རྒྱ་ནག་གི་ཚོགས་ཆེན་གཉིས་མཇུག་བསྒྲིལ་བ་དང་བསྟུན་ཏེ་གཞུང་གི་ཞིབ་བཤེར་འོག་ཡོད་པའི་དམག་དོན་འགན་འཛིན་གཞོན་པ་ཟུར་བ་ཞི་ཚད་ཧོ་འདས་གྲོངས་སུ་ཕྱིན་པའི་གནས་ཚུལ་བསྒྲགས།
དེ་རིང་རྒྱ་ནག་གི་བརྒྱུད་ལམ་ཁག་ཏུ་གནས་ཚུལ་སྤེལ་པ་ལྟར་ན། རྒྱ་ནག་དབུས་དམག་དོན་ཨུ་ཡོན་འགན་འཛིན་གཞོན་པ་ཟུར་བ་དང་རྒྱ་ནག་དབུས་ཆབ་སྲིད་ལྷན་ཁང་གི་ཨུ་ཡོན་ཟུར་བ་ཞི་ཚད་ཧོ་ཡི་སྐྲན་ནད་ཇེ་སྡུག་ཏུ་སོང་སྟེ། སྨན་བཅོས་བྱེད་ཐབས་བྲལ་ཏེ་ཟླ་འདིའི་ཚེས་ ༡༥ ཉིན་སྨན་ཁང་ནས་འདས་གྲོངས་སུ་སོང་ཡོད་པའི་གནས་ཚུལ་སྤེལ་འདུག
དེ་རིང་རྒྱ་ནག་དྲ་བའི་སྟེང་ རྒྱ་ནག་དམག་དོན་ཞིབ་བཤེར་ལྷན་ཁང་གིས་ཞི་ཚད་ཧོ་ཡིས་ལྐོག་ཟ་རུལ་སུངས་བྱས་ཡོད་པའི་གཏུག་བཤེར་བྱས་པ་ལྟར། ༢༠༡༤ ལོའི་ཟླ་ ༡༠ ཚེས་ ༢༧ ཉིན་གྱོད་དོན་དོགས་གཞིའི་འོག་བཀག་ཉར་བྱས་ཏེ། ཁྲིམས་ལུགས་ལྟར་རྩད་ཞིབ་བྱས་སྐབས་ཞི་ཚད་ཧོ་ཡིས་ལྐོག་རྔན་ཟོས་ཡོད་པའི་བདེན་དབང་ར་འཕྲོད་བྱུང་ཡོད་ཀྱང་། ཁོང་ལ་ནད་གཞིའི་འོག་འདས་གྲོངས་སུ་ཕྱིན་ཡོད་སྟབས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་དོན་གཏུག་བཤེར་གྱི་ཁྲིམས་ལུགས་དོན་ཚན་ ༡༥ བའི་དགོངས་དོན་ལྟར། དམག་དོན་ཞིབ་བཤེར་ལྷན་ཁང་གིས་ཞི་ཚད་ཧོ་ལ་མུ་མཐུད་གཏུག་བཤེར་བྱ་རྒྱུ་མིན་པ་ཐག་གཅོད་བྱས་ཡོད་སྐོར་འཁོད་འདུག
རོའུ་ཊར་གསར་ཁང་གི་རྒྱ་ཡིག་སྡེ་ཚན་གྱིས་དབྱེ་ཞིབ་བྱས་པ་ལྟར་ན། རྒྱ་ནག་གི་ཚོགས་ཆེན་གཉིས་མཇུག་བསྒྲིལ་བ་དང་བསྟུན་ཏེ། རྒྱ་ནག་གི་བརྒྱུད་ལམ་ཁག་ཏུ་ཞི་ཚད་ཧོ་འདས་གྲོང་ཕྱིན་སོང་བའི་གནས་ཚུལ་སྤེལ་པ་དེ་ནི། ཐག་གཅོད་བྱེད་དཀའ་བའི་གྱོད་དོན་དེ་དག་ལ་རྒྱ་ནག་གཞུང་གཡོལ་ཐབས་ཤིག་ཡིན་པ་དང་། ཞི་ཚད་ཧོ་དང་ཀོ་པའོ་ཞོན་གཉིས་ནི་ཅང་ཙི་མིན་ཤོག་ཁག་གི་དམག་དོན་མི་སྣ་ཆགས་ཡོད་པ་མ་ཟད། སྔོན་ཆད་ཞི་ཚད་ཧོ་རྒྱ་ནག་དབུས་དམག་ཁུལ་ ༡༦ པའི་དམག་སྲིད་ཨུ་ཡོན་ཡིན་པ་དང་། ༢༠༠༢ ལོར་རྒྱ་ནག་དབུས་ཆབ་སྲིད་འགན་འཛིན་དུ་བསྐོས་ཡོད། ༢༠༠༤ ལོར་ཅང་ཙེ་མིན་གྱིས་དབང་ཆ་ཡོངས་རྫོགས་རྩིས་སྤྲོད་མི་བྱེད་ཀ་མེད་བྱུང་སྐབས། ཞི་ཚད་ཧོ་དང་ཀོ་པའོ་ཞོན་གཉིས་རྒྱ་ནག་དབུས་དམག་དོན་འགན་འཛིན་གཞོན་པར་བསྐོས་ཏེ་ ༢༠༡༣ ལོའི་ཟླ་ ༣ པའི་བར་འགན་ཁུར་ཡོད་ཅིང་། ཞི་ཚད་ཧོ་ཡིས་མཐོ་རིམ་དཔོན་རིགས་ཚོའི་ལས་གནས་བརྗེ་སྤོར་སོགས་ལ་སྟངས་འཛིན་བྱས་ཡོད་སྟབས་ཧུའུ་ཅིན་ཐོ་ལ་དམག་དོན་གྱི་དབང་ཆ་ཡུན་རིང་ཐོབ་མེད། ཅེས་སོགས་འཁོད་འདུག
ཏཱ་ཅི་ཡོན་དྲ་བའི་སྟེང་། རྒྱ་ནག་གི་ཆབ་སྲིད་དཔྱད་ཞིབ་པ་ཞཱ་ཞའོ་ཆང་ (Xia Xiaoqiang)གིས། ཚོགས་ཐེངས་གཉིས་པའི་སྐབས་རྨ་བྱ་དྲ་བར་དཔྱད་བརྗོད་སྤེལ་བའི་ནང་། རྒྱ་ནག་དབུས་དམག་སྤྱི་གཞོན་པ་ཞིག་གིས་ཧུའུ་ཅིན་ཐོ་རྒྱ་ནག་དབུས་དམག་དོན་འགན་འཛིན་ཡིན་སྐབས། ཞི་ཚད་ཧོ་ཡིས་ཧུའུ་ཅིན་ཐོ་ལ་སྟངས་འཛིན་བྱས་ཚུལ་བརྗོད་པ་དེ། ཀྲུང་ནན་ཧེ་ཡིས་སྲིད་འཛིན་ཟུར་བ་ཧུའུ་ཅིན་ཐོ་ཡི་དབང་ཚད་ཅང་ཙི་མིན་གྱིས་སྟངས་འཛིན་བྱས་པའི་གནས་ཚུལ་ཁྱབ་བསྒྲགས་བྱས་པ་ཐོག་མ་དེ་ཡིན་པ་དང་། ཧུའུ་ཅིན་ཐོ་རུལ་སུངས་ཤོག་ཁག་ལ་འབྲེལ་པ་མེད་པ་གསལ་བོ་བཟོས་ཏེ། སྟག་རྒན་འཛིན་བཟུང་གི་དམིགས་འབེན་ཧུའུ་ཅིན་ཐོ་ལ་ཁ་གཏད་མེད་པར་བསྟན་པ་དང་། དེ་དང་མཉམ་དུ་ཧུའུ་ཅིན་ཐོ་དང་གོ་གནས་འདྲ་མཉམ་ཡིན་པའི་སྟག་རྒན་ཞིག་འཛིན་བཟུང་བྱ་རྒྱུའི་ཉེན་བརྡ་སྤྲད་ཡོད་ཅིང་། སྟག་རྒན་དེ་ནི་ཅང་ཙི་མིན་རེད། ཅེས་སོགས་བརྗོད་འདུག
ཁོང་གིས་མུ་མཐུད་དུ། ཞི་ཚད་ཧོ་རྩ་རླུང་ཆོས་འཁོར་སྒོམ་སྒྲུབ་པ་ཚོའི་དབང་བོ་གསོན་ལེན་བྱས་པའི་ནག་ཉེས་དང་འབྲེལ་བ་གཏིང་ཟབ་མོ་ཡོད་པ་དང་། ཅང་ཙི་མིན་ཤོག་ཁག་གི་གསང་བ་མང་པོར་འབྲེལ་བ་ཡོད་སྟབས། ལོ་སྔོན་མར་ཞི་ཅིན་ཕིན་གྱིས་ཞི་ཚད་ཧོ་འཛིན་བཟུང་བྱ་རྒྱུ་ཐག་གཅོད་བྱས་ཏེ་གྱོད་དོན་མགྱོགས་མྱུང་ངང་བསྒྲུབས་པ་དང་། ད་ལོའི་ཚོགས་ཆེན་གཉིས་མཇུག་བསྒྲིལ་བ་དང་བསྟུན་ཏེ། ཞི་ཚད་ཧོ་འདས་གྲོང་ཕྱིན་པའི་སྐོར་ཁྱབ་བསྒྲགས་བྱས་པའི་ཡ་མཚན་འདི་དག་གིས། ཞི་ཅིན་ཕིན་གྱིས་ཅང་ཙི་མིན་མགྱོགས་མྱུར་ངང་འཛིན་བཟུང་བྱ་རྒྱུའི་འགུལ་སྐྱོད་ཅིག་རེད། ཅེས་བརྗོད་འདུག
