༧ས་སྐྱ་གོང་མ་རིན་པོ་ཆེ་མཆོག་གིས་རྡེ་ར་རྡུན་ས་གནས་ཀྱི་མི་མང་སྟོང་ཕྲག་མང་པོར་སྨན་ལྷའི་བཀའ་དབང་བསྩལ་བ་དང་འབྲེལ། བདེ་ཐང་ངང་འཚོ་ཐུབ་པ་ཡིན་ན་ཆོས་དང་འཇིག་རྟེན་གྱི་བྱ་བ་གང་ཡིན་ཡང་འགྲུབ་ཐུབ་པའི་སྐོར་བཀའ་སློབ་གནང་འདུག
ཐུབ་བསྟན་རྒྱལ་མཚན་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། རྒྱ་གར་བྱང་ཕྱོགས་རྡེ་ར་རྡུན་མངའ་ཁུལ་གྱི་ས་གནས་བོད་ཀྱི་སྨན་རྩིས་ཁང་གི་ཡན་ལག་གསུམ་ནས་ཇི་ལྟར་གསོལ་བ་བཏབ་པ་ལྟར། ཟླ་འདིའི་ཕྱི་ཚེས་ ༦ ཉིན་འབྲི་གུང་བཀའ་བརྒྱུད་བྱང་ཆུབ་གླིང་གི་ཉེ་འདབས་ཐང་ཆེན་དུ། དཔལ་ས་སྐྱ་༧གོང་མ་བདག་ཁྲི་རིན་པོ་ཆེ་མཆོག་གིས་མི་མང་ཁྲི་གཅིག་ཡས་མས་ལ་སྨན་ལྷའི་དབང་ཆེན་གྱི་བཀའ་དབང་གནང་ཡོད་འདུག
སྐབས་དེར་༧གོང་མ་རིན་པོ་ཆེ་མཆོག་གིས་མི་མང་ལ་བླང་དོར་གྱི་བཀའ་སློབ་གནང་དོན། ནང་པ་སངས་རྒྱས་པའི་ཆོས་བསམ་གྱི་མི་ཁྱབ་པ་འདི་བོད་གངས་ཅན་གྱི་ལྗོངས་ལ་དར་ཁྱབ་གནང་མཁན་རྒྱ་གར་གྱི་པཎ་གྲུབ་ཚོ་རེད། ལྷག་པར་དུ་བོད་ཀྱི་ཆོས་རྒྱལ་ཚོས་མཐུན་འགྱུར་རོགས་རམ་དང་། དགོས་སུ་དཀའ་བ་དུ་མ་སྤྱད་པའི་བོད་ཀྱི་ལོ་ཙཱ་བ་ཚོས་སྐུ་ལས་ཆེན་པོ་བསྐྱོན་ནས་མར་དར་ཁྱབ་བྱུང་བ་ཞིག་རེད། བོད་ལ་ཕྱི་དངོས་པོར་མཚོན་ན་ཆེས་རྗེས་ལུས་ཀྱི་རྣམ་པ་ཡོད་ཀྱང་། ནང་བསམ་པའི་འཁྱེར་སོ་དེ་ཡར་ལྷ་བླ་མར་དད་པ་བྱེད་པ་དང་། མར་སེམས་ཅན་སྲོག་ཆགས་གྲོག་མ་ཚུན་ཆད་ལ་སྙིང་རྗེ་བྱེད་པ་རེད། དེ་བོད་གངས་ཅན་གྱི་ལྗོངས་རེད། དེ་བཞིན་བོད་ཀྱི་བླ་མ་ཚོས་ཐུགས་རྗེ་འཕྲིན་ལས་ཀྱིས་ཁྱབ་པའི་ཧི་མ་ལ་ཡའི་རི་རྒྱུད་ཀྱི་མི་ཚོ་གཞན་དང་མ་འདྲ་བ། འཛམ་བུ་གླིང་གི་མི་རིགས་གཞན་གང་ལ་བསྡུར་བ་ཡིན་ནའང་བསམ་པའི་འཁྱེར་སོ་མ་འདྲ་བ་ཡོད་པའི་སྟོབས་ལ་བརྟེན་ནས་གཤིས་རྒྱུད་འདུལ་བ་དང་བཟང་པོ། བག་ཡོད་ལྡན་པ་ཞིག་ཡིན་པ་དེ་དཔེ་མ་སྲིད་པའི་གལ་ཆེན་པོ་རེད། འགྲོ་བ་མིས་མཚོན་པའི་སེམས་ཅན་དུ་གཏོགས་ཚད་ཚང་མ་སྡུག་བསྔལ་མི་འདོད་མཁན་དང་བདེ་སྐྱིད་འདོད་མཁན་ཤ་སྟག་ཡིན་པ་དང་། སྡུག་བསྔལ་སེལ་བ་དང་བདེ་སྐྱིད་ཐོབ་ཆེད་ང་རང་ཚོ་ཚང་མས་དཀའ་ལས་རྒྱག་གིན་ཡོད་པ་རེད། འབད་བརྩོན་བྱེད་ཀྱིན་ཡོད་པ་རེད། ཡར་རྒྱས་གཏོང་གིན་ཡོད་པ་རེད། ཕྱི་དངོས་པོ་ཡར་རྒྱས་ཅི་ཙམ་ཕྱིན་ཀྱང་ནང་སེམས་དེ་ཡར་རྒྱས་ཕྱིན་མ་ཐུབ་པ་ཡིན་ན་དཀའ་ངལ་དངོས་གནས་དེ་སེལ་ཐུབ་ཡོད་མ་རེད། ཇི་སྲིད་སེམས་ཉོན་མོངས་པ་གཞན་དབང་དུ་གྱུར་པ་དེ་རྣམས་མ་གྲོལ་བར་དེ་སྲིད་དུ་རང་དབང་དངོས་གནས་དང་། ཞི་བདེ་དངོས་གནས་དེ་འཐོབ་ཐུབ་རྒྱུ་མེད་པ་རེད། དེ་འདྲ་ཡིན་ཙང་དེ་དག་ཐོབ་པའི་ཆེད་དུ་ཆོས་ཀྱི་ཉམས་ལེན་བྱེད་རྒྱུ་དེ་གལ་ཆེན་པོ་རེད། ཅེས་དང་།
ཁོང་གིས་ལུས་སེམས་ཀྱི་འཕྲོད་བསྟེན་ལ་དོ་སྣང་དགོས་སྐོར་བཀའ་སློབ་གནང་དོན། གཞོན་སྐྱེས་ཚོས་ཆང་རག་ཚོད་མེད་འཐུང་རྒྱུ་དང་། ཐ་མག་འཐེན་རྒྱུ་ལྷག་པར་དུ་ཐ་མག་ནག་པོ་དང་རྫས་ངན་འདྲ་མིན་ཟོས་ཏེ། ལུས་སེམས་གཉིས་ཀ་འཕྲོ་བརླག་འགྲོ་བ་དེ་འདྲའི་སྤྱོད་པ་ངན་པ་བྱེད་མཁན་མང་པོ་ཡོད་རྒྱུ་མ་རེད་དེ། དེ་འདྲ་རེ་གཉིས་ཡོད་སྲིད་པས་དེ་ཚོ་དཔེ་མི་སྲིད་པའི་ནོར་འཁྲུལ་ཆེན་པོ་རེད། སྤྱོད་པ་དེ་འདྲ་མེད་མཁན་ཚོས་ཀྱང་དུས་དང་རྣམ་པ་ཀུན་ཏུ་དོགས་ཟོན་བྱས་ཏེ། དེའི་ཕྱོགས་ལ་མ་འགྲོ་བ་ཞིག་བྱེད་དགོས་པ་དེར་ཕ་མ་ཚོས་སློབ་གསོ་རྒྱག་དགོས་པ་དང་། གཞོན་པ་ཚོས་ཀྱང་སོ་སོས་བསམ་བློ་ཡག་པོ་གཏོང་དགོས་པ་རེད། རང་གཅེས་པར་མི་འཛིན་མཁན་སུ་གང་མེད་པས། དུས་དང་རྣམ་པ་ཀུན་ཏུ་གཟུགས་པོར་འཕྲོད་བསྟེན་གནང་རྒྱུ་དེ་གལ་ཆེན་པོ་རེད། སྔོན་ཆད་བག་མེད་སྤྱོད་པའི་དབང་དུ་གྱུར་ཟིན་པ་དེ་འདྲ་ཡིན་ནའང་གཟབ་གཟབ་བྱས་པ་ཡིན་ན་གང་ཡིན་ནའང་བཟོ་བཅོས་ཐུབ་པས། སྤྱོད་པ་ངན་པའི་རིགས་དེ་ཚོ་རང་དོན་རང་གཅེས་བྱས་ཏེ་ཕར་སྤང་ནས་མི་ཚུལ་ལྡན་སྤྱོད་པ་ཡ་རབས་ཤིག་བྱེད་དགོས་པ་དེ་དཔེ་མ་སྲིད་པའི་་གལ་ཆེན་རེད་འདུག མིའི་ལུང་པ་གཞན་དག་ལ་བལྟས་ན་ང་རང་ཚོ་བོད་པ་མི་འབོར་ཉུང་ཉུང་རེད་བསྡད་ཡོད་པ་དང་། དེ་བཞིན་ཧི་མ་ལ་ཡའི་མི་རྒྱུད་ཚོ་ཡིན་ནའང་ང་རང་ཚོ་བོད་པ་གཅིག་པ་རེད། བསམ་པའི་འཁྱེར་སོ་དང་སྤྱོད་ལམ་གང་ཡིན་ནའང་གཅིག་འགྱུར་རེད་བསྡད་ཡོད་པ་རེད། ཚང་མས་དུས་དང་རྣམ་པ་ཀུན་ཏུ་གཟབ་གཟབ་བྱས་ནས་དེ་རིང་ང་རང་ཚོར་ཐོབ་པའི་ལུས་རྟེན་འདི་ཡུན་རིང་འཚོ་ཐུབ་པ་གཅིག་དང་། འཚོ་བ་དེ་ཡང་གཟུགས་པོ་བདེ་ཐང་གི་ངང་ནས་འཚོ་ཐུབ་པ་ཞིག་བྱུང་ན་ཆོས་འཇིག་རྟེན་གང་གི་བྱ་བ་ཡིན་ནའང་འགྲུབ་ཐུབ་པ་ཞིག་ཡིན་པས། ཚང་མས་དུས་དང་རྣམ་པ་ཀུན་ཏུ་ཟས་བཅུད་འཕྲོད་བསྟེན་གནང་རྒྱུ་སོགས་གལ་ཆེན་རེད། ཅེས་གསུངས་འདུག
པུ་རུ་ཝ་ལའི་གཞིས་དགོན་གཉིས་ཀྱིས་གསོལ་འདེབས་ཞུས་པ་ལྟར། ཟླ་འདིའི་ཕྱི་ཚེས་ ༡༡ ཉིན་༧གོང་མ་རིན་པོ་ཆེ་མཆོག་ནས་མི་མང་ལ་ཆོས་འབྲེལ་ཚེ་དབང་དང་དཔེ་མཛོད་སྒོ་འབྱེད་སོགས་ཀྱི་བཀའ་དྲིན་བསྐྱང་རྒྱུ་ཡིན་འདུག
གསར་འགོད་པ། པདྨ་མཚོ།
་་་་་་་་་་ སྔོན་ཆད་བག་མེད་སྤྱོད་པའི་དབང་དུ་གྱུར་ཟིན་པ་དེ་འདྲ་ཡིན་ནའང་གཟབ་གཟབ་བྱས་པ་ཡིན་ན་གང་ཡིན་ནའང་བཟོ་བཅོས་ཐུབ་པས།
སྤྱོད་པ་ངན་པའི་རིགས་དེ་ཚོ་རང་དོན་རང་གཅེས་བྱས་ཏེ་ཕར་སྤང་ནས་མི་ཚུལ་ལྡན་སྤྱོད་པ་ཡ་རབས་ཤིག་བྱེད་དགོས་པ་དེ་དཔེ་མ་སྲིད་པའི་་གལ་ཆེན་རེད་འདུག ་་་་་་་་་