ཁ་སང་ཨ་རིའི་གཞུང་གིས་གྲོས་ཚོགས་ཀྱི་རྒྱབ་སྐྱོར་འཐོབ་ཚེ་པ་ཀི་སི་ཐན་དང་ཨ་སྒོར་ཐེར་འབུམ་གཅིག་མ་ཟིན་ཙམ་གྱི་དམག་དོན་གྲོས་མཐུན་འཇོག་རྒྱུ་ཡིན་སྐོར་བརྗོད་འདུག
ཁ་སང་ཨ་རིའི་གཞུང་གིས་ད་རེབ་གྲོས་ཚོགས་ཀྱིས་པ་ཀི་སི་ཐན་དང་ཨ་རིའི་བར་གྱི་དམག་དོན་གྲོས་འཆར་ལ་རྒྱབ་སྐྱོར་འཐོབ་ཚེ། པ་ཀི་སི་ཐན་ལ་ཨ་སྒོར་ཐེར་འབུམ་གཅིག་མ་ཟིན་ཙམ་གྱི་དམག་དོན་གྲོས་མཐུན་བཞག་སྟེ། དམག་རྒྱག་གནམ་གྲུ་དང་མཚོན་ཆ་ཁག་ཅིག་ཕྱིར་ཚོང་བྱས་ཏེ། པ་ཀི་སི་ཐན་གྱི་འཇིགས་སྐུལ་རིང་ལུགས་པར་ཁ་གཏད་གཅོག་རྒྱུ་ཡིན་སྐོར་བསྒྲགས་འདུག
ཨ་རིའི་བདེ་སྲུང་མཉམ་འབྲེལ་ཚོགས་པས་(DSCA) རྒྱལ་སྤྱིའི་དཔལ་འབྱོར་དུས་བབ་ཐོག “ཨ་རིའི་གཞུང་གིས་པ་ཀི་སི་ཐན་དང་ཨ་སྒོར་ས་ཡ་ ༩༥༢ ཀྱི་དམག་དོན་གྲོས་མཐུན་ཞིག་བཞག་སྟེ། པ་ཀི་སི་ཐན་ལ་ཨ་རིའི་དམག་རྒྱག་ཐད་འཕུར་གནམ་གྲུ་ (AH-1) རྟགས་ཅན་ ༡༥ དང་། (Hellfire) ཞེས་པའི་སྒྱོགས་མདེལ་ ༡༠༠༠། དེང་རབས་ཅན་གྱི་དམག་བཀོལ་འཕྲུལ་ཆས་དང་ཕྱོགས་སྟོན་མཁོ་ཆས་ཁག་ཅིག་འཚོང་རྒྱུ་ཡིན། ཐད་འཕུར་གནམ་གྲུ་དང་དམག་དོན་བཀོལ་སྤྱོད་འཕྲུལ་ཆས་དེ་དག་ནི་འཇིགས་སྐུལ་རིང་ལུགས་པ་དང་། དྲག་སྤྱོད་ཤོག་ཁག་ལ་ཆེད་མངགས་དམིགས་ནས་བཟོས་པ་ཞིག་ཡིན་པ་མ་ཟད། ལྷག་པར་དུ་ཨབ་གྷན་ས་མཚམས་རི་རྒྱུད་དུ་ཡིབ་སྡོད་བྱེད་མཁན་ཋ་ལི་བྷན་དྲག་སྤྱོད་ཤོག་ཁག་ལ་གདོང་ལེན་བྱ་ཆེད་བཟོས་པ་ཞིག་རེད།”ཅེས་བརྗོད་འདུག
དབྱིན་ཡུལ་ཆ་འཕྲིན་དང་རྒྱ་གར་ཧིན་རྡུ་དུས་བབ་ཐོག་གནས་ཚུལ་སྤེལ་དོན་ལྟར་ན། ལོ་ཤས་གོང་ནས་བཟུང་པ་ཀི་སི་ཐན་ལ་ཋ་ལི་བྷན་དྲག་སྤྱོད་ཤོག་ཁག་དང་། ཨི་རན་དང་ས་འབྲེལ་ཡིན་པའི་ཁ་བྲལ་རིང་ལུགས་པ་ཚོས་གཏོར་རྒོལ་དང་མི་གསོད་ཁྲག་སྦྱོར་བྱས་ཏེ། ད་བར་གཞུང་དམག་དང་ཉེས་མེད་མི་སེར་ ༦༢༥༡ ལྷག་བསད་ཡོད་པ་མ་ཟད། ལྷག་པར་དུ་རྒྱལ་ཁབ་ཀྱི་བརྟན་ལྷིང་དང་མང་ཚོགས་ཀྱི་བདེ་འཇགས་གཏོར་བརླག་བཏང་སྟེ། རྒྱལ་ནང་ལ་དཀའ་ངལ་ཤུགས་ཆེན་འཕྲད་བཞིན་ཡོད་སྟབས། ལོ་རེའི་སྔོན་རྩིས་ནས་ཨ་སྒོར་ཐེར་འབུམ་ ༧ དམག་དོན་དང་ཉེན་རྟོག་པའི་འགོག་སྲུང་ཐོག་གཏོང་གི་ཡོད། ༢༠༡༠ ནས་ ༢༠༡༤ ལོའི་བར་པ་ཀི་སི་ཐན་གྱིས་དམག་དོན་མཚོན་ཆ་དང་འཕྲུལ་ཆས་བརྒྱ་ཆ་ ༥༠ ཙམ་རྒྱ་ནག་ནས་ནང་འདྲེན་བྱས་ཡོད་པ་མ་ཟད། ཟླ་རྗེས་མའི་ནང་ཨ་སྒོར་ཐེར་འབུམ་ ༤ ནས་ ༥ བར་སྤྲད་དེ་བྱིངས་གྲུ་ ༨ ཉོ་རྒྱུའི་གྲོས་ཆོད་བཞག་ཡོད། ད་ཐེངས་ཨ་རིའི་གྲོས་ཚོགས་ཀྱིས་རྒྱབ་སྐྱོར་འཐོབ་ཚེ་ཨ་རི་དང་ཨ་སྒོར་ས་ཡ་ ༩༠༠ ལྷག་གི་དམག་དོན་གྲོས་མཐུན་འཇོག་རྒྱུ་ཡིན་ཞེས་བཀོད་འདུག
དེ་རིང་ཨ་རིའི་བདེ་སྲུང་མཉམ་འབྲེལ་ཚོགས་པས་བསྒྲགས་གཏམ་སྤེལ་བའི་ནང་། “ད་ཐེངས་ཀྱི་དམག་དོན་གྲོས་འཆར་འདིས་ཨ་རིའི་ལྷོ་ཤར་ཨེ་ཤ་ཡའི་ཕྱི་སྲིད་དང་རྒྱལ་སྲུང་བདེ་འཇགས་ལ་ལེགས་སྐྱེས་ཆེན་པོ་ཞིག་འབུལ་རྒྱུ་ཡིན་པ་མ་ཟད། པ་ཀི་སི་ཐན་གཞུང་ལའང་ཝ་ཛི་རི་ཐན་མངའ་སྡེའི་ནུབ་ཁུལ་དང་གྲང་ངར་ཆེ་ཞིང་ས་འབབ་མཐོ་བའི་རི་ཁུལ་གྱི་ཁ་བྲལ་རིང་ལུགས་པ་ཚོར་རྒོལ་ལན་སློག་རྒྱུར་ཕན་ཐོགས་ཆེན་པོ་ཡོད། ཨ་རིས་པ་ཀི་སི་ཐན་ལ་དམག་དོན་མཚོན་ཆ་ཕྱིར་ཚོང་བྱ་འཆར་ཡོད་པ་དེས། མ་འོངས་པར་ཨེ་ཤ་ཡའི་མངའ་ཁུལ་གྱི་བརྟན་ལྷིང་དང་དམག་དོན་དོ་སྙོམ་ལ་འགྱུར་བ་གང་ཡང་ཐེབས་མི་སྲིད།”ཅེས་སོགས་བཀོད་འདུག
ཨོ་སི་ཌོ་ལི་ཡའི་པ་ཀི་སི་ཐན་གྱི་དམག་དོན་ལས་བྱེད་པ་དང་རྩོམ་པ་པོ་བྷེན་ཁཱོ་ལི་ (Brian Cloughley) ཡིས་བདེ་སྲུང་གསར་འཕྲིན (Defense News) ཞེས་པའི་ཐོག “པ་ཀི་སི་ཐན་ལ་གྲོས་མཐུན་དེ་གལ་ཆེན་པོ་གཉིས་ཆགས་ཡོད་པ་ནི། གཅིག་ནས་པ་ཀི་སི་ཐན་ལ་འཛམ་གླིང་ཐོག་གི་དམག་རྒྱག་ཐད་འཕུར་གནམ་གྲུ་རྩེ་ཕུད་ཁག་ཅིག་རག་པ་དང་། གཉིས་ནས་རྒྱལ་སྤྱིའི་མང་ཚོགས་ཀྱིས་ཨ་རིས་པ་ཀི་སི་ཐན་བསྐྱུར་བ་རེད་ཟེར་བ་དེ་བསྐྱུར་མེད་པ་ར་སྤྲོད་བྱས་པ་རེད། ཡིན་ཡང་གལ་སྲིད་ཨ་རིའི་གྲོས་ཚོགས་ཀྱིས་གྲོས་འཆར་དེར་བཀག་འགོག་བྱས་ནས་གྲོས་མཐུན་འཇོག་མ་ཐུབ་ཚེ། ཨ་རིས་འཇིགས་སྐུལ་རིང་ལུགས་པར་ཁ་གཏད་གཅོག་དགོས་སྐོར་ཟེར་བ་དེ་རྫུན་གཏམ་ཆགས་ཀྱི་རེད”ཅེས་བརྗོད་འདུག
པ་ཀི་སི་ཐན་གྱི་དམག་དོན་ཆེད་མཁས་པ་ཧཱ་རེ་སེ་ཁཱན་ (Haris Khan) གྱིས་པ་ཀི་སི་ཐན་གྱི་སྐྱ་རེངས་ཐོག དམག་དོན་གྲོས་འཆར་དེ་གཞི་རྒྱ་ཆེན་པོ་མེད་ཀྱང་། སྦྲུལ་དུག་པ་ཅན་ཝེ་པར་ (Vipers) གྱིས་ཉུང་མཐར་དུག་སྦྲུལ་གདེངས་ཀ་ཅན་ཀོབ་ར་ (Cobra) ཁག་ཅིག་བརྗེ་པོ་ཐུབ་རྒྱུ་མ་ཟད། དེ་ནི་རྒྱ་ནག་གིས་པ་ཀི་སི་ཐན་ལ་དམག་རྒྱག་ཐད་འཕུར་གནམ་གྲུ་ (WZ-10) རྟགས་ཅན་གསུམ་དང་། ཨུ་རུ་སུས་ (Mi-35 Hinds) རྟགས་ཅན་ ༢༠ ལྷག་ཕྱིར་ཚོང་བྱ་རྒྱུའི་ཐག་གཅོད་བྱས་རྗེས་བྱུང་བ་ཞིག་ཡིན་སྟབས། མ་འོངས་པར་པ་ཀི་སི་ཐན་གྱི་གོ་མཚོན་འཕེལ་རྒྱས་དང་། སྟོབས་ཆེན་རྒྱལ་ཁབ་གསུམ་དབར་འགྲན་རྩོད་ཞིག་ཀྱང་ཡོང་གི་ཡོད་པ་གསལ་བཤད་བྱས་པ་རེད་ཅེས་བརྗོད་འདུག
གསར་འགོད་པ། དོན་གྲུབ།
