དེ་རིང་སྔ་དྲོར་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ ཚོགས་ཚོགས་དུས་དགུ་པ་མཇུག་བསྒྲིལ་བ་དང་བསྟུན་ཏེ། སྤྱི་འཐུས་ཚོགས་གཙོ་མཆོག་གིས་ཉེ་ཆར་ཨ་རིའི་ནེའུ་ཡོག་ཏུ་བྱུང་བའི་གནས་ཚུལ་ དང་། གྲོས་ཚོགས་ནང་ཚོགས་གཙོར་ཉེས་འཛུགས་བྱས་པའི་གནད་དོན། དེ་བཞིན། འཕྲོད་བསྟེན་བཀའ་བློན་མཆོག་གི་རྙོག་གླེང་སྐོར། ཇོ་ནང་ཆོས་བརྒྱུད་ལ་སྤྱི་འཐུས་ཀྱི་གོ་སྐབས་སྤྲོད་མ་ཐུབ་པ་བཅས་ཀྱི་ཐོག་གསལ་བཤད་གནང་སོང་།
དེ་རིང་སྔ་དྲོའི་ཆུ་ཚོད་ ༡༢།༣༠ སྟེང་། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བ་མཇུག་བསྒྲིལ་ཡོད་པ་དང་། ད་རེབ་ཚེས་ ༡༦ ནས་ ༢༨ བར་གྱི་སྤྱི་འཐུས་ཚོགས་འདུའི་སྟེང་། བོད་མིའི་སྒྲིག་འཛུགས་ལྷན་ཁང་མ་ལག་དང་བཅས་པའི་ཕྱི་ལོ་ ༢༠༡༥ ནས་ ༢༠༡༦ ལོའི་སྔོན་རྩིས་གཏན་འབེབས་དང་། བཅའ་ཁྲིམས་དང་སྒྲིག་གཞི་ཁག་ཅིག་བསྐྱར་བཅོས། དེ་བཞིན། སྐར་རྟགས་ཅན་གྱི་དྲི་བ་བཅུ་དྲུག་ཐོག་བགྲོ་གླེང་དང་། སྤྱི་འཐུས་རྒྱུན་ལས་ཀྱི་ཆེད་འཛུགས་ཚོགས་ཆུང་ཁག་ ༥ ཙམ་གྱི་ཞིབ་འཇུག་སྙན་ཐོར་བགྲོ་གླེང་བཅས་གནང་ཡོད་པ་རེད།
སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མཇུག་བསྡོམས་གསུང་བཤད་གནང་སྐབས། ད་རེབ་ཀྱི་གྲོས་ཚོགས་མགོ་བཙུགས་པའི་སྐབས་ནས་ཏོག་ཙམ་བློ་མི་བདེ་བ་ཞིག་ཡོང་བསྡད་སོང་། ང་ཚོའི་ལས་དོན་ག་འདྲ་ཞིག་ཡིན་ནའང་གང་ལྟར་བར་ཆད་དང་གདོང་ལེན་བྱེད་དགོས་པ་མང་པོ་ཞིག་རང་བཞིན་གྱིས་ཡོང་གི་རེད། གནད་དོན་ག་རེ་བྱུང་བ་ཡིན་ནའང་ནང་པ་སངས་རྒྱས་པ་ཞིག་ཡིན་པའི་ཆ་ནས་རྒྱུ་དང་རྐྱེན་མང་པོ་ཞིག་འཛོམས་པའི་ཐོག་ནས་ཡོང་གི་ཡོད་པ་ཞིག་ལ་ངོས་འཛིན་བྱེད་ཀྱི་ཡོད། རྒྱུ་དང་རྐྱེན་གཅིག་མིན་པར་རྒྱུ་མང་པོ་ཞིག་དང་རྐྱེན་མང་པོ་ཞིག་ལ་བརྟེན་ནས་ ཡོང་གི་ཡོད་ལ། ད་རེབ་གྲོས་ཚོགས་འདིའི་ནང་ལའང་ཡོང་ཡོད་པ་རེད། ཚོགས་གཙོ་སྒེར་ལ་ཆ་བཞག་ན་ད་རེབ་ཏོག་ཙམ་བློ་མ་བདེ་བ་གཅིག་དེ། གྲོས་ཚོགས་སྟངས་འཛིན་བྱེད་སྐབས་མཚམས་རེར་སྤྱི་འཐུས་རེ་ཟུང་གིས་ཁ་ཐུག་ཏུ་ལན་ བརྒྱབ་ཡོང་བ་དེ་ཚོགས་གཙོ་སྤེན་པ་ཚེ་རིང་གི་གནས་ཚུལ་ཞིག་རེད། ཡིན་ནའང་། གཙོ་སྐྱོང་བྱེད་མཁན་ཚོགས་གཙོ་སྔོན་མ་ཕེབས་ཡོད་ལ། མ་འོངས་པར་ཡང་ཕེབས་ཡོང་གི་ཡོད་སྟབས། གྲོས་ཚོགས་ཀྱི་འགྲོ་ལུགས་སོགས་ཀྱི་ཐོག་གཟབ་གཟབ་གནང་དགོས་པ་རེད། སོ་སོ་སྒེར་གཅིག་པུའི་དོན་དག་བསྒྲུབ་པའི་སྐད་ཆ་མ་རེད། ང་ཚོ་ཚང་མས་བོད་མི་ས་ཡ་དྲུག་གི་ལས་ཀ་བྱེད་ཀྱི་ཡོད་པ་དང་། བོད་སྤྱི་པའི་དོན་དུ་ལས་ཀ་བྱེད་ཀྱི་ཡོད་པ་དེ་སེམས་ལ་བཞག་པའི་ཐོག གྲོས་ཚོགས་ཀྱི་འགྲོ་སྟངས་ཡིན་ནའང་ཚད་དང་ལྡན་པ་ཞིག་འགྲོ་ཐུབ་དགོས་པ་རེད། སྔོན་མ་ཚད་དང་ལྡན་པ་ཕྱིན་ཡོད་ལ་མ་འོངས་པར་ཡང་ཚད་དང་ལྡན་པ་འགྲོ་ཐུབ་པ་བྱེད་པར་དགོངས་པ་བཞེས་དགོས་པ་ཧ་ཅང་གལ་ཆེན་པོ་རེད། ང་རང་སྒེར་དང་འབྲེལ་བའི་ཐོག་ནས་གྲོས་ཚོགས་འདིའི་ནང་གནས་ཚུལ་བསླེབས་ཡོད་ལ། དེའི་སྐབས་ལའང་གསལ་བཤད་བྱེད་རྒྱུ་བྱུང་། ང་རང་སྒེར་གྱི་ངོས་ནས་ལྷག་བསམ་རྣམ་དག་ཡིན། གཙང་མ་གཙང་རྐྱང་ཡིན། ངོ་གནོང་དགོས་པ་དང་ཞུམ་དགོས་པ་རྩ་བ་ཉིད་ནས་མེད། ཡིན་ནའང་། ང་སྒེར་དང་འབྲེལ་བའི་གནད་དོན་ཡང་གྲོས་ཚོགས་ནང་བསླེབས་པ་རེད། དེ་བཞིན་གནད་དོན་གཞན་པ་དེ་འདྲའང་གྲོས་ཚོགས་འདིའི་ནང་ཡང་ཡང་སླེབ་ཀྱི་ཡོད་སྟབས། སོ་སོའི་རེ་བར་ཡིན་པ་ཡིན་པ་དང་མིན་པ་མིན་པ་བྱས་ནས་གཙང་མ་ཞིག་བཟོ་ཐུབ་ན་བསམ་གྱི་འདུག འཛིན་སྐྱོང་བཀའ་ཤག་གིས་དེ་ཚོའི་བརྒྱུད་རིམ་ཆ་ཚང་ཞིག་མཁྱེན་གྱི་ཡོད་སྟབས། ངོས་འཛིན་ག་འདྲ་ཞིག་གནང་གི་ཡོད་མེད་གསལ་བོ་ཞིག་གསུང་བཞག་པ་ཡིན་ན། མ་འོངས་པར་གནད་དོན་དེ་དང་དེའི་རིགས་གྲོས་ཚོགས་ནང་གླེང་མི་དགོས་པའི་རེ་བ་ཞུ་བཞིན་ཡོད་སྟབས་དེ་དགོངས་པར་འཇགས་རོགས་གནང་ཞུ་འདོད་བྱུང་། ཞེས་གསུངས་སོང་།
སྔོན་རྩིས་གཏན་འབེབས་སྐོར་ལ་ཁོང་གིས། ད་རེབ་སྔོན་རྩིས་ཀྱི་གྲོས་ཚོགས་ཡིན་སྟབས་དུས་ཚོད་མང་ཤོས་དེ་སྔོན་རྩིས་ཐོག་བཏང་ཡོད་པ་རེད། རྩིས་ལོ་ ༢༠༡༤ དང་ ༢༠༡༥ ཡི་བསྡོམས་རྩིས་ལ་ཆ་བཞག་ན། འཛིན་སྐྱོང་བཀའ་ཤག་གིས་ས་ཡ་ཉིས་སྟོང་གཉིས་བརྒྱ་བཅུ་གཉིས་ཀྱི་འགྲོ་སོང་གཏོང་གི་ཡོད་པ་དང་། དེ་གཞིར་བཟུང་གིས་ང་ཚོས་བསྐྱར་བཅོས་སྔོན་རྩིས་ཀྱི་ཐོག་ནས་གཏན་འབེབས་བྱས་པ་རེད། ཚུར་ཡོང་འཆར་དེ་ས་ཡ་ཉིས་སྟོང་བཞི་བཅུ་ཞེ་ལྔ་དང་སོང་འཆར་ས་ཡ་ཉིས་སྟོང་གཉིས་བརྒྱ་བཅུ་གཉིས་བྱས་ཏེ། ཁ་མ་འདུམས་པ་ས་ཡ་ ༡༦༧ ཡིན་ཡང་དེ་ཆ་ཚང་ཁ་མ་འདུམས་པ་ལབ་ཐུབ་ཀྱི་མ་རེད། རྩིས་མགོ་རྒྱག་རྒྱུ་ཡིན་དུས་འགྲོ་སོང་གཏོང་མ་དགོས་པ་དང་ལྷག་མ་སོགས་ཀྱིས་ཁ་ཅིག་འདུམས་འགྲོ་ཡི་ཡོད་པ་རེད། གང་ལྟར་དངུལ་འབོར་ཆེན་པོ་ཞེ་དྲགས་ཤིག་འགྲོ་བཞིན་ཡོད་པ་རེད། དེ་བཞིན་ ༢༠༡༥ དང་ ༢༠༡༦ ལའང་ས་ཡ་ཉིས་སྟོང་བཅོ་བརྒྱད་(༢,༠༡༨,༠༣༩,༡༡༠)འགྲོ་སོང་དུ་འགྲོ་ཡི་ཡོད་པ་དང་། ཚུར་ཡོང་རྒྱུ་དེ་ས་ཡ་གཅིག་སྟོང་དགུ་བརྒྱ་(༡,༩༠༠,༧༥༤,༧༨༤)ཡིན་ལ། དེའི་སྒང་ལ་ས་གནས་འཐུས་ཚོགས་མེད་པ་དང་སྨན་ཁང་ཁག་ཅིག་གི་འགྲོ་སོང་ལ་ས་ཡ་ ༤༥ ཞིག་འགྲོ་བཞིན་ཡོད་པ་རེད། ཅེས་གསུངས་སོང་བ་དང་འབྲེལ་ཏེ། སོ་སོ་སྒེར་གྱི་ཆེད་ཁོ་ན་ཙམ་མ་ཡིན་པར་བོད་སྤྱི་པའི་ཐོག་དཔལ་འབྱོར་གྱི་ནུས་པ་གཅིག་ཏུ་སྤུང་གལ་ཆེ་བ་དང་། སྒེར་གྱི་ལས་ཀའི་རྐྱེན་པས་བོད་སྤྱི་པའི་རྩ་དོན་ཆེད་གཞན་ཅི་ཡང་བྱེད་མ་ཐུབ་ཀྱང་། དཔྱ་ཁྲལ་དེ་ཏག་ཏག་ཅིག་ཕུལ་བ་ཡིན་ན་བོད་སྤྱི་པའི་དོན་ལ་ཕན་ཐོགས་ཀྱི་ཡོད་སྐོར་སོགས་གསུངས་སོང་།
ད་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་ཏུ་བྱུང་བའི་གནས་ཚུལ་ཐད་ཁོང་གིས། བོད་ནང་ཛ་དྲག་གི་གནས་ཚུལ་ཡོང་གི་ཡོད་དུས། ང་ཚོས་ལས་འགུལ་མང་པོ་སྤེལ་གྱི་ཡོད་ལ། བཀའ་སྤྱི་ལྷན་རྒྱས་ཀྱི་ཐོག་ནས་ལྡི་ལིར་གཞི་རྒྱ་ཆེ་བའི་ལས་འགུལ་ཞིག་སྤེལ་བ་རེད། སྐབས་དེའི་ང་ཚོའི་བསམ་བློ་ནི་བོད་པའི་སྤྱི་ཚོགས་འདི་དམངས་གཙོ་ཡིན་སྟབས། སོ་སོའི་ཆབ་སྲིད་ལངས་ཕྱོགས་འདྲ་མི་འདྲ་ཡོང་གི་ཡོད་ལ་ཡོང་དགོས་པའང་རེད། ཡིན་ནའང་། གཞི་རྒྱ་ཆེ་བའི་ལས་འགུལ་དེ་འདྲ་སྤེལ་སྐབས། སུས་གོ་སྒྲིག་གནང་གི་ཡོད་པ་ཡིན་ན། སྔོན་མ་ང་ཚོའི་དེར་སྐྱོན་བརྗོད་བྱས་ཡོད་པ་རེད་དེ། ཐབས་ལམ་ཡག་ཤོས་དེ་འཕྲེད་དར་སོགས་གཅིག་མཚུངས་འདྲ་བོ་ཞིག་འཁུར་ན་མ་གཏོགས་སྐད་འབོད་དེ་ཚོ་སྟངས་འཛིན་བྱེད་ཐུབ་རྒྱུ་ཁག་པོ་རེད། དེ་ཚོར་ལྷུག་ཙམ་གནང་བ་ཡིན་ནའང་ཚང་མར་དཀའ་ངལ་མི་འཕྲད་པའི་དཔེ་སྟོན་ཞིག་ཡོད་པ་རེད། ཡིན་ནའང་། གཞུང་འབྲེལ་མ་ཡིན་པའི་ཚོགས་པ་ཚོས་འདི་འདྲ་གནང་དགོས་པ་རེད་ཅེས་བཀའ་གཏོང་ཐུབ་པ་ཡོད་པ་མ་རེད། གཞུང་འབྲེལ་མ་ཡིན་པའི་ཚོགས་པ་ཁག་གིས་སོ་སོའི་ཕྱག་ལས་གནང་སྟངས་དེ་སོ་སོའི་འགྲོ་སྟངས་ཤིག་གི་འོག་ནས་འགྲོ་བཞིན་ཡོད་པ་རེད། ཡིན་ནའང་དེ་འདྲ་བྱུང་བ་ཡིན་ན་ཡག་པོ་ཡོད་པ་རེད་ཅེས་ཞུ་ཡི་ཡོད། ཅེས་གསུངས་སོང་།
འཕྲོད་བསྟེན་བཀའ་བློན་མཆོག་དང་འབྲེལ་བའི་གནས་ཚུལ་ཐད་ཁོང་གིས། ང་ཚོས་ཉམས་མྱོང་ག་རེ་ལེན་དགོས་པ་རེད་ཅེས་ལབ་ན། འཛིན་སྐྱོང་གིས་ཕྱག་ལས་ག་རེ་གནང་བ་ཡིན་ནའང་ཚད་དང་ལྡན་པ་ཞིག་གནང་དགོས་ལ། མང་ཆེ་བ་ཞིག་ཚད་དང་ལྡན་པ་ཞིག་ཡོང་གི་ཡོད་པར་ངོས་འཛིན་བྱེད་ཀྱི་ཡོད། གནས་ཚུལ་དེ་འདྲ་བྱུང་ནས་སྤྱི་ཚོགས་ནང་དུའང་བཀའ་མོལ་མང་པོ་བྱུང་བ་རེད་ལ། གྲོས་ཚོགས་ནང་ལའང་དུས་ཚོད་གང་ལ་གང་འཚམ་གཏོང་དགོས་པའི་གནས་སྟངས་བྱུང་པ་རེད། དེར་བརྟེན་ང་ཚོ་སྤྱི་པའི་འགན་འཁུར་མཁན་སུ་ཡིན་ནའང་སོ་སོ་ལྷག་བསམ་རྣམ་དག་ ཡིན་པ་ཞིག་ལ་སོ་སོས་ངོས་འཛིན་བྱེད་ཀྱི་ཡོད་པ་རེད། འོན་ཀྱང་། གཞན་པ་ཚོས་ག་འདྲ་ལྟ་ཡི་འདུག་སོ་སོའི་ལས་ཀར་སྐྱོན་དང་ནོར་འཁྲུལ་ག་རེ་ཡོང་གི་འདུག་དེ་ཚོར་སྐབས་སྐབས་སུ་དཔྱད་པ་བྱས། སོ་སོར་དྲི་བ་བཏང་ན། དེ་འདྲ་བའི་གནས་ཚུལ་ཡོང་མི་དགོས་པ་འདྲ་བོ་ཞིག་མཐོང་གི་ཡོད། གང་ལྟར་འཚོ་བྱེད་སྨན་ཁང་ནས་ཀོ་ལི་སྒར་དེ་ཚོར་ཞིབ་འཇུག་བྱེད་དགོས་བྱུང་བ་དང་། ལས་བྱེད་ཁ་ཤས་གནས་དབྱུང་གཏོང་དགོས་བྱུང་བ། ཡང་ལས་བྱེད་མང་པོ་ཕར་ཚུར་གནས་སྤོ་གཏོང་དགོས་པའི་གནས་སྟངས་བཅས་འཚོ་བྱེད་སྨན་ཁང་གི་གནས་ཚུལ་གྱི་བྱུང་རིམ་ཆ་ཚང་གི་ཐོག་ནས། ང་ཚོ་ལས་ཀྱི་སྣེ་མོ་བ་ཚོས་ཉམས་མྱོང་ལེན་དགོས་པ་དང་བསླབ་བྱ་ལེན་དགོས་པ་ཞིག་དང་། ལས་བྱེད་ནང་ལོགས་ཡིན་ནའང་སྤྱི་པའི་ལས་དོན་བྱེད་སྐབས་ལས་དོན་ཚགས་ཚུད་པོ་དང་གྲ་འགྲིག་པོ་ཡོང་དགོས་པ། ལྐོག་ཟ་རུལ་སུངས་དང་ངན་ཇུས་དེ་འདྲ་མེད་པའི་གནས་སྟངས་ཡག་པོ་བསྐྲུན་དགོས་པ་དེ་གལ་ཆེན་པོ་ཞེ་དྲགས་རེད་བསམ་གྱི་འདུག འཕྲོད་བསྟེན་བཀའ་བློན་མཆོག་གཅིག་པུའི་བཀའ་མོལ་མ་རེད། གནས་ཚུལ་སྤྱི་ཡོངས་ནས་དེ་འདྲ་མ་ཡོང་བ་དང་སོ་སོའི་ལས་འགན་ཡག་པོ་བསྒྲུབ་དགོས་པ་དེ་གནད་དོན་གལ་ཆེན་པོ་རེད་བསམ་གྱི་འདུག ཅེས་གསུངས་སོང་།
དམངས་གཙོའི་འགྲོ་ལུགས་ཀྱི་ཐོག་ནས་ཇོ་ནང་ལ་སྤྱི་འཐུས་གཉིས་ཀྱི་ཞབས་སྟེགས་མ་ཐོབ་པའི་སྐོར་ལ་ཁོང་གིས། ཁྲིམས་བཟོའི་ལས་དོན་དང་འབྲེལ་བའི་ཐོག་ནས་ང་ཚོས་རྒྱ་བལ་འབྲུག་གསུམ་འཕུད་པའི་ཨེ་ཤ་ཡ་དང་ཨོ་སི་ཊོ་ལེ་ཤི་་ཡའི་ཁུལ་དུ་ང་ཚོས་སྤྱི་འཐུས་གཅིག་གི་གོ་སྐབས་སྤྲོད་ཐུབ་ཡོད་པ་རེད། ང་རང་ཚོའི་གྲོས་ཚོགས་ནང་ནས་གང་ཐག་བཅད་པ་ཡིན་ནའང་དམངས་གཙོའི་ལམ་ལུགས་གཞིར་བཟུང་བྱས་ཏེ་ཐག་གཅོད་ཀྱི་ཡོད་པ་རེད། ཚོགས་འདུ་དབུ་འབྱེད་སྐབས་ལའང་ཞུས་པ་ཡིན། དམངས་གཙོའི་ལམ་ལུགས་གཞིར་བཟུང་གིས་ཐག་བཅད་ནས་འགྲོ་གི་རེད་དཱ། དེས་ཐོན་པ་དང་མ་ཐོན་པའི་གནས་སྟངས་ཀྱི་འོག་ནས་སྤྱི་ཚོགས་ནང་འཁྲུག་རྐྱེན་མ་ཐེབས་པ་ཞིག་ལ་ང་ཚོ་ཚང་མས་བསམ་བློ་གཏོང་དགོས་པ་རེད་ཅེས་ཞུས་པ་ཡིན། དེ་རིང་གྲོས་ཚོགས་མཇུག་བསྡུ་བའི་སྐབས་འདིར། ཇོ་ནང་པར་སྤྱི་འཐུས་ཀྱི་ཐོབ་ཐང་སྤྲད་མ་སོང་ཟེར་བའི་རྣམ་འགྱུར་ཞིག་བསྟན་ཏེ་གྲོས་ཚོགས་ཕྱི་ལོགས་སུ་བཞུགས་བསྡད་ཡོད་པ་རེད། ཁོ་རང་ཚོས་དགོས་འདུན་དོན་ཚན་ ༤ བཏོན་འདུག དེའི་ནང་གཞིས་བྱེས་བོད་མི་ཁྲི་ཕྲག་མང་པོས་ལོ་ ༡༨ ལྷག་གི་རིང་ལ་སྙན་ཞུ་བརྒྱ་ཕྲག་ཕུལ་བ་རྩིས་མེད་གཏོང་དགོས་དོན་ག་རེ་ཡིན་གསལ་བཤད་དགོས་ཀྱི་ཡོད་ཅེས་ཞུ་ཡི་ཡོད་པ་རེད། གནད་དོན་འདི་ང་ཚོ་སྤྱི་འཐུས་ཚང་མ་དང་མང་ཚོགས་ནང་མ་མཁྱེན་པ་གང་ཡང་ཡོད་པ་མ་རེད། ང་ཚོ་དམངས་གཙོའི་ལམ་སྲོལ་ཞིག་ལ་ཕྱིན་པ་རེད། ཕུལ་མ་ཐུབ་པ་དེ་མ་ཐུབ་པ་རེད། མ་འོངས་པར་ཁོ་རང་ཚོས་ཞུ་སྐུལ་བྱེད་སྟངས་དེ་ཚོ་ཚད་དང་ལྡན་པ་བྱས་ཏེ་ལམ་ཁ་ཞིག་གཏོད་ཐུབ་ཀྱི་ཡོད་པ་ཡིན་ན་རྗེས་མ་གཟིགས་རྒྱུ་རེད། དེ་མ་གཏོགས་འདིའི་སྒང་ལ་དམིགས་བསལ་ཅི་ཡང་ཞུ་རྒྱུ་མི་འདུག དགོས་འདུན་དོན་ཚན་གཉིས་པའི་ནང་ས་སྐྱའི་སྤྱི་འཐུས་ག་ཟི་དགེ་བཤེས་ཚེ་རིང་པོས་གཙོས་ཆོས་བརྒྱུད་སྤྱི་འཐུས་རྣམ་པས་༧གོང་ས་མཆོག་གི་བཀའ་སློབ་དང་བོད་ཀྱི་ཆོས་བརྒྱུད་ཁག་གི་བླ་ཆེན་རྣམས་ཀྱིས་ཇོ་ནང་པར་རྒྱབ་གཉེར་གནང་བའི་ཡིག་ཆ། དེ་བཞིན་ཆོས་ཚོགས་ཐེངས་ ༡༤ པའི་གྲོས་ཆོད་རྩིས་མེད་བཏང་དོན་ཅི་ཡིན་གསལ་བཤད་བྱ་དགོས་ཞེས་པ་དེར་ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ལན་རྒྱག་ཐབས་ཡོད་པ་མ་རེད། ཅེས་དང་གསུངས་སོང་།
ཁོང་གིས་མུ་མཐུད་དུ། དགོས་འདུན་དོན་ཚན་གསུམ་པ་ཐེངས་འདིའི་གྲོས་ཚོགས་ཐོག་དྲང་བདེན་མིན་པའི་ཐག་ གཅོད་ལ་ངོས་ལེན་མེད་པ་མ་ཟད། བགྲོ་གླེང་ཙམ་ཡང་མ་བྱས་པར་རྩིས་མེད་གཏོང་དོན་ཅི་ཡིན་གསལ་བཤད་བྱ་དགོས་ཞེས་པ་དེར་ངས་ཁ་སང་གྲོས་ཚོགས་ནང་གསལ་པོ་ཞུས་པ་ཡིན། ང་རང་ཚོའི་གྲོས་ཚོགས་ཀྱི་ལས་རིམ་དེ་བཀུར་འོས་སྤྱི་འཐུས་ཚང་མས་མཁྱེན་གྱི་ཡོད་པ་དང་། ལྷག་པར་དུ་ཁྲིམས་བཟོའི་སྐབས་ཨང་དང་པོ་ཁྲིམས་འཆར་འདོན་མཁན་དང་རྒྱབ་སྐྱོར་བྱེད་མཁན་གྱིས་སྙན་སྒྲོན་ཞུ་རྒྱུ་དང་། དེ་ནས་ཚུད་དང་མ་ཚུད་ལྟ་རྒྱུ། ཆེད་མངགས་དོ་དམ་པོ་ཡོང་བར་བརྗོད་པ་དང་པོ་དང་བརྗོད་པ་གཉིས་པ། བརྗོད་པ་གསུམ་བྱས་ནས་འགྲོ་ཡི་ཡོད་པ་རེད། བརྗོད་པ་གཉིས་པའི་སྐབས་ལ་གསུང་དགོས་པ་ཡོད་ན་ཕྱག་བརྐྱང་དགོས་པ་རེད། གང་ཡིན་ཟེར་ན། ཁ་སང་ལས་རིམ་རྣམ་གཞག་ཅིག་ཕེབས་པ་རེད། ལས་རིམ་རྣམ་གཞག་ཕེབས་སྟངས་དེར་ཚོགས་གཙོ་འདོད་པ་ཁེངས་པོ་མ་བྱུང་ཞུ་རྒྱུ་ཡིན། ལས་རིམ་རྣམ་གཞག་གནང་མཁན་སྤྱི་འཐུས་ཀྱིས་ཀྱང་གྲོས་ཚོགས་ནང་ཞུས་ཡོད་པ་རེད། གཅིག་བྱས་ན་འདིའི་རྒྱུ་མཚན་ལ་བརྟེན་ནས་བསམ་ཚུལ་དེ་བསླེབས་མེད་འགྲོ་བསམ་བསམ་ཞིག་ཡོང་གི་འདུག ཡིན་ནའང་། བརྗོད་པ་གཉིས་པའི་སྐབས་ལ་སོ་སོས་ཕྱག་མ་བརྐྱངས་བ་དང་གཏན་འབེབས་བྱས་ཚར་རྗེས། གཞི་ནས་ལས་རིམ་རྣམ་གཞག་བཏོན་ཡོང་དུས། སོ་སོའི་ནོར་འཁྲུལ་དེ་ཕར་བཀབ་ནས་ཚོགས་གཙོའི་མ་འགྲིག་པའི་རྣམ་པ་འདྲ་བོ་ཞིག་སྟོན་ཡོང་དུས་དེ་ཏག་ཏག་བསྡད་ཀྱི་མི་འདུག་ཞུ་འདོད་བྱུང་། ཚོགས་གཙོའི་ངོས་ནས་བགྲོ་གླེང་བྱེད་རྒྱུ་བཀག་མེད། བཀུར་འོས་སྤྱི་འཐུས་རྣམ་པས་བགྲོ་གླེང་མ་གནང་བ་ཡིན་ན། ཚོགས་གཙོས་ཁྱེད་རང་ཚོར་གསུང་རྒྱུ་ཡོད་དམ་ཞེས་ཕར་སྐད་ཆ་དྲིས་བསྡད་པ་ཡིན་ན་དེའང་ཚོགས་གཙོའི་ཐོག་ནས་ཏག་ཏག་བསྡད་ཡོད་པ་མ་རེད། ཅེས་སོགས་གསུངས་སོང་།
གསར་འགོད་པ། པདྨ་མཚོ།
བཀའ་དྲིན་ཆེ་ཚོགས་གཙོ་ལགས། ཁྱོད་ཀྱིས་འོབ་རྒྱལ་མྱོང་སོང་། གླུན་རྨོངས་པ་གླང་མགོ་དག་གི་ཁྲོད་ནས་ཁྱོད་ཀྱིས་དཀའ་ལས་མྱོང་སོང་། ཁྱོད་ཀྱི་མཛད་འཕྲིན་སྔ་ཕྱི་དག་ལ་དོ་བསྡོ་བར་འདོད་མཁན་སུ་གང་མེད་ཀྱང་། ཁྱོད་ཀྱི་ཤེས་འཇོན་ཀྱི་ནུས་པ་མར་གཅོག་འདོད་ཀྱི་ཕྲོག་དོག་དུག་གི་མཆེ་མང་པོ་ཞིག་གིས་ཁྱོད་ལ་དཀའ་ལས་གཏད་སོང་།
ཁག་ཅི་ལ་ཡོད། ཁྱོད་ཀྱི་རྒྱབ་མདུན་ན་ལག་པས་སྐྱོར་མཁན་གྱི་དཔུང་རོགས་མེད། ཁྱོད་ཀྱི་རྒྱབ་ལོག་ན་ཆོལ་ཀ་ཞིག་སྟོབས་ཤུགས་མེད། ཁྱོད་ཀྱི་རྒྱབ་མདུན་ན་ཚོགས་པ་གང་ཞིག་གི་ཆེད་གཉེར་དངུལ་ལོར་གྱི་ཡོང་ཁུངས་མེད། ཁྱོད་ཀྱིས་དཀའ་ལས་མྱོང་སོང་།
གལ་སྲིད་སྐུ་ཉིད་ལ་མདོ་སྟོད་ཆོལ་ཀ་ལྟ་བུའི་གཅིག་རྒྱབ་གཅིག་གྲོགས་ཀྱི་དཔུང་ཚོགས་ཡོད་ན། གལ་སྲིད་སྐུ་ཉིད་ལ་དབུས་གཙང་ཆོལ་ཁ་ལྟ་བུའི་མི་འབོར་དཔུང་ཤུགས་ཀྱི་ནུས་པ་ཡོད་ན། ཐེངས་འདིའི་མ་ཉེས་ཁ་གཡོག་གི་ཉེས་འཛུགས་འདི་ཁྱོད་ལ་ཕོག་ཐུབ་མེད། ཐེངས་འདིའི་སྐྱུག་བྲོའི་ཟློས་གར་འདི་བསྐྱར་འཁྲབ་དགོས་དོན་མེད།
ཁག་ཅི་ལ་ཡོད། ཁྱོད་ཉིད་མདོ་སྨད་པ་ཞིག་ཡིན་པས་རེད། ཁྱོད་ཉིད་མདོ་སྨད་ཀྱི་སྤྱི་འཐུས་ཤིག་ཡིན་པས་རེད། ཁྱོད་ཀྱི་ལས་དྲང་མི་འདུག ཚོགས་གཙོ་ལགས།
ཟླ་བྷེ་ལགས་ཀྱི་རྣམ་འགྱུར་དྲང་མོད། རྒྱལ་སྲིད་རྩིས་སྤྲོད་གནང་སྐབས་ཀྱི་དབུ་ཁྲིད་དུ་འཁེལ་བ་ཙམ་གྱིས་ཕྱག་གཡས་གཡོན་ཆགས་པའི་ངེས་པ་མ་ཁྱོན་ནས་མེད་པ་དེ་ཐུགས་ལ་འཛིན་རོགས། སྲིད་སྐྱོང་ལུ་གུ་རྒྱུད་དུ་བྱོན་དགོས་ནའང། ཕྱག་གཡས་གཡོན་གྱི་ཀ་ཆེན་ལྟར་བགྲང་ཆོག་པ་རེ་གཉིས་ཙམ་ལས་ཡོང་མདོག་ཁ་པོ་མ་རེད། ཡུལ་ལུང་གཞན་ལའང་སྲིད་འཛིན་གྱི་མིང་ཐོགས་ཚད་བྱས་ཅན་མིན་པ་བཤད་མི་དགོ་བཤམས་བཞག་ཡོད་པའི་དོན་དངོས་ཤིག་རེད། དེའི་ཆ་ནས་ཆབ་སྲིད་དང་ཐད་འབྲེལ་ཡོད་པའི་བཀའ་མོལ་འདི་དག་ཚོར་བས་བེད་ལོག་ཏུ་སྤྱད་ན་འབྲས་བུ་ངན་པ་འབྱུང་གི་རེད། སྤྱར་ཀིར་རྣ་ཙོར་འདོག་གི་རེད།
བཛྲ་སུ་མ་ཏི་ལགས་ལེགས་སོ།། ཡིན་དང་ཡིན།
ཡ་ཡ་དྲ་གྲོགས་འདྲེ་མགོ་རྡོས་ལགས་ཀྱིས་ལམ་སྟོན་གནང་བར་བཀའ་དྲིན་ཆེ། གུས་པའི་འདིར་རང་གི་བཤད་འདོད་པ་དག་རིག་གནས་ཀྱི་བཀག་རྒྱའི་འོག་ཕ་རོལ་པོ་ལ་བརྡ་གསལ་བོ་ཞིག་སྤྲོད་མ་ཐུབ་པར་དགོངས་དག་ཞུ་རྒྱུ་དང་། སྤྱིར་སངས་རྒྱས་ཀྱི་མཛད་པ་དང་སོ་སྐྱེ་ཡི་འཇོན་ཐང་གཉིས་བསྡུར་ཐབས་རྩ་བ་ནས་མེད་པ་གུས་པའི་ཡང་ཤེས་ཡོད། བྱེ་བྲག་བོད་ཀྱི་ཆབ་སྲིད་ཀྱི་ཐད་ནས་བཤད་ཀྱིན་ཡོད། ༧གོང་ས་སྐྱབས་མགོན་ཆེན་པོ་མཆོག་གིས་གང་ཉིད་ཀྱི་ཆེས་མཐོའི་ཆབ་སྲིད་སྐུ་དབང་དང་། མི་ལོ་སུམ་བརྒྱ་ལྷག་གི་དགའ་ལྡན་ཕོ་བྲང་གི་སྲིད་སྟེགས་དབང་ཚད་ཡོངས་སུ་རྫོགས་པ་དུས་བསྟུན་ཉེར་མཁོ་ཡི་གཟིགས་པ་ཆེན་པོས། བོད་མི་མང་གིས་འོས་འདེམས་བརྒྱུད་ཐོན་གྱི་དབུ་ཁྲིད་ལ་རྩིས་སྤྲོད་གནང་བ་ནས་བཟུང་། གུས་དམན་ཁོ་བོས་དེ་ལྟར་ངོས་འཛིན་བྱེད་བཞིན་ཡོད་ཞུ་བ་ལགས།
ཟླ་བྷེ་ལོ་ལོ། ༧གོང་ས་མཆོག་འཛམ་གླིང་ནང་མཚན་སྙན་འབར་བ་ཁོང་གི་བླ་ན་མེད་པའི་ཐུགས་དགོངས་དང་འཛམ་གླིང་སྐྱེ་འགྲོ་ཡོངས་ལ་གཅིག་གྱུར་ཀུན་ཁྱབ་ཀྱི་ཚད་མེད་སྙིང་རྗེ་སོགས་མཁྱེན་རབ་འབར་བའི་འཇོན་ཐང་རེད་མ་གཏོགས། ཕྱག་གཡས་གཡོན་ཡིན་ཟེར་མཁན་འདི་དག་ལ་བསྟེན་ནས་བྱུང་བ་གང་ཡང་མ་རེད།
ཟླ་བྷེ་ལོ་ལོ། ༧གོང་ས་མཆོག་འཛམ་གླིང་ནང་མཚན་སྙན་འབར་བ་ཁོང་གི་བླ་ན་མེད་པའི་ཐུགས་དགོངས་དང་འཛམ་གླིང་སྐྱེ་འགྲོ་ཡོངས་ལ་གཅིག་གྱུར་ཀུན་ཁྱབ་ཀྱི་ཚད་མེད་སྙིང་རྗེ་སོགས་མཁྱེན་རབ་འབར་བའི་འཇོན་ཐང་རེད་མ་གཏོགས། ཕྱག་གཡས་གཡོན་ཡིན་ཟེར་མཁན་འདི་དག་ལ་བསྟེན་ནས་བྱུང་བ་གང་ཡང་མ་རེད།
མགོ་ལོག་ཟླ་བྷེ་ཟེར་བ་ལགས། བསྟོད་མི་ཤེས་པས་བསྟོད་པ་ལས། ཟེར་བ་ལས་བོད་ཀྱི་གཏམ་དཔེ་ལྟར། སྐད་ཆ་ཆེན་པོ་བཤད་རྕིས་རྐྱང་བྱེད་པ་དེ། ཁོར་ཡུག་གིས་ངན་ལངས་ལ་བཏང་བའི་ཆ་རེད། ཁྱོས་སྐད་ཅ་བཤད་ས་འདི་ཁུག་ཀྱོག་ཅིག་མ་རེད། བོད་ཀྱི་དུས་བབ་དྲ་ངོས་རེད། ཆོལ་གསུམ་བོད་མི་ཤེས་ཡོན་ཅན་ངོ་མ་ཚོས་གཟིགས་སའི་ཡུལ་རེད། དེ་བས་ཚོགས་གཙོ་དང་སྲིད་སྐྱོང་རྣམ་གཉིས་༧གོང་ས་ཆེན་པོའི་ཕྱག་གཡས་གཡོན་ཆགས་མེད་པ་འཇིག་རྟེན་ཀུན་གསལ་རེད། ཐ་ན། ཕྱག་མཛུབ་ཅིག་གི་དཔེ་རུ་བཀོད་ཆོག་པའི་འཇོན་ཐང་གང་ཡང་ད་བར་བྱུང་མེད་པ་ཤེས་པར་གྱིས། ཤེས་ནས་སྨྲ་བའི་ལུགས་སུ་ཨུ་ཚུགས་བྱེད་རོགས།།
ཤེས་འཇོན་ལྷག་བསམ་དང་ལྡན་པའི་གཞོན་སྐྱེས་དབུ་ཁྲིད་དཔལ་ལྡན་སྲིད་སྐྱོང་མཆོག་དང་ཚོགས་གཙོ་མཆོག་རྣམ་པ་གཉིས་ནི་༧གོང་ས་སྐྱབས་མགོན་ཆེན་པོ་མཆོག་གི་ཕྱག་ལག་གཡས་གཡོན་དང་། གཞིས་བྱེས་བོད་མི་ཡོངས་ཀྱི་སྤྱན་མིག་གཡས་གཡོན་དང་འདྲ་བར་གཞན་ལ་ཡོད་ན་སྨོན་རྒྱུ་དང་། རང་ལ་ཡོད་ན་ངོམ་རྒྱུའི་མི་དབང་གཉིས་ཡིན་པ་བཤད་མ་དགོས་ལ་དགའ་སྤོབས་སྐྱེ་དགོས་པ་ཞིག་ནི་ཁོང་རྣམ་པ་གཉིས་པོ་ཐུགས་མཐུན་དམ་གཙང་གིས་རྡོག་རྩ་གཅིག་སྒྲིལ་ཡིན་འདུག་པས་བསམ་སྤྱོད་མ་རུངས་བ་དག་གིས་འགལ་བ་འཕེན་མི་ཐུབ་པ་ངེས་པས་ཤིན་ཏུ་དགའ་ཡོད། ཐེངས་འདིའི་གྲོས་ཚོགས་ཀྱི་བརྙན་རིས་དྲ་ལམ་ལ་ཡོང་ཚད་པོ་མགོ་ནས་མཇུག་བར་དུ་བལྟས་པ་ཡིན། བོད་མི་མང་སྤྱི་འཐུས་རྣམ་པས་མྱི་ངོ་དང་གནས་ལུགས་མི་བརྗེ་བའི་ཐོག་ནས་མི་མང་གི་ཚབ་ཡིན་པ་མ་བརྗེད་པར་གནད་འགག་ཅན་གྱི་དྲི་བ་དག་དང་། སྲིད་སྐྱོང་མཆོག་གིས་རྣམ་དཔྱོད་ཡངས་ཤིང་རྒྱུ་མཚན་ལྡན་པའི་བཀའ་ལན་རེ་རེ། གཞན་ཕྱག་རོགས་བཀའ་བློན་རྣམ་པ་ཚོས་རང་རང་གི་ཕྱག་ལས་དང་འབྲེལ་བའི་དྲིས་ལན། ལྷག་པར་དུ་ནང་སྲིད་བཀའ་བློན་རྒྱ་རི་སྒྲོལ་མ་ལགས་ཀྱིས་གཟི་བརྗིད་ལྡན་ཞིང་ཁ་ཚ་དགོས་གཏུགས་ཀྱིས་དམངས་ཕན་གཞུང་བརྟན་ཅན་གྱི་ཕྱག་ལས་ཁག་གི་གཞི་ལམ་འབྲས་གསུམ་ངོས་སྤྱོར་གསལ་བཤད་དང་དྲིས་ལན་དག མང་གཙོ་ཡང་དག་གི་ལམ་ལུགས་ལྟར་སྤྱི་མོས་དང་མང་མོས་ཀྱིས་གྲོས་ཆོད་ཁག ཚོགས་གཙོ་གཞོན་གཉིས་ཀྱིས་འཇུག་ལྡོག་མཁས་པོས་སྟངས་འཛིན་གྱི་རིམ་པ། སྦྲེལ་པོའི་ཐུགས་འདུན་མཚོན་པའི་ཚོགས་གཙོའི་མཇུག་སྡོམ་གསུང་བཤད།བཅས་ཀྱིས་བོད་མི་བོད་སེམས་ཅན་དག་ལ་དགའ་སྤོབས་གསར་བ་ཞིག་དང་། ཡིས་ཆེས་འཕར་མ་ཞིག རེ་བ་གསོན་པོ་ཞིག་བཅས་སྐྲུན་སོང་བས་བཀའ་དྲིན་ཤིན་ཏུ་ཆེ་ཞུ། དེ་མིན་ཉིན་བཞི་བའི་གཏམ་ངན་བཤད་ཚེགས་དེ་ལ་བསམ་ཚུལ་ཞིག་གཞན་དུ་བཤད་ཡོད་པས་འཐུས་ལ། ཚོགས་འདུ་སོགས་ནས་གོ་སྐབས་ནམ་རག་ལ་ཁོང་གཉིས་ཆ་ལ་དྲི་བ་ཚ་བོས་རྒྱུ་མ་ཕུ་འདེད་བྱེད་རྩིས་ཡོད། ཧ་ཅང་སྟབས་མ་ལེགས་པ་ཞིག་ལ་དཔལ་རྒྱལ་བ་ཇོ་ནང་བ་ལ་བོད་ཀྱི་ཆོས་བརྒྱུད་གཞན་དང་གཅིག་མཚུངས་ཀྱིས་ཐོབ་ཐང་མ་རག་པ་དེ་རེད། དེ་ཡིས་བཀྲ་མ་ཤིས་པ་གཞན་ཞིག་འདྲེན་ཨེ་ཡོང་ན་བསམ་པའི་བློ་ཚབ་ཡང་ཆེན་པོ་འདུག ཇོ་ནང་བ་ཚོ་ལ་ངོ་མ་ཐུགས་ཁག་མེད། གདུང་སེམས་མཉམ་སྐྱེད་ཡོད། ཡིན་ཡང་མང་གཙོའི་འགྲོ་སྟངས་ལྟར་སྤྱི་འཐུས་སྒེར་བ་སྐོར་ཞིག་གིས་རྒྱབ་སྐྱོར་མ་བྱས་པའི་ཉེར་ལེན་གྱིས་བྱུང་བ་ལས་བཙན་བྱོལ་བོད་མིའི་སྒྲིག་འཛུགས་སྤྱི་ཡི་ནག་ཉེས་མིན་པས་དེ་ལུགས་ཐུགས་ལ་ངེས་རྒྱུ་གཞིས་བྱེས་ཇོ་ནང་བ་ཡོངས་ལ་རེ་ཞུ་ཙམ་ཞིག་ཀྱང་ཡིན།
ད་རེས་སྤྱི་འཐུས་ཀྱི་ཚོགས་འདུའི་འགོ་མཇུག་བར་གསུམ་གྱི་གནས་ཚུལ་ཧང་སང་པ་སྤེལ་སོང་བས་བོད་ཀྱི་དུས་བབ་ཀྱི་མགོ་ལས་ཡོངས་ལ་སྙིང་ཁུངས་རུས་པའི་གཏིང་ནས་བཀྲ་ཤིས་བདེ་ལགས་ཐུགས་རྗེ་ཆེ་ཞུ་འདོད་བྱུང་སོང་། ཉི་མ་རེ་རེའི་གནད་ཆེའི་གསར་འགྱུར་ཁ་གསལ་ཚིག་གསལ་དག་ཀློག་ནས་ཡོང་བའི་སྐབས་སུ་དུས་བབ་ཚང་གི་རྩོམ་སྒྲིག་པ་ཆེན་མོ་དོན་གྲུབ་བཀྲ་ཤིས་མཆོག་གི་ཞལ་དངོས་སུ་མཇལ་སྙིང་འདོད་པའི་སེམས་ཀྱི་ཚོར་བ་དྲག་པོ་ཞིག་ཀྱང་རང་དབང་མེད་པར་སྐྱེས་སོང་བས་ཁྱེད་རྣམས་པ་ལྷན་རྒྱས་མཆོག་ང་ཚོས་ཕན་ཚུན་ངོ་མི་ཤེས་ཀྱང་སེམས་བསམ་བློའི་ནང་ནས་དུས་ནམ་ཡང་བརྩེ་བ་དང་དུང་བ་ཧ་ཅང་གཏིང་ཟམ་མོ་ཞིག་འཆིང་ཡོད་པས་མུ་མཐུད་དུ་འབད་བརྩོན་གནང་རོགས་གནང་ཞུ་བཞིན་ཡོད།
དཔལ་ལྡན་ཚོགས་གཙོ་མཆོག་གི་ཚོགས་གཙོའི་མཚན་དོན་དང་མཚུངས་པའི་མཇུག་སྡོམ་གསུང་བཤད་ལ་ཡི་རངས་ཞུ། དབུ་ཁྲིད་ངོ་མའི་ཁྱད་ཡོན་འབར་བཞིན་པའི་དན་རྟགས་གསལ་བོ་འདུག
ལག་དེབ་ལྗངས་ཁུའི་དཔྱ་ཁྲལ་འབུལ་རྒྱུ་མིན་ཟེར་ལོ་ཤས་སྔོན་ནས་ཐག་བཅད་ཕུལ་མེད། རྒྱུ་མཚན་གང་ཡིན་ཟེར་ན་དཔྱ་དངུལ་དེའི་རྒྱ་ནག་དམར་ཕྱོགས་ཚོགས་པ་ལ་རྒྱབ་སྐྱོར་བྱེད་ཀྱི་མིན་ཟེར་བ་ཡིན།
དཔྱ་ཁྲལ་འབུལ་རྒྱུ་ཡིན་།སྔོན་མ་དང་མ་འདྲ་བར་དེ་རིང་རྩིས་ཁྲ་རྙོག་གླེང་གྲོས་ཚོགས་ར་བ་ནང་གླེང་མོལ་བྱས་པ་དང་སྤྱི་འཐུས་ཁག་ཅིག་གི་ཕྱག་ལས་ཡག་པོ་གནང་འདུག་པ་ལེགས་བརྗོད་ཞུ།
སྲིད་སྐྱོང་མཆོག་དང་གྲོས་ཚོགས་ཚོགས་གཙོ་མཆོག་གཉིས་དངོས་ནས་༸གོང་ས་མཆོག་གི་ཕྱག་གཡས་གཡོན་རེད་ཟེར་ན་འགྲིག དངོས་ནས་འཇོན་པོ་གཉིས་འདུག ཁྱེད་གཉིས་ཀྱིས་རྩ་དོན་མདུན་ལ་སྤུངས་ནས་གཅིག་ཕན་གཅིག་གྲོགས་གནང་རོགས་ཞུ་ཡི་ཡོད།ཆོས་ཕྱོགས་ནས་བཤད་ན་བླ་མའི་ཐུགས་དགོངས་སྒྲུབ་ཡ་དེ་ལས་ལྷག་ཅིག་གང་དུ་ཡོད། ཆབ་སྲིད་ཐོག་བོད་མི་དམངས་ཀྱི་རེ་འདུན་དེ་ལས་ལྷག་ཅིག་གང་དུ་ཡོད།