ཡུལ་ཤུལ་ས་ཡོམ་གདུང་སེལ་ཚོགས་ཆུང་སྒོ་བརྒྱབ་པ་ཡིན་ཟེར།

དེ་རིང་ཉིན་རྒྱབ། ཡུལ་ཤུལ་ས་ཡོམ་གདུང་སེལ་ཚོགས་ཆུང་གི་རྩིས་པ་བློ་ཚེ་ལགས་ཀྱིས་འདི་གར་གནས་ཚུལ་ཞིག་མཁོ་སྤྲོད་གནང་བའི་ནང་། གདུང་སེལ་ཚོགས་ཆུང་གི་ལས་བསྡོམས་དང་རྩིས་ཁྲ་སོགས་ཟླ་འདིའི་ཚེས་ ༡༣ ཉིན་བཀའ་ཤག་དང་སྤྱི་འཐུས་རྒྱུན་ལས་ལ་ཕུལ་ཏེ་གདུང་སེལ་ཚོགས་ཆུང་སྒོ་བརྒྱབ་ཡོད་འདུག

དེའི་སྐོར་གྱི་གསལ་བསྒྲགས་ནང་འཁོད་པ་ལྟར་ན། གདུང་སེལ་ཚོགས་ཆུང་བཙུགས་པ་ནས་བཟུང་རྒྱ་བལ་འབྲུག་གསུམ་དང་ཕྱི་རྒྱལ་ཁག་ནས་ཞལ་འདེབས་ཁྱོན་བསྡོམས་ཧིན་སྒོར་ ༤༨༣༣༩༡༢༠ ཙམ་འབྱོར་ཡོད་པ་དང་། དེ་དག་ལས་བོད་ནང་སྤྲད་ཟིན་པ་རྒྱ་སྒོར་ ༥༦༦༨༨༡༧ དང་། བོད་ནང་རོགས་དངུལ་སྤྲོད་པར་ཕྱིན་པའི་འགྲོ་སོང་རྒྱ་སྒོར་ ༣༡༨༠༡༡ ། དེ་བཞིན། བཙན་བྱོལ་ནང་ལས་ཀ་བྱས་པའི་འགྲོ་སོང་དང་ཆོས་ཕྱོགས་བཅས་ལ་ཧིན་སྒོར་ ༡༠༨༥༤༩༦ ཙམ་བཏང་ཡོད་སྐོར་སོགས་འཁོད་འདུག་པའི་གསལ་བསྒྲགས་ཧྲིལ་བོ་འོག་ཏུ་བཀོད་ཡོད།

ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་བོད་མདོ་ཁམས་ཡུལ་ཤུལ་ཁུལ་དུ་ས་ཡོམ་འགུལ་ཚད་ ༧་༣ ཅན་ཞིག་བརྒྱབ་སྟེ་མི་རྒྱུ་གཉིས་ཀར་ཚད་ལས་བརྒལ་བའི་གནོད་སྐྱོན་ཐེབས་སྟབས། དྷ་རམ་ས་ལར་ཡོད་པའི་ཡུལ་ཤུལ་བ་རྣམས་ནས་མ་གྲོས་བསམ་པ་གཅིག་མཐུན་གྱིས་གནས་སྐབས་ངལ་སེལ་ཚོགས་ཆུང་ཞིག་བཙུགས་ཏེ། བཀའ་སྤྱི་གཉིས་ཀྱི་རྒྱབ་གཉེར་འོག་རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ནས་ཞལ་འདེབས་ཕོན་ཆེ་བྱུང་ཡང་ཕྱི་ཕྱོགས་ནས་ཞལ་འདེབས་བོད་ནང་དུ་འཕྲོད་འབྱོར་གྱི་ཐབས་ལམ་ཤིན་ཏུ་དཀའ་བར་བརྟེན། ཚོགས་ཆུང་གི་ངོས་ནས་རྒྱ་ནག་གཞུང་ཚབ་ཁང་དུ་ལན་མང་བཅར་ཏེ་ཐབས་ཤེས་ཇི་ཡོད་བཙལ་འབྲས་སུ་ཚོགས་མི་བཞི་བོད་དུ་བསྐྱོད་རྒྱུའི་མཐོང་མཆན་ཐོབ་པ་དང་། དེ་མཚུངས་རྒྱ་སྒོར་ཁྲི་ ༡༩༥ ས་གནས་སུ་ངལ་སེལ་བྱེད་ཆོག་པའི་བཀའ་འཁྲོལ་ཐོབ་ཡོད། འོན་ཀྱང་ཚོགས་མི་བཞི་པོ་བོད་དུ་འབྱོར་རྗེས་ས་གནས་རྒྱ་ནག་གཞུང་ཕྱོགས་ནས་བཙན་བྱོལ་བོད་མིའི་སྐུ་ཚབ་ཀྱི་ངོ་བོར་བརྩིས་ཏེ་འགྲོ་འདུག་གང་ཅིར་བལྟ་སྲུང་དང་ཚོད་འཛིན་བྱས་ཏེ་གཞུང་གི་ཆོག་མཆན་འོག་ནས་རྒྱ་སྒོར་ཁྲི་ ༡༩༥ ལྷག་བགོ་སྤྲོད་ཆོག་མཆན་ཡོད་པ་དེར་ཡང་ཀ་ཀོར་དུས་འགྱངས་ཀྱིས་དངོས་སུ་མི་མང་ནང་བགོ་སྤྲོད་བྱེད་རྒྱུར་ལོ་གསུམ་འགོར་ཞིང་། གཞན་རྣམས་ལྐོག་ནས་འཚོལ་ཞིབ་ཀྱིས་གསང་སྟབས་ངང་བགོ་སྤྲོད་ཞུ་སྐབས་དཀའ་ངལ་མི་ཉུང་བ་ཞིག་འཕྲད་དེ་ཡུན་རིང་དུས་འགོར་བྱུང་།

བར་སྐབས་ཤིག་ནས་བཙན་བྱོལ་དུ་ཡོད་པའི་ཕ་ཡུལ་གཅིག་པ་མང་པོས་སྐད་འཕྲིན་ཚོགས་པ་འདྲ་མིན་བཙུགས་ཏེ་ཞལ་འདེབས་རོགས་དངུལ་གང་དག་བྱུང་བ་རྣམས་གོ་ཐོས་མཐོང་གསུམ་གང་ཡང་མི་འདུག ས་གནས་ས་ཐོག་ཏུ་འཕྲོད་འབྱོར་བྱུང་མེད་ཚུལ་བརྗོད་དེ་ལབ་གླེང་འདྲ་མིན་དང་། ཐད་ཀར་བོད་ནང་སྡེ་དགོན་ག་གེ་མོ་དེ་རིགས་ལ་ཁ་པར་བཏང་སྟེ་འདྲི་རྩད་ཀྱང་བྱས་ཡོད་ཚོད་འདུག གླེང་སློང་དེ་དག་གི་དབང་ལས་དེ་སྔོན་ཞལ་འདེབས་འཕྲོད་འབྱོར་བྱུང་ཟིན་པ་ནས་ལེན་མ་ནུས་པར་ཕྱིར་སློག་བྱེད་མཁན་བྱུང་ལ། ཁག་ཅིག་ལ་ལག་སོན་བྱུང་ཡོད་ཀྱང་སྐབས་འཕྲལ་སོ་སོར་ལག་སོན་བྱུང་ཞེས་བརྗོད་མ་ནུས་པ་སོགས་ཀྱི་དཀའ་ངལ་ཡང་བྱུང་།

གཞན་ཡང་བཙན་བྱོལ་ནང་གི་ས་གནས་འདྲ་མིན་གྱི་ཡུལ་ཤུལ་བ་མི་གྲངས་ ༡༨ ལས་གྲུབ་པའི་རྒྱབ་སྐྱོར་ཚོགས་པའི་མིང་ཐོག་ནས་ཉིན་གྲངས་བརྒྱད་རིང་ཞིབ་འཇུག་གནང་རྗེས་གྲུབ་དོན་རྣམས་བཀའ་སྤྱི་གཉིས་ལ་སྙན་སེང་ཞུས་ཡོད་ལ། བོད་ཀྱི་དུས་བབ་དང་། བོད་ཀྱི་བང་ཆེན་ཐོག་ཏུའང་གསར་འགོད་གསལ་བསྒྲགས་གནང་ཡོད་པ་རེད།

ད་ལན་ཚོགས་ཆུང་གི་ལས་གཞི་ཡོངས་རྫོགས་འཇུག་བསྡོམས་བྱ་རྒྱུར་སོང་། ཞིབ་ཕྲའི་ལས་བསྡོམས་དང་བྱུང་སོང་གི་རྩིས་ཁྲ་འཛིན་སྐྱོང་བཀའ་ཤག་ལ་འབུལ་ལམ་ཞུས་ཡོད་ལ། ངོ་བཤུས་བོད་མི་མང་སྤྱི་འཐུས་ལྷན་ཚོགས་སུའང་ཕུལ་ཡོད། འོན་ཀྱང་ང་ཚོར་རྒྱབ་སྐྱོར་དང་རོགས་རམ་གནང་མཁན་གྱི་རྒྱ་ཆེའི་མི་མང་རྣམ་པས་མཁྱེན་རྟོགས་སླད་བྱུང་སོང་གི་ལས་བསྡོམས་སྙིང་བསྡུས་ཤིག་ཞུ་རྒྱུར།

༡༽ ཁྱོན་བསྡོམས་རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ནས་ཞལ་འདེབས་བྱུང་བ་ཁྱོན་ཧིན་སྒོར་ ༤༨༣༣༩༡༢༠ ཐམ་པ་བྱུང་།

༢༽ སྐྱེ་རྒུ་མདོར་ས་ཡོམ་གོད་ཆགས་ཐེབས་པའི་མི་མང་ནང་ཞིབ་འཇུག་བྱས་ཏེ་མང་ཚོགས་ཁྲོད་དགོས་མཁོ་དང་མཐུན་པའི་ཅ་དངོས་དང་།དངུལ་སྨར་གྱི་རོགས་སྐྱོར་དངོས་སུ་སྤྲད་ཐུབ་པ་རྒྱ་སྒོར་༥༦༦༨༨༡༧ ཐམ་པ་བགོ་འགྲེམས་ཐུབ་པ་བྱུང་ཡོད།

༣༽ ཚོགས་མི་བཞི་བོད་དུ་བསྐྱོད་སྐབས་འགྲིམ་འགྲུལ་དང་། ཟས་གྲོན། བོད་ནང་འབྲེལ་མཐུད་པའི་ལས་ཡུན་ལོ་གསུམ་གྱི་རྒྱུན་གྲོན་ལ་རྒྱ་སྒོར་ ༣༡༨༠༡༡ ཐམ་པ་སོང་།

༤༽ བཙན་བྱོལ་ནང་རྒྱུན་གྲོན་དང་། བདུན་ཚིགས་དང་། ཞེ་དགུ། ལོ་མཆོད་བཅས་ཀྱི་རྗེས་མཇུག་གི་འགྲོ་གྲོན་ལ་ཧིན་སྒོར་ ༡༠༨༥༤༩༦ ཐམ་པ་སོང་།

༥༽ བོད་དུ་རོགས་དངུལ་བཏང་ཟིན་ཀྱང་ས་གནས་ནས་ལེན་མ་ནུས་པར་རྗེས་སུ་ཕྱིར་སློག་བྱུང་བ་ཁག་ཡུལ་ཤུལ་འདས་གསོན་གཉིས་ཀྱི་སྐྱབས་རྟེན་དང་བསྔོ་རྟེན་ཆེད་བཙན་བྱོལ་དུ་ཡོད་པའི་བླ་ཆེན་རྣམ་པ་དང་། ཆོས་བརྒྱུད་ཁག་གི་སྨོན་ལམ་ཐེབས་རྩ། དེ་བཞིན་ཕྱི་ལོ་ ༢༠༡༤ ལོར་ལ་དྭགས་དུས་འཁོར་དབང་ཆེན། ཕྱི་ལོ་ ༢༠༡༦ ལོའི་རྡོར་གདན་དུས་འཁོར་དབང་ཆེན་གྱི་ཞལ་འདེབས་བཅས་རྣམ་གྲངས་ཁག་བཅུ་ལ་ཁྱོན་བསྡོམས་ཧིན་སྒོར་ ༢༠༥༠༠༠༠ ཐམ་པ་བགོ་འགྲེམས་ཞུས་པ་ཡིན།

༦༽ ཐོག་མར་ཕྱི་ལོ་ ༢༠༡༠ ལོར་ཚོགས་ཆུང་གསར་འཛུགས་སྐབས་ཚོགས་མི་སྒེར་གྱི་དངུལ་ཁང་གི་ལག་དེབ་གཡར་པོ་ཞུས་ཏེ་རོགས་དངུལ་ཕོན་ཆེ་ཞིག་ཉར་འཇོག་བྱ་དགོས་བྱུང་བས་དངུལ་ཁང་གི་རྙོག་དྲ་ཞིག་ད་དུང་གཙང་སེལ་ཆགས་མེད་སྟབས། ད་ཆ་ཚོགས་ཆུང་གི་ལས་གཞི་སྒོ་བརྒྱབ་རྗེས་རྙོག་དྲ་བསྐྱར་ལང་གི་འགྲོ་གྲོན་མང་པོ་གཏོང་དགོས་བྱུང་ཚེ། ཚོགས་ཆུང་གི་ཚོགས་མི་སྒེར་སོ་སོའི་ངོས་ནས་བསྡུ་རུབ་ཡོང་ཐབས་མེད་པར་བརྟེན། དེ་དག་གཙང་བཟོའི་ཁ་མཆུ་དང་། དངུལ་ཆད་འགྲོ་གྲོན་གཏོང་དགོས་རིགས་བྱུང་ཚེ་དེའི་འགྲོ་གྲོན་ཆེད་ཧིན་སྒོར་ ༩༤༦༠༠༠ ཐམ་པ་ཞིག་ཟུར་བཅད་ཀྱིས་འབྲེལ་ཡོད་ཚོགས་མིའི་ལག་ཏུ་ཡོད། དངུལ་ཁང་གི་རྙོག་དྲའི་གདོང་ལེན་དང་། འགྲོ་གྲོན་ཇི་སོང་དེ་ནས་ནར་གཏོང་ཞུས་པའི་དངུལ་ལྷག་ཇི་ཡོད་ཕྱི་ལོ་ ༢༠༡༦ ཟླ་ ༣ ཚེས་ ༣༡ གོང་བཀའ་ཤག་ལ་འབུལ་རྒྱུ་དང་། ཚོགས་ཆུང་སྒོ་བརྒྱབ་རྗེས་དྲན་སྐུལ་དང་། བརྡ་དེད་བྱེད་མཁན་མེད་སྟབས་འབྲེལ་ཡོད་ལག་དེབ་ཀྱི་དོ་བདག་དགེ་འདུན་ཚེ་འཕེལ་གྱིས་རང་དོན་རང་གཅེས་ཐོག་བཀའ་ཤག་ལ་འབུལ་རྒྱུར་ཚོགས་ཆུང་དང་འབྲེལ་ཡོད་དབར་གན་རྒྱ་བཞག་སྟེ་ངོ་བཤུས་བཀའ་ཤག་ལ་ཕུལ་ཡོད།

༧༽ ས་ཡོམ་གོད་ཆགས་ཀྱི་སྔ་ཕྱི་བར་གསུམ་གྱི་འབྲེལ་ཡོད་གནས་ཚུལ་ཕྱོགས་བསྡུས་ཞུས་པའི་དཔེ་དེབ་པར་སྐྲུན་དང་། དེའི་འགྲོ་གྲོན་ཆེད་ཧིན་སྒོར་ ༡༠༥༥༩༦ ཐམ་པ་ལྷག་ཡོད།

ཕྱི་ལོ་ ༢༠༡༠ ཟླ་ ༤ ཚེས་ ༡༧ ཉིན་ཡུལ་ཤུལ་ས་ཡོམ་གདུང་སེལ་ཚོགས་ཆུང་བཙུགས་པ་ནས་ད་བར་གྱི་ལས་བསྡོམས་དང་། རྩིས་ཁྲ་ཡོངས་རྫོགས་ཕྱི་ལོ་ ༢༠༡༥ ཟླ་ ༣ ཚེས་ ༡༣ ཉིན་བཀའ་ཤག་ལ་རྩིས་འབུལ་ཞུས་ཏེ་ངོ་བཤུས་སྤྱི་འཐུས་རྒྱུན་ལས་སུའང་ཕུལ་ཡོད།

ཚོགས་ཆུང་གི་ཐོག་མཐའ་བར་གསུམ་གྱི་ལས་གཞི་དང་། གནད་དོན་ཡོད་དོ་ཅོག་བཀའ་ཤག་ལ་སྙན་གསེང་དང་ལམ་སྟོན་ཞུས་ཡོད་ལ། ཚོགས་ཆུང་གི་ངོས་ནས་རྩིས་ཤོག་དང་། ཡིག་ཆ། པར་རིགས་ཁག་བཅས་བཀའ་ཤག་ལ་ཕུལ་རྗེས་ཚོགས་ཆུང་འདི་ཉིད་སྒོ་བརྒྱབ་པ་ཡིན།

དཔྱད་གཞིའི་ཡིག་ཆ་དང་པར་རིགས་ཕུལ་བ་ཁག་གཤམ་གསལ།

༡༽ ངལ་སེལ་རོགས་སྐྱོར་ཞུས་པའི་པར་རིགས་གྲངས། ༢༤༡༣ ། ༢༽ རོགས་སྐྱོར་འཕྲོད་འབྱོར་བྱུང་བའི་བྱུང་འཛིན་དང་། རེ་སྐུལ་ཞུ་ཡིག་ཁག་གི་ཡིག་ཆ་ཤོག་ གྲངས་ ༡༩༦ ཐམ་པ།

༣༽ བོད་ནང་རོགས་སྐྱོར་ཞུ་ཡུལ་གྱི་གནོད་ཐེབས་མང་ཚོགས་ལ་བཅར་འདྲི་དང་། བསམ་ཚུལ་བསྡུ་ལེན་བྱས་པའི་བརྙན་ཐུང་གྲངས་ ༡༥༠ །

༤༽ རྒྱབ་སྐྱོར་ཚོགས་པའི་ཕྱི་ལོ་ ༢༠༡༣ ཟླ་ ༩ ནང་ཉིན་གྲངས་བརྒྱད་རིང་ཞིབ་འཇུག་བྱས་པའི་པར་རིགས་གྲངས་ ༩༡ དང་བརྙན་ཐུང་གྲངས་ ༡༠ །

༥༽ ཡུལ་ཤུལ་ས་ཡོམ་གདུང་སེལ་ཚོགས་ཆུང་གི་ལས་དོན་བྱེད་ཕྱོགས་ཀྱི་པར་རིགས་དང་། བརྙན་ཐུང་གྲངས་ ༩ །

 ༦༽ རྒྱ་བལ་འབྲུག་གསུམ་དང་། ཕྱི་རྒྱལ་ཡུལ་གྲུ་ཁག་ནས་རོགས་དངུལ་ཞལ་འདེབས་བྱུང་བའི་བྱུང་སོང་གི་རྩིས་ཁྲ། ལས་བསྡོམས་སྔ་ཕྱི་བཅས་བསྡོམས་ཤོག་གྲངས་ ༦༠ ཐམ་པ་བཅས་འབུལ་ལམ་ཞུས་ཏེ་ལས་མཐའ་ཡོངས་སུ་མཇུག་རྫོགས་པ་ཡིན།

 ༤།༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ནས། ཕྱི་ལོ་ ༢༠༡༥ ཟླ་ ༣ ཚེས་ ༡༦ ལ།