འབྲུག་ནང་གི་ནོར་གླིང་སྒྲ་དབྱངས་ཚོགས་པས་ཆོས་རྒྱལ་དྲི་མེད་ཀུན་ལྡན་གྱི་གློག་བརྙན་དྷ་སའི་མི་མང་ལ་གཟིགས་འབུལ་ཐོག སྤྱི་འཐུས་ཚོགས་གཙོ་མཆོག་གིས་མང་ཚོགས་གང་མང་གློག་བརྙན་བལྟ་རུ་ཕེབས་དགོས་པའི་འབོད་སྐུལ་གནང་སོང་།
མདང་ནུབ་ཆུ་ཚོད་ ༦།༣༠ ཐོག་མེག་དྷ་ས་བོད་ཀྱི་ཟློས་གར་ཚོགས་ཁང་དུ། ཐང་སྟོང་གླུ་གར་བོད་ཀྱི་འཁྲབ་སྟོན་ཚོགས་པའི་གོ་སྒྲིག་འོག འབྲུག་ནང་རྟེན་གཞི་བྱས་པའི་ནོར་གླིང་སྒྲ་དབྱངས་ཚོགས་པས་བཟོ་སྐྲུན་གནང་བའི་བོད་ཀྱི་ལྷ་མོའི་སྒྱུ་རྩལ་ཆོས་རྒྱལ་དྲི་མེད་ཀུན་ལྡན་གྱི་གློག་བརྙན་བཞུགས་སྒར་ལ་ཐེངས་དང་པོར་སྟོན་པའི་མཛད་སྒོ་ཞིག་ཚོགས་ཡོད་ཅིང་། དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་གིས་དབུས། དམངས་གཙོའི་ཀ་བ་གསུམ་གྱི་མཛད་སྒོ་རྣམ་པ་དང་སྲི་ཞུ་ལས་བྱེད་ཁག་ཅིག དྷ་ས་ཁུལ་གྱི་མང་ཚོགས་བཅས་འདུ་འཛོམས་གནང་སོང་།
གློག་བརྙན་མགོ་འཛུགས་མ་ཞུས་སྔོན་ལ་ནོར་གླིང་སྒྲ་དབྱངས་ཚོགས་པའི་ལས་བྱེད་བསྟན་འཛིན་འབྱུང་གནས་ལགས་ཀྱིས་ངོ་སྤྲོད་གནང་དོན། ཆོས་རྒྱལ་དྲི་མེད་ཀུན་ལྡན་གྱི་རྣམ་ཐར་ནི། བོད་ཀྱི་ལྷ་གཞུང་ཆེ་ཁག་བརྒྱད་ཀྱི་ནང་གསེས་གཅིག་ཡིན་པ་དང་། ནམ་རྒྱུན་ལྷ་གཞུང་འཁྲབ་སྐབས་ཉིན་གང་འཁྲབ་སྟོན་ཞུ་དགོས་སྟབས། འཁྲབ་མཁན་རྣམས་དཀའ་ངས་ཁག་པོ་ཡོད་པ་མ་ཟད། གཟིགས་མོ་གཟིགས་མཁན་རྣམས་ཀྱང་དུས་ཚོད་རིང་པོ་གཏོང་དགོས་པ་སོགས་ཀྱི་སྐུ་ངལ་ཡོད་སྟབས། ད་ཐེངས་ང་ཚོས་དྲི་མེད་ཀུན་ལྡན་གྱི་རྣམ་ཐར་འདི་དེང་དུས་དང་མཐུན་པའི་ལམ་ནས་འཁྲབ་སྟོན་ཞུས་པ་ཡིན། འཁྲབ་སྟོན་པ་རྣམས་བོད་ཀྱི་ཟློས་གར་ཚོགས་པ་དང་། འབྲུག་ཏུ་ཡོད་པའི་བོད་མི་དང་འབྲུག་པ་བཅས་མཉམ་རུབ་ཐོག་འཁྲབ་སྟོན་ཞུས་ཡོད་པ་མ་ཟད། ལྟད་མོའི་སྐད་ཀྱང་བོད་སྐད་དང་འབྲུག་སྐད་གཉིས་ཐོག་བཟོ་སྐྲུན་ཞུས་ཡོད། གློག་བརྙན་འདི་ནི་ང་ཚོའི་ནང་ཆོས་ངོས་ནས་བཤད་ན་སངས་རྒྱས་བཅོམ་ལྡན་འདས་ཀྱིས་དག་པའི་སྐྱེ་བ་ ༥༠༠ དང་མ་དག་པའི་སྐྱེ་བ་ ༥༠༠ བཞེས་པའི་ཁྲོད་ནས་སྦྱིན་པའི་ཕ་རོལ་དུ་ཕྱིན་པ་སྟོན་པའི་ལོ་རྒྱུས་ཤིག་ཆགས་ཡོད་ཅིང་། ལོ་རྒྱུས་འདི་ནི་བོད་དང་འབྲུག་ནང་བྱུང་བ་ཞིག་མིན་པར་སངས་རྒྱས་བཅོམ་ལྡན་འདས་ཀྱི་སྤྲུལ་པ་རྒྱ་གར་གྱི་རྒྱལ་པོ་ཧཱ་རེ་ཅན་དྷ་ར་ཞུ་བ་དེའི་ལོ་རྒྱུས་ཡིན་པ་མ་ཟད། རྒྱལ་པོ་དེས་མིག་སྦྱིན་པ་བཏང་བ་དང་། བྱམས་སྙིང་རྗེ་དང་སེམས་བཟང་པོ་བྱེད་དགོས་པ་སོགས་གཞན་ཕན་གྱི་བསླབ་བྱ་བཟང་པོ་དག་དད་ལྡན་ཚོར་བུམ་པ་གང་བྱོའི་ཚུལ་དུ་ཕུལ་བའི་རྣམ་ཐར་ཆགས་ཡོད་སྟབས། ང་ཚོས་དཔལ་འབྱོར་འདུ་འགོད་དང་། ཚོང་གི་ཁེ་ཕན་གཅིག་པུའི་དོན་དུ་མིན་པར་དེང་རབས་འཛམ་གླིང་འདིའི་ཐོག་བྱམས་པ་དང་སྙིང་རྗེ། ཡ་རབས་སྤྱོད་བཟང་སོགས་ཀྱི་ཕོངས་ཏེ་དཀའ་ངལ་འཕྲད་དང་འཕྲད་བཞིན་པ་ལྟར། འཛམ་གླིང་མི་མང་སྤྱི་དང་། ལྷག་པར་ང་ཚོ་བོད་རིགས་དང་ཡང་སྒོས་བོད་རིགས་ན་གཞོན་རྣམས་ལ་བྱམས་བརྩེ་དང་། ཡ་རབས་བཟང་སྤྱོད་སོགས་ཀྱི་མིག་དཔེ་དང་བསླབ་བྱ་བཟང་པོ་ཞིག་ཐོབ་ཆེད་བཟོ་ སྐྲུན་བྱས་པ་ཞིག་ཆགས་ཡོད། ཅེས་བརྗོད་སོང་།
ཁོང་གིས་མུ་མཐུད་དུ། ད་བར་ང་ཚོའི་གློག་བརྙན་བཟོ་སྐྲུན་ཁང་གིས་༼ཚེ་སྔོན་ལས་འགྲོ༽དང་། ༼འཇིགས་བྲལ༽༼བུ་བཀྲིས༽སོགས་རིགས་མི་འདྲ་བའི་གློག་བརྙན་གསུམ་བཟོས་ཡོད་པ་མ་ཟད། འབྲུག་ནང་གློག་བརྙན་བཟོ་མཁན་ཐོག་མ་དེ་ཡང་ཆགས་ཡོད། དྲི་མེད་ཀུན་ལྡན་གྱི་གློག་བརྙན་འདི་༧གོང་ས་མཆོག་གིས་མོན་གྷོ་འདོད་དགུ་གླིང་དུ་ལམ་རིམ་གསུང་ཆོས་བསྩལ་སྐབས་ཐོག་མ་བསྟན་ཡོད་པ་མ་ཟད། དེའི་རྗེས་གནས་མཆོག་རྡོར་རྗེ་གདན་དུ་ཉིན་དྲུག་དང་། སྤེལ་ཀོབ་ཉིན་གསུམ་བསྟན་རྗེས། ད་ཆར་དྷ་རམ་ས་ལར་ཡོང་ནས་ཉིན་བཞི་ལྔ་ཞིག་ལ་སྟོན་རྒྱུའི་འཆར་གཞི་སྒྲིག་ཡོད། ད་བར་གློག་བརྙན་འདིར་འབྲུག་ནང་གློག་བརྙན་དང་ཆས་གོས། སྒྲ་སྒྲིག་སྦྱོར་དང་རིག་གཞུང་ལེགས་ཤོས་སོགས་ཀྱི་བྱ་དགའ་མི་འདྲ་བ་ལྔ་ཐོབ་ཡོད་པ་མ་ཟད། ༢༠༡༤ ལོའི་ཟླ་ ༡༠ ནང་འབྲུག་ནང་ཐེངས་དང་པོ་སྟོན་སྐབས་རྒྱ་ཆེའི་མང་ཚོགས་ཧ་ཅང་ཉེས་པོ་བྱུང་སྟེ། ཁ་ཤས་ཀྱིས་ཐེངས་བཅུ་ལྷག་ལྟ་མཁན་བྱུང་འདུག ང་ཚོས་གློག་བརྙན་འདི་བཟོ་སྐྲུན་བྱེད་པར་ལོ་གཅིག་ཙམ་འགོར་ཡོད་པ་མ་ཟད། ད་བར་ཧིན་སྒོར་འབུམ་ ༡༣༠ ཙམ་གྱི་འགྲོ་གྲོན་བཏང་ཡོད་པ་རེད། ཅེས་སོགས་བརྗོད་སོང་།
དེའི་རྗེས་སྐུ་མགྲོན་གཙོ་བོ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གློག་བརྙན་བཟོ་སྟངས་ཐོག་གསུངས་དོན། གློག་བརྙན་བཟོ་མཁན་གྱིས་གློག་བརྙན་བཟོས་རྗེས་མི་གང་མང་ཞིག་གིས་གཟིགས་རྒྱུའི་རེ་བ་བསྐྱོན་གྱི་ཡོད་པ་རེད། ད་ཐེངས་འབྲུག་གི་ནོར་གླིང་སྒྲ་དབྱངས་ཀྱིས་སྐུ་ལས་མང་པོ་ཞིག་བསྐྱོན་ཏེ་གློག་བརྙན་འདི་བཟོ་སྐྲུན་བྱས་ཡོད་པ་མ་ཟད། དེ་རིང་ཆེད་མངག་ནོར་གླིང་སྒྲ་དབྱངས་དང་ཐང་སྟོང་གླུ་གར་ཐུན་མོང་གིས་བོད་ མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་སྲི་ཞུ་བ་ཚོར་དམིགས་བསལ་གཟིགས་འབུལ་ཞུས་པ་རེད། གནམ་གཤིས་ཀྱི་རྐྱེན་པས་ཡིན་ན་རེད། གང་ལྟར་མང་པོ་ཞིག་ཕེབས་ཐུབ་མི་འདུག སང་ཉིན་ནངས་ཉིན་མུ་མཐུད་སྟོན་རྒྱུ་ཡིན་དུས། མི་མང་གང་མང་ཞིག་གཟིགས་མོ་གཟིགས་བར་ཕེབས་ཐུབ་ཚེ། ཁོ་ཚོས་འགྲོ་སོང་བཏང་བ་དེར་ཐུགས་ཕན་གསོས་པ་ཞིག་ཡོང་རྒྱུ་ཡིན་པ་མ་ཟད། གློག་བརྙན་གྱི་ནང་དོན་གཙོ་བོ་དེ་ཡང་ང་ཚོ་བོད་པའི་རིག་གཞུང་དང་འབྲེལ་བ་ཡོད་པ་ལྷ་མོའི་གཞུང་ཆོས་རྒྱལ་དྲི་མེད་ཀུན་ལྡན་གྱི་ཆོས་དང་འཇིག་རྟེན་གྱི་བསླབ་བྱ་མང་པོ་ཞིག་ཡོད་སྟབས། མང་ཚོགས་ལ་ཁྱབ་བསྒྲགས་འགྲོ་རྒྱུར་ཕན་ཐོགས་ཆེན་པོ་ཡོད། ངས་གོ་ཐོས་ལ་གློག་བརྙན་འདིར་འབྲུག་ནང་གཟེངས་བསྟོད་ཞིག་ཐོབ་ཡོད་པ་མ་ཟད། རེ་བར་རྒྱལ་སྤྱིའི་གློག་བརྙན་དུས་སྟོན་མང་པོ་ཚོགས་བཞིན་ཡོད་པ་དེ་དག་ནང་འཛུལ་ཞུགས་གནང་ཐུབ་པ་ཙམ་མིན་པར། རྒྱལ་སྤྱི་ཁྱོན་ཡོངས་ཀྱི་མང་ཚོགས་དག་གིས་གློག་བརྙན་འདི་ལྟ་ཐུབ་པ་དང་འབྲེལ་འདིའི་བསླབ་བྱ་ཁག་ལེན་ཐུབ་པའི་རེ་བ་ཞུ་བཞིན་ཡོད། ཅེས་སོགས་གསུངས་སོང་།
མཇུག་ཏུ་ཐང་སྟོང་གླུ་གར་གྱི་འགན་འཛིན་ཕུན་ཚོགས་ཚེ་རིང་ལགས་སུ་གློག་བརྙན་བལྟས་རྗེས་མྱོང་ཚོར་གང་བྱུང་དྲིས་པར་ཁོང་གིས། ང་རང་ཆུང་དུས་ནས་བཟུང་བོད་ཀྱི་སྲོལ་རྒྱུན་རིག་གཞུང་འཁྲབ་སྟོན་བྱེད་མཁན་ཞིག་ ཡིན་སྟབས། ནམ་རྒྱུན་གློག་བརྙན་ལ་དེ་ཙམ་དོ་སྣང་བྱེད་ཀྱི་མེད་ཀྱང་། དེ་རིང་གློག་བརྙན་འདི་གཞན་དང་མི་འདྲ་བར་སྤུས་དག་པོ་དང་འཁྲབ་མཁན་ཡག་པོ། གྱོན་ཆས་ལེགས་པོ་དང་གྲལ་སྒྲིག་པོ་ཡོད་པ་སོགས་ཕྱོགས་གང་ཅིའི་ཐད་ནུབ་ཕྱོགས་པའི་གློག་བརྙན་བཟོ་སྟངས་ལྟར་བཟོས་ཡོད་པ་མཐོང་བྱུང་ལ། བཙན་བྱོལ་གྱི་གློག་བརྙན་ཁྲོད་ནས་དྲག་གྲས་ཤིག་རེད་བཞག་བསམ་པ་ཞིག་ཀྱང་དྲན་བྱུང་། ད་ཐེངས་ང་ཚོ་གོ་སྒྲིག་ཚོགས་ཆུང་ངོས་ནས་དམིགས་བསལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་སྲི་ཞུ་ལས་བྱེད་ཚོ་གློག་བརྙན་གཟིགས་པར་མགྲོན་འབོད་ཞུས་ཡོད་ཀྱང་། ད་ཐེངས་མཛད་གཙོ་བ་དང་སྲི་ཞུ་ལས་བྱེད་མང་ཆེ་བ་ཕེབས་ཐུབ་མེད་པ་དེར་ཏོག་ཙམ་བློ་ཕམ་བྱུང་། ཞེས་སོགས་བརྗོད་བྱུང་།
གསར་འགོད་པ། དོན་གྲུབ།
