ཀྲུའུ་ཡོང་ཁཱང་གིས་ཞུ་བ་བྱས།

ཕྱི་ཕྱོགས་ཀྱི་གསར་ལམ་ཁག་ཏུ་ཀྲུའུ་ཡོན་ཁཱང་ལ་སྔ་རྗེས་ཐེངས་ཉེར་བདུན་ཙམ་ལ་འདྲི་གཅོད་བྱས་ཡོད་པ་དང་། ཁོས་རང་སྲོག་ཆད་མི་ཡོང་ཐབས་ལ་ཐེངས་བདུན་ཙམ་ལ་པུས་མོ་སར་བཙུགས་ཏེ་ཞུ་བ་བྱས་ཡོད་སྐོར་བཀོད་འདུག

ཁ་སང་ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཉིན་འགའི་སྔོན་གྱི་ཧོང་ཀོང་གི་དུས་དེབ་ཅིག་གི་སྟེང་དུ་༼ཀྲུའུ་ཡོན་ཁཱང་གིས་ཉེས་པ་ངོས་ལེན་བྱས་ཏེ་སྲོག་ཁྲིམས་གུ་ཡངས་གཏོང་བའི་ཞུ་བ༽ ཞེས་པའི་རྩོམ་ཞིག་བཀོད་ཡོད་པའི་ནང་གི་གནས་ཚུལ་འདྲེན་བཀོད་བྱས་པའི་ནང་། ཕྱི་ཟླ་ ༤ ཚེས་ ༡ ཉིན་གྱི་དགོང་མོར་ཀྲུའུ་ཡོན་ཁཱང་པེ་ཅིན་ནས་ཐན་ཅིན་དམག་དོན་གཞུང་སྒྲུབ་ཁང་གི་སྣེ་ལེན་ཁང་དུ་བཙོན་བཅུག་གནས་སྤོར་བྱས་སྐབས། ཁོ་ལ་འདྲི་གཅོད་མ་བྱས་སྔོན་ལ་ལྟ་རྟོག་བྱེད་མཁན་དེར་ཁོས། ཁྲིམས་ཐག་གཅོད་རྒྱུ། མགྱོགས་པོ་རེད། མགྱོགས་པོ་རེད། ཅེས་བརྗོད་ཡོད་འདུག

ཀྲུའུ་ཡོན་ཁཱང་ཆེས་མཐའ་མཇུག་ཕྱི་ལ་ཐོན་པ་ནི་ ༢༠༡༣ ལོའི་ཟླ་ ༡༠ ཚེས་ ༡ ཉིན་ཁོའི་མ་ཡུམ་སློབ་གྲྭའམ་རྒྱ་ནག་རྡོ་སྣུམ་སློབ་ཆེན་གྱི་མཛད་སྒོའི་སྟེང་ཞུགས་པ་དེ་ཡིན་པ་དང་། སྐབས་དེའི་ཀྲུའུ་ཡོན་ཁཱང་གི་གཏམ་བཤད་ནང་། དེ་རེབ་ཀྱི་འདི་ནི་ཕལ་ཆེར་མ་ཡུམ་སློབ་གྲྭ་ཕྱིར་ཡོང་ནས་ཚང་མ་ཐུག་འཕྲད་བྱས་པ་མཐའ་མ་དེ་ཡིན་སྲིད། ཅེས་བརྗོད་ཡོད་འདུག དེའི་དགོང་མོར་ཀྲུའུ་ཡོན་ཁཱང་དང་རོགས་པ་ ༢༠ ལྷག་གིས་ཨ་རག་འཐུང་རྗེས་ཡང་བསྐྱར་ཕྱིར་ཅིན་ལིན་ (JingLing) སྒེར་གྱི་སྤྲོ་ཚོམས་ཁང་དུ་ཕྱིན་ཏེ། རང་ཉིད་ཀྱི་གཟུགས་པོར་དོ་སྣང་མ་སྤྲད་པར་རྗེས་སུ་ནད་གཞི་ཕོག་སྟེ་དམག་མིའི་སྨན་ཁང་ནས་ཉིན་གསུམ་སྡོད་དགོས་བྱུང་པ་དང་། ཟླ་དེའི་ཟླ་དཀྱུལ་བར་ཁོ་ལ་འགྲོ་འདུག་དང་བྱ་འགུལ་ལ་ཚོད་འཛིན་བྱས་ཏེ་བཀག་ཉར་འོག་བཞག་ཡོད་འདུག རྗེས་སུ་ ༢༠༡༤ ལོའི་ཟླ་ ༧ ཚེས་ ༢༩ ཉིན་གྱོད་དོན་ཞིབ་བཤེར་དང་། ཕྱི་ཟླ་ ༡༢ ཚེས་ ༥ ཉིན་ཁྲིམས་འཛིན་ལྷན་ཁང་གིས་དངོས་སུ་འཛིན་བཟུང་ཁྱབ་བསྒྲགས། ད་ལོའི་ཕྱི་ཟླ་ ༤ ཚེས་ ༣ ལ་ཞུ་གཏུག་སོགས་བྱས་ཡོད་པ་རེད།

ཀྲུའུ་ཡོན་ཁཱང་གི་གྱོད་དོན་ལ་ཞིབ་བཤེར་ནས་ཞུ་གཏུག་བར་གྱི་ཟླ་ ༩ ཡི་རིང་ཁོས་ནུས་ཤུགས་ཡོད་ཚད་ཀྱིས་འཕག་འཚག་མང་པོ་བརྒྱབས་ཏེ། ཟས་བཅད་ངོ་རྒོལ་བྱས་པ་དང་རང་སྲོག་གཅོད་རྩིས་བྱས་པ། འཛིན་བཟུང་ཡི་གེ་སྟེང་མིང་རྟགས་མ་བཀོད་པ་དང་། བར་སྐབས་ཞིག་ཁོར་སྙིང་གཞི་ཕོག་པའི་འཁྲབ་སྟོན་མང་པོ་བྱས་ཡོད་ཀྱང་། མཇུག་མཐར་ཁོས་ཞུ་བ་བྱས་ཏེ་ཚེ་སྲོག་སྲུང་སྐྱོབ་བྱ་རྒྱུ་དེ་བདམས་ཡོད་འདུག  

ཧོང་ཀོང་གི་བརྒྱུད་ལམ་ཞིག་གིས་གནས་ཚུལ་སྤེལ་པ་ལྟར་ན། ཕྱི་ཟླ་ ༡ པའི་ཚེས་ ༡༩ ཉིན་ནས་ཕྱི་ཟླ་ ༣ པའི་ཟླ་སྟོད་བར་ཀྲུའུ་ཡོན་ཁཱང་ལ་འདྲི་གཅོད་ཐེངས་ ༢༧ ཙམ་བྱས་ཡོད་པ་དང་། འདྲི་གཅོད་ཀྱི་ཆུ་ཚོད་ ༡༡༢ བྱས་པའི་རིང་ཀྲུའུ་ཡོན་ཁཱང་ལ་གྱོད་དོན་ ༢༢ ཙམ་རྩིས་སྤྲོད་བྱས་ཡོད་པ་དང་། གྱོད་དོན་དེ་དག་ལ་བདེན་དཔང་ཡོད་པ་རྐྱང་རྐྱང་ཡིན་སྟབས། གལ་སྲིད་ཁྲིམས་ལྟར་ཐག་གཅོད་བྱས་ན་ཀྲུའུ་ཡོན་ཁཱང་ལ་ཚེ་བཙོན་དང་། ཡང་ན་སྲོག་ཆད་གཏོང་རྒྱུ་ལས་ལམ་ཁ་གཞན་མེད་པ་ཆགས་ཡོད་འདུག ཀྲུའུ་ཡོན་ཁཱང་གིས་ཀྱང་ཁོ་རང་ཉིད་ལ་སྲོག་ཁྲིམས་འབབ་པ་ཚོར་ཏེ། རྒྱ་ནག་ཆེ་མཐོའི་ཞིབ་བཤེར་ལྷན་ཁང་གི་འགན་འཛིན་གཞོན་པ་ཧོ་ཙི་ཅོན་ (Hu zejun) གྱིས་འདྲི་གཅོད་བྱེད་སྐབས་ཁོས་ཐེངས་ ༧ ལ་པུས་མོ་སར་བཙུགས་ཏེ་སྲོག་ཁྲིམས་གུ་ཡངས་ཡོང་བའི་ཞུ་བ་བྱས་འདུག ཅེས་བརྗོད་འདུག

ཧོང་ཀོང་ཤར་ཕྱོགས་ཉིན་རེ་གསར་ཁང་གིས་གཞན་གྱི་དཔྱད་བརྗོད་ལུང་འདྲེན་བྱས་པ་ལྟར་ན། པའོ་ཞི་ལེ་ཡིས་དབང་ཆ་སྒེར་སྤྱོད་ཚབས་ཆེན་བྱས་སྟབས་ཚེ་བཙོན་བྱས་ཡོད་པ་དང་། ཀྲུའུ་ཡོན་ཁཱང་གི་གྱོད་དོན་ཞུ་གཏུག་ཐེངས་གཉིས་གླེང་སྐབས་ “གནས་སྟངས་ཚབས་ཆེན་” གླེང་ཡོད་པ་དེས་ཀྲུའུ་ཡོན་ཁཱང་གི་གྱོད་དོན་པའོ་ཞི་ལེ་དང་སྡུར་ན་ཧ་ཅང་ཚབས་ཆེན་ཡིན་པ་མཚོན་ཐུབ་པ་དང་། ཕལ་ཆེར་ཀྲུའུ་ཡོན་ཁཱང་ལ་སྲོག་ཆད་གཏོང་སྲིད། ཅེས་བརྗོད་འདུག