རྩ་ཁྲིམས་བསྐྱར་བཅོས་ཀྱི་དགོས་འདུན།

འབར་མའི་དམངས་གཙོ་དོན་གཉེར་བ་ལྕམ་ཨན་སང་སུ་ཁེ་མཆོག་གིས་སྲིད་འཛིན་གཙོས་མཐོ་རིམ་དཔོན་རིགས་ཁག་ལ་ཐུག་ནས་རྩ་ཁྲིམས་དང་འོས་བསྡུའི་སྒྲིག་གཞི་ཁག་གཅིག་བསྐྱར་བཅོས་བྱེད་དགོས་པའི་དགོས་འདུན་བཏོན་འདུག

དེ་རིང་འབར་མའི་རྒྱལ་སའི་སྲིད་འཛིན་ལས་ཁུངས་སུ། ཕྱོགས་འགལ་རྒྱལ་ཡོངས་དམངས་གཙོ་ཚོགས་པའི་ཚོགས་གཙོ་དང་ནོ་བྷེལ་ཞི་བདེ་གཟེངས་རྟགས་བཞེས་མཁན་ལྕམ་ཨན་སང་སུ་ཁེ་མཆོག་གིས་སྲིད་འཛིན་ཋན་སན་ (Thein Sein) དང་དམག་སྤྱི་མེང་ཨན་ (Min Aung Hlaing) གཙོས། གྲོས་ཚོགས་གོང་འོག་གཉིས་ཀྱི་ཚོགས་གཙོ་དང་གྲངས་ཉུང་མི་རིགས་ཀྱི་སྐུ་ཚབ་ཨཱ་ཡེ་མང་ (Aye Maung) བཅས་ཐུག་སྟེ། ཟླ་རྗེས་མའི་རྒྱལ་ཡོངས་སྲིད་འཛིན་འོས་བསྡུ་དྲང་བདེན་ཕྱོགས་ལྷུང་མེད་པ་ཡག་པོ་ཞིག་ཡོང་ཆེད། ད་ལྟ་གྲངས་ཉུང་མི་རིགས་དང་ཕྱོགས་འགལ་དམངས་གཙོ་ཚོགས་པར་རྩ་ཁྲིམས་དང་། འོས་བསྡུའི་སྒྲིག་གཞི་ཁག་གཅིག་ཐོག་གྱོང་རག་བཞིན་པ་དག་ལ་བསྐྱར་ཞིབ་བྱས་ཏེ་ཐག་གཅོད་བྱེད་དགོས་པའི་གྲོས་མོལ་གནང་ཡོད་འདུག

ལྕམ་ཨན་སང་སུ་ཁེ་མཆོག་གིས་ཉིན་རེའི་གསར་འཕྲིན་ (Daily Journal) ཐོག “ད་ཐེངས་གྲོས་མོལ་འདི་ནི་རྒྱལ་ཡོངས་སྲིད་འཛིན་འོས་བསྡུ་དྲང་བདེན་དང་ཚགས་ཚུད་ཡོང་ཆེད་བྱས་པ་ཞིག་ཡིན་སྟབས། འདི་བརྒྱུད་ནས་མ་འོངས་པར་རྩ་ཁྲིམས་དང་འོས་བསྡུའི་སྒྲིག་གཞི་ཁག་གཅིག་བསྐྱར་བཅོས་བྱེད་ཐུབ་ཚེ། གཞུང་འཛིན་དང་ཕྱོགས་འགལ་ཚོགས་པར་ཕན་ཐོགས་ཆེན་པོ་ཡོང་རྒྱུ་རེད། གང་ཡིན་ཟེར་ན། ཟླ་རྗེས་མའི་རྒྱལ་ཡོངས་འོས་བསྡུ་དེ་ནི་ ༢༠༡༠ ལོ་དང་མི་འདྲ་བ་ཆགས་ཡོད་སྟབས། ང་ཚོས་རེ་བ་བརྒྱབ་པ་ལྟར་ཡོང་བའི་ཡིད་ཆེས་བྱེད་བཞིན་ཡོད།”ཅེས་དང་། གྲངས་ཉུང་མི་རིགས་ཀྱི་སྐུ་ཚབ་ཨཱ་ཡེ་མང་གིས། “གྲོས་མོལ་འདིས་ཕྱོགས་ཕན་ཚུན་བསམ་ཤེས་བྱས་ཏེ། མི་རིང་བར་རྩ་ཁྲིམས་བསྐྱར་བཅོས་ཀྱི་གྲོས་མཐུན་ཞིག་འཇོག་རྒྱུར་རེ་བ་རྒྱག་བཞིན་ཡོད་ཀྱང་། གལ་སྲིད་ང་ཚོའི་མངོན་འདོད་མ་འགྲུབ་ཚེ་དུས་ཐོག་འོས་བསྡུ་བྱ་རྒྱུ་ཁག་པོ་ཆགས་ཡོད”ཅེས་བརྗོད་འདུག

ཨེ་ཕེ་(AP News)གསར་ལམ་ཐོག་གནས་ཚུལ་སྤེལ་དོན་ལྟར་ན། ༡༩༦༢ ལོ་ནས་བཟུང་འབར་མ་ནང་བསྟུད་མར་ནང་འཁྲུག་ལངས་ཏེ། དམག་མིས་རྒྱལ་ཡོངས་ནང་དྲག་པོའི་ཁྲིམས་གཞི་བསྡམས་ནས་དབང་ཆ་བཟུང་རྗེས། མང་ཚོགས་ཀྱི་འགྲོ་འདུག་སྤྱོད་གསུམ་ལ་དམ་དྲག་དང་འབྲེལ་མི་སྤྱོད་ལས་འདས་པའི་མནར་གཅོད་མྱོང་དགོས་བྱུང་ཡོད་སྟབས། འབར་མའི་ནང་པའི་དགེ་འདུན་པ་ཚོས་སྣེ་འཁྲིད་དེ། རྒྱལ་ཡོངས་ནང་མི་གཅིག་དབང་སྒྱུར་རིང་ལུགས་གཏོར་ཕམ་བཏང་ནས་དམངས་གཙོའི་ལམ་ ལུགས་གཏོད་དགོས་པའི་ངོ་རྒོལ་རིམ་པ་བྱས་པ་བརྒྱུད། དམག་མི་དང་མི་སེར་བར་ནང་དམེ་ཤོར་ནས་མི་༣༠༠༠ ལྷག་བསད་ཡོད་སྟབས། རྒྱལ་སྤྱིའི་སྒྲིག་འཛུགས་ཀྱིས་དམག་སྤྱི་ཋན་སན་ལ་གནོན་ཤུགས་སྤྲད་དེ། རྩ་ཁྲིམས་གསར་བཟོ་བྱས་ནས་དམངས་གཙོའི་ལམ་ལུགས་ཐོག་བསྐྱོད་དགོས་པའི་བརྒྱུད་སྐུལ་བྱས་ཡོད། ༢༠༠༨ ལོར་དམག་མིའི་གཞུང་གིས་རྩ་ཁྲིམས་ཤིག་བཟོས་ཡོད་ཀྱང་། དམངས་གཙོ་དོན་གཉེར་བ་ལྕམ་ཨན་སང་སུ་ཁེ་མཆོག་གི་བུ་ཕྲུག་ཕྱི་རྒྱལ་གྱི་མི་སེར་ཡིན་སྟབས། ཁོ་མོ་སྲིད་འཛིན་གྱི་འོས་མིར་ཞུགས་མི་ཆོག་ཚུལ་བརྗོད་ཡོད། ༢༠༡༠ ལོའི་རྒྱལ་ཡོངས་སྲིད་འཛིན་འོས་བསྡུ་སྐབས་ལྕམ་ཨན་སང་སུ་ཁེ་ཡི་རྒྱལ་ཡོངས་དམངས་གཙོ་ཚོགས་པས། དམག་སྤྱི་ཋན་སན་གྱི་རྒྱལ་ཡོངས་ཆིག་སྒྲིལ་ཡར་རྒྱས་ཚོགས་པ་ཕམ་ཉེས་བཏང་སྟེ་རྒྱལ་ཁ་ཐོབ་རྒྱུའི་རེ་བ་ཡོད་ཀྱང་། ཁྲིམས་ཐོག་ནས་ལྕམ་ཨན་སན་སུ་ཁེ་མཆོག་སྲིད་འཛིན་བྱ་རྒྱུ་མེད་སྟབས། འོས་བསྡུར་ངོ་རྒོལ་དང་འབྲེལ་མཉམ་ཞུགས་བྱས་མེད། ༢༠༡༢ ལོར་འོས་བསྡུའི་སྒྲིག་གཞི་ཁག་གཅིག་བསྐྱར་བཅོས་བྱས་སྟབས་གྲོས་ཚོགས་འཐུས་མིའི་ཁ་སྐོང་འོས་བསྡུར་ (by-election) ཞུགས་ཏེ། གྲོས་ཚོགས་འཐུས་མིའི་རྐུབ་སྟེགས་ ༤༤ ཡོད་ཁོངས་ནས་ ༤༣ ཐོབ་ཡོད་ཅེས་བཀོད་འདུག

འབར་མའི་གནད་དོན་ཆེད་མཁས་པ་ཋན་སུང་ཨན་གྱིས་འབར་མའི་དུས་བབ་ཐོག ད་ཐེངས་གྲོས་མོལ་འདི་བརྒྱུད་རྩ་ཁྲིམས་དང་འོས་བསྡུའི་སྒྲིག་གཞི་བསྐྱར་བཅོས་ བྱེད་མ་ཐུབ་ཚེ། ཟླ་རྗེས་མར་རྒྱལ་ཡོངས་སྲིད་འཛིན་འོས་བསྡུ་བྱེད་ཁག་པོ་ཡིན་པ་མ་ཟད་ཟིང་འཁྲུག་ཀྱང་ལངས་སྲིད་པ་ཞིག་ཡིན་སྟབས། ད་ལྟ་གང་བྱེད་དགོས་མིན་མཐོ་རིམ་དཔོན་རིགས་ཚོས་བསམ་བློ་གཏོང་དགོས་པ་ཆགས་ཡོད་ཅེས་བརྗོད་འདུག

གསར་འགོད་པ། དོན་གྲུབ།