ཞི་ཅིན་ཕིན་དང་ཝང་ཆི་ཧྲན་གཉིས་ལ་ལྐོག་གསོད་ཀྱི་ཉེན་ཁ་ཡོད་དམ།

ད་ལྟའི་རྒྱ་ནག་གི་ལྐོག་ཟ་རུལ་སུངས་ལ་རྒོལ་རྡུང་གཏོང་པའི་གཡུལ་འགྱེད་ཆེན་མོའི་དེའི་ཁྲོད། སྲིད་འཛིན་ཞི་ཅིན་ཕིན་དང་སྒྲིག་ཁྲིམས་ཞིབ་བཤེར་འགན་འཛིན་ཝང་ཆི་ཧྲན་གཉིས་ལ་ལྐོག་གསོད་ཀྱི་ཉེན་ཁ་འབྱུང་སྲིད་པ་དང་། དམག་ཕྱོགས་ནས་གྱེན་ལོག་དང་ཟིང་ཆ་སློང་སྲིད་པའི་སྐོར་ལ། ཆབ་སྲིད་དཔྱད་བརྗོད་པ་ཚོས་དབྱེ་ཞིབ་དང་ཚོད་དཔག་སྣ་ཚོགས་བྱེད་བཞིན་ཡོད་འདུག

ཉེ་ཆར་རྒྱ་ནག་གི་རྩོམ་པ་པོ་ཧོང་ཙི་ཡོའུ་ (Huangzi You)ཡིས་ཆབ་སྲིད་སྐོར་གྱི་འཕྲུལ་དེབ་ “ཞི་ཅིན་ཕིན་སུས་ལྐོག་གསོད་བྱེད་སྲིད་དམ།” ཞེས་པ་ཞིག་དྲ་ཐོག་ཏུ་སྤེལ་བ་དང་བསྟུན་ཏེ། རྒྱ་ནག་ཕྱི་ནང་གི་ཆབ་སྲིད་དཔྱད་བརྗོད་པ་ཚོས་སྲིད་འཛིན་ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་ལས་འགུལ་དེར་འགོག་རྐྱེན་གང་དག་འཕྲད་སྲིད་མིན་དང་། ཁོ་རང་གི་བདེ་འཇགས་ཐད་གནོད་སྐྱོན་གང་འདྲ་འབྱུང་སྲིད་མིན་སྐོར་ལ་དབྱེ་ཞིབ་མང་པོ་བྱས་འདུག་ལ། དེ་སྔོན་ཧོང་ཀོང་གི་གསར་ལམ་ཁག་ཅིག་ཏུའང་ཞི་ཅིན་ཕིན་དང་ཝང་ཆི་ཧྲན་གཉིས་སྔོན་ཆད་ལྐོག་གསོད་བྱེད་རྩིས་བྱས་པའི་གནས་ཚུལ་མང་པོ་ཞིག་རིམ་བསྟུད་དུ་ཐོན་ཡོད།

འཕྲུལ་དེབ་དེའི་ངོ་སྤྲོད་ནང་། སུ་ཞིག་གི་དབང་ཚད་ཀྱིས་ཞི་ཅིན་ཕིན་ལྐོག་གསོད་བྱེད་སྲིད་པ་དང་། གནོད་སྐྱོན་ཇི་ལྟར་བཟོ་སྲིད་པའི་འགྲེལ་བ་མེད་ཀྱང་། རྩོམ་པ་པོས་སྔོན་ཆད་རྒྱ་ནག་གི་མགོ་ཁྲིད་མའོ་ཙེ་ཏུང་གིས་རིག་གནས་གསར་བརྗེའི་ལས་འགུལ་སྤེལ་སྐབས། ཁོས་རྒྱ་ནག་གི་མཐོ་རིམ་དཔོན་རིགས་མང་པོ་ལ་ཕོག་ཐུག་བཏང་ཡོད་སྟབས། ཀུང་ཏོན་ཞིང་ཆེན་ས་གནས་སྲིད་གཞུང་གི་མཐོ་རིམ་དཔོན་རིགས་ཚོས་དམག་མིའི་ཟིང་འཁྲུག་བསླངས་མྱོང་བ་སོགས་ལ་ཞིབ་སྡུར་བྱས་ཏེ། ད་ལྟའི་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཀྱང་ལྐོག་ཟ་རུལ་སུངས་ལ་རྡུང་རྡེག་གཏོང་ཡུལ་ཐོག་མ་དེ་ཏང་གི་མཐོ་རིམ་དཔོན་རིགས་དང་དམག་སྡེ་དཔུང་ཁག་གི་སྟག་རྒན་ཚོ་ནས་མགོ་བཙུགས་ཡོད་སྟབས། མཐའ་མཇུག་ཏང་ཕྱོགས་ནས་གྱེན་ལོག་བྱེད་སྲིད་པ་དང་། དམག་དཔུང་གིས་ཟིང་ཆའང་བསླང་སྲིད་པ། ཡང་ན། ཞི་ཅིན་ཕིན་ལྐོག་གསོད་ཀྱི་ཉེན་ཁའང་ཡོད་སྲིད་པ་སོགས་བརྗོད་འདུག

ཟླ་སྔོན་མའི་ཟླ་མཇུག་ལ་ཞིན་ཐང་རིན་ཞེས་པའི་དྲ་ཚིགས་སྟེང་། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྡུང་རྡེག་གཏོང་བཞིན་པ་དེར་ཁ་ཕྱོགས་ངེས་མེད་ཡིན་པ་དང་། དཔོན་ངན་ཚོ་ཡིབ་ཐབས་མེད་པ། སྟག་རྒན་ཅི་ཙམ་མང་ཡང་ཞིབ་བཤེར་འཛིན་བཟུང་ཕྱི་བཤོལ་མི་བྱ་རྒྱུའི་ཁྱབ་བསྒྲགས་བྱས་ཡོད་པ་མ་ཟད། དེ་བཞིན་དུ་ལག་བསྟར་དོན་འཁྱལ་ཡང་བྱེད་བཞིན་ཡོད་ཀྱང་། མའོ་ཙེ་ཏུང་གིས་རིག་གནས་གསར་བརྗེའི་སྐབས་མཐོ་རིམ་དཔོན་རིགས་ལ་ཕོག་ཐུག་བཏང་པ་དང་། ཞི་ཅིན་ཕིན་གྱིས་ལྐོག་ཟ་རུལ་སུངས་རྒོལ་རྡུང་ལས་འགུལ་ཁྲོད་མཐོ་རིམ་དཔོན་རིགས་ལ་ཕོག་ཐུག་བཏང་པ་གཉིས་ཀྱི་མི་འདྲ་བའི་ཐད། རྒྱ་ནག་གི་ཆབ་སྲིད་དཔྱད་ཞིབ་པ་ཝང་ཁོན་ (Wang Kun)གྱིས་འདི་ལྟར་བརྗོད་འདུག ཞི་ཅིན་ཕིན་དང་ཝང་ཆི་ཧྲན་གཉིས་ཀྱིས་ལྐོག་ཟ་རུལ་སུངས་རྒོལ་རྡུང་ལས་འགུལ་མགོ་མ་བཙུགས་སྔོན་ལ། ཁོ་གཉིས་ལ་ལྐོག་གསོད་ཀྱི་ཉེན་ཁ་ཡོད་མེད་དང་། གྱེན་ལོག་གི་གནས་ཚུལ། ཡང་ན་དམག་ཕྱོགས་ནས་ཟིང་སློང་སྲིད་པ་སོགས་ལ་བསམ་བློ་བཏང་ཡོད་ཀྱང་། གནད་འགག་ཆེ་ཤོས་ནི་ཉེན་ཁ་སྔོན་འགོག་གི་བྱེད་ཐབས་ག་རེ་བཏོན་ཡོད་པ་དེ་རེད། འདས་པའི་ལོ་གཉིས་ལྷག་རིང་རུལ་སུངས་ལ་རྒོལ་རྡུང་གཏོང་ཕྱོགས་དང་ལག་བསྟར་སོགས་ལ་བལྟས་ཡོང་ན། ཞི་ཅིན་ཕིན་དང་ཝང་ཆི་ཧྲན་གཉིས་ལྐོག་གསོད་བྱེད་ཐུབ་མེད་པ་མ་ཟད། ད་སྔ་སུ་གང་གིས་ཀྱང་ཁོ་གཉིས་ལ་གྱེན་ལོག་དང་ཟིང་སློང་ཐུབ་མེད་པར་གཞིགས་ན། ཁོ་གཉིས་ཀྱི་སྔོན་འགོག་བྱེད་ཐབས་ལ་རྒྱལ་ཁ་ཐོབ་ཡོད་པ་ར་སྤྲོད་བྱེད་ཐུབ་འདུག ཅེས་སོགས་འཁོད་འདུག

ཁོང་གིས་མུ་མཐུད་དུ། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་བཏང་པ་དང་། མའོ་ཙེ་ཏུང་གིས་རིག་གནས་གསར་བརྗེ་སྐབས་དཔོན་རིགས་ཚོར་ཉེས་ཆད་བཅད་པ་གཉིས་བསྡུར་ན། སྔ་ཕྱི་གཉིས་ཀས་སྲིད་གཞུང་གི་མཐོ་རིམ་དཔོན་རིགས་ལ་ཕོག་ཐུག་བཏང་བ་གཅིག་མཚུངས་ཡིན་པ་གང་ཞིག་ལ། དཔོན་རིགས་ཚང་མ་གུང་ཁྲན་ཏང་གི་དཔོན་རིགས་ཡིན་པའང་གཅིག་མཚུངས་ཡིན་ཡང་། དེ་གཉིས་ཀྱི་ངོ་བོ་ལ་གནམ་ས་ལྟ་བུའི་ཁྱད་པར་ཡོད། མའོ་ཙེ་ཏུང་གིས་མིའི་རིགས་ལ་ངོ་རྒོལ་བྱས་ཡོད་སྟབས། ཁོས་འཐབ་འཁྲུག་ཁྲོད་ཀྱི་དཔོན་རིགས་མང་པོ་ཞིག་ལ་མ་ཉེས་ཁ་ཡོག་གི་ནག་ཉེས་ཕོག་ཡོད་ཀྱང་། རྗེས་སུ་རིམ་གྱིས་ཉེས་མེད་ཉེས་འགེལ་ཐེབས་པའི་དངོས་ཡོད་གནས་ཚུལ་བདེན་པ་དག་སྐྱེལ་བྱས་ཡོད། འོན་ཀྱང་ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་གཏོང་པ་ནི། མི་དམངས་ཀྱི་མངོན་འདོད་ལ་གནམ་གྱིས་གོ་སྒྲིག་བྱས་པ་བརྒྱུད་ནས་ལག་བསྟར་བྱས་པ་ཞིག་ཆགས་ཡོད།

ཞི་ཅིན་ཕིན་གྱིས་དཔོན་རིགས་ཚོ་ལ་རྒོལ་རྡུང་གཏོང་བཞིན་པ་དེ་གདམ་ཀ་རང་བཞིན་ཅན་ཞིག་ཡིན་ཡང་། མི་ཆོས་ཀུན་སྤྱོད་ལ་འོས་འཚམ་ཡིན་པ་མ་ཟད། ཁྲིམས་ལྟར་ལག་བསྟར་བྱས་ན་མ་ཉེས་ཁ་ཡོག་བྱས་པའི་གནས་ཚུལ་ཡང་མེད། ཉེས་ཅན་དཔོན་རིགས་མང་ཆེ་བར་སྲོག་ཁྲིམས་བཅད་ཀྱང་ཉེས་པ་མི་དག་མཁན་རྐྱང་རྐྱང་ཡིན་པ་མ་ཟད། འཛམ་གླིང་རྒྱལ་ཁབ་གང་གི་ཁྲིམས་ཁང་ནས་ཁྲིམས་གཅོད་བྱས་ཀྱང་། སྟག་ངན་ཚོའི་ནག་ཉེས་འདག་ཐུབ་མེད།

འོན་ཀྱང་། དེ་སྔོན་རུལ་སུངས་རྒོལ་རྡུང་ལས་འགུལ་ཁྲོད་རྙི་ནང་དུ་ཚུད་ཟིན་པའི་སྟག་རྒན་ཚོ་དང་། མ་འོངས་པར་ཞིབ་བཤེར་འོག་ཚུད་ངེས་པའི་དཔོན་རིགས་ཚོས་བཟོད་བསྲན་བྱེད་མི་ཐུབ་པ་གཅིག་ནི། རྒྱ་ནག་གི་དཔོན་རིགས་ཡོད་ཚད་ཀྱིས་ལྐོག་ཟ་བྱེད་བཞིན་པ་གཅིག་མཚུངས་ཡིན་ཡང་། “ང་” ཐེར་འདོན་བྱ་དགོས་དོན་གང་ཡིན་ནམ་ཞེས་པ་དེ་དཔོན་རིགས་ཡོངས་ཁྱབ་ཀྱི་སེམས་ཁམས་ལྟ་བུ་ཞིག་ཡིན། འོན་ཀྱང་དེ་ནི་འགྲོ་བ་མི་སྤྱི་མཚུངས་ཀྱི་རང་གཤིས་ཤིག་ཀྱང་ཡིན་སྲིད།

ཞི་ཅིན་ཕིན་དང་ཝང་ཆི་ཧྲན་ལྐོག་གསོད་དང་གྱེན་ལོག དམག་ཕྱོགས་ནས་ཟིང་སློང་ཐུབ་མིན་ཐད། ཝང་ཁོན་གྱིས། ཧོང་ཀོང་གི་བརྒྱུད་ལམ་ཁག་ཅིག་ལ་བལྟས་ན། ཞི་ཅིན་ཕིན་དང་ཝང་ཆི་ཧྲན་གཉིས་ལ་དེ་སྔོན་ལྐོག་གསོད་ཀྱི་ཐབས་ཤེས་ཐེངས་མང་བྱས་ཡོད་ཀྱང་ལེགས་འགྲུབ་བྱུང་མི་འདུག གནས་སྟངས་དེ་ལ་བརྟེན་ཏེ་རྒྱ་ནག་གཞུང་གིས་ལྐོག་ཟ་རུལ་སུངས་ཀྱི་གྱོད་དོན་ཆེད་དུ་རུ་ཁག་གསར་བཙུགས་བྱས་ཡོད་པ་དང་། རུལ་སུངས་རྒོལ་རྡུང་གི་ལས་འགུལ་ཤུགས་ཆེ་རུ་བཏང་ཡོད་སྟབས། རུལ་སུངས་རྒོལ་རྡུང་ཁྲོད་ཀྱི་གནོད་སྐྱོན་སྔོན་འགོག་འཐུས་སྒོ་ཚང་བ་ཞིག་ཆགས་ཀྱང་། ད་དུང་ཁོ་གཉིས་ལ་ལྐོག་གསོད་ཉེན་ཁ་མེད་པ་མིན་ཡང་ལྐོག་གསོད་ཀྱི་གོ་སྐབས་སྔར་ལས་ཉུང་ཉུང་ཆགས་ཡོད།

གལ་སྲིད་ཞི་ཅིན་ཕིན་ལ་གྱེན་ལོག་བྱ་དགོས་ན། སྟག་རྒན་ཚོས་སྦ་གསང་མེད་པར་ཆབ་སྲིད་ཀྱི་བསྒྲགས་གཏམ་སྤེལ་ཏེ། གང་ཞིག་ལ་སྙད་འདོགས་བྱས་ཏེ་རང་ཉིད་སྲུང་སྐྱོབ་བྱ་དགོས། རང་ཉིད་ཀྱི་གནས་སྟངས་ལ་གཞིགས་ཏེ་གཞན་ལ་སྐད་ཆ་ཤོད་ཟེར་བའི་དཔེ་ལྟར། གལ་སྲིད་དཔོན་རིགས་ཚོས་ཞི་ཅིན་ཕིན་ལ་གྱེན་ལོག་བྱེད་དགོས་ན་རང་ཉིད་ཀྱིས་ལྐོག་ཟ་བྱས་པའི་གནས་ཚུལ་དྲང་པོར་བརྗོད་པ་ལས་ཐབས་གཞན་མེད། རང་གི་ལྐོག་ཟ་རུལ་སུངས་འགེབ་སྲུང་བྱས་ཏེ་གྱེན་ལོག་བྱེད་རྒྱུ་ཁག་པ་རེད།

གནས་ཚུལ་གཞན་ཞིག་ལ་ཁག་འདོགས་བྱས་ཏེ་གྱེན་ལོག་བྱེད་དམ། དཔེར་ན། དཔལ་འབྱོར་ཉམས་ཆག་དང་འགྲོ་བ་མིའི་ཐོབ་ཐང་། སྤྱི་ཚོགས་སྲ་བརྟན་སྲུང་སྐྱོང་སོགས་འབྱུང་སྲིད་དམ་ཞེས་ན། རྩ་བའི་དེ་ནི་ཐབས་ལམ་ཡག་ཤོས་ཤིག་ཡིན་ཡང་དེ་ལྟར་འབྱུང་བ་ཧ་ཅང་དཀའ་ལས་ཁག་པོ་ཡིན། གང་ཡིན་ཞེས་ན། རུལ་སུངས་དཔོན་རིགས་ཁོ་རང་ཚོ་ནི་དཔལ་འབྱོར་ཉམས་ཆག་གི་གཞི་མ་དང་། གཞན་གྱི་ཁེ་དབང་རྐྱང་རྐྱང་ཟ་མཁན་གྱི་ཉེས་ཅན། སྤྱི་ཚོགས་ལྷང་འཇགས་རྡོག་རོལ་གཏོང་མཁན་གྱི་འབྱུང་ཁུངས་ལྟ་བུ་ཆགས་ཡོད།

དམག་དཔུང་གིས་ཟིང་སློང་པའི་གནས་ཚུལ་ཡང་དཔོན་ངན་ཚོས་གྱེན་ལོག་བྱ་མི་ཐུབ་པ་དང་གཅིག་མཚུངས་རེད། གང་ཡིན་ཞེ་ན། དམག་དཔུང་གི་ཟིང་སློང་པ་ལའང་སྙད་འདོགས་བྱེད་ས་ཞིག་དགོས་པ་དང་། གལ་སྲིད་དམག་སྒར་ནང་གི་རུལ་སུངས་དཔོན་རིགས་ཚོས་རང་ཉིད་སྲུང་སྐྱོབ་ཆེད། ཁོ་ཚོའི་དམག་དཔུང་ལ་རྒྱལ་ཡོངས་དམག་དོན་འགན་འཛིན་ཞི་ཅིན་ཕིན་དང་། དབུས་སྒྲིག་ཁྲིམས་ཞིབ་བཤེར་ལྷན་ཁང་གི་འགན་འཛིན་ཝང་ཆི་ཧྲན་གཉིས་འཛིན་བཟུང་བྱ་དགོས་པའི་བཀའ་བཏང་ན་ཡང་དམག་མི་ཚོས་བཀའ་དང་ལེན་བྱ་མི་སྲིད། གང་ཡིན་ཞེ་ན། ལྐོག་ཟ་རུལ་སུངས་ཀྱིས་དམག་མི་ཚོའི་ཁེ་ཕན་ལའང་གནོད་སྐྱོན་ཕོག་གི་ཡོད་པ་ཤེས་རྟོག་བྱུང་ཡོད་པས་རེད།

དེར་བརྟེན། རུལ་སུངས་དཔོན་རིགས་ཚོས་ཁ་གཡར་ས་ཡག་པོ་ཞིག་འཚོལ་དགོས། དཔེར་ན། དེ་ནི་རྒྱལ་ཁབ་སྲུང་སྐྱོབ་བྱེད་པ་དང་གུང་ཁྲན་ཏུང་སྲུང་སྐྱོབ་བྱེད་པ། མི་རིགས་སྲུང་སྐྱོབ་བྱེད་པ་ལྟ་བུ་སོགས་ཡིན། དེ་ལྟར་བྱས་ཚེ་ཁོ་ཚོར་ལག་པ་འཆིང་ས་ཞིག་ཡོད་ནའང་ཁོ་ཚོས་དེ་ལྟར་བྱ་སྲིད་དམ། ལྐོག་ཟ་རུལ་སུངས་བྱེད་མཁན་དཔོན་རིགས་ཚོ་ནི་ “ཤོག་བུའི་སྟག་རྒན་” རྐྱང་རྐྱང་ཡིན་སྟབས། ཁོ་ཚོ་ལ་དེ་འདྲའི་སྙིང་སྟོབས་མེད་པ་མ་ཟད། གནའ་ནས་ད་བར་ལྐོག་ཟ་རུལ་སུངས་བྱེད་མཁཉ་དཔོན་རིགས་ཁྲོད་དུ། ཕ་རོལ་བོའི་ཡིད་འགུག་ཐུབ་མཁན་གྱི་མི་ནུས་འཇོན་ཅན་གཅིག་ཀྱང་བྱུང་མྱོང་མེད། ཅེས་སོགས་འཁོད་འདུག

རྩོམ་པ་པོ་ཧོང་ཙི་ཡོའུ་ཡིས་ཞི་ཅིན་ཕིན་ལ་གྱེན་ལོག་རྒྱག་པ་དང་དམག་དཔུང་གི་ཟིང་སློང་པ། ལྐོག་གསོད་བྱེད་པ་དག་ལས། ལྐོག་གསོད་ཀྱི་ཉེན་ཁ་ཆེ་ཙམ་ཡོད་པའི་སྐོར་གླེང་བའི་ནང་། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་བཏང་པའི་དབང་ཤུགས་ཀྱིས། རྒྱ་གཞུང་གི་དཔོན་རིགས་མང་པོ་ཞིག་ལ་རང་བཞིན་གྱིས་འཇིགས་སྣང་སྐུལ་ཡོད་སྟབས། གྱེན་ལོག་དང་དམག་གི་ཟིང་སློང་པ་ལས། ལྐོག་གསོད་ཀྱི་ཉེན་ཁ་ཆེན་པོ་ཡོད། ཅེས་བརྗོད་ཡོད།

དེར་བརྟེན། ཞི་ཅིན་ཕིན་དང་ཝང་ཆི་ཧྲན་གཉིས་ལ་ལྐོག་གསོད་ཀྱི་ཉེན་ཁ་ལས་གཞན་པའི་ཉེན་ཚབས་མེད་དམ་ཞེ་ན། དེ་ཡང་མ་རེད། གོང་གི་དབྱེ་ཞིབ་ནི་ཏང་གི་ལྐོག་ཟ་རུལ་སུངས་བྱེད་མཁན་དང་། རུལ་སུངས་ལ་རྒོལ་རྡུང་གཏོང་མཁན་གཉིས་ཀྱི་གནས་ཚུལ་ཙམ་རེད། རྒྱལ་ཁབ་གྱི་ཁེ་ཕན་ཕྱོགས་དང་རྒྱལ་ཡོངས་མི་དམངས་ཕྱོགས་ནས་བལྟས་ན། ཞི་ཅིན་ཕིན་དང་ཝང་ཆི་ཧྲན་གཉིས་ཀྱིས་ལྐོག་ཟ་རུལ་སུངས་ལ་རྒོལ་རྡུང་གཏོང་པའི་དབང་ཤུགས་དང་བརྒྱུད་རིམ་ལ་ད་དུང་སྟོང་ཆ་མང་པོ་ལྷག་ཡོད་འདུག

ད་ལྟ་རྒྱ་ནག་ཕྱི་ནང་གཉིས་ཀྱི་དཔྱད་ཞིབ་པ་མང་པོ་ཞིག་གིས། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་གཏོང་པ་ནི་གདམ་ཀ་རང་བཞིན་ཅན་ཞིག་ཡིན་པ་དང་། གདམ་ཀའི་དམིགས་འབེན་གཙོ་བོ་ཅང་ཙི་མིན་དང་ཚིན་ཆིན་ཧོན་གཉིས་ཀྱི་དབང་ཤུགས་ལ་དམིགས་ཡོད་པ་མ་ཟད། དམིགས་འབེན་དེ་བརྒྱུད་ནས་ཞི་ཅིན་ཕིན་དང་ཝང་ཆི་ཧྲན་གཉིས་ཀྱི་དབང་ཆ་བརྟན་པོ་ཡོང་རྒྱུའི་ཁེ་ཕན་ཡོད་ཀྱང་། ཞི་ཅིན་ཕིན་གྱིས་རྒྱ་ནག་སྤྱི་ཡོངས་ཀྱི་ལྐོག་ཟ་རུལ་སུངས་གྱོད་དོན་གྱི་རྩ་བ་འཛིན་ཐུབ་མེད་པ་མ་ཟད། རྒྱ་ནག་མི་དམངས་ལ་གནོད་སྐྱོན་ཐེབས་བཞིན་པའི་ལྐོག་ཟ་རུལ་སུངས་ཉེན་ཁ་ཆུང་དུའང་གཏོང་ཐུབ་མེད་སྟབས། གལ་སྲིད་ཉིན་ཞིག་རྒྱ་ནག་མི་མང་གིས་བཟོད་བསྲན་བྱེད་མ་ཐུབ་པ་དང་རྒྱ་ཡོངས་རང་བཞིན་གྱི་ཟིང་འཁྲུག་ཅིག་བསླངས་པ་ཡིན་ན། ཞི་ཅིན་ཕིན་དང་ཝང་ཆི་ཧྲན་གཉིས་ནི་རྒྱ་ནག་གི་ཆབ་སྲིད་མི་སྣ་གཙོ་གྲས་དེ་ཡིན་སྟབས། ཁོ་གཉིས་ཀྱི་ཉེན་ཁ་འགོག་ཐབས་མེད། ཅེས་བརྗོད་འདུག

ཝང་ཁོན་གྱིས། ཞི་ཅིན་ཕིན་དང་ཝང་ཆི་ཧྲན་གཉིས་ཀྱི་ཆེས་བློ་རིག་གསལ་བའི་གདམ་ཀ་ནི་གུང་ཁྲན་ཏང་འདོར་རྒྱུ་དེ་རེད། གལ་སྲིད་ཁོ་གཉིས་ཀྱིས་གུང་ཁྲན་ཏང་དོར་བ་ཡིན་ན། གུང་ཁྲན་ཏང་གི་ལྐོག་ཟ་རུལ་སུངས་ཀྱི་འབྱུང་རྩ་མེད་པར་བཟོ་ཐུབ་པ་མ་ཟད། རྫོགས་རྒྱུ་མེད་པའི་རྒྱ་ནག་ནང་ཁུལ་གྱི་རྙིག་འཛིང་དག་ཀྱང་རང་བཞིན་གྱིས་མེད་པ་ཆགས་འགྲོ་བ་རེད། ཅེས་བརྗོད་འདུག

ཉེ་ལམ་ཏཱ་ཅི་ཡོན་དྲ་ཚིགས་སྟེང་། ཞི་ཅིན་ཕིན་དང་ཝང་ཆི་ཧྲན་གཉིས་ལྐོག་གསོད་ཀྱི་གནས་ཚུལ་བྱུང་པའི་ཁྲོད། ལོ་སྔོན་མར་པེ་ཏད་ཧི་ཚོགས་འདུ་༼ པེ་ཏད་ཧི་ཞེས་པ་ནི་རྒྱ་ནག་ཤར་ཕྱོགས་ཀྱི་ས་ཆ་ཞིག་ཡིན་ཞིང་། པེ་ཏད་ཧི་ཚོགས་འདུ་ཞེས་པ་དེ་ནི་ཕྱི་ལོ་ ༡༩༤༥ ལོ་ནས་མགོ་བཙུགས་ཡོད་འདུག དེ་ནི་རྒྱ་ནག་གུང་ཁྲན་ཏང་གི་མཐོ་རིམ་དཔོན་རིགས་ཚོས་དབྱར་སྐྱིད་དང་བསྟུན་ཏེ། རྒྱལ་ཁབ་ཀྱི་དོན་ཆེན་ཁག་ཐག་གཅོད་བྱེད་ས་ཞིག་ཡིན་འདུག བར་ལམ་པེ་ཏད་ཧིའི་ཚོགས་འདུའི་ཁ་ཕྱོགས་གཙོ་བོ་དེ་རྒྱ་ནག་ནང་གི་ལྐོག་ཟ་རུལ་སུངས་རྡུང་རྡེག་གི་གནད་དོན་དེ་ཆགས་ཡོད་པ་རེད།༽སྔ་རྗེས་ལ་ཀྲུའུ་ཡོན་ཁང་གིས་ཉུང་མཐར་ཞི་ཅིན་ཕིན་ཐེངས་གཉིས་ལ་ལྐོག་བྱེད་གཏོང་རྩིས་བྱས་ཚུལ་འཁོད་འདུག པེ་ཏད་ཧི་ཚོགས་ཁང་ནང་ལ་འགད་རྫས་བཞག་པ་དང་། པེ་ཅིན་ ༣༠༡ སྨན་ཁང་དུ་ཞི་ཅིན་ཕིན་གྱི་གཟུགས་པོར་བརྟག་དཔྱད་བྱས་སྐབས་དུག་ཁབ་རྒྱག་རྩིས་བྱས་ཡོད་པ་བཅས་དང་། ཝང་ཆི་ཧྲན་གྱི་རླངས་འཁོར་རུ་ཁག་ཅིག་ལ་ལམ་བར་ནས་ཆག་སྐྱོན་སོགས་མེད་པར་མེ་འབར་བའི་གནས་ཚུལ་བྱུང་ཡོད་པ་དང་། རླངས་འཁོར་ཁོར་ལོའི་གཅུ་གཟེར་ལྷོད་པ་དང་། ལོ་སར་སྐབས་དུག་རྫས་ (KCN)ཅན་ཡོད་པའི་འཚམས་འདྲིའི་ཤོག་རྟགས་འབྱོར་བ་སོགས་ཀྱི་གནས་ཚུལ་བྱུང་ཡོད། ཅེས་སོགས་འཁོད་འདུག

ཟླ་སྔོན་མའི་ཕྱི་ཚེས་ ༢༤ ཉིན། ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཧོང་ཀོང་གི་གནས་ཚུལ་ལུང་འདྲེན་བྱས་པ་ལྟར་ན། ༢༠༡༣ ལོའི་ལོ་མཇུག་ཅིག་ལ། ཝང་ཆི་ཧྲན་ཅང་ཞཱི་ཞིང་ཆེན་ནན་ཁྲང་གྲོང་ཁྱེར་སོགས་སུ་གཞུང་དོན་དུ་བསྐྱོད་སྐབས། སྔོན་ཆད་དམག་སྒར་ནས་ཕྱིར་ཕུད་བཏང་བའི་ལག་དམར་གཉིས་ཀྱིས་གྲོང་གསེབ་པའི་ལ་བ་གྱོན་ཏེ། ཝང་ཆི་ཧྲན་ལ་ཞུ་གཏུག་ཡི་གེ་སྤྲོད་པའི་གོ་སྐབས་དང་བསྟུན་ཏེ་ཝང་ཆི་ཧྲན་ལྐོག་གསོད་བྱེད་རྩིས་བྱས་སྐབས། བདེ་སྲུང་དམག་མིས་ཤེས་རྟོག་བྱུང་ཡོད་པ་དང་། དེ་མ་ཐག་ཉེས་ཅན་པ་དེ་གཉིས་ཀྱིས་རང་སྲོག་གཅོད་རྩིས་བྱས་ཡོད་ཀྱང་། ལེགས་འགྲུབ་མ་བྱུང་བར་འཛིན་ཐེབས་ཡོད། ཅེས་བརྗོད་འདུག

པའོ་ཞིན་དྲ་བས་གནས་ཚུལ་སྤེལ་བ་ལྟར་ན། གོ་གནས་ཕབ་པའི་ཞིང་ཆེན་རིམ་པའི་དཔོན་རིགས་ཅིག་གི་ཁྱིམ་གྱི་གནས་ཚུལ་ཤེས་རྟོག་བྱུང་བར། མི་ཁ་ཤས་ཀྱིས་ལྐོག་ནས་ཨ་རིའི་རྒྱལ་ཁབ་ཀྱིས་བཟོས་པའི་ལྐོག་གསོད་མེ་མདའ་ (sniper rifle) ཉོ་རྒྱུ་གོ་སྒྲིག་བྱས་ཏེ་འཁོན་ལན་སློག་རྩིས་ཡོད་སྟབས། འདས་པའི་ལོ་ཕྱེད་རིང་ཞི་ཅིན་ཕིན་ཕྱིར་སྐྱོད་ཀྱི་བདེ་སྲུང་དམག་མི་ཇེ་མང་དུ་བཏང་ཡོད་པ་དང་། ཞི་ཅིན་ཕིན་གྱིས་དུས་རྒྱུན་རྒྱ་ནག་གི་ནུས་རྩལ་རྩེ་ཕུད་ཀྱི་དམིགས་བསལ་སྐུ་སྲུང་པ་ཁྲིད་ཡོད་པ་མ་ཟད། ཕྱི་རོལ་གྱི་མཛད་སྒོ་སོགས་སུ་སྐྱོད་སྐབས། ས་གནས་དེ་ཁུལ་གྱི་ཉེན་འགོག་སྒྲིག་ཆས་ཧ་ཅང་འཐུས་སྒོ་ཚང་བ་བཀོད་སྒྲིག་བྱེད་བཞིན་ཡོད་པ་དང་། ཞིང་ཆེན་རིམ་པའི་དཔོན་རིགས་གཞོན་པ་རྣམ་ལའང་ཞིབ་བཤེར་རྟོག་ཞིབ་བྱེད་བཞིན་ཡོད་འདུག

འདས་པའི་ལོ་གཉིས་རིང་། ལྐོག་ཟ་རུལ་སུངས་རྒོལ་རྡུང་ལས་འགུལ་ཁྲོད་རྙི་ནང་དུ་ཚུད་པའི་དཔོན་རིགས་ཚོའི་ནང་མི་བཙོན་བཅུག་དང་། འབྲེལ་ཡོད་དཔོན་རིགས་ཚོས་རང་ཤི་རྒྱག་པའི་གནས་ཚུལ་མང་དག་ཅིག་རིམ་བསྟུད་དུ་འབྱུང་བཞིན་ཡོད་སྟབས། ད་ལྟའི་ཐབས་ཟད་འུ་ཐུག་གི་གནས་སྟངས་འདི་འདྲའི་འོག་ཏུ། ཁྱོད་ཤི་ང་གསོན་གྱི་བསམ་བློ་དེ་རུལ་སུངས་དཔོན་ངན་ཚོར་མི་འཁོར་རང་འཁོར་གྱི་གནས་སྟངས་ཆགས་ཡོད། ཅེས་བརྗོད་འདུག

ཧོང་ཀོང་གི་ཤར་ཕྱོགས་དྲ་བའི་སྟེང་གི་རྩོམ་ཡིག་ཅིག་ཏུ། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་གཏོང་སྟངས་འདི། “ཆུ་ངོགས་གཏམ་རྒྱུད་”ནང་གི་ཝའོ་སོན་གྱིས་སྟག་གསོད་སྟངས་དང་ཧ་ཅང་འདྲ་བོ་ཡོད། དེ་ནི་ཝའོ་སོན་ཐོག་མར་ཆིན་ཧི་རྫོང་དུ་གཉེན་ཉེ་ལ་ཐུག་འཕྲད་བྱེད་དུ་སྐྱོད་པའི་ལམ་བར་དུ། ཅིན་ཡཱང་རི་བོ་ནས་སྟག་ལ་འཕྲད་ཡོད་པ་དང་། སྟག་དེས་ཁོ་རང་ཟ་རྒྱུའི་ཉེན་ཁར་ཐུག་སྐབས། ཁོས་རང་ཉིད་སྲུང་སྐྱོབ་ཆེད་སྟག་ལ་ཕར་རྒོལ་བྱས་ཏེ། མཐའ་མཇུག་སྟག་གསོད་ཐུབ་པ་བྱུང་བ་མ་ཟད། ཁོ་རང་ལའང་དཔལ་རྒོད་ཀྱི་མཚན་སྙན་ཐོབ་པ་རེད། འོན་ཀྱང་། ཐོག་མར་ཁོའི་བསམ་བློའི་ནང་དུ་གྲ་སྒྲིག་མེད་པའི་ཞན་སྐྱོན་ཁ་ཤས་ཡོད་པ་ནི། དང་པོ། ཁོས་ཐོག་མ་རི་མགོ་དེར་སྟག་ཡོད་པར་ཡིད་ཆེས་བྱས་མེད་པ་དང་། གཉིས་པ། ཁོ་རང་སྟག་ལ་དངོས་སུ་ཐུག་རྒྱུ་ཡིན་པ་བསམ་བློར་ཡང་འཁོར་མེད། གསུམ་པ། སྟག་རྒན་ལ་དེ་འདྲའི་སྟོབས་ཤུགས་དང་གཏུམ་སྤྱོད་ཆེ་བའང་དྲན་མེད་པ་སོགས་རེད།

ཐེངས་འདིར་ཞི་ཅིན་ཕིན་གྱིས་རུལ་སུངས་ལ་རྒོལ་རྡུང་བཏང་སྟེ་སྟག་རྒན་འཛིན་བཟུང་བྱས་པ་དེ་ཡང་ཝའོ་སོན་གྱིས་སྟག་བསད་པ་ལྟར། ཞི་ཅིན་ཕིན་གྱིས་ཚད་མཐོ་ས་ནས་ལྐོག་ཟ་རུལ་སུངས་ལ་རྒོལ་རྡུང་གཏོང་གི་ཡོད་ཀྱང་། དོན་དངོས་སུ་ཁོས་སྔོན་དཔག་བྱས་པ་དང་ད་ལྟའི་གནས་སྟངས་དངོས་གཉིས་ལ་བར་ཐག་ཆེན་པོ་ཡོད། ལྐོག་ཟ་རུལ་སུངས་ལ་རྒོལ་རྡུང་གཏོང་མཁན་ཚོས་ལས་འགུལ་དེའི་ཁྲོད་དེ་འདྲའི་ཚབས་ཆེན་གྱི་གནས་ཚུལ་འབྱུང་སྲིད་པའི་ཚོད་དཔག་བྱས་མེད་ལ། དེ་འདྲའི་མཐོ་རིམ་དཔོན་རིགས་ཁྲོད་དུ་ལྐོག་ཟ་རུལ་སུངས་ཚབས་ཆེན་ཡོད་པའང་དྲན་མེད། ལྐོག་ཟ་བྱེད་མཁན་གྱི་དཔོན་རིགས་དེ་དག་ལ་དེ་འདྲའི་སྟོབས་ཤུགས་དང་དབང་ནུས་དང་། རྒྱབ་ཏུ་དཔུང་ཚོགས་ཡོད་པའང་དྲན་ཡུལ་དུ་འཆར་མྱོང་མེད་སྟབས། ཞི་ཅིན་ཕིན་གྱིས་རུལ་རྒོད་ལས་འགུལ་གཏིང་ཇེ་ཟབ་ཏུ་གཏོང་དགོས་པ་མ་ཟད། རུལ་སུངས་སྟག་རྒན་ཚོ་དང་སྲོག་རྡོས་ཀྱིས་ཁྱོད་ཤི་ང་གསོན་གྱི་འཐབ་འཛིང་བྱེད་རྒྱུ་དེར་གཡོལ་ཐབས་མེད་པའི་གནས་སྟངས་ཤིག་ཀྱང་ཆགས་ཡོད། ཅེས་སོགས་འཁོད་འདུག