བལ་བོད་བར་མེ་འཁོར་ལྕགས་ལམ་མཐུད་རྒྱུ་ཡིན།

འབྱུང་འགྱུར་ལོ་ལྔའི་ནང་བོད་ནས་བལ་ཡུལ་དང་འབྲུག་རྒྱ་གར་བཅས་སུ་མེ་འཁོར་ལྕགས་ལམ་བཟོ་སྐྲུན་འབྲེལ་མཐུད་བྱ་རྒྱུ་ཡིན་སྐོར་བརྗོད་འདུག

གཟའ་པ་སངས་ཉིན། བལ་ཡལ་ཕྱི་འབྲེལ་ལས་ཁུངས་ཀྱིས་གནས་ཚུལ་སྤེལ་པ་ལྟར་ན། ཟླ་སྔོན་མའི་ཚེས་ ༣༡ ཉིན་བལ་ཡུལ་སྲིད་འཛིན་རམ་བྷ་རན་ཡཱ་ཌཝ་ (Ram Baran Yadav) ལྷ་ས་རུ་སྐོར་སྐྱོད་བྱེད་སྐབས། བོད་རང་སྐྱོང་ལྗོངས་ཀྱི་མགོ་ཁྲིད་བློ་བཟང་རྒྱལ་མཚན་གྱིས་བལ་ཡུལ་སྲིད་འཛིན་ལ་ཐུག་འཕྲད་བྱས་ཏེ། ཁོང་གཉིས་ཀྱིས་ ༢༠༢༠ ལོའི་བར་མཚོ་བོད་མེ་འཁོར་ལྕགས་ལམ་དེ་གཞིས་ཀ་རྩེ་ནས་སྤྱི་ལེ་ ༥༤༠ སར་ཡོད་སའི་བལ་བོད་ས་མཚམས་སྐྱིད་རོང་བར་འཛུགས་སྐྲུན་བྱ་རྒྱུའི་སྐོར་ལ་གྲོས་མཐུན་བཞག་ཡོད་འདུག

ཟླ་འདི་ཚེས་ ༢ ཉིན། ཀ་ཋ་མན་ཏོའུ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་མཚོ་བོད་ལྕགས་ལམ་རྒྱ་སྐྱེད་བྱ་རྒྱུ་མོས་མཐུན་བྱས་ཏེ། ༢༠༡༤ རྒྱ་ནག་ཕྱི་འབྲེལ་ལས་ལྷན་ཁང་གི་འགན་འཛིན་ཝང་ཡཱི་ (Wang Yi) བལ་ཡུལ་ལ་སྐོར་སྐྱོད་བྱེད་སྐབས། རྒྱལ་ཁབ་གཉིས་བར་མཚོ་བོད་ལྕགས་ལམ་ས་མཚམས་སུ་འཛུགས་སྐྲུན་ལ་གྲོས་མཐུན་བྱུང་ཡོད་ཀྱང་། སྐབས་དེར་བལ་ཡུལ་ཕྱོགས་ནས་ལྕགས་ལམ་འཛུགས་སྐྲུན་ཐད་ཉམས་ཞིབ་བྱ་དགོས་ཀྱི་ཡོད་པ་དང་། ད་རེབ་དངོས་སུ་གྲོས་མཐུན་མིང་རྟགས་བཀོད་པ་དེ་ནི། འབྱུང་གྱུར་བལ་བོད་བར་ལྕགས་ལམ་གྱི་ཚོང་འབྲེལ་དང་ཡུལ་སྐོར་སྤྲོ་འཆམ་པའི་ལམ་ཆེན་ཞིག་སྒོ་འབྱེད་རྒྱུ་ཡིན་པ་སོགས་བརྗོད་འདུག

ཟླ་འདིའི་ཚེས་ ༣ ཉིན་རྒྱ་ནག་གི་ “aastocks” དྲ་བའི་སྟེང་། རྒྱ་ནག་གི་ད་ལྟའི་རྒྱལ་སྤྱིའི་འབྲེལ་ལམ་ཞིབ་འཇུག་ཁང་གི་ལྷོ་ཤར་ཨེ་ཤ་ཡ་ཞིབ་འཇུག་ཁང་གི་མགོ་གཙོ་ཧུའུ་ཧྲི་ཧྲིན་ (Hushi Sheng) གྱིས། འབྱུང་གྱུར་གཞིས་ཀ་རྩེ་ནས་བལ་ཡུལ་མཐའ་མཚམས་བར་ལྕགས་ལམ་གཉིས་འཛུགས་པའི་རེ་བ་སྟེ། “རྒྱུད་གཅིག་ལམ་གཅིག” གི་འཐབ་ཇུས་ཀྱི་གྲུབ་ཆ་ཞིག་ཆགས་ཡོད་པ་དང་། བོད་ནི་རྒྱ་ནག་ལྷོ་ནུབ་དང་ལྷོ་ཨེ་ཤ་ཡ་ས་ཁུལ་སོགས་ཀྱི་སྒོ་མོ་ཞིག་ཆགས་ཡོད་སྟབས། ལྷོ་ཨེ་ཤ་ཡའི་ལྕགས་ལམ་མངོན་གྱུར་འབྱུང་པ་ཡིན་ན་བོད་ཀྱི་ཡུལ་སྐོར་སྤྲོ་འཆམ་ལས་རིགས་དང་། ཞབས་འདེགས་ལས་རིགས་སོགས་འཕེལ་རྒྱས་འགྲོ་རྒྱུར་ནུས་པ་གལ་ཆེན་འཐོན་ངེས་རེད། ཅེས་བརྗོད་འདུག

སྔར་ལོའི་ཕྱི་ཟླ་ ༧ པའི་ནང་། རྒྱ་ནག་མི་དམངས་ཉིན་རེ་ཚགས་པར་གྱིས་གནས་ཚུལ་སྤེལ་བའི་ནང་། རྒྱ་ནག་གཞུང་གི་འཆར་གཞི་ལྟར་ན་ ༢༠༢༠ ལོའི་ནང་མཚོ་བོད་མཐོ་སྒང་གི་ལྕགས་ལམ་རྒྱ་གར་དང་བལ་ཡུལ། འབྲུག་བཅས་ཀྱི་མཐའ་མཚམས་སུ་བཟོ་སྐྲུན་བྱ་རྒྱུའི་ཁྲོད། བོད་རང་སྐྱོང་ལྗོངས་ལྕགས་ལམ་གཞུང་སྒྲུབ་ཁང་གི་མགོ་གཙོ་གཞོན་པ་ཡཱང་ཡོ་ལིན་ (Yang Yulin) གྱིས། གཞིས་ཀ་རྩེ་མེ་འཁོར་ས་ཚིགས་ནས་མགོ་བཙུགས་ཏེ་ལྕགས་ལམ་ཁག་གཉིས་སུ་གྱེས་ཏེ་བཟོ་འཆར་ཡོད་པ་དང་། དེ་གཉིས་ལས་གཅིག་རྒྱ་གར་དང་འབྲུག་གི་ས་མཚམས་གྲོ་མོ་བར་འཛུགས་སྐྲུན་བྱ་རྒྱུ་དང་། གཞན་དེ་བལ་བོད་ས་མཚམས་སྐྱེད་རོང་བར་འཛུགས་སྐྲུན་བྱ་རྒྱུ་ཡིན་སྐོར་སོགས་བརྗོད་འདུག

གསར་འགོད་པ། འཇིགས་མེད་རྒྱ་མཚོ།