ཨོ་བྷ་མ་ཕ་ཡུལ་ལ་སྐོར་སྐྱོད་བྱ་རྒྱུ་རེད་ཟེར།

ཨ་རིའི་སྲིད་འཛིན་ཨོ་བྷ་མ་འབྱུང་འགྱུར་ཕྱི་ཟླ་བདུན་པའི་ནང་ཁོ་རང་གི་ཨ་ཕའི་སྐྱེས་ཡུལ་ཁེན་ཡཱའི་ནང་སྐོར་སྐྱོད་བྱ་རྒྱུ་ཡིན་འདུག

ཁ་སང་ཨ་རིའི་ཕོ་བྲང་དཀར་པོས་གསལ་བསྒྲགས་སྤེལ་བའི་ནང་། ཨ་རིའི་སྲིད་འཛིན་ཨོ་བྷ་མ་འབྱུང་གྱུར་གྱི་ཕྱི་ཟླ་ ༧ པའི་ནང་ ༢༠༡༥ ལོའི་འཛམ་གླིང་ཚོང་དོན་ཚོགས་འདུ་ (global entrepreneurship summit) ཞེས་པའི་སྟེང་ཚོགས་ཞུགས་བྱ་རྒྱུ་ཡིན་འདུག་ལ། སྐབས་དེ་དང་བསྟུན་ཏེ་ཁོའི་ཨ་ཕའི་སྐྱེས་ཡུལ་ཁེན་ཡཱ་ (Kenya)གཞུང་གི་མི་སྣར་ཐེངས་དང་པོར་ཐུག་འཕྲད་བྱ་རྒྱུ་ཡིན་འདུག ཨོ་བྷ་མ་ཐེངས་འདིར་ཁེན་ཡཱའི་ནང་སྐོར་སྐྱོད་བྱེད་འཆར་ཡོད་པ་དེ་ནི་ཁོ་སྲིད་འཛིན་དུ་བསྡད་རྗེས་ཀྱི་སྐོར་སྐྱོད་ཐོག་མ་དེ་ཆགས་ཡོད་འདུག

ཁ་སང་སེ་ཨན་ཨན་ (CNN)གྱིས་གནས་ཚུལ་སྤེལ་བ་ལྟར་ན། ཐེངས་འདིའི་སྲིད་འཛིན་ཨོ་བྷ་མ་ཨ་ཧྥི་རི་ཀའི་ས་ར་ཧྭ་ཆུང་བ་ (sub-Saharan Africa)ལ་སྐོར་སྐྱོད་བྱེད་འཆར་ཡོད་པ་དེ་ནི་ཐེངས་བཞི་བ་དེ་ཡིན་པ་དང་། ཁོང་གི་ཐེངས་སྔོན་མའི་སྐོར་སྐྱོད་དེ་ ༢༠༡༣ ལོའི་ཟླ་ ༡༢ ནང་ནེལ་སེན་མན་ཌྷ་ལ་ (Nelson Mandela) ཡི་འདས་མཆོད་སྟེང་ཕེབས་ཡོད་པ་དང་། ༢༠༡༣ ལོའི་དབྱར་ཁར་ཨོ་བྷ་མ་སན་ནེ་གྷལ་ (Senegal) དང་ལྷོ་ཨ་ཧྥི་རི་ཀ་ (South Africa)། ཁྲེན་ཛཱ་ནེཡཱ་ (Tanzania) བཅས་སུ་སྐོར་སྐྱོད་སྐབས་ཨ་རི་གཞུང་གིས་ཨ་ཧྥི་རི་ཀའི་དཔལ་འབྱོར་གོང་འཕེལ་དང་དམངས་གཙོའི་སྒྲིག་འཛུགས། གཞོན་སྐྱེས་མགོ་ཁྲིད་ཚོའི་ཡར་རྒྱས་གཏོང་ཕྱོགས་བཅས་ཀྱི་ཐོག་རོགས་རམ་གནང་རྒྱུའི་ཁས་ལེན་བྱས་ཡོད་འདུག

ཨ་རིའི་ཕོ་བྲང་དཀར་པོའི་ཕྱོགས་ནས་གསར་ལམ་ཐོག ལོ་འདིའི་དབྱར་ཁར་སྲིད་འཛིན་ཨོ་བྷ་མ་ཁེན་ཡཱ་ལ་སྐོར་སྐྱོད་བྱ་རྒྱུ་དེ་ཨོ་བྷ་མ་སྔོན་ཆད་ཁོ་རང་སྒེར་གྱི་སྐོར་སྐྱོད་ཙམ་ཡིན་པ་ལས། ནང་མི་དང་ཐུག་འཕྲད་སོགས་ཀྱི་ལས་རིམ་གང་ཡང་ད་སྔ་གོ་སྒྲིག་མེད་སྐོར་བརྗོད་ཡོད་འདུག

ཁ་སང་དབྱིན་ཇིའི་ལྟ་སྐྱོང་(theguardain) ཞེས་པའི་དྲ་བའི་སྟེང་། ཨོ་བྷ་མ་ཐོག་དང་པོར་ ༡༩༨༧ ལོར་ཁེན་ཡཱའི་ནང་སྐོར་སྐྱོད་བྱས་སྐབས་ཁོས་ཨ་ཕའི་ཁྱིམ་རྒྱུད་རྩད་གཅོད་བྱས་ཏེ། ༡༩༩༥ ལོར་ཁོས་ཟིན་བྲིས་བཀོད་པའི་“ངའི་ཨ་ཕའི་རྨི་ལམ་” (Dreams From My Father)ཞེས་པའི་དེབ་ཅིག་དཔར་བསྐྲུན་བྱས་ཡོད་འདུག

ད་ལྟའི་ཨ་རིའི་སྲིད་འཛིན་ཨོ་བྷ་མའི་ཨ་ཕ་བྷི་རེ་ཁུ་ཧོ་སིན་ཨོ་བྷ་མ་སའུ་ (Barack Hussein Obama, Sr.) ནི་ཕྱི་ལོ་ ༡༩༣༦ ལོར་ཁེན་ཡཱ་ནས་སྐྱེས་ཤིང་ས་དེ་གར་འཚར་ལོངས་བྱུང་ཡོད་པ་དང་། ༡༩༥༠ ནས་ ༡༩༦༠ ལོའི་བར་ཨ་རིར་བཅའ་སྡོད་བྱས་ཡོད་ལ། དེའི་རྗེས་ཁོ་ཕ་ཡུལ་ཁེན་ཡཱ་ལ་ཕྱིར་ལོག་ཡོད་འདུག ༡༩༨༢ ལོར་རླངས་འཁོར་དོན་རྐྱེན་ཞིག་གི་འོག་ཏུ་རྐྱེན་ལམ་ཏུ་ཤོར་ཡོད་འདུག

ཨོ་བྷ་མ་ཧྭ་ཝ་ (Hawaii)ནས་སྐྱེས་ཡོད་པ་དང་། ཁོང་གི་སྐྱེས་ཚེས་ལག་འཁྱར་སྐོར་ཕོ་བྲང་དཀར་བོའི་དྲ་ཚིགས་ནས་རྩད་ཞིབ་བྱ་ཐུབ་ཀྱང་། ལྐོག་ཇུས་བྱེད་མཁན་ཚོས་ཨོ་བྷ་མ་སྲིད་འཛིན་དུ་མ་བསྡད་སྔོན་ནས་ཨོ་བྷ་མ་ཁེན་ཡཱ་ནས་སྐྱེས་ཡོད་ཚུལ་བརྗོད་དེ། ཨ་རའི་སྲིད་འཛིན་དུ་བཞུགས་རྒྱུར་འོས་འཚམ་མིན་ཚུལ་བརྗོད་ཡོད་འདུག