བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༦ སྟེང་གི་རྩོམ་སྒྲིག་པའི་གཏམ།
ད་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་དང་ནེའུ་ཇིར་སི་ས་ཁུལ་གྱི་སྐད་འབོད་ལས་འགུལ་སྐབས། ཆབ་སྲིད་ལངས་ཕྱོགས་མཐུན་མིན་ཞིག་གི་ཐོག་ནས་རྙོག་གྲ་ཞིག་བྱུང་ཡོད། གནས་ཚུལ་དེ་སྤྱི་ཚོགས་བརྒྱུད་ལམ་ཁག་ཏུ་ཁྱབ་སྟེ། མང་ཚོགས་ནང་དུའང་གླེང་སློང་ཆེན་པོ་བྱུང་སོང་། རྙོག་གྲ་དེའི་འབྱུང་རྩ་བོད་རང་བཙན་གྱི་འབོད་ཚིག་བཀག་སོང་ཟེར་བ་འདི་རེད།
སྨྲ་བརྗོད་རང་དབང་གལ་ཆེན་རེད། སྨྲ་བརྗོད་རང་དབང་ལས་ཀྱང་རྩ་དོན་གལ་ཆེན་རེད། སྤྱི་བའི་རྩ་དོན་ཆེད་སྒེར་བའི་སྨྲ་བརྗོད་རང་དབང་ལ་རྡོག་རྫུས་ཐེབས་ཀྱིན་ཡོད་ན། སྒེར་བ་བློས་བཏང་སྟེ་སྤྱི་བའི་ལས་དོན་དེ་འགན་ལེན་དགོས། ང་ཚོས་རྒྱ་ནག་ལ་རྩོད་བཞིན་པའི་གྲས་སུ་སྨྲ་བརྗོད་རང་དབང་ཡོད་ཀྱང་། སྨྲ་བརྗོད་རང་དབང་ང་ཚོའི་རྩོད་གཞི་མཐར་ཐུག་མ་རེད།
ད་རེས་ཀྱི་རྙོག་གླེང་འདིའི་ཐད་མི་མང་པོ་ཞིག་གིས་ཁ་རྡུང་གཏོང་ཡུལ་ལས་འགུལ་གོ་སྒྲིག་གནང་མཁན་ཚོ་རེད། གནས་ཚུལ་དེ་བརྒྱུད་ནས་སྐྱོན་བརྗོད་དང་ཟུར་ཟ་བྱེད་ས་དབུ་མའི་ལམ་ཆགས་འདུག དེ་ལྟ་བུའི་ཁ་རྡུང་གཏོང་དོན་ཡང་ལས་འགུལ་གོ་སྒྲིག་པ་ཚོས་རང་བཙན་སྐད་འབོད་གནང་མཁན་ཚོའི་སྟེང་ཉེན་རྟོག་པ་བཏང་སོང་ཟེར་བའི་གླེང་ཕྱོགས་ཤིག་གི་དབང་གིས་རེད།
ད་རེབ་ཨ་རིའི་ནེའུ་ཡོག་གི་རྙོག་གྲ་དེ་ཧ་ཅང་བློ་བུར་བ་ཞིག་རེད། ཁྱབ་སྤེལ་གྱི་མྱུར་ཚད་ཀྱང་ཧ་ཅང་མགྱོགས་པོ་རེད། འཆར་གཞི་གོ་རིམ་ལྡན་ཞིང་ཇུས་འགོད་ཞིབ་ཚགས་རེད། ང་ཚོའི་བོད་པ་ཚོ་འདི་འདྲ་རེད། ཁ་ནང་ལ་སྐོར་ན་དཔའ་མཛངས་ལྡན་ལ་བློ་རིག་ཀྱང་རྒོད། ང་ཚོའི་རྩ་དོན་ཐོག་ལའང་འདི་ལྟར་འཆར་འགོད་དང་། འདི་ལྟར་ཧུར་བརྩོན་ཞིག་ཡོད་ན། ང་ཚོའི་མངོན་འདོད་ཡོངས་སུ་འགྲུབ་མེད་ཀྱང་འགྲུབ་རྒྱུ་ཉེ་སར་བསླེབ་ཡོད་ངེས་ཡིན།
ང་ཚོས་ལས་འགུལ་གྱི་ཆེད་དུ་ལས་འགུལ་སྤེལ་གྱི་ཡོད་ན་ནི། ལས་འགུལ་དེ་གལ་ཆེ་ཤོས་དང་། ལས་འགུལ་ལ་བར་ཆད་བྱེད་མཁན་དེ་དགྲ་བོའི་དྭངས་མ་ཡིན། ང་ཚོས་རྩ་དོན་གྱི་ཆེད་དུ་ལས་འགུལ་སྤེལ་གྱི་ཡོད་ན། ལས་འགུལ་དེ་ང་ཚོའི་དམིགས་ཡུལ་དུ་འཁྱོལ་བ་ཞིག་དང་། རྒྱལ་སྤྱིའི་སྤྱི་ཚོགས་ནང་གོ་བ་ལོག་སྒྲུབ་མ་ཐེབས་པ་ཞིག་ངེས་པར་དུ་ཡིན་དགོས།
ཆབ་སྲིད་ཀྱི་ལས་འགུལ་གང་ཞིག་སྤེལ་ཡང་དེའི་བརྡ་ལན་དེ་འབོད་ཚིག་དང་འཕྲེད་དར་ཆགས་ཡོད། ལྷག་པར་དུ་ནུབ་ཕྱོགས་ལུང་པའི་ནང་མང་ཚོགས་ཀྱི་ལས་འགུལ་སྤེལ་སྐབས། ཆེས་འབུར་དུ་ཐོན་པ་དེ་འཕྲེད་དར་སྟེང་གི་ཡི་གེ་ཡིན་ལ། གསར་ལམ་ཁག་དང་ཆབ་སྲིད་པ་ཚོས་དོ་སྣང་བྱེད་ཡུལ་ཡང་འབོད་སྒྲ་དང་འཕྲེད་དར་ཡིན།
ད་རེས་ཀྱི་གནས་ཚུལ་འདི་བརྒྱུད་ནས་མ་འོངས་པར་གཞུང་འབྲེལ་གྱི་ལས་འགུལ་སྤེལ་ཕྱོགས་ཤིག་དང་། འབོད་ཚིག་གི་ནང་དོན། འཕྲེད་དར་སོགས་ཀྱང་གཅིག་གྱུར་གཏན་འབེབས་དང་། གཅིག་གྱུར་ལམ་སྟོན་གསལ་བོ་ཞིག་དགོས་པ་ཧ་ཅང་གལ་ཆེན་རེད། ང་ཚོའི་སྒྲིག་འཛུགས་ཀྱི་ལངས་ཕྱོགས་དབུ་མའི་ལམ་རེད། བོད་རིགས་ཡོངས་ལ་རང་སྐྱོང་མིང་དོན་མཚུངས་པ་ཞིག་རེག་རྒྱུ་དེ་རེད། འདྲེ་ཤར་སྒོར་བཞག་ནས་ལྟོ་ནུབ་སྒོར་བསྐྱལ་བའི་དཔེ་ལྟར། སྒྲིག་འཛུགས་ཀྱིས་ཁ་ནས་རང་སྐྱོང་བཤད་དེ་མང་ཚོགས་ཀྱི་ལུས་ངག་ནས་བརྡ་ལན་གཞན་ཞིག་ཐོན་ན། དེས་ང་ཚོའི་རྩ་དོན་ལ་ཕན་པའི་ཚབ་ཏུ་གནོད་པ་ཆེ་འོ།།1
