༄༅། ། རྒྱ་ཆེའི་དད་ལྡན་དོན་གཉེར་ཅན་རྣམས་ཀྱི་སྙན་དབང་དུ་ཞུ་གསོལ།
འདི་ག་རྒྱ་གར་མངའ་སྡེ་ནུབ་བྷ་གྷལ་ཁུལ་གྱི་ས་གནས་སཱ་ལུ་སྒར་དུ་གནས་པའི་༧དཔལ་ལྡན་སྲད་རྒྱུད་མ་དགོན་འདུས་སྤྱི་ནས་གསོལ་བ་ཕུར་ཚུགས་སུ་བཏབ་པའི་ངོར། ཕྱི་ལོ་ ༢༠༡༥ ཟླ་ ༣ ཚེས་ ༧ ཉིན། རི་བོ་དགེ་ལྡན་པའི་བསྟན་པའི་སྲོག་ཤིང་༧འཇམ་དགོན་རྒྱལ་བ་གཉིས་པའི་རྒྱལ་ཚབ་དགའ་ལྡན་ཁྲི་རབས་བརྒྱ་དང་གཉིས་༧སྐྱབས་རྗེ་རི་རྫོང་སྲས་སྤྲུལ་རིན་པ་ཆེ་མཆོག་ནས་ཞིང་གཤེགས་དམ་པ་སྲད་རྒྱུད་མཁན་ཁྲི་གོ་བདུན་པ་རྡོ་རྗེ་འཆང་༧རྗེ་བཙུན་བྱམས་པ་དབང་རྒྱལ་མཆོག་གི་དགོངས་རྫོགས་མཆོད་འབུལ་དང་། སྐལ་ལྡན་གྱི་འགྲོ་བར་དམིགས་ནས་སྤྱི་ཟླ་ ༣ ཚེས་ ༨ ཉིན༧དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་བཀའ་དབང་གི་སྟ་གོན་དང་། ཚེས་ ༩ ཉིན་དངོས་གཞི། ཚེས་ ༡༠ ཉིན་༧འཕགས་པ་ཐུགས་རྗེ་ཆེན་པོའི་བཀའ་དབང་། ཚེས་ ༡༡ ཉིན་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཅས་ཉིན་བཞིའི་ཆོས་འབྲེལ་སྩལ་རྒྱུའི་བཀའ་བཞེས་ཟབ་མོ་ཐོབ་པ་ལགས་ན།
ཕྱོགས་མཐའ་ཁག་ལ་བཞུགས་པའི་དད་ལྡན་གསུང་ཆོས་ལ་བཅར་བློ་ཡོད་རིགས་རྣམས་དུས་ཐོག་ངེས་ཕེབས་ཡོང་བའི་ཆོས་བརྡར།
སཱ་ལུ་སྒར་༧དཔལ་ལྡན་སྲད་རྒྱུད་མ་དགོན་སྡེ་གྲྭ་ཚང་ནས་ཕྱི་ལོ་ ༢༠༡༥ ཟླ་བ་ ༢ ཚེས་ ༡༢ ལ་ཕུལ།
