སུད་སིའི་གྲོང་ཁྱེར་ཛུ་རིག་ཏུ་པཎ་ཆེན་རིན་པོ་ཆེ་མཆོག་དང་སྤྲུལ་སྐུ་བསྟན་འཛིན་བདེ་ལེགས་རྣམ་གཉིས་ཀློད་གྲོལ་ཡོང་ཆེད་མི་མང་རྔམ་སྟོན་ཁྲོམ་སྐོར་གྱི་ལས་འགུལ་ཞིག་སྤེལ་འདུག
ཕྱི་ཚེས་ ༧ ཉིན་ཡུ་རོབ་སུད་སིའི་གྲོང་ཁྱེར་ཛུ་རིག་ནང་། བོད་ཀྱི་མི་རབས་གསར་བའི་མཐུན་ཚོགས་ཀྱི་གོ་སྒྲིག་འོག པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྣམ་གཉིས་གཙོས་པའི་བོད་པའི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་གང་མགྱོགས་ཀློད་གྲོལ་ཡོང་དགོས་པའི་དགོས་འདུན་འོག སུད་སིའི་གྲོང་ཁྱེར་ཛུ་རིག་མེ་འཁོར་འབབ་ཚིགས་ནས་རྒྱ་ནག་གཞུང་ཚབ་ཁང་མདུན་བར་མི་མང་ཁྲོམ་སྐོར་སྐད་འབོད་ཀྱི་ལས་འགུལ་ཞིག་སྤེལ་ཡོད་འདུག ལས་འགུལ་དེའི་ནང་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་། སྤྲུལ་སྐུ་བདེན་འཛིན་བདེ་ལེགས་རིན་པོ་ཆེའི་ཚ་བོ་འཕྲིན་ལས་རྣམ་གཉིས་གཙོས། ས་གནས་བོད་རིགས་མི་མང་དང་ཕྱི་རྒྱལ་བོད་དོན་རྒྱབ་སྐྱོར་བ་སོགས་མཉམ་ཞུགས་གནང་ཡོད་འདུག
ལས་འགུལ་གོ་སྒྲིག་པའི་བསྒྲགས་གཏམ་ནང་འཁོད་པ་ལྟར་ན། རྒྱ་ནག་དམར་གཞུང་གིས་མི་ལོ་དྲུག་བཅུ་ལྷག་གི་རིང་ལ་བོད་ནང་བཙོན་ར་ལྟ་བུར་ བསྒྱུར་ཡོད་པ་དང་། ལྷག་དོན་པན་ཆེན་ཆུང་སྲིད་རིན་པོ་ཆེ་མཆོག་དང་། སྤྲུལ་སྐུ་བསྟན་འཛིན་བདེ་ལེགས་ཀྱིས་གཙོས་བོད་ནང་གི་བླ་ཆེན་ཁག་དང་། ཤེས་ཡོན་པ། གྲྭ་བ། སློབ་མ། དགེ་རྒན། མི་མང་དཀྱུས་མ་ཚུན་ཆད་ནས་རྒྱ་ནག་གཞུང་གི་སྲིད་བྱུས་ལ་ལྷག་བསམ་རྣམ་དག་གིས་ བསམ་ཚུལ་ཕུལ་བ་དང་། བོད་ཀྱི་སྐད་ཡིག་རིག་གཞུང་སོགས་ལ་བདག་སྐྱོང་གི་ལས་འགུལ་སྤེལ་བ། ཁོར་ཡུག་བདག་སྐྱོང་། སློབ་གསོའི་བྱ་འགུལ་སོགས་སྤེལ་བ་གང་ཅིར་ཆབ་སྲིད་ཀྱི་ཉེས་མིང་གཡོག་ཅིང་། རྒྱལ་ཁབ་ཁ་བྲལ་གྱི་བྱ་སྤྱོད་ལ་ངོས་འཛིན་གྱིས་ཡོད་ཚད་བཀག་སྡོམ་དང་འཛིན་བཟུང་ བཙོན་འཇུག་སོགས་བྱེད་བཞིན་པ་ནི་རྒྱལ་སྤྱིའི་ཁྲིམས་དང་འགྲོ་བ་མིའི་ཐོབ་ཐང་ གི་བསྒྲགས་ཡིག་སོགས་གང་ལའང་མི་འཚམས་པ་ཞིག་ཡིན་པ་མ་ཟད། རྒྱ་ནག་གཞུང་རང་གི་རྩ་ཁྲིམས་ཀྱི་དོན་ཚན་དང་། ས་གནས་རང་སྐྱོང་བཅའ་ཁྲིམས་གྱི་དོན་ཚན་ཁག་དང་གཏན་ནས་མི་མཐུན་པ་ཞིག་ཡིན་ལ། ཁོང་དག་གི་བྱ་སྤྱོད་གང་ལའང་རྒྱལ་སྤྱིའི་ཁྲིམས་དང་ཀྲུང་ཧ་མི་མང་སྤྱི་མཐུན་ རྒྱལ་ཁབ་ཀྱི་རྩ་ཁྲིམས་ཀྱི་དགོངས་དོན་དང་འགལ་བའི་གནས་ལུགས་ཁུངས་སྐྱེལ་གང་ཡང་ མེད་པ་གསལ་བོ་ཡིན་སྟབས། གོང་བརྗོད་ཆབ་སྲིད་བཙོན་པ་གཉིས་ཀྱིས་གཙོས་བོད་ཀྱི་ཆབ་སྲིད་བཙོན་པ་རྣམས་ཆ་ རྐྱེན་གང་ཡང་མེད་པའི་ཐོག་གློད་གྲོལ་གཏོང་དགོས། ཞེས་འཁོད་འདུག
མགོ་ལོག་འཇིགས་མེད་ལགས་ཀྱིས་གཏམ་བཤད་གནང་དོན། པཎ་ཆེན་མཆོག་སྤྲུལ་རིན་པོ་ཆེ་མཆོག་དགུང་གྲངས་དྲུག་ནས་ནང་མི་ཕ་མ་དང་བཅས་པ་གར་སོང་ཆ་མེད་གྱུར་བ་རེད། དེང་སང་གསོན་དང་གནས་ཀྱི་སྐད་ཆ་གང་ཡང་གོ་གི་ཡོད་པ་མ་རེད། དེ་ནི་བྱིས་པ་ཆུང་ཆུང་དེ་འདྲ་ཞིག་ལ་ཆབ་སྲིད་ཀྱི་ཉེས་མིང་འོག་བཀག་སྡོམ་བཙོན་ འཇུག་བྱས་པ་རེད། དེ་ནི་འཛམ་གླིང་རྒྱལ་གཞན་དག་སུ་གང་གིས་ཀྱང་བྱས་མྱོང་མེད་པའི་ཚད་བརྒལ་གྱི་བྱ་སྤྱོད་ཅིག་རེད། ཅེས་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་མཚོན་ན་རིན་པོ་ཆེ་མཆོག་གིས་བོད་ནང་ཁོར་ཡུག་སྲུང་སྐྱོབ་དང་། རིག་གནས་དར་སྤེལ་སོགས་བྱས་རྗེས་བླ་མེད་བཞག་པ་དང་། བོད་པ་རྣམས་རྡོག་རྩ་གཅིག་སྒྲིལ་གནང་དགོས་པའི་ཕྱག་ལས་རླབས་ཆེན་མང་པོ་སྐྱོང་ཡོད། ཁོང་གི་ཕྱག་ལས་ཀྱི་ཤུགས་རྐྱེན་དེ་བོད་ས་ཡོངས་རྫོགས་ལ་ཁྱབ་ཡོད་པ་མ་ཟད། དམིགས་བསལ་ཁོང་གི་ཁོར་ཡུག་སྲུང་སྐྱོབ་སོགས་ཀྱི་ཤུགས་རྐྱེན་དེ་བོད་ས་ཡོངས་ཀྱིས་ད་ལྟའང་ལག་བསྟར་བྱེད་བཞིན་པ་རེད། ཁོང་གི་ལས་རླབས་ཆེན་དེ་དག་ལ་བར་ཆད་གཏོང་རྒྱུར་ཆེད་དུ་དམིགས་ནས་འཛིན་བཟུང་གནང་བ་ཞིག་རེད།
འོན་ཀྱང་། རྒྱ་ནག་གཞུང་གིས་ཁྲིན་ཏུའུ་ནང་མའོ་ཡི་འདྲ་སྐུ་ཞིག་གས་གཏོར་བྱས་པ་དང་འབྲེལ་བ་ཡོད་ཚུལ་དང་། མི་གསོད་ཉེས་ཅན་པ་ཡིན་ཚུལ་གྱི་ཞ་མོ་གཡོག་ནས་བཙོན་འཇུག་བྱས་པ་རེད། དེ་འདྲ་བླ་མ་རྩ་ཆེན་ཞིག་དང་ནང་ཆོས་ལ་དད་པ་དང་སྦྱོང་བ་ཡོད་མཁན་ཞིག་མི་གསོད་ཉེས་ཅན་པར་ག་འདྲ་བྱས་ནས་གྱུར་བ་རེད། དེ་བོད་མི་ཚང་མས་བདེན་དཔང་བྱེད་ཐུབ་ཀྱི་རེད་ལ། ངས་ཀྱང་བདེན་དཔང་བྱེད་ཐུབ། ང་ལའང་རྒྱ་ནག་གིས་མི་གསོད་ལག་དམར་རེད་ཟེར་ནས་འཛིན་བཟུང་བྱས་པ་རེད། འདི་ནི་རྒྱ་ནག་གིས་མི་ལ་ཞ་མོ་ནག་པོ་གཡོག་སྟངས་ཞིག་ཡིན་པ་ལས། ཁོང་གིས་མི་བསད་མེད་པ་ནི་ངས་བདེན་དཔང་བྱེད་ཆོག ཅེས་སོགས་བརྗོད་སོང་།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
