དེ་རིང་སྔ་དྲོར་སྤྱི་འཐུས་གྲོས་ཚོགས་ནང་། བོད་ནས་རྒྱ་གར་ལ་སྐྱབས་བཅོལ་དུ་ཡོང་མཁན་ཇེ་ཉུང་དུ་ཕྱིན་པ་དང་། རྒྱ་གར་ནས་ཕྱིར་བོད་ནང་ལོག་མཁན་དང་ཕྱི་རྒྱལ་ཁག་ཏུ་སྐྱོད་མཁན་ཇེ་མང་དུ་འགྲོ་བཞིན་པའི་ཐད། སྤྱི་འཐུས་ཁག་ཅིག་དང་སྲིད་སྐྱོང་མཆོག་གི་བར་དྲི་བ་དྲས་ལེན་གནང་སོང་།
དེ་རིང་སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་བའི་ལས་ཉིན་བཞི་པའི་སྔ་དྲོར། སྐར་སྟགས་ཅན་གྱི་དྲི་བ་དྲིས་ལན་གནང་སྐབས། སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་ལ། དེང་སྐབས་རྒྱ་གར་ནང་གི་བོད་མི་མང་པོ་བོད་ནང་ཕར་སྐྱོད་པ་དང་ཚུར་ལོག་པ། རྒྱ་གར་ནས་ཕྱི་རྒྱལ་ཡུལ་གྲུ་ཁག་དང་། དེ་ནས་བོད་ནང་དུ་ཕར་སྐྱོད་ཚུར་ལོག་བྱེད་པའི་གནས་ཚུལ་སྔོན་མ་ལས་མང་དུ་འགྲོ་བཞིན་པའི་གནད་དོན་ཐད་བློ་ཚབ་འདུག་ན། ད་ལྟའི་ཆར་འཛིན་སྐྱོང་བཀའ་ཤག་གིས་གོང་གི་གནད་དོན་ཐད་རྟོག་ཞིབ་གནང་གི་ཡོད་མེད་དང་། བཀའ་ཤག་གིས་གནད་དོན་དེའི་ཐད་སྲིད་ཇུས་དང་ཆབ་སྲིད་ཀྱི་གནད་འགག་ཅིག་ཏུ་གཟིགས་ཀྱི་ཡོད་མེད་དྲིས་པའི་ལན་དུ་སྲིད་སྐྱོང་མཆོག་གིས། རྒྱ་གར་དང་ཕྱི་རྒྱལ་ཡུལ་གྲུ་ཁག་ནས་བོད་དུ་ཕར་འགྲོ་ཚུར་ལོག་བྱེད་མཁན་བོད་མི་ཇེ་མང་དུ་འགྲོ་བཞིན་པའི་གནད་དོན་ཐོག བཀའ་ཤག་ནས་འབྲེལ་ཡོད་ལས་ཁུངས་བརྒྱུད་རྟོག་ཞིབ་གང་ཐུབ་གནང་གི་ཡོད། བཀའ་ཤག་གིས་གནད་དོན་དེ་གནད་འགག་ཅན་ཞིག་ཡིན་པར་གཟིགས་ཀྱི་ཡོད་ཅིང་། དེར་ལམ་སྟོན་གནང་དང་གནང་མུས་ཡིན་ཡང་། ལམ་སྟོན་ལྟར་བྱུང་དང་མ་བྱུང་ཅི་རིགས་ཡོང་གི་འདུག ཅེས་གསུངས་སོང་།
སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་འཕྲོས་དོན་དྲི་བར། བཀའ་ཤག་གིས་འབྲེལ་ཡོད་ལས་ཁུངས་བརྒྱུད་དེ་ལམ་སྟོན་གནང་གི་ཡོད་ཀྱང་གྲུབ་འབྲས་ཐོན་མ་ཐོན་ཅི་རིགས་ཡོང་གི་ཡོད་པའི་རྐྱེན་རྩ་གང་ལ་ཐུག་ཡོད་དྲིས་པའི་ལན་དུ་སྲིད་སྐྱོང་མཆོག་གིས། བཙན་བྱོལ་དུ་ཡོད་པའི་བོད་མི་མང་པོའི་ནང་མི་སྤུན་མཆེད་བོད་ནང་ཡོད་པ་ལྟར། གཉེན་འཕྲད་དུ་འགྲོ་མཁན་མང་པོ་ཡོད་པ་དེ་དངོས་ཡོད་གནས་ཚུལ་ཆགས་ཡོད་པ་རེད། ཡིན་ནའང་། གཉེན་འཕྲད་དུ་འགྲོ་ན་ཇི་ལྟར་འགྲོ་དགོས་མིན་ཐད་ས་གནས་མགོ་འཛིན་དང་ལྷན་ཁང་ཁག་བརྒྱུད་དེ་ལམ་སྟོན་བྱེད་ཀྱི་ཡོད་སྟབས་གཙོ་བོ་དོ་དག་སོ་སོར་རག་ལས་ཡོད། གཉེན་འཕྲད་ཁ་ལ་འཁྱེར་དེ་བོད་ལ་འགྲོ་རྒྱུ་མང་དྲགས་ཏེ་སྒེར་ལ་དཀའ་ངལ་འཕྲད་པ་ཡིན་ན། བོད་མིའི་སྒྲིག་འཛུགས་ཐོག་ནས་བྱེད་ཐབས་གང་ཡང་མེད་པ་ཚང་མའི་སེམས་ལ་འཇོག་དགོས་པ་རེད། ཅེས་གསུངས་སོང་།
སྤྱི་འཐུས་ག་ཟི་དགེ་བཤེས་ཚེ་རིང་པོ་ལགས་ཀྱིས། དྷ་རམ་ས་ལར་སྡོད་མཁན་ང་ཚོའི་བོད་མིའི་སྒྲིག་འཛུགས་དང་བླ་མ་རྣམ་པའི་ཆེ་མཐོང་དང་གཟུགས་ཕྱོགས་ཡག་པོ་ཡོད་ས་རེད་བསམ་པ་དེ་འདྲ་ཞིག་བོད་ནང་ལ་ཕྱིན་ཞིང་། རྒྱ་ནག་གི་འབྲེལ་ཡོད་ལས་ཁུངས་ཀྱིས་དགའ་བསུ་ཞུས། ཕར་ནས་ས་ཆ་དང་ཁང་པ་བརྒྱབ། དེ་ནས་ཁོ་ཕྱིར་དྷ་རམ་ས་ལར་ཡོང་ཡོད་པ་ཞིག་ཡོད་ས་རེད། དེ་ཚོར་རྣམ་འགྱུར་ག་འདྲ་འཛིན་དགོས་ཀྱི་ཡོད་མེད་སྐོར་དྲིས་པའི་ལན་དུ་སྲིད་སྐྱོང་མཆོག་གིས། གཉེན་འཕྲད་མ་ཡིན་པར་བོད་ནང་ཕེབས་རྒྱུ་མང་དྲགས་པ་དེ་འདྲ་ཡིན་ན་བོད་མིའི་སྒྲིག་འཛུགས་ངོས་ནས་དོ་སྣང་བྱེད་དགོས་པ་ཞིག་རེད་ལ་། དེ་བཞིན་རྒྱ་གར་འབྲེལ་ཡོད་ལས་ཁུངས་ཀྱིས་ཀྱང་དོ་སྣང་གནང་གི་ཡོད་པར་ངོས་འཛིན་གནང་རོགས། ཞེས་གསུངས་སོང་།
སྤྱི་འཐུས་བསྟན་པ་ཡར་འཕེལ་ལགས་ཀྱིས་ཕྲོས་དོན་དྲི་བར། བོད་ནས་ཡོང་མཁན་ཇེ་ཉུང་དང་ཕར་བོད་ནང་ལོག་མཁན་ཇེ་མང་ཡིན་པ་གསལ་བོ་རེད། དེར་བཀའ་ཤག་གིས་ ༢༠༠༨ ནས་བཟུང་ལམ་ཁ་དམ་དྲག་བྱས་པ་རེད་གསུང་གི་ཡོད་པ་རེད། དེ་གཅིག་པུར་ངོས་འཛིན་གནང་གི་ཡོད་དམ། བཙན་བྱོལ་སྒྲིག་འཛུགས་ཀྱི་ངོས་ནས་མཐུན་རྐྱེན་ཚད་དང་ལྡན་པ་ཞིག་བསྐྲུན་མ་ཐུབ་པ་ཞིག་ལ་ངོས་འཛིན་གནང་གི་ཡོད། དེ་བཞིན། བོད་ནས་རྒྱ་གར་ནང་ཡོང་མཁན་ཚོའང་བཙན་བྱོལ་ནང་འདུག་མི་ཐུབ་པའི་རྒྱུ་རྐྱེན་གང་ལ་ཐུག་ཡོད་པ་དང་། དེའི་ཐོག་བཀའ་ཤག་ལ་དགོངས་འཆར་ཅི་ཡོད་དྲིས་པའི་ལན་དུ་སྲིད་སྐྱོང་མཆོག་གིས། བོད་ནས་ཡོང་བ་ཚོ་རྒྱ་ནག་གཞུང་གི་བཙན་བཟུང་འོག བོད་ནང་ཆབ་སྲིད་སོགས་གང་ཅིའི་ཐད་དམ་དྲག་ཆེན་པོ་ཡོད་པར་བརྟེན་རྒྱ་གར་ལ་བཙན་བྱོལ་དུ་ཡོང་བ་ཞིག་ལ་ངོས་འཛིན་བྱེད་ཀྱིན་ཡོད། འདིར་འབྱོར་དུས་མཐུན་རྐྱེན་སྦྱོར་རྒྱུ་བོད་མིའི་སྒྲིག་འཛུགས་ལ་འགན་ཡོད་སྟབས། གཞན་དབང་སྟབས་བསྟུན་ཡིན་ནའང་བོད་མིའི་སྒྲིག་འཛུགས་ངོས་ནས་གང་ཐུབ་ཅི་ཐུབ་གནང་གི་ཡོད། དཔེར་ན། ཤེས་རབ་དགའ་ཚལ་སློབ་གླིང་ལ་ང་རང་ཐེངས་གཉིས་གསུམ་ལ་ཆེད་དུ་བཅར་བ་ཡིན་ལ། ཕྱི་ཟླ་ ༤ པའི་ནང་བསྐྱར་དུ་འགྲོ་རྒྱུ་ཡིན། ཁོ་ཚོར་ག་རེ་ཞུ་ཡི་ཡོད་ཟེར་ན། ཁྱེད་རང་ཚོ་འདིར་བསླེབས་པའི་ཞོར་ལ་སློབ་གྲྭ་ནས་འཐོན་ཡོང་སྐབས་ལག་འཁྱེར་ཞིག་ཡོད་པ་བྱོས། ཡང་མིན་ན་ལག་ཤེས་ཤིག་ཡོད་པ་བྱོས། འདི་ནས་མར་བསླེབ་ཡོང་དུས་འཚོ་བ་སྐྱེལ་རྒྱུ་ཡོད་པ་ཞིག་དང་། ཡང་ན་མུ་མཐུད་སློབ་སྦྱོང་བྱ་རྒྱུ་ཡོད་པ་ཞིག་བྱེད་དགོས་པ་རེད་ཅེས་ཞུ་བཞིན་ཡོད། གསོག་སྒར་སློབ་གྲྭ་དེ་སྔ་ལོ་གསུམ་རྨང་གཞིའི་དབྱིན་ཡིག་དང་བོད་ཡིག ཨང་རྩིས་བསླབས་ཀྱི་ཡོད་ཀྱང་། རྗེས་སུ་ལོ་ ༨ བར་སྡོད་ཆོག་པ་བཟོས་ཡོད། ལྷ་རིས་ཡིན་ན་ལྷ་རིས་ཆ་ཚང་གི་ལག་ཤེས་ལེན་ཐུབ་པ་དང་། འཛིན་གྲྭ་ལྔ་པ་བརྒྱད་པ་དང་བཅུ་པར་ཡིག་ཚད་བཏང་ནས་བཅུ་གཉིས། དེ་ནས་མཐོ་སློབ་ལ་ཕྱིན་ལ་འགྲོ་ན་སློབ་ཡོན་སྤྲོད་རྒྱུ་ཡིན། དཔེར་ན། ད་ལོར་འཛིན་གྲྭ་བཅུ་གཉིས་ལ་ཡིག་ཚད་གཏོང་གི་ཡིན་ཟེར་མཁན་སློབ་ཕྲུག་ ༧ ཡོད། འཛིན་གྲྭ་ ༡༠ པར་ཡིག་ཚད་གཏོང་གི་ཡིན་ཟེར་མཁན་ ༡༩ ཡོད། སློབ་ཕྲུག་བདུན་དེ་མཐོ་སློབ་ཏུ་ཚུད་པ་ཡིན་ན། མཐོ་སློབ་ཀྱི་སློབ་ཡོན་ ༥ ཡོད་ཅེས་ཁོ་རང་ཚོར་ལབ་ཡོད།
དེ་བཞིན་ཆབ་སྲིད་བཙོན་ཟུར་ཚོས་ཁོང་ཚོར་དཀའ་ངལ་ཡོད་སྐོར་གསུངས་པ་ལྟར། དེ་སྔ་ཡིན་ན་མི་རེར་སྟོང་ཕྲག་གཉིས་གསུམ་རེ་གནང་གི་ཡོད་པ་དེ་སྤར་ནས་ད་ལྟ་ཆབ་སྲིད་བཙོན་ཟུར་ཡོངས་རྫོགས་ལ་སྟོང་ཕྲག་ ༦ རེ་སྤྲོད་ཀྱི་ཡོད་པ་མ་ཟད། ཨོ་སི་ཊོ་ལི་ཡའི་དོན་གཅོད་བརྒྱུད་དེ་ཐབས་ཤེས་བྱས་ནས་དེ་སྔ་ཐོ་ཡོད་པའི་ཆབ་སྲིད་བཙོན་ཟུར་ཡོངས་རྫོགས་གཏོང་ཐུབ་པ་བྱེད་བཞིན་ཡོད། དེ་བཞིན་དགེ་འདུན་པ་ཡིན་ནའང་། ཆོས་རིག་ལས་ཁུངས་བརྒྱུད་དེ་ཁོ་རང་ཚོ་དགོན་སྡེ་ཁག་གང་དུ་ཕེབས་པ་ཡིན་ནའང་། སློབ་ཡོན་དུ་དངུལ་མི་ཉུང་བ་ཞིག་སྤྲོད་ཀྱི་ཡོད་པ་རེད། བོད་ནས་ཡོང་མཁན་ཚོས་ཁང་པ་དང་ས་ཆ་མི་འདུག་ཅེས་བཀའ་ཤག་ལ་ཞུ་གཏུག་བྱས་ཡོད་པ་རེད་ལ། དེ་དངོས་ཡོད་གནས་ཚུལ་ཡིན་སྟབས། ཉེ་བའི་ཆར་ནང་སྲིད་ལས་ཁུངས་ནས་སྤིར་ལ་དམིགས་བསལ་བྱས་ཏེ་ཧིན་སྒོར་འབུམ་ ༡༢༠ ཡིས་ས་ཆ་ཉོས་ཡོད་པ་དང་། དེའི་ཐོག་ལ་དཔལ་འབྱོར་ཐབས་ཤེས་བྱེད་བཞིན་ཡོད། དེ་བཞིན། སྤེལ་ཀོབ་གཞིས་ཆགས་ནང་དུའང་ཁང་པ་རྒྱག་མ་ཐུབ་ཀྱང་ས་ཆ་ཞིག་རག་ཐབས་ལ་འབད་བརྩོན་བྱེད་བཞིན་ཡོད། ཅེས་གསུངས་སོང་།
སྲིད་སྐྱོང་མཆོག་གིས་མུ་མཐུད་དུ། ད་ལོ་འཕྲོད་བསྟེན་ལས་ཁུངས་ལ་ཨ་སྒོར་ས་ཡ་ ༣ དང་འབུམ་ ༢ རག་ཡོད་པ་དང་། ད་ལན་དེའི་ནང་ཨ་རིའི་གཞུང་ནས་དམིགས་བསལ་ཞིག་གནང་བ་ནི་ནང་མི་ ༦༠༠༠ བཅས་བསྡོམས་པའི་མི་ཁྲི་ ༣ ལ་སྨན་བཅོས་ལྟ་སྐྱོང་ལས་གཞིའི་ནང་འཛུལ་ཞུགས་བྱེད་མཁན་ཡིན་ན། དེ་སྔོན་ནང་མི་ ༦ ཅན་ཞིག་གིས་སྒོར་ ༣༥༦༠ ཕུལ་དགོས་ཀྱི་ཡོད་ཀྱང་། ད་ལྟ་སྒོར་ ༢༥༠༠ ཆག་ཡང་བཏང་ཏེ་ནང་མི་ ༦ ཅན་ཞིག་གིས་སྒོར་ ༡༠༦༠ སྤྲད་ནས་སྨན་བཅོས་ལྟ་སྐྱོང་ནང་འཛུལ་ཐུབ་ཀྱི་ཡོད་ལ། ལས་གཞི་དེའི་ནང་དུའང་བོད་ནས་ཡོང་བ་དང་དམིགས་བསལ་གྱིས་དགེ་འདུན་པ་ཚོར་དམིགས་བསལ་ཆག་ཡང་འདུག་མིན་འཕྲོད་བསྟེན་ལས་ཁུངས་ཀྱི་ངོས་ནས་ལས་གཞི་སྤེལ་བཞིན་ཡོད་པ་རེད། དེ་བཞིན་དུ་བདེ་སྲུང་ལས་ཁུངས་ངོས་ནས་བོད་ནས་གནས་སྐོར་དུ་ཡོང་བའི་བོད་མི་ ༨༠༠ ཙམ་ལ་སྐྱབས་བཅོལ་ལག་དེབ་(RC)མེད་པའི་དཀའ་ངལ་འཕྲད་ཡོད་པ་ལྟར། ལྡི་ལི་དོན་གཅོད་བརྒྱུད་དེ་ང་ཚོ་སྒྲིག་འཛུགས་ནས་འགན་འཁུར་ཏེ་ཉེས་ཆད་སྒོར་མོ་སྤྲད་ནས་སྐྱབས་བཅོལ་ལག་དེབ་ཡོད་པ་བཟོས་ཡོད། དེ་དང་དེ་བཞིན་གྱིས་ལྷན་ཁང་རེ་རེའི་ཐོག་ནས་གང་ཐུབ་ཅི་ཐུབ་བྱེད་བཞིན་ཡོད། ཡིན་ནའང་། རེ་གཉིས་ཤིག་དངོས་གནས་འདོད་པ་མ་ཁེངས་བར་བོད་ནང་ཆབ་སྲིད་ཀྱི་གནས་སྟངས་རང་སར་གནས་ཡོད་ཀྱང་བོད་ལ་ལོག་འགྲོ་བཞིན་ཡོད་ན་ང་ཚོར་བློ་ཕམ་ཡོད། ང་ཚོའི་ངོས་ནས་མཐུན་རྐྱེན་བསྐྲུན་མ་ཐུབ་པར་ཕྱིན་པ་ཡིན་ན་ང་ཚོའི་འཐུས་ཤོར་རེད། སྤྱིར་བཏང་གཞན་དབང་སྟབས་བསྟུན་གྱི་སྒྲིག་འཛུགས་ཤིག་ཡིན་དུས། ང་ཚོའི་ངོས་ནས་ཚང་མ་གནང་ཐུབ་ཀྱི་འདུག་ཅེས་རྩ་བ་ཉིད་ནས་ཞུ་ཡི་མེད། འཐུས་ཤོར་དང་མ་སྙོབ་པ་མང་པོ་ཡོང་གི་འདུག དེ་དག་ལ་དགོངས་སེལ་ཞུ་རྒྱུ་ལས་གཞན་གང་ཡང་མི་འདུག ཅེས་གསུངས་སོང་།
གསར་འགོད་པ། པདྨ་མཚོ།
གློག་འཕྲིན། པར་འདེབས། ཕི་ཌི་ཨེཧཕ།
གསར་འབྱོར་བ་ཚོ་གང་ལ་འགྲོ་དགོས་ཀྱི་རེད། ཁྱེད་རང་གི་ཁ་བྱང་འདི་མཐོང་སྐབས་སྣེ་ལེན་ཁང་ལ་འགྲོ་དགོས་ཀྱི་རེད་བསྙམ་སྲིད་མོད། འདི་ནི་འདི་འདྲའི་ལས་སླ་བོ་ཞིག་གཏན་ནས་མ་རེད།
ང་༢༠༠༢་ལོར་བོད་ནས་གསར་དུ་འབྱོར་ནས་བཙན་བྱོལ་གཞུང་གི་སྣེ་ལེན་རོགས་སྐྱོར་བཀྲིན་འོག་སློབ་སྦྱོང་གི་གོ་སྐབས་དང་སྟོ་ཟས་ཀྱི་མཐུན་རྐྱེན་སྤྲད་བྱུང་བས་ངས་འདི་ནི་གསར་འབྱོར་བ་འགྲོ་ས་དང་འདུག་ས་རེད་བསྙམ། འོན་ཀྱང་ང་གསོག་སྒར་སློབ་གྲྭ་འམ་ཤེས་རབ་དགའ་ཚལ་སློབ་གླིང་ནས་མཐར་ཕྱིར་རྗེས་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་དུ་ལས་ཀ་ཞིག་ལོན་ནས་༢༠༠༧་ལོ་མཇུག་ལྷོ་ཕྱོགས་བྷེལ་ཀོབ་དུ་ཕྱིན། རང་ཉིད་འདུག་སའི་ཁང་པ་ཞིག་བཙལ་ནས་བསྡད་སྐབས་ངས་ད་གཟོད་གསར་འབྱོར་ཚོ་འགྲོ་ས་གང་ཡིན་དང་འདུག་ས་གང་ཡིན་འཚོལ་དགོས་བྱུང་། གནད་དོན་འདི་འདྲ་ཞིག་རེད། ང་དང་པོ་འདིར་སླེབ་དུས་རྣམ་གྲོལ་གླིང་ནས་ཟླ་ཕྱེད་ཙམ་བསྡད་ཀྱང་ཁ་བྱང་མེད་པས་ལས་དོན་མང་པོར་དཀའ་ངལ་འཕྲད། དེ་ནས་སེར་སྨད་དང་ལུགས་བསམ་གཞིས་གྲོང་དང་པོ་ནས་ཁང་གླ་སྤྲད་ནས་ཟླ་གཅིག་རེའི་རིང་བསྡད་ཀྱང་དེ་མཚུངས་སུ་གྱུར། དེ་ལས་ལུགས་བསམ་མཉམ་སྤྲེལ་ལས་ཤག་ཞིག་གཡར་ནས་བསྡད་པས་ཅུང་ཟད་སྟབས་བདེ་ཞིག་བྱུང་ཡང་སྤྲག་ཁང་ནང་ཅ་དངོས་གལ་ཆེན་རེ་འབྱོར་ཡང་མཉམ་སྤྲེལ་དང་གཞིས་ལས་ཁང་གཉིས་ནས་རྒྱབ་གཉེར་མེད་ན་མི་ངོས་འཕྲོད་ཀྱང་ལེན་ཐུབ་ཀྱི་མི་འདུག རྒྱུ་མཚན་གསར་འབྱོར་བ་ལ་ཁ་བྱང་བརྟན་པོ་མེད་པས་རེད་འདུག དེ་ནས་ལས་ཤག་ནང་ལས་བྱེད་པ་འདུག་དགོས་བྱུང་སྟབས་ཁང་པ་མི་སྤོ་ཐབས་མེད་རེད། ཡང་བསྐྱར་ལུགས་བསམ་མཉམ་སྤྲེལ་ཀྱི་ཁུངས་རྟོགས་ཁང་པ་ཞིག་དང་རིམ་བཞིན་གཞིས་ཆགས་གསར་བའི་གྲོང་སྡེ་དྲུག་པར་གྲོགས་པོ་ཞིག་བརྒྱུད་ཁང་པ་ཞིག་དུས་ངེས་མེད་གཡར་བོ་བྱས་ནས་བསྡད་པ་ཡིན། གྲོང་སྡེའི་སྤྱི་མི་དང་གཞིས་ལས་ཁང་དུ་ང་དེར་བསྡད་ཡོད་པའི་སྙན་གསན་ཞུས་པ་ཡིན། ས་གནས་འགོ་འཛིན་གྱིས་ཁྱེད་རང་དེར་འདུག་གི་ཡོད་པའི་སྙན་གསན་བྱུང་བ་ཡག་པོ་རེད་ངོ་མ་བཤད་ན་བདེ་སྲུང་གིས་ཁྱེད་རང་འདུག་ས་གང་ཡིན་ས་གནས་སོ་སོའི་འགོ་འཛིན་ལ་ཡི་གེ་སྐུར་དགོས་ཀྱི་རེད་མོད། དེ་འདྲའི་ལམ་སྟོན་ལུགས་སོ་མི་འདུག འོན་ཀྱང་ཁྱེད་ལ་སློབ་སྦྱོང་ཡོད་ཚང་འདི་ལྟར་སྙན་གསན་བྱས་པ་ཡག་པོ་རེད། རེད་དེ་སྤྱི་མི་དང་ཁང་བདག་གི་ས་ནས་ཁང་གླ་སྤྲད་དེ་བསྡད་ཡོད་པའི་མཚན་རྟགས་ཤིག་ཁུར་ཤོག་ཟེར། ངས་སྤྱི་མི་ལ་བཤད་སྐབས་ཁང་བདག་ལ་འདྲི་དགོས་ཟེར། ཕྱི་ཉིན་ང་ཁང་བདག་སར་སོང་སྐབས་ཁོང་གིས་འགྲོ་སྟངས་དེ་དགོས་ཀྱི་མ་རེད་དེ་འདྲ་བྱས་ན་ཁོང་ལ་དཀའ་ངལ་ཡོད་པ་མང་པོ་བཤད། མ་ཚད་ཁྱེད་རང་གན་རྒྱ་མེད་པར་འདུག་འདོད་མེད་ན་སོང་ཀྱང་ཆོག་པར་བཤད་སོང་། ལྷག་པར་ཁོང་གི་བུ་ཕྲུག་ཁ་ཤས་ལ་ས་ཁང་གི་ཐོབ་ཐང་མེད་པ་དང་སྔོན་མ་ཞིག་ལ་ཁོང་གི་ཁང་ཨང་བེད་སྤྱོད་བྱས་ནས་གཞིས་ཆགས་མི་ཞིག་གིས་དངུལ་ཁང་ནས་སྒོར་མོ་མང་པོ་བླང་རྗེས་དཀའ་ངལ་འཕྲད་པའི་སྐོར་བརྗོད་སོང་། གང་ལྟར་ངས་དེར་ཁང་གླ་སྤྲད་ནས་གནས་སྐབས་རིང་བསྡད་ཡོད་པ་རེད་ཟེར་བ་ཙམ་ལ་ཡང་རྒྱབ་སྐྱོར་བྱེད་ཀྱི་མི་དུག་པས་མ་ཚད། ང་ཚོས་ས་ཁང་བདག་ཐོབ་འཕྲོག་པ་འམ་ཡང་ན་ཁང་པའི་ཨང་གྲངས་བེད་སྤྱོད་འདྲ་མིན་གཏོང་འདོད་ཀྱིས་དོགས་པས་མཚན་རྟགས་གནང་མ་སོང་།
བྱེད་སྟངས་འདིས་གསར་འབྱོར་བ་གཞིས་ཆགས་སུ་གནས་སྡོད་མི་ཐུབ་པ་བཟོ་ཐུབ་ཀྱི་ཡོད་པ་རེད། གནད་དོན་འདིའི་རྒྱབ་ལྗོངས་སུ་བཙན་བྱོལ་བོད་གཞུང་གི་གསར་འབྱོར་ཕྱིར་ལོག་གི་སྲིད་ཇུས་ཡོད་པ་རེད་དམ་ཡང་ན་ས་གནས་ཞིགས་ཆགས་ཀྱིས་གསར་འབྱོར་བ་ལ་ལྟ་ཚུལ་གྱི་སྲིད་ཇུས་ཤིག་ཡོད་པ་རེད། གང་ལྟར་མཐར་ངས་ཁོང་ལ་ས་ཁང་བདག་ཐོབ་དང་ཁང་ཨང་བེད་སྤྱོད་ལོག་པ་བྱ་འདོད་ཀྱིས་མིན་ལ་གན་རྒྱ་འཇོག་འདོད་ཀྱང་མིན་པའི་གསལ་བཤད་ཞིག་བྱས་ནས་ཐོན་ཡོང་པ་ཡིན། གང་ལྟར་ངས་ཁང་བྱང་མ་རགས་པ་རེད། དེ་ཡང་ང་གཅིག་པུ་ག་ལ་ཡིན་འདི་ཕྱོགས་ཀྱི་གསར་འབྱོར་བ་མི་སྐྱ་ཚང་མ་འདི་ལྟར་རེད། བོད་པའི་གཞིས་ཆགས་སུ་བོད་པ་སླེབས་ཀྱང་འདུག་ས་མགྲོན་ཁང་ལས་སྐྱོ་བ་རེད། ངས་ལས་བྱེད་དང་མི་རྒན། གསར་འབྱོར་དང་གཞིས་ཆགས། ཚོང་པ་ཚོར་ང་ལ་འདུག་ས་ངོ་མ་ཞིག་དང་ཁ་བྱང་དག་མ་ཞིག་ལོན་ཀྱི་ཡོད་མེད་རྩད་གཅོད་བྱས་ཀྱང་འདི་ན་འདུག་ས་ཡོད་རེད་ཟེར་མཁན་གཅིག་ཀྱང་མ་བྱུང་བས་མ་ཚད། བཙན་བྱོལ་གཞུང་ལ་གསར་འབྱོར་བ་ཚོ་ཕྱིར་ལོག་བྱ་རྒྱུར་སྲིད་ཇུས་ཡོད་པ་ཡང་དྲན་གསོ་བྱེད་མཁན་བྱུང་། སྐབས་དེར་ངས་སྔོན་མ་ང་སློབ་གྲྭ་ན་ཡོད་སྐབས་ཤེས་རིགས་དྲུང་ཆེ་ཀརྨ་དགེ་ལེགས་ཀྱིས་གསར་འབྱོར་ཕྱིར་ལོག་གི་སྲིད་ཇུས་གསལ་བཤད་བྱས་པས་དེ་ཡང་དྲན་པ་སོས། འོན་ཀྱང་ངས་ང་ཚོ་གསར་འབྱོར་བ་རྒྱ་གར་ནང་འདུག་འདོད་ཡོད་མཁན་ཚོ་འདུག་ས་དང་འགྲོ་ས་ངོ་མ་གང་རེད་ཅེས་དྲི་བ་འདི་འདྲི་འདོད་བྱུང་། ཡང་ངས་འདི་ལྟར་མང་པོ་ཞིག་བཤད་ཡོང་སྐབས་ཁྱེད་ཀྱིས་སེམས་ལ་ཁང་པ་གླ་རྒྱུ་ལོན་དུས་འདུག་མ་ཐུབ་ཡར་ལ་སྙན་གསན་ཞུས་མར་ལ་སྙན་གསན་ཞུ་དགོས་མི་འདུག་བསྙམ་ཡང་སྲིད་མོད། དེ་དེ་འདྲའི་བསྡོམས་བདེ་བོ་ཞིག་ག་ལ་ཡིན། ང་ཚོར་རྒྱ་གར་སྐྱབས་བཅོལ་ལག་དེབ་དང་ཕྱིར་བསྒྱོད་ལག་དེབ་བཟོ་དགོས་པ་སོགས་ལས་ཀ་མང་པོ་ཞིག་ལ་ཁ་བྱང་ཁུངས་བརྟན་གསལ་བོ་སྤྲད་རྒྱུ་མེད་ན་ཁག་པོ་ཞེ་དྲག་རེད། ད་དུང་དེ་མིན་པའི་དཔེ་མཚོན་གཅིག་བཞག་ན། ལོ་སྔོན་མ་ཞིག་ལ་བོད་ཀྱི་གྲྭ་བ་ཞིག་བྷེལ་ཀོབ་བོད་མའི་གཞིས་ཆགས་སུ་མེར་བསྲེག་དོན་རྐྱེན་བྱུང་པ་རེད། ཉེན་རྟོགས་པ་དང་གསང་ལས་པས་བརྟགས་དཔྱད་བྱས་མཐར་གྲྭ་པ་དེའི་གྲྭ་ཚང་དང་ཁམས་ཚན། སྤུན་ཟླ་སོགས་སུ་ཡིན་གསར་བོ་ངོས་ཟིན་པ་རེད་ལ། གཞིས་ཆགས་ལས་ཁང་། དགོན་པ་གྲྭ་ཚང་། གཞོན་ནུ་བུད་མེད། འདི་ཚོ་ཚང་མས་ཧ་གོ་ཡོད་པ་རེད་མོད་བོད་པ་སུ་གཅིག་གིས་རོ་བདག་མ་བྱས་པ་རེད། འདི་ནི་གསར་འབྱོར་བ་ཚོའི་འདུག་ས་རེད་དམ།
སྤྱི་འཐུས་ག་ཟི་དགེ་བཤེས་ཚེ་རིང་པོ་ལགས་ཀྱིས། དྷ་རམ་ས་ལར་སྡོད་མཁན་ང་ཚོའི་བོད་མིའི་སྒྲིག་འཛུགས་དང་བླ་མ་རྣམ་པའི་ཆེ་མཐོང་དང་གཟུགས་ཕྱོགས་ཡག་པོ་ཡོད་ས་རེད་བསམ་པ་དེ་འདྲ་ཞིག་བོད་ནང་ལ་ཕྱིན་ཞིང་། རྒྱ་ནག་གི་འབྲེལ་ཡོད་ལས་ཁུངས་ཀྱིས་དགའ་བསུ་ཞུས། ཕར་ནས་ས་ཆ་དང་ཁང་པ་བརྒྱབ། དེ་ནས་ཁོ་ཕྱིར་དྷ་རམ་ས་ལར་ཡོང་ཡོད་པ་ཞིག་ཡོད་ས་རེད། དེ་ཚོར་རྣམ་འགྱུར་ག་འདྲ་འཛིན་དགོས་ཀྱི་ཡོད་མེད་སྐོར་དྲིས་པའི་ལན་དུ་སྲིད་སྐྱོང་མཆོག་གིས། གཉེན་འཕྲད་མ་ཡིན་པར་བོད་ནང་ཕེབས་རྒྱུ་མང་དྲགས་པ་དེ་འདྲ་ཡིན་ན་བོད་མིའི་སྒྲིག་འཛུགས་ངོས་ནས་དོ་སྣང་བྱེད་དགོས་པ་ཞིག་རེད་ལ་། དེ་བཞིན་རྒྱ་གར་འབྲེལ་ཡོད་ལས་ཁུངས་ཀྱིས་ཀྱང་དོ་སྣང་གནང་གི་ཡོད་པར་ངོས་འཛིན་གནང་རོགས། ཞེས་གསུངས་སོང་། མི་འདི་སུ་ཡིན་པ་གསལ་པོ་གསུང་རོགས་་་
་་་་་་་་་ བོད་ནས་ཡོང་མཁན་ཚོས་ཁང་པ་དང་ས་ཆ་མི་འདུག་ཅེས་བཀའ་ཤག་ལ་ཞུ་གཏུག་བྱས་ཡོད་པ་རེད་ལ། དེ་དངོས་ཡོད་གནས་ཚུལ་ཡིན་སྟབས།
ཉེ་བའི་ཆར་ནང་སྲིད་ལས་ཁུངས་ནས་སྤིར་ལ་དམིགས་བསལ་བྱས་ཏེ་ཧིན་སྒོར་འབུམ་ ༡༢༠ ཡིས་ས་ཆ་ཉོས་ཡོད་པ་དང་། དེའི་ཐོག་ལ་དཔལ་འབྱོར་ཐབས་ཤེས་བྱེད་བཞིན་ཡོད།
དེ་བཞིན། སྤེལ་ཀོབ་གཞིས་ཆགས་ནང་དུའང་ཁང་པ་རྒྱག་མ་ཐུབ་ཀྱང་ས་ཆ་ཞིག་རག་ཐབས་ལ་འབད་བརྩོན་བྱེད་བཞིན་ཡོད། ་་་་་་་་་་་་་་་་