ཁ་ཉིན་ལྷོ་ཀོ་རི་ཡའི་ཨ་རིའི་གཞུང་ཚབ་ཆེན་མོར་ཡུལ་མི་ཞིག་གིས་གྲིས་བརྒྱབ་པའི་གནད་དོན་དེར་བྱང་ཀོ་རི་ཡར་འབྲེལ་བ་ཡོད་མེད་རྩད་ཞིབ་བྱེད་བཞིན་ཡོད་འདུག
ཟླ་འདིའི་ཚེས་ ༦ ཉིན་གྱི་སྔ་དྲོར་ལྷོ་ཀོ་རི་ཡའི་ཨ་རིའི་གཞུང་ཚབ་ཆེན་མོ་མག་ལེ་པར་ཌི་ (Mark Lippert)ལྷོ་བྱང་ཀོ་རི་ཡའི་ཞོགས་ཟས་ལྷན་ཚོགས་ཤིག་གི་ཐོག་ཞུགས་སྐབས། ལྷོ་ཀོ་རི་ཡའི་ཀེམ་ཁེ་ཇོང་ (Kim Ki-jong)ཟེར་བ་ཞིག་གིས་གློ་བུར་གྲིས་བརྒྱབ་སྟེ་ཁོའི་སྐེ་དང་ལག་གཡོན་པ་བཅས་སུ་རྨས་སྐྱོན་བཟོས་ཡོད་པ་དང་། དེ་མ་ཐག་སྨན་ཁང་དུ་བསྐྱལ་ཏེ་ཁྱོན་འཚེམ་བུ་ ༨༠ ཙམ་རྒྱག་དགོས་བྱུང་ཡོད་འདུག ཨ་རིའི་སྲིད་འཛིན་ཨོ་བྷ་མས་ཁ་པར་བརྒྱུད་གཞུང་ཚབ་ཆེན་མོར་འཚམས་འདྲི་ཞུས་ཡོད་འདུག
ཀེམ་ཁེ་ཇོང་ནི་ལྷོ་ཀོ་རི་ཡའི་མཁྲེགས་འཛིན་ཕྱོགས་ཁག་གི་མི་སྣ་ཞིག་ཡིན་པ་དང་། ཁོ་བྱང་ཀོ་རི་ཡར་ཐེངས་མང་སྐྱོད་མྱོང་ཡོད་སྟབས། ད་ལྟ་ལྷོ་ཀོ་རི་ཡའི་ཕྱོགས་ནས་ཀེམ་ཁེ་ཇོང་དང་བྱང་ཀོ་རི་ཡའི་བར་འབྲེལ་བ་ཅི་ཞིག་ཡོད་མེད་རྩད་ཞིབ་བྱེད་བཞིན་ཡོད་འདུག གནས་ཚུལ་དེ་བྱུང་མ་ཐག་བྱང་ཀོ་རི་ཡའི་གསར་ལམ་ཁག་གིས་ཨ་རིའི་གཞུང་ཚབ་ལ་གྲིས་བརྒྱབ་པ་དེ་ཨ་རི་ལ་བདེན་པ་ར་སྤྲོད་བྱས་པ་རེད་ཟེར་བ་དང་། ཨ་རི་ལ་སྐྱིན་ཚབ་ཆུང་ཆུང་ཞིག་བླངས་པ་རེད་ཟེར་བ་སོགས་བརྗོད་ཡོད་འདུག ལྷོ་ཀོ་རི་ཡའི་མང་ཚོགས་མང་པོ་ཞིག་གིས་ཨ་རིའི་གཞུང་ཚབ་ཆེན་མོར་གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་བྱས་ཡོད་འདུག
ཁ་སང་ལྷོ་ཀོ་རི་ཡའི་རྒྱལ་སའི་ཇུན་ཎོ་ས་ཁུལ་གྱི་མགོ་གཙོ་ཡོན་མེ་ཡུང་སུང་ (Yoon Myeong-seong) གིས་རོའུ་ཌར་དང་ཡོན་ཧབ་ (Yonhap) གསར་ལམ་ཐོག “ད་ལྟ་ང་ཚོས་ཀེམ་ཁེ་ཇོན་གྱིས་ཨ་རིའི་གཞུང་ཚབ་ཆེན་མོར་གྲིས་བརྒྱབ་པ་དང་། ཁོ་དེ་སྔོན་བྱང་ཀོ་རི་ཡར་ཕར་འགྲོ་ཚུར་འོང་ཐེངས་མང་བྱས་པའི་བར་འབྲེལ་བ་ཅི་ཡོད་རྩད་ཞིབ་བྱེད་བཞིན་ཡོད། གཞུང་གིས་ཁོས་མི་གསོད་རྩིས་བྱས་པ་མ་ཟད་ཕྱི་རྒྱལ་སྐུ་ཚབ་ལ་དྲག་སྤྱོད་སྤེལ་ཏེ་རྒྱལ་ཁབ་ཀྱི་ཚོང་འབྲེལ་ལ་འགོག་རྐྱེན་བཟོས་པའི་ཉེས་མིང་འོག་འཇུ་བཟུང་བྱས་ཡོད།”ཅེས་བརྗོད་འདུག
དེ་རིང་གསར་ལམ་ཁག་ཅིག་ནང་ཀེམ་ཁེ་ཇོང་ཟེར་བ་དེའི་ལོ་རྒྱུས་འཁོད་པའི་ནང་། ༡༩༨༥ ལོར་ཀེམ་ཁེ་ཇོན་ལྷོ་ཀོ་རི་ཡའི་རྒྱལ་ས་སོལ་ནང་རྟེན་གཞི་བྱས་པའི་ཨ་རིའི་གཞུང་ཁབ་ཁང་དུ་འཛུལ་ཏེ་ཨ་རིའི་རྒྱལ་དར་ཕབ་ནས་བསྲེགས་ཡོད་པ་དང་། ༢༠༠༦ དང་ ༢༠༠༧ ལོའི་བར་ཁོ་བྱང་ཀོ་རི་ཡར་ཐེངས་ ༦ ཙམ་ཕྱིན་ཡོད་པ་མ་ཟད། ༢༠༡༠ ལོར་ཉི་ཧོང་གི་གཞུང་ཚབ་ཆེན་མོ་ཌོ་ཤེ་ཎོ་རེ་ལ་ལག་བཀྱགས་ཏེ་བཙོན་འཇུག་བྱས་ཡོད་པ་དང་། ༢༠༡༡ ལོར་རྒྱལ་ས་སོལ་གྱི་ལྟེ་གནས་ཤིག་ཏུ་བྱང་ཀོ་རི་ཡའི་མགོ་ཁྲིད་ཀེམ་ཇོན་ཨེལ་ (Kim Jong-il) ལ་དྲན་རྟེན་རྡོ་རིང་འཛུགས་ཐབས་བྱས་ཡོད་འདུག
ཁོས་ད་བར་ཨ་རིའི་བྱ་སྤྱོད་ལ་ངོ་རྒོལ་ལས་འགུལ་ཐེངས་ ༡༢ ལྷག་སྤེལ་ཡོད་པ་དང་། བདུན་ཕྲག་སྔོན་མའི་ནང་ཁོའི་བྱ་འགུལ་ཚོགས་པ་ཝུ་རེ་མཱ་ཌན་(Woorimadang)ཟེར་བས་ཨ་རིའི་གཞུང་ཚབ་ཁང་མདུན་དུ། ཨ་རི་དང་ལྷོ་ཀོ་རི་ཡའི་བར་རེས་གཟའ་ཟླ་བ་ནས་བཟུང་ཟླ་ ༤ པའི་ཟླ་མཇུག་བར་མཉམ་འབྲེལ་དམག་སྦྱོང་བྱ་འཆར་ཡོད་པར་ངོ་རྒོལ་སྐད་འབོད་བྱས་ཡོད་པ་མ་ཟད། ཁོས་ད་རེབ་ཨ་རིའི་གཞུང་ཚབ་ཆེན་མོར་གྲིས་བརྒྱབ་རྗེས་ཉེན་རྟོག་པས་འཁྲིད་འགྲོ་སྐབས་ཀྱང་། ལྷོ་བྱང་ལྷོ་ཀོ་རི་ཡ་ཆིག་སྒྲིལ་དགོས་པ་དང་མཉམ་འབྲེལ་དམག་སྦྱོང་ལ་ངོ་རྒོལ་ཡོད་སྐོར་སྐད་འབོད་བརྒྱབ་ཡོད་འདུག
ཀེམ་ཁེ་ཇོན་གྱིས་ཨ་རིའི་གཞུང་ཚབ་ཆེན་མོར་གྲིས་བརྒྱབ་རྗེས། བྱང་ཀོ་རི་ཡའི་གཞུང་འབྲེལ་བརྒྱུད་ལམ་ཁག་གིས་དགའ་བསུའི་རྣམ་འགྱུར་དེའི་ཐད། ཁ་སང་ཨ་རིའི་ཕྱི་སྲིད་ལྷན་ཁང་མགྲིན་ཚབ་པ་གཞོན་པ་ལྕམ་མཱ་རེ་(Marie Elizabeth Harf ) ཡིས། ང་ཚོས་ཡ་ང་སྙིང་རྗེ་མེད་པའི་བསྒྲགས་གཏམ་དེ་དག་མཐོང་སོང་ཡང་། དེ་ནི་སྲིད་དབང་སྒེར་འཛིན་པ་ཞིག་གི་འགྱུར་མེད་རང་བཞིན་དང་འུད་སྒྲོག་ཅིག་ཏུ་ངོས་འཛིན་བྱེད་རྒྱུ་ལས་སྐྱོན་འཛུགས་གང་ཡང་བྱེད་འདོད་མེད་ཅེས་བརྗོད་འདུག ད་ལྟ་ཨ་རབ་ནང་སྐོར་སྐྱོད་བྱེད་བཞིན་ཡོད་པའི་ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་ཡིས། ཨ་རིའི་ཕྱི་འབྲེལ་མི་སྣ་དང་ཨ་རིར་གནོད་འཚེ་གཏོང་མཁན་དག་ལ་ང་ཚོ་འཇིགས་སྣང་བྱེད་དགོས་དོན་མེད་སྐོར་བརྗོད་ཡོད་ཀྱང་། ཉེས་ཅན་པ་ཀེམ་ཁེ་ཇོན་གྱིས་ངས་ཨ་རིའི་གཞུང་ཚབ་ཆེན་མོ་མཆོག་གསོད་རྩིས་མེད་ལ། ང་དང་བྱང་ཀོ་རི་ཡའི་བར་འབྲེལ་བ་གང་ཡང་མེད་ཅེས་བརྗོད་འདུག
ལྷོ་ཀོ་རི་ཡའི་ཀང་ཎམ་ (Kyungnam) གཙུག་ལག་སློབ་ཆེན་གྱི་སློབ་དཔོན་ཡུ་ཧན་ཅང་ (Yu Hyung-chang) གིས། ནག་ཉེས་ཅན་གྱི་མི་དེ་འདྲ་དུས་སྟོན་ལ་གཏོང་དགོས་དོན་གང་ཡིན་ནམ། གལ་སྲིད་གཏོང་དགོས་ན་ཁོ་ལ་རྟོག་ཞིབ་བྱེད་མཁན་ཞིག་ངེས་པར་དུ་འཇོག་དགོས་ཀྱང་བཞག་མེད་པ་དེ་གཞུང་གི་ནོར་འཁྲུལ་ཆེན་པོ་ཞིག་རེད། ཞེས་བརྗོད་འདུག
ད་ལྟ་ཨ་རིའི་གཞུང་ཚབ་ཆེན་མོ་མག་ལེ་པར་ཌི་ལྷོ་ཀོ་རི་ཡའི་སྨན་ཁང་ཞིག་ཏུ་སྨན་བཅོས་བྱེད་བཞིན་ཡོད་པ་དང་། སྨན་པས་བདུན་ཕྲག་རྗེས་མའི་རེས་གཟའ་ཟླ་བ་དང་མིག་དམར་ཉིན་ཁོང་གི་འཚེམ་བུ་བཀྲོལ་ཏེ་སྨན་ཁང་ནས་ཕྱིར་ལོག་ཆོག་ཚུལ་བརྗོད་འདུག
