བོད་དོན་སྦག་སྦག་སྐོར་སྐྱོད་པ་འཇམ་དབྱངས་བསྟན་འཛིན་ལགས་ཀྱིས་ཁོང་གི་ལས་འགུལ་དེས་བོད་པ་གཞོན་སྐྱེས་རྣམས་ལ་མིག་དཔེར་འོས་པའི་འཐབ་རྩོད་ཀྱི་ལས་དོན་ཞིག་ཆགས་རྒྱུའི་རེ་བ་བྱེད་བཞིན་ཡོད་ཅེས་བརྗོད་བྱུང་།
དེ་རིང་ཕྱི་ཚེས་ ༡༢ ཉིན་བོད་དོན་སྦག་སྦག་སྐོར་སྐྱོད་པ་འཇམ་དབྱངས་བསྟན་འཛིན་ལགས་དང་། སྦིར་ས་གནས་གཞོན་ནུའི་ཚོགས་གཙོ་བློ་གྲོས་དཔལ་ལྡན་ལགས་རྣམ་གཉིས་མོན་གྷོ་ནས་གྷོ་ཝ་ (Goa) ཕྱོགས་སུ་སྦག་སྦག་སྐོར་སྐྱོད་གནང་བཞིན་འདུག་ལ། ཟླ་འདིའི་ཕྱི་ཚེས་ ༡༠ ཉིན་ཁོང་གཉིས་མོན་གྷོ་འདོད་རྒུ་གླིང་གཞིས་ཆགས་ནང་འབྱོར་སྐབས་ས་གནས་ཚོགས་པ་ཁག་དང་སེར་སྐྱ་མི་མང་གིས་ཕེབས་བསུ་གནང་ཡོད་འདུག
འདས་ལོའི་ཕྱི་ཟླ་ ༡༢ ཚེས་ ༡༩ ཉིན་དྷ་རམ་ས་ལ་ནས་སྦག་སྦག་སྐོར་སྐྱོད་མགོ་འཛུགས་བྱས་ཡོད་ཅིང་། དྷ་ས་ནས་སྒང་ཏོག་ཏུ་སྦག་སྦག་སྐོར་སྐྱོད་ཀྱི་ལས་འགུལ་སྤེལ་བཞིན་པའི་སྐབས། ལམ་བར་དུ་སྦིར་ས་གནས་གཞོན་ནུའི་ཚོགས་གཙོ་བློ་གྲོས་དཔལ་ལྡན་ལགས་སྦག་སྦག་བརྡབ་སྐྱོན་ཤོར་ཏེ་སྨན་ཁང་དུ་བསྟེན་གཏུག་བྱས་ནས་ཉིན་གྲངས་བཅུའི་རིང་ངལ་གསོ་རྒྱག་སྟེ། ཉིན་གྲངས་བཅུའི་རིང་བོད་དོན་ལས་འགུལ་བ་འཇམ་དབྱངས་ལགས་དང་། ཀ་ལིམ་སྤོང་གི་གཞོན་ནུའི་ཚོགས་མི་བསྟན་འཛིན་འཇམ་དཔལ་རྣམ་གཉིས་ཀྱིས་ཨ་རུ་ན་ཅལ་དང་ཨ་སམ་ཁུལ་དུ་སྦག་སྦག་སྐོར་སྐྱོད་གནང་ཡོད་འདུག དེ་རྗེས་བློ་གྲོས་དཔལ་ལྡན་ལགས་དྲག་སྐྱེད་བྱུང་སྟེ་ས་ལུ་གྷར་ནས་ལས་འགུལ་མུ་མཐུད་སྤེལ་བཞིན་འདུག ད་བར་རྒྱ་གར་གྱི་མངའ་སྡེ་ ༡༦ ནང་སྐོར་སྐྱོད་བྱས་ཟིན་པ་དང་། མུ་མཐུད་རྒྱ་གར་གྱི་མངའ་སྡེ་ ༥ དང་རང་སྐྱོང་ས་ཚིགས་ (Union Territory) ༢ ཀྱི་ནང་དུ་སྐོར་སྐྱོད་གནང་རྒྱུ་ཡིན་འདུག་ལ། འདི་ལོའི་གསུམ་བཅུའི་དུས་དྲན་ཉིན་རྒྱ་གར་གྱི་རྒྱལ་ས་ལྡི་ལི་རུ་ལས་འགུལ་མཇུག་བསྒྲིལ་རྒྱུ་ཡིན་འདུག
འཇམ་དབྱངས་བསྟན་འཛིན་ལགས་ཀྱིས་འདི་གའི་གསར་འགོད་པར། རང་མི་རིགས་ཀྱི་བློ་གསར་གཞོན་སྐྱེས་རྣམས་ལ་མི་རིགས་ཀྱི་འཐབ་རྩོད་ཐད་བློ་དཀར་ཞུམ་མེད་ཀྱིས་ཞབས་ཕྱི་སྒྲུབ་དགོས་གལ་སོགས་ཀྱི་བློ་སྐྱེད་དང་སེམས་ཤུགས་སྤར་རྒྱུ་མ་ཟད། ལས་འགུལ་འདི་ཁོང་རྣམ་པར་མིག་དཔེར་འོས་པའི་འཐབ་རྩོད་ཀྱི་ལས་དོན་ཞིག་ཆགས་རྒྱུར་རེ་བ་ཞུ་བཞིན་ཡོད། ང་ཚོས་བོད་དོན་ལས་འགུལ་སྤེལ་རྒྱུ་ཉམས་ཆག་འགྲོ་མུས་ཡིན་པར་བརྟེན། དེ་སླར་གསོ་ཡོང་བའི་རེ་བ་དང་གཞོན་སྐྱེས་རྣམས་ཀྱིས་བོད་དོན་ལས་འགུལ་གང་མང་སྤེལ་རྒྱུའི་རེ་བ་ཞུ་ཡི་ཡོད། བོད་མི་ཡོངས་ལ་མི་ཡུལ་ག་ཚོད་སྐྱིད་ཀྱང་། རང་ཡུལ་ནམ་ཡང་མ་བརྗེད་ཞུ་རྒྱུ་དང་། བོད་མི་རྣམས་ཆོལ་ཁ་ཆོས་ལུགས་ལོགས་སུ་དབྱེ་མི་དགོས་པར་ཚང་མས་གཅིག་སྒྲིལ་གྱིས་སོ་སོའི་རྒྱལ་ཁབ་ཀྱི་ཆེད་དུ་ལས་འགུལ་སྤེལ་ཐུབ་པའི་རེ་བ་ཆེན་པོ་ཡོད། ཅེས་དང་། རྒྱ་གར་བ་རྣམས་ལ་བོད་དོན་དྲིལ་བསྒྲགས་དང་བོད་ཀྱི་གནད་དོན་གལ་གནད་སོགས་ཀྱི་ཐད་གོ་རྟོགས་སྤེལ་རྒྱུ་ཡིན། དེ་ཡང་གཙོ་བོ་ད་ལྟའི་ཆར་རྒྱ་གཞུང་གིས་བོད་ནང་གི་ཤེས་རིག་སློབ་གཉེར་ཁང་རྣམས་གཅིག་རྗེས་གཉིས་མཐུད་ཀྱིས་བཙན་གྱིས་སྒོ་བརྒྱབ་ཏུ་བཅུག་སྟེ་བོད་ཀྱི་ངོ་བོ་མཚོན་པའི་སྐད་དང་ཡི་གེ ཡུལ་སྲོལ་གོམས་གཤིས་སོགས་རྩ་མེད་བཟོ་ཐབས་ཀྱི་ཛ་དྲག་གི་གནས་སྟངས་སྐོར་གོ་རྟོགས་སྤེལ་རྒྱུ་ཡིན་སྐོར་འགྲེལ་བརྗོད་གནང་བྱུང་།
བློ་གྲོས་དཔལ་ལྡན་ལགས་ཀྱིས་འདི་གའི་གསར་འགོད་པར། ༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་༸སྐུའི་གོ་སྟོན་དང་བྱམས་བརྩེའི་ལོ་སྲུང་གཙིའི་ཆེད་དུ་ཉིན་གྲངས་ ༩༠ རིང་སྦག་སྦག་སྐོར་སྐྱོད་ཀྱི་ལས་འགུལ་སྤེལ་མུས་ཡིན་པ་དང་། རྒྱ་གར་མི་མང་རྣམས་ལ་རྒྱ་ནག་གཞུང་གིས་བོད་ཕྲུག་ས་ཡ་མང་པོ་ཕ་མ་དང་ཁ་བྲལ་དུ་བཅུག་ནས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་ཀྱི་ཡོད་པའི་ཛ་དྲག་གི་གནས་སྟངས་སྐོར་གོ་རྟོགས་སྤེལ་གྱི་ཡོད། དེ་བཞིན་ལོ་ ༦༠ ལྷག་རིང་རྒྱ་གར་ལ་བཙན་བྱོལ་དུ་བསྡད་པར་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་དང་། རྒྱ་གར་དང་བོད་ཀྱི་བར་ལ་ས་མཚམས་ཡོད་པ་ལས། རྒྱ་གར་དང་རྒྱ་ནག་བར་ལ་ས་མཚམས་མེད། མ་འོངས་པར་མུ་མཐུད་དུ་ལས་འགུལ་གང་མང་སྤེལ་གྱི་ཡིན་སྐོར་སོགས་འགྲེལ་བརྗོད་གནང་བྱུང་།
རང་ལོ་ ༦༥ ཡིན་པའི་བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ནི་རྡེ་ར་ལྡུན་ནས་ཡིན་པ་དང་། ཕ་དམ་པའི་རེ་བ་ལྟར་བོད་སྤྱི་པའི་རྩ་དོན་ཆེད་ཧུར་ཐག་གནང་མཁན་ཞིག་ཡིན་འདུག་ལ། དེ་སྔོན་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་གནང་བའི་བོད་ཀྱི་ས་མཚམས་བར་དུ་སྦག་སྦག་བཞོན་ནས་བོད་དོན་དྲིལ་བསྒྲགས་ཀྱི་ལས་འགུལ་ནང་དུའང་མཉམ་ཞུགས་བྱས་མྱོང་ཡོད་པ་མ་ཟད། ཕྱི་ལོ་ ༢༠༢༣ ལོའི་ཟླ་ ༡༠ ནང་ང་ཚོས་བོད་ནམ་ཡང་མ་བརྗེད་ཅེས་པའི་འབོད་ཚིག་འོག བཞུགས་སྒར་དྷ་ས་མེག་གྷན་ཁྲོམ་གཞུང་ནས་རྡོ་རྗེ་གདན་བར་དུ་རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་ཐེངས་དང་པོ་སྤེལ་ཡོད་པ་དང་། ཕྱི་ཟླ་ ༡༢ པའི་ནང་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་སྦེལ་ཀོབ་གཞིས་ཆགས་ནས་ཨུ་ཊར་ཁན་ཌི་མངའ་སྡེའི་རྡེ་ར་ལྡུན་བདེ་སྐྱིད་གླིང་བར་རྐང་འཁོར་སྐོར་སྐྱོད་ཐེངས་གཉིས་པ་སྤེལ། ཕྱི་ལོ་ ༢༠༢༤ ལོའི་ཟླ་ ༣ པའི་ནང་རྡེ་ར་ལྡུན་བདེ་སྐྱིད་གླིང་ནས་ལྡི་ལི་བར་རྐང་འཁོར་སྐོར་སྐྱོད་ཐེངས་གསུམ་པ་དང་། ཕྱི་ལོ་ ༢༠༢༤ ལོའི་ཟླ་ ༥ པའི་ནང་ལ་དྭགས་མཁར་གདོང་ལ་ནས་དྷ་སའི་བར་རྐང་འཁོར་སྐོར་སྐྱོད་བཞི་བ། དེ་བཞིན་ཕྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་བོད་ཀྱི་རྒྱལ་ས་ལྷ་སར་མི་རབས་གསར་པས་སྣེ་ཁྲིད་དེ་རྒྱ་ནག་གཞུང་ལ་ཞི་བའི་ངོ་རྒོལ་གྱི་རྔམ་སྟོན་ཁྲོམ་སྐོར་བྱས་ཏེ་མི་ལོ་ ༣༧ འཁོར་བའི་དུས་དྲན་དང་སྟབས་བསྟུན། ཨ་རུ་ན་ཅལ་མངའ་སྡེའི་མོན་རྟ་དབང་ནས་རྒྱ་གར་གྱི་རྒྱལ་ས་ལྡི་ལིའི་ཇན་ཏར་མན་ཏར་བར་རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་ཐེངས་ལྔ་པ། རྒྱ་གར་བྱང་ཕྱོགས་རྡེ་ར་ལྡུན་ནས་ལྡི་ལིའི་བར་དུ་བོད་དོན་ཞི་བའི་གོམ་བགྲོད་ཐེངས་དྲུག་པ། ༸གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་འཁྲུངས་སྐར་དང་བསྟུན། འདས་ལོའི་ཕྱི་ཟླ་ ༡༠ པའི་ནང་བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ནས་དྷ་ས་བར་བོད་དོན་རྐང་འཁོར་སྐོར་སྐྱོད་ཐེངས་བདུན་པ་བཅས་གནང་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
