རྒྱལ་དར་བེད་སྤྱོད་གཏོང་སྟངས་ལ་གཟབ་གཟབ་བྱོས།

དེ་རིང་ཉིན་རྒྱབ་དྷ་ས་མེག་གྷན་ཉིན་སློབ་ཏུ་བོད་རང་བཙན་བསྐྱར་དུ་གསལ་བསྒྲགས་གནང་བའི་ཉིན་མོ་སྲུང་གཙི་དང་འབྲེལ། བོད་ཀྱི་རྒྱལ་དར་དང་རྒྱ་གར་གྱི་རྒྱལ་དར་བེད་སྤྱོད་གཏོང་སྐབས་གཟབ་གཟབ་བྱེད་དགོས་སྐོར་བརྗོད་སོང་།

དེ་རིང་ཉིན་རྒྱབ་ཆུ་ཚོད་ ༣།༣༠ ཙམ་ལ་དྷ་ས་མེག་གྷན་ཉིན་སློབ་ཀྱི་ཚོགས་ཁང་དུ། བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག ཕྱི་ལོ་ ༡༩༡༣ ལོའི་ཟླ་ ༢ ཚེས་ ༡༣ ཉིན་༸རྒྱལ་བ་སྐུ་ཕྲེང་བཅུ་གསུམ་པ་མཆོག་གིས། བོད་རང་བཙན་བསྐྱར་དུ་གསལ་བསྒྲགས་གནང་བའི་ཉིན་མོ་སྲུང་གཙི་བྱས་ཏེ་བགྲོ་གླེང་ཞིག་ཚོགས་སོང་བ་དང་།  ཚོགས་ཐོག་ཏུ་སྐུ་མགྲོན་གཙོ་བོ་སྣར་སྐྱིད་ངག་དབང་དོན་གྲུབ་ལགས་དང་། བོད་མི་མང་སྤྱི་འཐུས་རྒྱུན་ལས་དགེ་བཤེས་སྨོན་ལམ་མཐར་ཕྱིན་ལགས། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ལྷ་རྒྱལ་རི་རྣམ་རྒྱལ་སྒྲོན་དཀར་ལགས། དེ་བཞིན་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན་ལགས་བཅས་ཀྱིས། བོད་ཀྱི་རྒྱལ་དར་གྱི་བྱུང་རིམ་དང་མཚོན་དོན། དེ་བཞིན་བེད་སྤྱོད་གཏོང་ཕྱོགས་སོགས་ཀྱི་ཐོག་བགྲོ་གླེང་དང་དྲི་བ་དྲིས་ལན་གནང་སོང་།

གཞན་ཡང་། སྐབས་དེར་ལོ་ངོ་ ༡༠༠ ལྷག་གི་ལོ་རྒྱུས་ཡོད་པའི་བོད་ཀྱི་གངས་སེང་དམག་དར་ཞིག་དབུ་འབྱེད་དང་པར་རིས་འགྲེམས་སྟོན། དེ་བཞིན་གཞས་པ་ཁག་ཅིག་གིས་གཞས་སྣ་འཁྲབ་སྟོན་སོགས་བྱས་སོང་ལ། དྷ་ས་ཁུལ་གྱི་བོད་རིགས་སེར་སྐྱ་མི་མང་དང་ཕྱི་རྒྱལ་ཁག་ནས་ཡོང་བའི་བོད་དོན་དོ་སྣང་ཅན་བཅས་མི་གྲངས་ ༡༠༠ ཡས་མས་ཤིག་འཛོམས་འདུག

བགྲོ་གླེང་ཐོག་སྣར་སྐྱིད་ངག་དབང་དོན་གྲུབ་ལགས་ཀྱིས་བོད་ཀྱི་རྒྱལ་དར་གྱི་བྱུང་རིམ་དང་མཚོན་དོན་ངོ་སྤྲོད་གནང་སྐབས། བོད་ཀྱི་རྒྱལ་དར་གྱི་ཐོག་མའི་བྱུང་རིམ་ནི་བོད་རྒྱལ་སྲོང་བཙན་སྒམ་པོའི་སྐབས་ནས་བཟུང་བྱུང་ཡོད་པ་དང་།  ཕྱིས་སུ་༸རྒྱལ་བ་སྐུ་ཕྲེང་བཅུ་གསུམ་པ་མཆོག་སྐུ་དངོས་ནས་བོད་ཀྱི་དམག་དར་དེ་ད་ལྟའི་རྒྱལ་དར་གྱི་ངོ་བོར་ ལྗགས་བཀོད་གནང་བའི་ལོ་རྒྱུས་ཡོད་སྐོར་གསུངས་པ་དང་འབྲེལ། བོད་ཀྱི་རྒྱལ་དར་གྱི་མཚོན་དོན་རྣམས་ངོ་སྤྲོད་གནང་སོང་།

དེ་རྗེས་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་ཀྱིས་དབྱིན་སྐད་ཀྱི་ཐོག་ནས་འཛམ་གླིང་ཐོག་རྒྱལ་དར་མང་པོ་ཡོད་པའི་ཁྲོད་ནས་བོད་ཀྱི་རྒྱལ་དར་ནི་ལོ་རྒྱུས་གང་འཚམ་ཡུན་རིང་ལྡན་པ་ཞིག་ཡིན་ཡང་། རྒྱ་གཞུང་གི་དབང་བསྒྱུར་འོག་ད་ལྟའི་ཆར་བོད་ནང་དུ་བོད་ཀྱི་རྒྱལ་དར་བསྒྲེང་འཕྱར་བྱས་ན་ཁྲིམས་འགལ་ཆགས་ཀྱི་ཡོད་པ་མ་ཟད། བོད་ཀྱི་རྒྱལ་དར་འཕྱར་བའི་ནག་ཉེས་འོག་བོད་མི་མང་པོ་འཛིན་བཟུང་གཅར་རྡུང་དང་། མནར་གཅོད་འོག་ཚེ་སྲོག་ཤོར་གྱི་ཡོད་པ་རེད། ཡིན་ནའང་།  གཞིས་ལུས་བོད་མི་ཚོས་འཛེམས་ཟོན་མེད་པར་མ་སྐུལ་དང་བླངས་ཀྱིས་རང་ཁྱིམ་དུ་བོད་དར་སྒྲིག་ཤོམ་དང་། བོད་མིའི་རང་དབང་འཐབ་རྩོད་བྱེད་པའི་ཆོད་སེམས་ནམ་ཡང་འདོར་གྱི་མེད་སྐོར་སོགས་བརྗོད་སོང་།

དགེ་བཤེས་སྨོན་ལམ་མཐར་ཕྱིན་ལགས་ཀྱིས་བོད་ཀྱི་རྒྱལ་དར་བེད་སྤྱོད་གཏོང་ཕྱོགས་ཐད་ཁྲིམས་སྲོལ་གཏན་འབེབས་མེད་པར་བརྟེན། སྤྱི་ཚོགས་ཐོག་གང་བྱུང་བེད་སྤྱོད་གཏོང་གི་ཡོད་པ་མ་ཟད། བེད་སྤྱོད་བཏང་རྗེས་བདག་པོ་མ་བརྒྱབ་པར་རྒྱལ་ཁབ་ཅིག་གི་རྒྱལ་དར་གྱི་ཆེ་མཐོང་བརླག་འགྲོ་ཡི་ཡོད་སྐོར་དང་། དེ་བཞིན། རྒྱ་གར་གྱི་རྒྱལ་དར་བེད་སྤྱོད་གཏོང་སྐབས་གཟབ་གཟབ་མ་བྱས་ན།  དེ་སྔོན་བོད་མིས་ལས་འགུལ་སྤེལ་སྐབས་དང་ཚོགས་འདུ་སོགས་སུ་རྒྱ་གར་གྱི་རྒྱལ་དར་ཁྲིམས་སྲོལ་ལྟར་སྒྲེང་འཕྱར་མ་བྱས་པའི་དཀའ་རྙོག་བྱུང་མྱོང་ཡོད་སྟབས། གནས་ཡུལ་རྒྱལ་ཁབ་ཀྱི་ཁྲིམས་ཚུལ་བཞིན་སྲུང་དགོས་ལུགས་བརྗོད་ཀྱི་ཡོད་པ་ལྟར། མ་འོངས་པར་ལས་འགུལ་སོགས་སྤེལ་སྐབས་ངེས་པར་དུ་བེད་སྤྱོད་མ་ནོར་བ་དགོས་རྒྱུ་གལ་ཆེན་ཡིན་པའི་སྐོར་སོགས་བརྗོད་པ་དང་འབྲེལ། བཙན་བྱོལ་བོད་མིའི་སྤྱི་ཚོགས་ཁྲོད་བོད་དར་དང་རྒྱ་གར་གྱི་རྒྱལ་དར་བེད་སྤྱོད་བྱེད་སྟངས་ཚུལ་མཐུན་མིན་པའི་པར་རིས་མང་པོ་བརྙན་རས་བརྒྱུད་འགྲེམས་སྟོན་གནང་སོང་།

བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན་ལགས་ཀྱིས་བགྲོ་གླེང་དང་འབྲེལ་བའི་གཏམ་བཤད་གནང་སྐབས། དེ་རིང་ནི་བོད་རང་བཙན་གསལ་བསྒྲགས་གནང་བའི་ཉིན་མོ་སྲུང་གཙི་བྱས་པ་ཐེངས་གསུམ་པ་དེ་ཆགས་ཡོད། ཕྱི་ལོ་ ༢༠༡༣ ལོའི་ཕྱི་ཟླ་ ༢ ཚེས་ ༡༣ ཉིན་༸རྒྱལ་བ་སྐུ་ཕྲེང་བཅུ་གསུམ་པས་བོད་རང་བཙན་བསྐྱར་གནས་གསལ་བསྒྲགས་གནང་སྟེ་ལོ་ངོ་ ༡༠༠ འཁོར་ཡོད་སྟབས། ང་ཚོས་དྷ་རམ་ས་ལ་རུ་ཉིན་མོ་དེ་སྲུང་གཙི་བྱས་ཡོད་ལ། སྐབས་དེར་དྷ་ས་ཙམ་མ་ཡིན་པར་འཛམ་གླིང་གི་རྒྱལ་ཁབ་ཁག་ ༣༠ ལྷག་གི་རྒྱལ་ས་དག་ཏུ་ཉིན་མོ་སྲུང་གཙི་བྱས་ཏེ་ལས་འགུལ་དཔེ་མི་སྲིད་པའི་ཚགས་ཚུད་པོ་བྱུང་ཡོད་པ་རེད། ལས་འགུལ་འདིའི་དམིགས་ཡུལ་ནི་ལོ་རྒྱུས་ནང་བོད་རང་བཙན་ཡིན་པ་དེ་དངོས་ཡོད་ཡིན་ནའང་། རྒྱ་ནག་གཞུང་གིས་ལོ་ངོ་ ༦༠ ལྷག་གི་རིང་གནོན་ཤུགས་སྤྲོད་པ་དང་ཁྱབ་བསྒྲགས་བྱེད་པ་སོགས་ཨ་སྒོར་ས་ཡ་མང་པོས་འགྲོ་སོང་བཏང་སྟེ། ང་ཚོའི་ལོ་རྒྱུས་དེ་གསུབ་ཐབས་བྱེད་ཀྱི་ཡོད་སྟབས། དེ་ལ་ཁ་གཏད་བཅག་སྟེ་ང་རང་ཚོ་བོད་པ་དང་རྒྱལ་སྤྱིའི་ཐོག་ང་ཚོའི་ལོ་རྒྱུས་ཀྱི་བདེན་པ་ར་སྤྲོད་བྱེད་པའི་དམིགས་ཡུལ་བཟུང་ཡོད། ཅེས་སོགས་བརྗོད་སོང་།

གསར་འགོད་པ། པདྨ་མཚོ།