུན་སྒྲིལ་ཆེན་པོ་བྱེད་པའི་སྟོབས་ཤུགས་ཡིན་ཞེས་བརྗོད་པ་ལྟར། རིམ་པ་འདིའི་ནང་ཁོས་ལག་པ་དམར་པོ་དེ་གཙང་བཀྲུས་བྱས་ཏེ། རྒྱ་ནག་མི་མང་དང་རྒྱལ་སྤྱིའི་སྤྱི་ཚོགས་ཁྲོད་སྣང་བརྙན་གསར་པ་ཞིག་བཞེངས་ཐུབ་བྱ་ངེས་ཡིན།