ལོ་གསར་ལམ་འཚམས་འདྲི་ཞུ།

སྲིད་སྐྱོང་མཆོག་གིས་བོད་རྒྱལ་ལོ་ ༢༡༤༢ རབ་བྱུང་ ༡༧ ཤིང་མོ་ལུག་ལོའི་གནམ་ལོ་གསར་ཚེས་ལ་བོད་མི་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུས་ཡོད།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་ཤིང་མོ་ལུག་ལོའི་གནམ་ལོ་གསར་ཚེས་ལ། གཞིས་བྱས་བོད་མི་ཡོངས་ལ་འཚམས་འདྲི་དང་འབྲེལ། བོད་མི་གཞོན་སྐྱེས་ཚོས་ལོ་གསར་སོགས་ཆོས་ཕྱོགས་དང་སྲོལ་རྒྱུན་གྱི་བྱེད་སྒོ་ཁག་ལ་ཐུགས་སྣང་མཉམ་ཞུགས་གནང་གལ་ཆེ་བ་དང་། བོད་ཕྱི་ནང་གཉིས་སུ་བོད་བསྟན་སྲིད་མི་རིགས་ཆེད་ཚེ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་དང་། ད་ལྟ་རྒྱའི་བཙོན་འོག་ཏུ་དཀའ་སྡུག་མྱོང་བཞིན་པ་དག་དུས་ནམ་ཡང་བརྗེད་ཐུབ་མེད་པ། བོད་མིའི་འདུ་ཕྱིའི་སྐྱབས་མགོན་༧གོང་ས་མཆོག་གི་ཆོས་སྲིད་ཀྱི་བཀའ་སློབ་ལམ་སྟོན་ཁག་བོད་མི་ཡོངས་ཀྱིས་ཉམས་ལེན་ཚུལ་བཞིན་གནང་དགོས་པ། དེ་བཞིན་བཀའ་ཤག་སྐབས་བཅུ་བཞི་པའི་ཆིག་སྒྲིལ་དང་གསར་གཏོད། རང་ཁ་རང་གསོ་བཅས་ཀྱི་ལྟ་གྲུབ་གསུམ་ལ་བརྟེན་ཏེ་བོད་མིའི་མངོན་འདོད་བསྒྲུབ་ཐུབ་ལ་ལྷག་བསམ་རྣམ་དག་གིས་འབད་བརྩོན་མུ་མཐུད་གནང་དགོས་པ་བཅས་ཀྱི་འབོད་སྐུལ་གནང་སོང་།