ལོ་གསར་ཚེས་གཅིག་ཉིན་བསྟན་པ་དར་རྒྱས་ལགས་ཀྱིས་ཨོ་སི་ཊོ་ལི་ཡའི་སྦིར་སི་བྷན་དུ་བོད་པའི་བདེན་དོན་ཆེད་ཚེ་སྲོག་ཤོར་བ་དག་གི་ཆེད་དུ་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་འདུག
ཆབ་སྲིད་བཙོན་བཟུར་བསྟན་པ་དར་རྒྱལ་ལགས་ཀྱིས། ཕྱི་ཟླ་ ༢ ཚེས་ ༡༩ སྟེ་བོད་པའི་ལོ་གསར་ཚེས་གཅིག་དང་བསྟུན་ཏེ། ཨོ་སི་ཊོ་ལི་ཡའི་ཁོན་སི་ལན་ཌི་(Queensland)མངའ་སྡེའི་གྲོང་ཁྱེར་ལྟེ་བ་སྦིར་སི་བྷན་(Brisbane)དུ། བོད་ཕྱི་ནང་གཉིས་སུ་བོད་དོན་ཆེད་རང་ལུས་མེར་བསྲེགས་གནང་མཁན་ཚོའི་ཆེད་དུ། ཆུ་ཚོད་ ༡༢ རིང་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་ཡོད་པ་དང་། སྐབས་དེར་ཁོང་གིས་བོད་ཀྱི་རྒྱལ་དར་བསྒྲེངས་འཛུགས་དང་བོད་པའི་རྒྱལ་གཅེས་དཔའ་བོ་དཔའ་མོ་ཚོའི་སྐུ་དཔར་འགྲེམས་སྟོན། བོད་དོན་སྐོར་གྱི་ཡིག་ཆ་འགྲེམ་སྤེལ་བཅས་གནང་ཡོད་འདུག
བསྟན་པ་དར་རྒྱས་ལགས་ཀྱིས་འདི་གར་ངོ་སྤྲོད་གནང་བ་ལྟར་ན། ཐེངས་འདིའི་ལས་འགུལ་ནང་ཁོན་སི་ལན་ཌིའི་བོད་རིགས་ཚོགས་པའི་དྲུང་ཆེ་དཀོན་མཆོག་ཆོས་དབྱངས་བློ་གྲོས་ལགས་ཀྱང་ཚོགས་པའི་སྐུ་ཚབ་ཀྱི་མིང་ཐོག་ནས་ལས་འགུལ་ནང་མཉམ་ཞུགས་གནང་ཡོད་དང་། ཁོང་གཉིས་ཀྱིས་བོད་དོན་སྐོར་གྱི་ཡིག་ཆ་ ༥༠༠ ལྷག་འགྲེམས་སྤེལ་བྱས་ཡོད་འདུག བསྟན་པ་དར་རྒྱས་ལགས་ཀྱིས་བརྗོད་དོན། ང་ཚོའི་མངའ་སྡེ་(QueenSland)འདིའི་གཞུང་འཛིན་བློན་ཆེན་དེ་རྒྱ་ནག་གཞུང་དང་འབྲེལ་བ་ཆེན་པོ་ཡོད་པ་རེད་ཟེར་གྱི་འདུག བོད་པའི་རྒྱལ་དར་དང་པར་དེ་དག་བསྒྲིག་མི་ཆོག་ཟེར་ནས་བཀག་འགོག་ཆེན་པོ་བྱས་སོང་། ཞུ་བ་མང་པོ་བྱས་མཐར་རྒྱལ་དར་གཅིག་རང་གཅིག་བསྒྲེང་དུ་བཅུག་སོང་། ཞེས་སོགས་བརྗོད་བྱུང་།
བསྟན་པ་དར་རྒྱས་ལགས་ཀྱིས་སྔར་ལོའི་ལོ་གསར་ཚེས་གཅིག་ཉིན་ཡང་། དྷ་ས་གཙུག་ལག་ཁང་གི་དཔའ་བོའི་རྗེས་དྲན་རྡོ་རིང་མདུན་དུ། ‘བོད་གཞིས་བྱེས་མཉམ་འཛོམས་མ་བྱུང་བར་ང་ལ་ལོ་གསར་མེད།’ ཅེས་པའི་བསྒྲགས་གཏམ་འོག ཆུ་ཚོད་ ༧༢ རིང་ཟས་བཅད་ཆུ་བཅད་ཀྱི་ངོ་རྒོལ་ལས་འགུལ་ཞིག་སྤེལ་ཡོད་པ་རེད།
བསྟན་པ་དར་རྒྱས་ལགས་ཀྱི་ལས་འགུལ་བསྒྲགས་གཏམ་ནང་འཁོད་དོན། ངས་དེ་རིང་འདི་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་སྐུ་ལུས་མེར་སྲེག་གཏོང་མཁན་གྱི་རྒྱལ་གཅེས་དཔའ་པོ་དཔའ་མོ་གཙོ་བོར་བཟུང་ནས་དེའི་ཕ་མ་དང་ནང་མི་ཚོ་ལ་གདུང་སེམས་མཉམ་བསྐྱེད་བྱ་རྒྱུ་ཡིན། ངས་བོད་ནང་གི་ཉིན་རེ་ཉིན་རེའི་ཛ་དྲག་གི་གནས་སྟངས་དངོས་སུ་མཐོང་མྱོང་ཡོད་ལ། རྒྱ་ནག་གཞུང་གིས་བཙན་ཁྲིད་བཙོན་འཇུག་བྱས་པའི་བོད་ཀྱི་ཆབ་སྲིད་བཙོན་མའི་དཀའ་སྡུག་གི་ནམ་ཟླ་དེ་ཡང་ངས་བསྐྱལ་མྱོང་། གནས་ཚུལ་འདི་དག་ལ་ཕྱིར་དྲན་རེ་བྱས་དུས་རང་དབང་ལུང་པ་ནས་ལོ་སར་ནས་འདུག་རྒྱུ་དེ་བྲོ་བ་ཞིག་གཏན་ནས་མི་འདུག རྒྱུ་མཚན་དེས་སྤྱིར་ན་ཕྱི་ལོ་ ༢༠༡༤ ནས་མགོ་བཙུགས་ཏེ་ངས་བོད་གཞིས་བྱེས་གཉིས་ཞལ་འཛོམས་མ་བྱུང་བར་དུ་ལོ་མི་སར་ཟེར་ནས་དམ་བཅའ་བྱས་པ་ཡིན། དེ་རིང་ཡང་བོད་ཀྱི་ལོ་སར་དུས་སྟོན་ལ་ཁེལ་ཡོད་སྟབས་ང་ཐང་ཆེན་འདིའི་སྟེང་ལ་ཐོན་ནས། ངས་འཛམ་གླིང་མི་མང་ལ་གོང་གི་གནས་ཚུལ་འདི་བསྒྲགས་ཞོར་དུ། ཆུ་ཚོད་ ༡༢ ཀྱི་རིང་ལ་ཟས་བཅད་ཆུ་བཅད་ཀྱིས་འདས་ཟིན་པའི་དཔའ་བོ་དཔའ་མོ་དག་ལ་གུས་བརྩི་དང་གདུང་སེམས་མཉམ་བསྐྱེད་བྱ་རྒྱུ་ཡིན། ཁོ་བོའི་རེ་བ་ལ་བོད་ནང་གི་ཡ་ང་བའི་གནས་སྟངས་ཐབས་སྡུག་འདི་འཛམ་གླིང་མི་མང་གིས་མཁྱེན་ཐུབ་པའི་རེ་བ་བྱེད་ཀྱིན་ཡིན། འཛམ་གླིང་མི་མང་ནི་དྲང་བདེན་གྱི་རྒྱབ་ལོགས་ན་ཡོད་པ་ང་ལ་ཡིད་ཆེས་གཙང་མ་ཡོད། ཅེས་སོགས་འཁོད་འདུག
