ཀྲུའུ་ཡོན་ཁང་གིས་གསང་བ་ཕྱི་གྱར་བྱས་པ་འདི་རེད།

ཀྲུའུ་ཡོན་ཁང་གིས་རྒྱ་ནག་གཞུང་དང་བྱང་ཀོ་རི་ཡའི་ངལ་རྩོལ་ཚོགས་ཁག་གི་གསང་བ་ཀོ་རི་ཡའི་སྲིད་གཞུང་ལ་བཤད་པའི་དབང་གིས། ཀོ་རི་ཡའི་གཞུང་གིས་ཅཱང་སུང་ཐེག་ལ་སྲོག་ཁྲིམས་བཅད་པ་རེད་ཟེར།

ལོ་སྔོན་མའི་ཕྱི་ཟླ་ ༡༢ པའི་ཚེས་ ༦ ཉིན། རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་དེ་སྔའི་རྒྱ་ནག་དབུས་བདེ་འཇགས་ལྷན་ཁང་གི་འགན་འཛིན་ཀྲུའུ་ཡོན་ཁང་ལ་ནག་ཉེས་དྲུག་བགྲང་པའི་ཁྲོད། རྒྱལ་ཁབ་དང་ཏང་གི་གསང་བ་ཕྱི་གྱར་བྱས་པའི་ནག་ཉེས་བགྲང་ཡོད་ཀྱང་གསང་པ་ག་རེ་ཕྱི་གྱར་བྱས་པ་ཁ་གསལ་མེད་སྟབས། རྒྱ་ནག་ཕྱིའི་ཆབ་སྲིད་དཔྱད་ཞིབ་པ་ཚོས་རྒྱ་ནག་གི་གསང་པ་གང་ཞིག་ཕྱི་གྱར་བྱས་པའི་སྐོར་ལ་གླེང་སློང་ཤུགས་ཆེན་བྱུང་ཞིང་ཚོད་དཔག་དང་དབྱེ་ཞིབ་འདྲ་མིན་བྱས་ཡོད། ཉེ་ཆར་གསར་འགྱུར་བརྒྱུད་ལམ་ཁག་ཏུ་ཀྲུའུ་ཡོན་ཁང་གི་གསང་བ་ཕྱི་གྱར་བྱས་པ་དེ་བྱང་ཀོ་རི་ཡའི་གནད་དོན་ཞིག་ཡིན་སྐོར་ཁྱབ་ཡོད།

ཁ་སང་པའོ་ཞིན་དྲ་བའི་སྟེང་། ཀྲུའུ་ཡོན་ཁང་གིས་གསང་བ་ཕྱི་གྱར་བྱས་པའི་གནས་ཚུལ་བསྐྱར་དུ་ཐོན་པའི་ནང་། ༢༠༡༢ ལོའི་ཟླ་ ༨ པའི་ཚེས་ ༡༣ ཉིན། བྱང་ཀོ་རི་ཡ་དང་རྒྱ་ནག་གཉིས་ཀྱི་དཔལ་འབྱོར་མཉམ་འབྲེལ་ཚོགས་འདུ་ཐེངས་གསུམ་པ་པེ་ཅིན་དུ་བསྐོངས་སྐབས། བྱང་ཀོ་རི་ཡའི་སྐུ་ཚབ་ཅཱང་སུང་ཐེག་ (Jang Sung-taek) ༼ཅཱང་སོམ་ཙེ་ནི་ངལ་རྩོལ་ཤོག་ཁག་གི་དབུས་ཆབ་སྲིད་འགན་འཛིན་དང་། ད་ལྟའི་བྱང་ཀོ་རི་ཡའི་སྲིད་འཛིན་ཀེམ་ཇོང་ཨུན་གྱི་དྲུང་ཡིག་གཞོན་པ་ཡིན།༽ ཚོགས་ཐོག་ཏུ་བཞུགས་ཡོད་པ་དང་། ཟླ་དེའི་ཚེས་ ༡༧ ཉིན་ཅཱང་སུང་ཐེག་དང་སྐབས་དེའི་རྒྱ་ནག་གི་སྲིད་འཛིན་ཧུའུ་ཅིན་ཐོ། དེ་བཞིན་རྒྱ་ནག་གི་སྐད་སྒྱུར་བ་ཞིག་བཅས་གསང་བའི་ཐོག་ཟུར་དུ་ཐུག་འཕྲད་བྱས་ཏེ། བྱང་ཀོ་རི་ཡཱའི་སྲིད་འཛིན་ཟུར་པ་ཀེམ་ཇོང་ཨེལ་ (Kim Jong-il) གྱི་བུ་ཆེ་བ་ཀེམ་ཇོང་ནཱམ་ (Kim Jong-nam) དང་། བུ་ཆུང་བ་ཀེམ་ཇོང་ཨུན་ (Kim Jong-un) གཉིས་ཀྱི་གོ་གནས་བརྗེ་བོ་རྒྱག་ཕྱོགས་སྐོར་ལ་ཆུ་ཚོད་ ༡ རིང་གྲོས་མོལ་བྱས་ཡོད་སྐོར་དང་། སྐབས་དེར་ཧུའུ་ཅིན་ཐོ་ཡིས་གནད་དོན་དེར་ངོས་མཐུན་གྱི་སྐད་ཆ་གང་ཡང་བཤད་མེད་ཀྱང་། གནས་ཚུལ་དེ་ཀྲུའུ་ཡོན་ཁང་གིས་ཤེས་རྟོག་བྱུང་སྟེ། གསང་བའི་ཐོག་བྱང་ཀོ་རི་ཡའི་མགོ་ཁྲིད་ཀེམ་ཇོང་ཨུན་ལ་བཤད་ཡོད་སྟབས། ༢༠༡༣ ཟླ་ ༡༢ ཚེས་ ༡༢ ཉིན་ཀེམ་ཇོནང་ཨུན་གྱིས་ཁོ་རང་གི་ཨ་ཞང་ཅཱང་སུང་ཐེག་ལ་སྲོག་ཁྲིམས་བཅད་པ་དང་། བྱང་ཀོ་རི་ཡའི་ནང་གི་རྒྱ་ནག་ལ་དགའ་བའི་ཚོགས་ཁག་རྩ་མེད་བཟོས་ཡོད་འདུག

རྗེས་སུ་གནས་ཚུལ་དེའི་སྐོར་ལ་རྒྱུས་མངའ་ཡོད་པའི་བྱང་ཀོ་རི་ཡའི་མི་སྣ་ཞིག་རྒྱ་ནག་ལ་བྲོས་བྱོལ་ཕྱིན་པ་དང་། ཁོས་རྒྱ་ནག་གཞུང་ལ་ཀྲུའུ་ཡོན་ཁང་གི་གསང་དོན་དེ་བཤད་ཡོད་པ་མ་ཟད། སྐབས་དེར་ཀྲུའུ་ཡོན་ཁང་བྱང་ཀོ་རི་ཡ་ལ་བྲོས་བྱོལ་འགྲོ་རྒྱུའི་འཆར་གཞི་ཡོད་པ་སོགས་ཀྱང་བཤད་ཡོད་སྟབས། ཀྲུའུ་ཡོན་ཁང་བྱང་ཀོ་རི་ཡར་བྲོས་བྱོལ་འགྲོ་ཐུབ་མེད་སྐོར་སོགས་བཀོད་འདུག

ཁ་སང་ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཀོ་རི་ཡའི་གནས་ཚུལ་དེའི་སྐོར་ལུང་འདྲེན་བྱས་པ་ལྟར་ན། ༢༠༡༣ ལོའི་ཟླ་ ༡༢ ཚེས་ ༨ ཉིན་བྱང་ཀོ་རི་ཡའི་ངལ་རྩོལ་ཤོག་ཁག་གིས་དབུས་ཆབ་སྲིད་ལྷན་ཁང་གི་ཚོགས་འདུའི་ཐོག་ཏུ་ཅཱང་སོན་ཙེ་འཛིན་བཟུང་བྱས་ཡོད་པ་དང་། ཟླ་དེའི་ཚེས་ ༡༢ ཉིན་བྱང་ཀོ་རི་ཡའི་སྲིད་གཞུང་བདེ་སྲུང་ལྷན་ཁང་གིས་ཅཱང་སོན་ཙེ་ལ་འདྲི་གཅོད་བྱས་རྗེས་སྲོག་ཁྲིམས་གཅོད་རྒྱུ་གཏན་ཁེལ་བྱས་ཡོད་པ་དང་། དེ་ནི་འདས་པའི་ལོ་ ༡༦ ནང་བྱང་ཀོ་རི་ཡ་ཡི་ཆབ་སྲིད་ཨུ་ཡོན་མཐོ་རིགས་དཔོན་རིགས་སྲོག་ཁྲིམས་བཅད་པ་ཐོག་མ་དེ་ཆགས་ཡོད་ཅེས་བརྗོད་འདུག