ཁ་སང་ཏུ་ཎེ་ཤཱི་ཡཱའི་འགྲེམས་སྟོན་ཁང་ཞིག་ཏུ་དྲག་སྤྱོད་པ་གཉིས་འཛུལ་ཏེ་ཡུལ་སྐོར་སྤྲོ་འཆམ་པ་ ༡༩ བསད་ཡོད་འདུག
ཁ་སང་དཀྱིལ་ཤར་ཡུལ་གྲུ་ཏུ་ཎེ་ཤཱི་ཡཱའི་རྒྱལ་སར་རྟེན་གཞི་བྱས་པའི་རྒྱལ་ཡོངས་བྷར་ཌོ་འགྲེམས་སྟོན་ཁང་ (Bardo Museum) ཞེས་པར་དྲག་སྤྱོད་པ་གཉིས་འཛུལ་ནས་གང་བྱུང་མེ་མདའ་བརྒྱབ་ཏེ། མི་ ༡༩ བསད་ཡོད་པ་དང་གཞན་མི་ ༤༠ ལྷག་ལ་རྨས་སྐྱོན་བཏང་ཡོད་སྟབས། ཉེན་རྟོག་པས་དྲག་སྤྱོད་པ་དང་འཐབ་མོ་བྱས་ནས་ཁོ་གཉིས་བསད་ཡོད་པ་དང་། ད་ཆར་འཇིགས་སྐུལ་བ་དེ་གཉིས་ཀྱི་ངན་གྲོགས་སུ་ཡིན་མིན་འཚོལ་ཞིབ་བྱེད་བཞིན་ཡོད་འདུག
ཏུ་ཎེ་ཤཱི་ཡཱའི་སྲིད་འཛིན་བྷེ་ཇེ་ (Beji Caid Essebsi) ཡིས་བྷི་བྷི་སི་གསར་ལམ་ཐོག “ང་ཚོར་འཇིགས་སྐུལ་བ་ཉུང་ཤས་ཤིག་གིས་འཇིགས་སྣང་སྐུལ་བཞིན་ཡོད་སྟབས། ང་ཚོས་སྙིང་རྗེ་སྤུ་ཙམ་མེད་པར་གདོང་ལེན་ཁ་གཏད་གཅོག་རྒྱུ་ཡིན། དྲག་སྤྱོད་པས་གཏོར་རྒོལ་ཇི་ཙམ་བཏང་ཡང་རྒྱལ་ཡོངས་ནང་དམངས་གཙོར་རྒྱལ་ཁ་ཐོབ་ནས་སྔར་བཞིན་འཕེལ་རྒྱས་འགྲོ་རྒྱུ་རེད”ཅེས་དང་། སྲིད་བློན་ཧཱ་བྷེབ་ (Habib Essid) ཀྱིས། “ཐེངས་འདིར་དྲག་སྤྱོད་པས་ཏུ་ཎེ་ཤཱི་ཡཱའི་མི་ ༢ དང་ཉི་ཧོང་གི་མི་ ༥། ཨི་ཌ་ལིའི་མི་ ༤། ཀཱོ་ལོམ་བྷེ་ཡའི་མི་ ༢། སི་པན་གྱི་མི་ ༢། ཨོ་སོ་ཌོ་ལི་ཡ་དང་ཕ་རན་སི། པོ་ལན་ཌི་བཅས་ཀྱི་མི་རེ་དང་གཞན་ཞིག་བཅས་བསད་ཡོད། ང་ཚོས་དེ་ནི་ཛ་དྲག་གནས་སྟངས་ཤིག་ཡིན་པར་ངོས་འཛིན་བྱེད་བཞིན་ཡོད་པ་མ་ཟད། ལོ་རྒྱུས་ཐོག་དཀྱོག་མཚམས་ཀྱི་འཕོ་འགྱུར་གལ་ཆེ་ཤོས་ཤིག་ཀྱང་ཆགས་ཡོད”ཅེས་བརྗོད་འདུག
དེ་རིང་རྒྱ་གར་གྱི་ཧིན་རྡུ་སི་ཐན་དུས་བབ་དང་རོའུ་ཌར་གསར་ལམ་ཐོག་དོན་རྐྱེན་དེའི་བྱུང་རིམ་སྐོར་འཁོད་དོན། ༢༠༡༡ ལོར་དཀྱིལ་ཤར་ཡུལ་གྲུ་ནང་དཔྱིད་དུས་གསར་བརྗེ་ཞེས་པ་ལངས་ཏེ། མང་ཚོགས་ས་ཡ་མང་པོས་དབང་ཆ་སྒེར་སྤྱོད་བྱེད་མཁན་གྱི་དཔོན་ངན་དག་གནས་དབྱུང་བཏང་སྟེ། དམངས་གཙོའི་ལམ་ལུགས་ཐོག་བསྐྱོད་དགོས་པའི་ངོ་རྒོལ་རིམ་པ་བྱས་པ་ལྟར། ཏུ་ཎེ་ཤཱི་ཡཱའི་མང་ཚོགས་འབུམ་ ༢༠ ལྷག་གིས་དབང་ཆ་སྒེར་སྤྱོད་བྱེད་མཁན་སྲིད་འཛིན་བྷན་ཨཱ་ལི་ (Zine El Abidine Ben Ali) ལས་གནས་ནས་གནས་དབྱུང་གཏོང་དགོས་པའི་ངོ་རྒོལ་བྱས་རྗེས། བྷན་ཨཱ་ལི་སོ་ཌི་ཨེ་རབ་བྷེ་ཡ་ནང་བྲོས་བྱོལ་བྱེད་དགོས་ཐུག་ཡོད་སྟབས། ཨལ་ཁཱེ་ཌ་དྲག་སྤྱོད་ཤོག་ཁག་གིས་ཉེན་རྟོག་པ་དང་ཡུལ་དམག་ ༡༢ ལྷག་བསད་ཡོད་པ་མ་ཟད། ༢༠༡༢ ལོར་སླར་ཡང་ཨལ་ཁཱེ་ཌ་དྲག་སྤྱོད་པས་ཏུ་ཎེ་ཤཱི་ཡཱའི་ནང་འཇབ་རྒོལ་བྱས་ནས་ཡུལ་མི་ཁག་ཅིག་བསད་ཡོད་སྟབས། ཏུ་ཎེ་ཤཱི་ཡཱའི་མཁའ་དམག་གིས་མཁའ་རྒོལ་བྱས་ཀྱང་རྩ་མེད་གཏོང་ཐུབ་མེད་སྟབས། དྲག་སྤྱོད་པ་ ༣༠༠༠ ལྷག་ཨི་རག་དང་སི་རེ་ཡཱ། ལེབ་ཡཱ་བཅས་ནང་ཉེན་ཡོལ་ཕྱིན་ནས་ཨི་རག་དང་སི་རེ་ཡའི་མཉམ་འབྲེལ་དྲག་སྤྱོད་ཤོག་ཁག་ (ISI) ཞེས་པར་འཛུལ་ཏེ། དྲག་འཛིན་བྱ་སྤྱོད་སྤེལ་བཞིན་ཡོད་པ་མ་ཟད། དྲག་སྤྱོད་པ་ ༥༠༠ ལྷག་ཏུ་ཎཱེ་ཤཱི་ཡཱའི་ནང་ཕྱིར་ལོག་བྱས་ཡོད་སྟབས། ད་ཐེངས་དྲག་འཛིན་བྱ་སྤྱོད་འདི་བྱུང་བ་ཞིག་ཡིན་སྐོར་བཀོད་འདུག
༢༠༠༢ ལོར་ཨལ་ཁཱེ་ཌ་དྲག་སྤྱོད་ཤོག་ཁག་གིས་ཏུ་ཎེ་ཤཱི་ཡཱའི་ཇར་བྷ་ (Djerba) གླིང་ཕྲན་ནང་འབར་རྫས་གས་གཏོར་བྱས་ཏེ། འཇར་མཱ་ཎིའི་ཡུལ་སྐོར་སྤྲོ་འཆམ་པ་ ༡༤ དང་ཕ་རན་སིའི་མི་ ༢། ཏུ་ཎེ་ཤཱི་ཡཱའི་ཡུལ་མི་ ༥ དང་། ཟླ་འདིའི་ཚེས་ ༡༨ ཉིན་བྷར་ཌོ་འགྲེམས་སྟོན་ཁང་ལ་འཇབ་རྒོལ་བྱས་ནས་ཡུལ་སྐོར་སྤྲོ་འཆམ་པ་ ༡༩ བསད་ཡོད་སྟབས། ཁ་སང་གནད་དོན་དེའི་ཐོག་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་གྲོས་ཆོད་ཅིག་བཞག་པ་དང་འབྲེལ་སྤྱི་ཁྱབ་དྲུང་ཆེ་བྷན་ཁཱེ་མོན་མཆོག་གི་མགྲིན་ཚབ་པས་དྲག་སྤྱོད་པས་མི་གསོད་ཁྲག་སྦྱོར་བྱས་པ་དེར་སྐྱོན་འཛུགས་དང་འབྲེལ། ནང་མི་ཉེ་འབྲེལ་ཚོར་གདུང་སེམས་མཉམ་སྐྱེད་ཞུ་རྒྱུ་ཡིན་ཞེས་དང་། ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་ཡིས་ཨ་རིས་ཏུ་ཎེ་ཤཱི་ཡཱའི་གཞུང་གིས་རྒྱལ་ཁབ་བདེ་འཇགས་དང་དམངས་གཙོའི་ལམ་ལུགས་ཐོག་ཤར་སྐྱོད་བྱ་རྒྱུར་རྒྱབ་སྐྱོར་བྱེད་བཞིན་ཡོད་ཅེས་བརྗོད་འདུག ཡུ་རོབ་མཐུན་ཚོགས་ཕྱི་སྲིད་ལྷན་ཚོགས་ཀྱི་ཚོགས་གཙོ་ཕ་ཌེ་རེ་ཁཱ་ (Federica Mogherini) ཡིས། ཡུ་རོབ་མཐུན་ཚོགས་ཀྱིས་ཏུ་ཎེ་ཤཱི་ཡཱའི་གཞུང་གིས་འཇིགས་སྐུལ་རིང་ལུགས་པར་ཁ་ གཏད་གཅོག་རྒྱུར་རྒྱབ་སྐྱོར་ཞུ་རྒྱུ་ཡིན་ཞེས་བརྗོད་འདུག
