དེ་རིང་ལྷོ་ཀོ་རི་ཡའི་རྒྱལ་སར་རྒྱ་ནག་དང་ཀོ་རི་ཡ་ཉི་ཧོང་བཅས་ཀྱི་ཕྱི་སྲིད་བློན་ཆེན་འཛོམས་ཏེ་རྒྱལ་ཁབ་ཕན་ཚུན་གྱི་དཀའ་རྙོག་ཞི་འགྲིག་ཡོང་ཐབས་ལ་གྲོས་བསྡུར་བྱས་ཡོད་འདུག
དེ་རིང་ལྷོ་ཀོ་རི་ཡའི་རྒྱལ་ས་སོལ་ནང་ཉི་ཧོང་གི་ཕྱི་སྲིད་བློན་ཆེན་ཕུ་མའེ (Fumio Kishida)དང་། རྒྱ་ནག་གི་ཕྱི་སྲིད་བློན་ཆེན་ཝང་ཡེ (Wang Yi)། ལྷོ་ཀོ་རི་ཡའི་ཕྱི་སྲིད་བློན་ཆེན་ཡུང་བྷེ་ཡུང་ (Yun Byung-se) བཅས་འཛོམས་ཏེ། ཞི་བདེ་རྒྱ་མཚོའི་མཚོ་གླིང་རྩོད་ཉོག་དང་ལྷོ་ཤར་རྒྱ་ནག་རྒྱ་མཚོའི་བདག་དབང་གནད་དོན། ཉི་ཧོང་གི་སྲིད་བློན་ཤིང་ཛོ་ཨ་བྷེ་འཛམ་གླིང་དམག་ཆེན་གཉིས་པའི་ཁྲོད་རྐྱེན་འདས་སུ་སོང་བའི་ཉི་ཧོང་གི་དམག་མིའི་དྲན་རྟེན་ལྷ་ཁང་དུ་མཆོད་འབུལ་ཕྱིན་པ་བཅས་ཀྱི་ཐོག་གླེང་སློང་བྱས་ཡོད་པ་མ་ཟད། མ་འོངས་པར་གནས་ཚུལ་དེ་རིགས་མི་འཐོན་པ་བྱས་ནས་རྒྱལ་ཁབ་ཕན་ཚུན་གྱི་འབྲེལ་ལམ་ཡར་རྒྱས་གཏོང་ཐབས་བཅས་ཀྱི་སྐོར་ལ་གྲོས་བསྡུར་བྱས་ཡོད་འདུག
ཁོ་ཚོས་གསར་འགོད་བསྒྲགས་གཏམ་སྤེལ་བའི་ནང་། “རྒྱལ་ཁབ་གསུམ་ཞི་འགྲིག་མཉམ་ལས་བྱེད་རྒྱུ་ནི་ཉི་ཧོང་ལ་གལ་འགངས་ཆེན་པོ་ཆགས་ཡོད་སྟབས། ད་ཐེངས་ཀྱི་ལྷན་ཚོགས་འདི་བརྒྱུད་མ་འོངས་པའང་ཞི་མོལ་འདི་རིགས་འཚོགས་རྒྱུར་འབད་བརྩོན་བྱེད་དགོས”ཞེས་དང་། རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཡིས། “ང་ཚོས་རྒྱལ་ཁབ་ཕན་ཚུན་གྱི་འབྲེལ་ལམ་སྔར་ལྷག་འཕེལ་རྒྱས་གཏོང་ཐབས་ཐོག་གྲོས་མོལ་བྱས་ཡོད་པ་མ་ཟད། མ་འོངས་པར་རྒྱ་ནག་དང་ཉི་ཧོང་གི་མགོ་ཁྲིད་བར་ཐུག་འཕྲད་བྱས་ཏེ། རྒྱལ་ཁབ་གཉིས་ཀྱི་དཀའ་རྙོག་ཞི་འགྲིག་ཡོང་ཐབས་ཀྱི་ཐག་གཅོད་བྱས་པ་ཡིན། རྒྱ་ནག་དང་ལྷོ་ཀོ་རི་ཡའི་འབྲེལ་ལམ་ཡག་པོ་ཡོད་ཀྱང་། ཉི་ཧོང་དང་རྒྱལ་ཁབ་གཉིས་བར་ལོ་རྒྱུས་དང་མངའ་ཁུལ་གྱི་བདག་དབང་ཐད་དཀའ་རྙོག་འཕྲད་བཞིན་ཡོད་སྟབས། ད་ཐེངས་དཀའ་རྙོག་དེ་དག་ཞི་འགྲིག་དང་འབྲེལ་མཉམ་ལས་ཀྱི་ནུས་པ་འདོན་སྤེལ་བྱ་རྒྱུའི་ཐོག་གོ་བསྡུར་བྱས་པ་ཡིན”ཞེས་བརྗོད་འདུག
༢༠༡༣ ལོར་རྒྱ་ནག་གིས་ཞི་བདེ་རྒྱ་མཚོའི་མཚོ་གླིང་ཐོག་མཁའ་དབྱིངས་དབྱེ་མཚམས་ཐིག་ཚད་བཟོས་པ་དང་འབྲེལ། སིང་ཁཱ་ཁའོ་མཚོ་གླིང་ (Senkakus) གི་བདག་དབང་གནད་དོན་ཐད་ཉི་ཧོང་དང་རྒྱ་ནག་བར་རྩོད་རྙོག་བྱུང་རྗེས། རྒྱ་ནག་གི་མཚོ་དམག་གིས་ཞི་བདེ་རྒྱ་མཚོའི་མངའ་ཁུལ་དུ་སྐོར་གཡེང་བྱས་ནས་ཉི་ཧོང་ལ་ཁོང་ཁྲོ་བསླངས་ཡོད་པ་དང་། ཉི་ཧོང་གིས་དམག་དོན་རྩ་ཁྲིམས་ལ་བསྐྱར་བཅོས་བྱས་ནས་རྒྱལ་ཁབ་ཀྱི་བརྟན་ལྷིང་ ཆེད་རྒྱལ་ཁབ་གཞན་དང་དམག་འཐབ་བྱ་རྒྱུ་ཐག་གཅོད་བྱས་ཡོད་པ་མ་ཟད། ལྷོ་ཀོ་རི་ཡ་དང་རྒྱ་ནག་གིས་ནག་ཉེས་བརྩི་བཞིན་ཡོད་པའི་འཛམ་གླིང་དམག་ཆེན་གཉིས་པའི་དྲན་རྟེན་མཆོད་ཁང་དུ་མཆོད་འབུལ་ཕྱིན་ཡོད། ན་ནིང་རྒྱ་ནག་རྒྱལ་ས་པེ་ཅིན་ཨེ་ཤ་ཡའི་དཔལ་འབྱོར་གླེང་སྟེགས་སྐབས། ཞི་ཅིན་ཕིན་གྱིས་ཤིང་ཛོ་ཨ་བྷེ་དང་ཐུག་སྐབས་མ་དགའ་བའི་རྣམ་འགྱུར་བསྟན་ཡོད་པ་མ་ཟད། རྒྱ་ནག་ནན་ཅིན་གྲོང་ཁྱེར་དུ་འཛམ་གླིང་དམག་ཆེན་གཉིས་པའི་སྐབས་ཉི་ཧོང་གོང་དམག་གིས་ནན་ཅིན་སོགས་རྒྱ་ནག་བྱང་ཤར་ཁུལ་དུ་བཙན་འཛུལ་བྱས་སྐབས་རྐྱེན་ལམ་དུ་ཕྱིན་པའི་དམག་དམངས་ལ་རྒྱལ་ཡོངས་མྱ་ངན་འདས་མཆོད་སོགས་བྱས་ཡོད་སྟབས། རྒྱལ་ཁབ་གཉིས་ཀྱི་འབྲེལ་ལམ་སྡུག་ཏུ་ཕྱིན་ཡོད།
ཆབ་སྲིད་དབྱེ་ཞིབ་པ་ཚོས། ད་ཐེངས་ཀྱི་གྲོས་མོལ་འདི་བརྒྱུད་ཉི་ཧོང་དང་ལྷོ་ཀོ་རི་ཡའི་འབྲེལ་ལམ་ཡག་ཏུ་འགྲོ་སྲིད་པ་ཞིག་ཡིན་ཡང་། རྒྱ་ནག་དང་ཉི་ཧོང་བར་དཀའ་རྙོག་འདྲ་མིན་འཕྲད་བཞིན་ཡོད་སྟབས། མ་འོངས་པར་འབྲེལ་ལམ་ཡག་ཏུ་འགྲོ་རྒྱུ་ཁག་པོ་ཆགས་ཡོད་སྐོར་བརྗོད་འདུག༢༠༠༨ ལོ་ནས་བཟུང་ལོ་རེར་རྒྱལ་ཁབ་གསུམ་པོའི་ཕྱི་སྲིད་བློན་ཆེན་བར་ལྷན་ཚོགས་བསྡུས་ཡོད་ཀྱང་། ༢༠༡༢ ལོར་འབྲེལ་ལམ་ཆད་དེ་ད་བར་ཚོགས་ཐུབ་མེད་ཀྱང་། ད་ཐེངས་ལྷོ་ཀོ་རི་ཡའི་མགོ་ཁྲིད་འོག་ལྷན་ཚོགས་ཐེངས་དྲུག་པ་དེ་ཚོགས་ཡོད།
གསར་འགོད་པ། དོན་གྲུབ།
