དབྱིན་ཇིའི་རྒྱལ་སྲས་ཝེ་ལམ་ལགས་ཀྱིས་རྒྱ་ནག་ནང་གཟིགས་སྐོར་གནང་བཞིན་ཡོད་ཀྱང་། རྒྱ་ནག་ནང་གི་ཆབ་སྲིད་དང་འགྲོ་བ་མིའི་ཐོབ་ཐང་སོགས་ཚོར་བ་སྐྱེན་པའི་བརྗོད་གཞི་རིགས་གླེང་སློང་གནང་འཆར་མེད་སྐོར་བརྗོད་འདུག
ཁ་སང་ཕྱི་ཚེས་ ༡ ཉིན་དབྱིན་ཇིའི་རྒྱལ་སྲས་ཝེ་ལམ་(Prince William)ལགས་པེ་ཅིན་དུ་ཕྱིན་ཏེ། དེ་རིང་སྔ་དྲོར་པེ་ཅིན་མི་མང་ཚོགས་ཁང་ཆེན་མོའི་ནང་། རྒྱ་ནག་གི་སྲིད་འཛིན་ཞི་ཅིན་ཕིན་ལ་མཇལ་འཕྲད་གནང་ཡོད་པ་མ་ཟད། དབྱིན་ཇིའི་རྒྱལ་མོ་ཡིས་ཞི་ཅིན་ཕིན་ལ་བསྐུར་བའི་མགྲོན་ཤོག་ཅིག་གནང་ཡོད་པ་ལྟར། ཞི་ཡིས་ལོ་འདིའི་ནང་དབྱིན་ཡུལ་དུ་འགྲོ་ཐུབ་པའི་རེ་བ་ཡོད་སྐོར་བརྗོད་འདུག
རྒྱ་ནག་ཞིན་ཧྭ་གསར་ཁང་དང་བྷི་བྷི་སིས་གནས་ཚུལ་སྤེལ་བ་ལྟར་ན། མཇལ་འཕྲད་སྐབས་ཞི་ཅིན་ཕིན་གྱིས་ད་ལྟ་དབྱིན་ཇི་དང་རྒྱ་ནག་བར་གྱི་འབྲེལ་བ་ཡག་པོ་ཡོད་པ་མ་ཟད། ཕྱོགས་ཡོངས་ནས་ཐབས་ཇུས་འབྲེལ་བ་མགྱོགས་མྱུར་གྱིས་གོང་འཕེལ་དུ་འགྲོ་བཞིན་ཡོད་ལ། རྒྱལ་ཁབ་གཉིས་བར་རྒྱ་སྒོར་དུང་ཕྱུར་ ༨༠༠ ལྷག་གི་ཚོང་ལས་འབྲེལ་བ་བཞག་ཡོད་པ་ལྟར། དབྱིན་ཇི་ནི་རྒྱ་ནག་གི་མ་རྐང་འཇོག་སའི་རྒྱལ་ཁབ་གཙོ་བོ་ཞིག་ཡིན་སྐོར་དང་། དབྱིན་ཇིའི་རྒྱལ་མོས་མགྲོན་འབོད་གནང་བ་ལྟར་འདི་ལོར་ཁོ་བོ་དབྱིན་ཡུལ་དུ་ཕྱིན་ཏེ། དབྱིན་ཇིའི་དབུ་ཁྲིད་ཚོ་མཉམ་དུ་རྒྱལ་ཁབ་གཉིས་བར་གྱི་མ་འོངས་འབྲེལ་བ་འཕེལ་རྒྱས་གཏོང་ཕྱོགས་ལ་གྲོས་མོལ་བྱ་འདོད་ཡོད་ལ། དབྱིན་ཡུལ་ཙམ་མ་ཟད་འཛམ་གླིང་ཐོག་ཤུགས་རྐྱེན་ཆེན་པོ་ཡོད་པའི་དབྱིན་ཇི་རྒྱལ་པོའི་ཁྱིམ་བརྒྱུད་ཀྱི་སྐུ་ཚབ་རྒྱ་ནག་ནང་མང་དུ་ཕེབས་པར་དགའ་བསུ་ཡོད་སྐོར་སོགས་བརྗོད་ཡོད་འདུག
རྒྱལ་སྲས་ཝེ་ལམ་ལགས་ཀྱིས་ཉིན་གྲངས་ ༣ རིང་རྒྱ་ནག་པེ་ཅིན་གྲོང་ཁྱེར་གྱི་གནའ་མཁར་དང་ཧྲང་ཧེ་ཡི་གློག་བརྙན་འགྲེམས་སྟོན་མཛད་སྒོ། དེ་བཞིན་ཡུན་ནན་ཞིང་ཆེན་གྱི་གླང་ཆེན་ར་བ་སོགས་སུ་གཟིགས་སྐོར་གྱིས་གཏམ་བཤད་གནང་འཆར་ཡོད་ཀྱང་། དབྱིན་ཇིའི་ཕྱི་འབྲེལ་ལྷན་ཁང་གིས་ཐེངས་འདིའི་སྐོར་སྐྱོད་སྐབས། རྒྱལ་སྲས་ཀྱིས་རྒྱ་ནག་གི་མགོ་ཁྲིད་ཚོ་དང་ལྷན་དུ་ཆབ་སྲིད་དང་འགྲོ་བ་མིའི་ཐོབ་ཐང་སོགས་ཚོར་བ་སྐྱེན་པའི་བརྗོད་གཞི་གླེང་སློང་བྱ་འཆར་མེད་ལུགས་བརྗོད་ཡོད་པ་རེད།
ཕྱི་ཟླ་ ༢ ཚེས་ ༢༧ ཉིན་རྒྱལ་སྲས་ཝེ་ལམ་ལགས་ཉི་ཧོང་ནང་གཟིགས་སྐོར་དུ་ཕེབས་ཏེ། ཉི་ཧོང་གི་སྲིད་བློན་ཤིན་ཛོ་ཨ་བྷི་དང་ཉི་ཧོང་གི་རྒྱལ་པོ་རྒྱལ་མོ་སོགས་ལ་མཇལ་འཕྲད་གནང་ཡོད་པ་མ་ཟད། ཉིན་གྲངས་ ༤ རིང་ཕྱི་ལོ་ ༢༠༡༡ ལོར་མཚོ་སྐྱོམ་གྱིས་གོད་ཆག་ཆེན་པོ་ཕོག་སའི་ཧྥོ་ཁོ་ཞི་མཱ་(Fukushima)དང་། ཕྱི་ལོ་ ༢༠༢༠ ལོའི་ཨོ་ལིན་ཕིག་རྩེད་ར་སོགས་སུ་གཟིགས་སྐོར་གནང་གྲུབ་རྗེས་ཐད་ཀར་རྒྱ་ནག་ནང་ཕེབས་ཡོད་འདུག
བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཐེངས་འདིའི་ཉི་ཧོང་ནང་གི་གཟིགས་སྐོར་དེ། ལོ་ངོ་ ༣༠ རྗེས་ཀྱི་དབྱིན་ཇིའི་རྒྱལ་ཚབ་ཅིག་ཉི་ཧོང་ནང་ཕེབས་པར་ཉི་ཧོང་གཞུང་མང་ནས་དགའ་བསུ་ཆེན་པོ་བྱས་པ་ཐོག་མ་དེ་ཆགས་ཡོད་སྐོར་རྗོད་ཀྱི་ཡོད་པ་མ་ཟད། ཉི་ཧོང་གི་གསར་འགོད་པ་ཞིག་གིས་རྒྱལ་སྲས་ཝེ་ལམ་ལགས་ཀྱི་མི་མང་དཀྱུས་མ་ཞིག་གི་འདུ་ཤེས་འཛིན་སྟངས་དེས། ཉི་ཧོང་རྒྱལ་བརྒྱུད་ཚོས་དུས་རབས་གསར་པའི་བསམ་བློ་དང་ཕྱི་ཕྱོགས་སྒོ་འབྱེད་ལ་གདོང་གཏད་དེ། མི་མང་དང་བར་ཐག་ཉེ་རུ་གཏོང་བར་དམིགས་དཔེ་བསྟན་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
