རྒྱ་ནག་རྒྱལ་ཡོངས་སྲིད་གྲོས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པ་ཚོགས་ལ་ཉེ་བ་དང་བསྟུན་ཏེ། ལིན་ཅི་ཧྭ་གཙོས་པའི་འཐུས་མི་ ༩ ཡི་ལས་གནས་ཕྱིར་བསྡུ་བྱས་ཡོད་པ་དང་། དེ་བཞིན་ཐེངས་འདིར་རྒྱུན་ལས་ཨུ་ཡོན་ ༡༣ དང་མི་མང་འཐུས་མི་ ༣༤ ཚོགས་བཞུགས་བྱེད་ཐུབ་མེད་སྐོར་གསལ་བསྒྲགས་སྤེལ་འདུག
ཁ་སང་རྒྱ་གཞུང་གིས་གསར་འགྱུར་རྒྱུད་ལམ་ཁག་ཏུ་གནས་ཚུལ་སྤེལ་པ་ལྟར་ན། ཉེ་ལམ་ཕྱི་ཟླ་ ༢ ཚེས་ ༢༨ ཉིན། རྒྱ་ནག་དབུས་སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་མཇུག་བསྡུས་བསྐོངས་པའི་ཐོག ལིན་ཅི་ཧྭ་གཙོ་ཞེས་པའི་རྒྱུན་ལས་ཨུ་ཡོན་ ༩ ཡི་གོ་གནས་ཕྱིར་བསྡུ་བྱས་ཡོད་པ་མ་ཟད། ཁྲོ་པའོ་ཞིན་ (Chou Baoxing)རྒྱ་སྲིད་སྤྱི་ཁྱབ་ཁང་དུ་གནས་སྤོར་བྱས་ཡོད་པ་དང་། སྔོན་ཏ་ལེན་གྲོང་ཁྱེར་སྲིད་གྲོས་འགན་འཛིན་ཞོ་ཧྲིན་ཧྥིན་ (Xiao Shengfeng)ཏ་ལེན་གྲོང་ཁྱེར་འགན་འཛིན་གྱི་གོ་གནས་སུ་སྤར་ཡོད་འདུག
དེ་བཞིན། དབུས་བརྙན་འཕྲིན་ཁང་གི་དམག་དོན་ལས་ཚན་གྱི་མདོ་འཛིན་པ་དང་སྲིད་གྲོས་ཨུ་ཡོན་ཧྥིན་ལིན་ (Feng Lin) སྲིད་གྲོས་ཨུ་ཡོན་ནས་རྩ་དགོངས་ཞུ་དགོས་པ་ཁྱབ་བསྒྲགས་བྱས་ཡོད་ཀྱང་ཁོ་རང་གི་ཉེས་པ་གང་ཡིན་སོགས་གསལ་ཁ་མི་འདུག
དེ་རིང་རྒྱ་གཞུང་གིས་ཚད་ཞིན་དྲ་བས་གནས་ཚུལ་སྤེལ་བ་ལྟར་ན། སང་ཉིན་རྒྱ་ནག་སྲིད་གྲོས་ཨུ་ཡོན་སྐབས་བཅུ་གཉིས་པའི་རྒྱལ་ཡོངས་སྲིད་གྲོས་ཚོགས་ཆེན་ཐེངས་ ༣ པ་པེ་ཅིན་དུ་བསྐོང་རྒྱུ་ཡིན་པ་དང་། ཐེངས་འདིར་རྒྱལ་ཡོངས་སྲིད་གྲོས་འགན་འཛིན་གཞོན་པ་ཟུར་བ་སུ་རོན་ (Su Rong) དང་། འཐབ་ཕྱོགས་གཅིག་གྱུར་གྱི་འགན་འཛིན་དང་སྲིད་གྲོས་འགན་འཛིན་གཞོན་པ་ཟུར་བ་ལིན་ཅི་ཧྭ་ (Ling Jihua)། རྒྱལ་ཡོངས་བདེ་འཇགས་ལྷན་ཁང་གིས་འགན་འཛིན་གཞོན་པ་ཟུར་བ་མཱ་ཅན་ (Ma Jian)། སི་ཁྲོན་ཞིང་ཆེན་དམག་དོན་སྲིད་གྲོས་ཨུ་ཡོན་ཟུར་བ་ཡཱེ་ཝན་ཡོན་ (Ye Wanyong)། ཀོང་ཏོན་ཞིང་ཆེན་གྱི་སྲིད་གྲོས་འགན་འཛིན་ཟུར་བ་ཀྲུའུ་མིན་ཀོ་ (Zhou Mingguo)། ཧོང་ཀོང་རང་དབང་ཤོག་ཁག་གི་འགན་འཛིན་ཟུར་བ་ཐེན་པེ་ཅོན་ (Tian Baijun)། ཧྲན་ཞི་ཞིང་ཆེན་ཨུ་ཡོན་རྒྱུན་ལས་དང་ཞིང་ཆེན་འཐབ་ཕྱོགས་གཅིག་གྱུར་གྱི་འགན་འཛིན་ཟུར་པ་པེ་ཡོན་ (Bai Yun)། རྒྱ་ནག་ཧ་ཡང་བཟོ་ལས་ཁང་གི་འགན་འཛིན་སོན་ཀྲའོ་ཞའུ་ (Sun Zhaoxue)། ཧྭ་རོན་ལྷན་ཚོགས་ཀྱི་འགན་འཛིན་སོན་ལིན་ (Song Lin)སོགས་ཚོགས་ཞུགས་བྱེད་ཐུབ་ཀྱི་མེད་དང་། ཨུ་ཡོན་གསར་པ་བཞི་ཁ་སྣོན་བྱས་ཡོད་སྐོར་སོགས་བསྒྲགས་འདུག
ཏཱ་ཅི་ཡོན་དྲ་བས་གནས་ཚུལ་སྤེལ་བ་ལྟར་ན། ཐེངས་འདིར་རྒྱ་ནག་དབུས་བརྙན་འཕྲིན་ལས་ཁང་གི་དམག་དོན་སྡེ་ཚན་གྱི་རང་ལོ་ ༣༩ ཡིན་པའི་མདོ་འཛིན་པ་མཛེས་མ་ཧྥིན་ལིན་སྲིད་གྲོས་ཨུ་ཡོན་ནས་གློ་བར་དུ་དགོངས་པ་ཞུ་དགོས་བྱུང་བ་དེ་ནི། སྲིད་གཞུང་གིས་བརྙན་འཕྲིན་ཁང་གི་རུལ་སུངས་ལ་རྒོལ་རྡུང་གཏོང་མགོ་བཙུགས་ཡོད་པ་མཚོན་པ་དང་། འདི་ནི་གསར་འགྱུར་བརྒྱུད་ལམ་ཁག་ཏུ་ལས་ཀ་བྱེད་མཁན་ཚོས་དོ་སྣང་བྱ་དགོས་པ་ཞིག་ཡིན་སྐོར་དང་། འདས་པའི་ལོ་གཉིས་ལྷག་རིང་གི་རུལ་སུངས་ལ་རྒོལ་རྡུང་ལས་འགུལ་ཁྲོད། རུའི་ཁྲིན་ཀོང་དང་ཡཱད་ཡིན་ཁྲོན་སོགས་དབུས་བརྙན་འཕྲིན་ལས་ཁང་གི་མདོ་འཛིན་པ་ཁ་ཤས་ལ་ཞིབ་བཤེར་ཁྱབ་བསྒྲགས་བྱས་ཡོད་ཀྱང་། ཁོང་ཅག་ད་དུང་སྲིད་གྲོས་ཨུ་ཡོན་རྒྱུན་ནས་ཕྱིར་འཕུད་བཏང་མི་འདུག་ཅེས་སོགས་བརྗོད་འདུག
འདས་པའི་ལོ་གཉིས་ལྷག་རིང་གི་རུལ་རྒོལ་ལས་འགུལ་ཁྲོད་ཁྱོན་ནག་མི་མང་འཐུས་མི་ ༣༤ དང་རྒྱ་ནག་སྲིད་གྲོས་རྒྱུན་ལས་ཨུ་ཡོན་ ༡༣ ཙམ་གྱི་གོ་གནས་ཕྱིར་བསྡུ་བྱས་ཡོད། ཅེས་སོགས་འཁོད་འདུག
ཧྥིན་ལིན་ལ་མིང་གཞན་ཧད་ལིན་ཟེར་ཞིང་། ༡༩༧༦ ལོར་ཅི་ལིན་ཕད་ཧྲི་ནས་སྐྱེས་པ་དང་ ༡༩༩༦ ལོར་རྒྱ་ནག་བརྒྱུད་ལམ་སློབ་ཆེན་རྒྱང་སྲིང་སྡེ་ཁག་ནས་མཐར་ཕྱིན་ཏེ། དམག་དོན་བརྙན་འཕྲིན་རྒྱང་བསྒྲགས་ལྟེ་གནས་སུ་དམག་དོན་གསར་འགྱུར་རྒྱང་སྲིང་རི་ཁག་གི་མགོ་གཙོ་དང་། རྒྱལ་ཡོངས་གཞོན་ནུ་ལྷན་ཚོགས་གྱི་རྒྱུན་ལས་ཨུ་ཡོན། སྐབས་ ༡༠ བའི་རྒྱལ་ཡོངས་བུད་མེད་ལྷན་ཚོགས་ཀྱི་འཐུས་མི། རྒྱལ་སྲུང་སློབ་ཆེན་གྱི་གདན་ཞུའི་ཆེད་མཁས་པ་སོགས་ཡིན་འདུག
