གུང་ཁྲན་ཏང་རྩ་གཏོར་གཏོང་དགོས།

རྒྱ་ནག་གི་གྲོང་ཁྱེར་ཁ་ཤས་ནང་གུང་ཁྲན་ཏང་ལ་ངོ་རྒོལ་རང་བཞིན་གྱི་གསང་བའི་གསར་བརྗེ་ལས་འགུལ་གྱི་སྨྱུ་གུ་ཞིག་འབུས་བཞིན་ཡོད་འདུག

རྒྱ་ནག་དམར་ཤོག་ཚོགས་པའི་ཚོགས་ཆེན་བཅོ་བརྒྱད་པ་ཚོགས་པའི་ཚུན་དུ། སྲིད་དབང་འཐབ་རྩོད་ཀྱི་གཡུལ་འགྱེད་ཁྲོད་ཞི་ཅིན་ཕིན་གྱིས་ཅང་ཤོག་ཁག་ལ་ཁ་གཏད་དེ་རུལ་སུངས་རྒོལ་རྡུང་གི་ལས་འགུལ་ཚ་ཚ་འུར་འུར་དུ་སྤེལ་བཞིན་ཡོད་ཀྱང་། རྒྱ་ནག་གི་མང་ཚོགས་ནང་གུང་ཁྲན་ཏང་ལ་དགའ་མོས་མེད་པའི་རྣམ་འགྱུར་ཤུགས་ཆེ་རུ་འགྲོ་བཞིན་ཡོད་པ་དང་། ཉེ་ལམ་ཞིག་ནས་རྒྱ་ནག་ནང་ “གསར་བརྗེ་” རུ་ཁག་ཅིག་གི་སྨྱུ་གུའང་འབུས་མགོ་ཚིགས་ཏེ། རྒྱ་ནག་གི་དངུལ་སྒོར་སྣ་ཚོགས་སྟེང་ “གུང་ཁྲན་ཏང་རྩ་གཏོར་གཏོང་དགོས།” ཞེས་པའི་ཐམ་ཀ་དམར་པོ་བརྒྱབ་སྟེ་རྒྱ་ནག་ནང་ཁུལ་དུ་འགྲེམ་བཞིན་ཡོད་འདུག

དེ་རིང་ཀྲུང་གོ་ལྟ་བ་ཞེས་པའི་དྲ་བའི་སྟེང་གནས་ཚུལ་སྤེལ་བ་ལྟར་ན། ཟླ་སྔོན་མའི་ཚེས་ ༡༦ ཉིན་ཨ་རིའི་སན་ཧྥརན་སེ་ཁཱོ་རུ་ “རྒྱ་ནག་མི་སེར་རྒྱལ་ཁབ་སླར་གསོའི་ལས་དོན་ཚོགས་འདུ་(光复民国（大陆）工作委员会)ཐེངས་དང་པོ།” ཞེས་པ་ཚོགས་པའི་སྟེང་། ཚོགས་འདུ་གཙོ་སྐྱོང་བ་ཞིན་ཧོ་ནན་ (XinHaonan) གྱིས་རྒྱ་ནག་ནང་གསར་བརྗེ་གནས་ཚུལ་ཞིག་འབྱུང་བཞིན་ཡོད་པའི་གནས་ཚུལ་བསྒྲགས་ཡོད་འདུག ཁོང་གིས་བརྗོད་རྒྱུར། རྒྱ་ནག་མི་སེར་རྒྱལ་ཁབ་སླར་གསོའི་ལས་དོན་ཚོགས་འདུ་ཐེངས་དང་པོ་སྐོང་བཞིན་པ་འདི་རྒྱ་ནག་ནང་གི་གྲོགས་པོ་ཚོས་ཇི་ལྟར་ཧ་གོ་བ་ངས་མི་ཤེས་ཀྱང་། ཚོགས་འདུའི་སྔོན་གྱི་ཉིན་ཅིག་ལ་ང་ཚོར་རྒྱ་ནག་ནས་འཕྲིན་ཡིག་དང་པར་མང་པོ་ཞིག་བསྐུར་ནས་འབྱོར་སོང་། འཕྲིན་ཡིག་ནང་གསལ་བཤད་བྱས་པ་གཅིག་ནི་ང་རང་ཉིད་ཀྱིས་ “སླར་གསོའི་ཚོགས་འདུ་” ཐོག་མའི་སྟེང་། རྒྱ་ནག་ལ་ “གསར་བརྗེ་བ་” འབྱུང་བཞིན་ཡོད་པའི་གནས་ཚུལ་ཁྱབ་བསྒྲགས་བྱེད་དགོས་པ་དེ་རེད། འདི་ནི་གུང་ཁྲན་ཏང་ནང་སྔོན་ཆད་བྱུང་མ་མྱོང་བའི་གནད་དོན་ཞིག་རེད། ཅེས་བརྗོད་འདུག

ཁོང་གིས་མུ་མཐུད་དུ། ང་དང་སླར་གསོ་ཚོགས་འདུའི་ལས་གྲོགས་རྣམ་པས་པར་འདི་དག་ལ་བལྟས་རྗེས། ང་ཚོ་ཚང་མར་ལྟ་ཕྱོགས་གཅིག་ཡོད་པ་ནི་རྒྱ་ནག་ནང་ “གསར་བརྗེ་བ་” བྱུང་ཡོད་པ་དེ་རེད། པར་འདི་དག་ལ་ཁྱད་ཆོས་གསུམ་ཡོད་པ་ནི། གཅིག ང་ཚོར་འབྱོར་བའི་དྲིལ་བསྒྲགས་ཀྱི་དངོས་བོའི་སྟེང་དུ་གསར་བརྗེ་བའི་ཐམ་ཀ་གྲུ་བཞིའི་ཡིག་ཆ་དཔར་ཡོད་པ་དང་། དེ་དག་ནི་ “གུང་ཁྲན་ཏང་རྩ་གཏོར་གཏོང་དགོས།”ཞེས་པ་དེ་ནི་མངོན་གསལ་དོད་པོའི་གསར་བརྗེ་ལས་འགུལ་གྱི་ནང་དོན་ལྡན་པ་ཞིག་རེད།

གཉིས། གསར་བརྗེ་བས་ཐམ་ཀ་བརྒྱབ་ཡོད་པའི་དངུལ་སྒོར་འདྲ་མིན་ཡོད་ཅིང་། དེ་དག་སྐམ་ས་ཆེན་མོའི་ས་ཁུལ་མི་འདྲ་བ་ཁ་ཤས་ནས་ཐོན་ཡོད། དཔེར་ན། པེ་ཅིན་དང་ཞི་ཨན། ཀོང་ཀྲུའུ། ཧྲོང་ཧེ། ཅི་ནན། ཝོ་ཧན། པའོ་ཅི། ཁྲོན་ཆིན། ཧོ་མིན། ཀོའི་ལིན། ཡཱོང་ཧྲོ་སོགས་གྲང་ཁྱེར་མི་འདྲ་བ་མང་པོ་ཞིག་ནས་ཐོན་ཡོད་པ་དེ་རེད།

གསུམ། པར་དེ་དག་ཁྲོད་ཀྱི་གཅིག་ལ་གསར་བརྗེ་བས་མི་སེར་དོན་གསུམ་རིང་ལུགས་(三民主义) ཀྱི་ནང་དོན་དངུལ་སྒོར་གྱི་སྟེང་ཐམ་ཀ་བཞིན་བརྒྱབ་ཡོད་སྟབས། རྒྱ་ནག་ནང་ལ་གསར་བརྗེ་བ་འབྱུང་གི་ཡོད་པ་དེ་ནི། སུན་ཀྲོན་ཧྲན་གྱི་རིག་གནས་གསར་བརྗེ་རྒྱུན་འཛིན་དང་། ཀྲུང་ཧྭ་མི་སེར་རྒྱལ་ཁབ་སླར་གསོ་བྱ་རྒྱུའི་བསམ་བློ་དང་བརྩོན་ལེན་བྱེད་བཞིན་པ་མཚོན་ཐུབ།

འདི་དག་གིས་ང་ཚོའི་མི་མང་དང་གཞོན་སྐྱེས་ཚོས། ང་ཚོའི་མི་སེར་རྒྱལ་ཁབ་ཀྱི་ཕུགས་འདུན་ཁྱབ་བསྒྲགས་བྱ་དགོས་ཡོད་པ་ཤེས་རྟོག་བྱུང་ཡོད་པ་དང་། ང་ཚོའི་མང་ཚོགས་རང་ཉིད་ཀྱིས་ཁོ་ཚོ་གནས་ཡོད་པའི་ཁྱབ་བསྒྲགས་བྱེད་པ་དང་། གསར་བརྗེ་རྩ་འཛུགས་ཁྱབ་བསྒྲགས་བྱེད་བཞིན་ཡོད་པ་རེད། གུང་ཁྲན་ཏང་ལ་གསར་བརྗེ་བྱེད་མཁན་འབྱུང་འོས་པ་ཞིག་ཡིན། དཔེར་ན། ཆིན་རྒྱལ་རབས་མཇུག་བསྒྲིལ་བ་དེ་ཡང་སྲིད་དབང་རུལ་སུངས་དང་དཔོན་ངན་རུལ་སུངས་ཆགས་སྟབས། སྤྱི་ཚོགས་ཁྱོན་ཡོངས་རུལ་སུངས་ཅན་དུ་གྱུར་བ་དང་བསྟུན་ཏེ་གསར་བརྗེ་བྱུང་པ་རེད། ད་ལྟའི་གུང་ཁྲན་ཏང་གིས་རུལ་སུངས་བྱེད་པ་དང་། ཆིན་རྒྱལ་རབས་ཀྱིས་རུལ་སུངས་བྱས་པ་གཉིས་བསྡུར་ན། ད་ལྟའི་གུང་ཁྲན་ཏང་གི་སྲིད་དབང་རུལ་སུངས་དང་དཔོན་རིགས་རུལ་སུངས། སྤྱི་ཚོགས་རུལ་སུངས་སོགས་ལྡབ་སྟོང་ཕྲག་ལྷག་གིས་ཤུགས་ཆེ་བ་ཡོད་སྟབས། གུང་ཁྲན་ཏང་ལ་གསར་བརྗེ་བྱེད་མཁན་བྱུང་པ་དེ་ནི། འབྱུང་འོས་པ་ཞིག་དང་ངེས་པར་དུ་འབྱུང་དགོས་པ་ཞིག་རེད། ཅེས་བརྗོད་འདུག

ཞིན་ཧོ་ནན་གྱི་རེ་བར། ད་ལྟའི་གསར་བརྗེ་བ་དེ་དག་ལ་རྩ་འཛུགས་ཡོད་མེད་གང་ལྟར་ཡང་། དེ་དག་ནི་རྒྱ་ནག་རང་གི་ས་ཆར་བསྡད་དེ་སྙིང་སྟོབས་ཆེན་པོས་གུང་ཁྲན་ཏང་གི་གདོང་དུ་ལངས་ཡོད་པ་དང་། མི་ལོ་ ༦༥ ཡི་ནང་གསར་བརྗེ་བ་ཞེས་པའི་འབོད་ཚིག་ཐོག་མ་བྱུང་སྟེ། གསར་བརྗེ་བས་བསྒྲུབ་དགོས་པའི་ལས་དོན་ཞིག་རྩོམ་བཞིན་ཡོད་སྟབས། ང་ཚོས་གསར་བརྗེ་གཞོན་སྐྱེས་འདི་དག་ལ་རྒྱབ་སྐྱོར་བྱེས་དགོས་པ་དེ་རེད།

གསར་འགོད་པ། འཇིགས་མེད་རྒྱ་མཚོ།