དེ་རིང་ཟླ་འདིའི་ཚེས་ ༢ ཉིན་ཨི་ཇེབ་ཀྱི་སི་ཎེ་མངའ་སྡེ་ནང་རྟེན་གཞི་བྱས་པའི་ཁ་ཆེ་དྲག་སྤྱོད་ཤོག་ཁག་གིས་ཨི་ཛི་རལ་གྱི་གྷ་ཛ་ལུང་གཤོང་དང་ས་འབྲེལ་ཡིན་པའི་ཨི་ཇེབ་ཀྱི་ཤཱེག་ཁཱ་ཛུ་ཝེ་ཌི་ (Sheikh Zuweid) གྲོང་ཁྱེར་གྱི་ཞིབ་བཤེར་ས་ཚིགས་ཤིག་ལ་གློ་བུར་འཇབ་རྒོལ་བྱས་ཏེ། ཡུལ་དམག་ ༡༥ དང་མི་སེར་ ༢ བཅས་བསད་ཡོད་སྟབས། ཨི་ཇེབ་གཞུང་གིས་གནམ་ས་གཉིས་ནས་རྒོལ་ལན་བསློགས་ཏེ་དྲག་སྤྱོད་པ་ ༤༠ ལྷག་བསད་ཡོད་འདུག
མིང་སྨྲོས་མེད་པའི་ཨི་ཇེབ་གཞུང་གི་ལས་བྱེད་ཞིག་གིས་ཨི་ཇེབ་ཀྱི་ཨལ་ཨཱ་རམ་ (Al-Ahram) ཐོག “གཞུང་དམག་གིས་གནམ་ས་གཉིས་ཐོག་ནས་དྲག་སྤྱོད་ཤོག་ཁག་ལ་འཐབ་འཛིང་བྱས་ཏེ། དྲག་སྤྱོད་ཤོག་ཁག་གི་སྤྱི་ཁྱབ་ལས་ཁུངས་ ༢༠ དང་དམག་རྒྱག་རླངས་འཁོར་ ༧ རྩ་མེད་བཟོས་ཡོད་པ་མ་ཟད། དྲག་སྤྱོད་པ་ ༥ འཛིན་བཟུང་བྱས་ཡོད། མ་འོངས་པར་ང་ཚོས་དྲག་སྤྱོད་པའི་རྟེན་གཞི་སི་ཎེ་མངའ་སྡེའི་བྱང་ཤར་ས་ཁུལ་དུ་དཔུང་འཇུག་བྱས་ནས་དྲག་སྤྱོད་པ་རྩ་མེད་བཟོ་འཆར་ཡོད་ཀྱང་། རྒྱལ་ཁབ་ཁག་གཅིག་གིས་དྲག་སྤྱོད་པར་རོགས་དངུལ་དང་མཚོན་ཆའི་རྒྱབ་སྐྱོར་བྱེད་བཞིན་ཡོད་སྟབས། དཀྱིལ་ཤར་ཡུལ་གྲུའི་དྲག་སྤྱོད་པའི་གཏོར་རྒོལ་ལས་འགུལ་དེ་མཚམས་འཇོག་བྱ་རྒྱུ་ཁག་པོ་ཆགས་ཡོད།”ཅེས་བརྗོད་འདུག
རྒྱ་གར་དུས་བབ་ཐོག་གནས་ཚུལ་སྤེལ་དོན་ལྟར་ན། ༢༠༡༡ ལོར་ཨི་ཇེབ་ནང་དཔྱིད་དུས་གསར་བརྗེ་ལངས་ཏེ། དབང་ཆ་གཅིག་སྡུད་བྱེད་མཁན་ཧོ་སེ་ཎེ་མོ་བྷ་རག་ (Hosni Mubarak) སྲིད་འཛིན་གྱི་ལས་གནས་ནས་གནས་དབྱུང་བཏང་རྗེས། ཨི་ཇེབ་ཀྱི་ས་ཁུལ་གང་སར་དྲག་སྤྱོད་བྱ་འགུལ་སྤེལ་ནས་ད་བར་ཁྱོན་མི་ ༡༨༣༥ ལྷག་བསད་ཡོད་འདུག
༢༠༡༣ ལོར་དམག་སྤྱི་ཨབ་ཌལ་ (Abdel Fattah el-Sisi) ཀྱིས་ཨི་ཇེབ་ནང་དྲག་པོའི་ཁྲིམས་གཞི་བསྡམས་ནས་སྲིད་འཛིན་མོར་སི་ (Mohamed Morsi) གནས་དབྱུང་བཏང་ཡོད་སྟབས། ཨི་ཇེབ་ཀྱི་སི་ཎེ་མངའ་སྡེ་ནང་རྟེན་གཞི་བྱས་པའི་ཁ་ཆེ་དྲག་སྤྱོད་ཤོག་ཁག་གིས་ཉེན་རྟོག་པ་དང་དམག་མིར་འཇབ་རྒོལ་བྱས་ཏེ། ད་བར་དམག་མི་དང་ཉེན་རྟོག་པ་ ༥༠༠ ལྷག་བསད་ཡོད་པ་མ་ཟད། ཟླ་ ༡ ཚེས་ ༢༩ ཉིན་མི་ ༣༠ དང་། ཟླ་འདིའི་ཚེས་ ༢ ཉིན་གྷ་ཛ་ལུང་གཤོང་འཁྲིས་ཀྱི་ཞིབ་བཤེར་ས་ཚིགས་ཤིག་ལ་གཏོར་རྒོལ་བྱས་ནས་དམག་མི་ ༡༥ དང་མི་སེར་ ༢ བསད་ཡོད་ཅེས་བཀོད་འདུག
ཨི་ཇེབ་ཀྱི་གནད་དོན་ཆེད་མཁས་པ་མཱོ་མཱ་ཋ་ཛན་ཌར་གྱིས་དབྱིན་ཡུལ་ཆ་འཕྲིན་ཐོག ཨི་ཇེབ་ཀྱི་མང་ཚོགས་ཚོས་དབྱིད་དུས་ཀྱི་གསར་བརྗེ་མཇུག་སྒྲིལ་རྗེས། ཨི་ཇེབ་གཙོས་དཀྱིལ་ཤར་ཡུལ་གྲུ་ཁག་ནང་དམག་འཁྲུག་མེད་པར་ཕན་ཚུན་འཆམ་མཐུན་ཡོང་རྒྱུའི་རེ་བ་བཅངས་ཡོད་ཀྱང་། ད་ལྟ་དེ་ལས་ལྡོག་སྟེ་དམག་འཁྲུག་དང་ཟིང་འཁྲུག་བསྟུད་མར་ལངས་བཞིན་ཡོད་སྟབས། མ་འོངས་པར་རྒྱལ་ཁབ་འཛུགས་སྐྲུན་དང་མང་ཚོགས་ཀྱི་བདེ་འཇགས་ལ་དཀའ་ངལ་ཤུགས་ཆེན་འཕྲད་རྒྱུ་ཡིན་པ་མ་ཟད། དཀྱིལ་ཤར་ཡུལ་གྲུ་དག་དྲག་སྤྱོད་པའི་འཐབ་རྭ་ཞིག་ཏུ་འགྱུར་སྲིད་པ་ཞིག་ཡིན་སྐོར་བརྗོད་འདུག
གསར་འགོད་པ། དོན་གྲུབ།
